Ginapamatian Mo Baea ro mga Paandam?

1. Ano ro paghukom nga maeapit eon matabo?

NAGAKABUHI kita sa panahon nga abung pagbag-o ro nagakatabo! Sa indi magbuhay, hukman ni Jesus ro tanan nga tawo sa eugta. Ginsugid na ro panahon kon hin-uno matabo rayang paghukom paagi sa pagsugid it mga “paeatandaan” sa anang mga disipulo ku anang indi makita nga pag-abot ag ku “katapusan it kalibutan” o sistema it mga bagay. (Mat. 24:3) Raya nga hula hay nakasueat sa Mateo kapitulo 24 ag 25, Marcos kapitulo 13 ag Lucas kapitulo 21.

2. Ano ro pagatalakayon naton sa rayang artikulo, ag ham-an makabulig ra katon?

² Nagtao si Jesus it paandam nga makabulig katon paagi sa tatlong parabula. Rayang mga parabula hay parti sa mga karnero ag mga kanding, maaeam ag buko’t maaeam nga mga birhen, ag mga talanton. Mabuligan kita kara nga maeubtan nga ro atong mga ginaobra hay may epekto sa kon paano kita hukman. Habang ginatalakay naton rayang mga parabula, tun-an naton ro mga leksyon ag kon paano naton ra maaplikar. Pagatalakayon naton ro unang parabula parti sa mga karnero ag mga kanding.

RO MGA KARNERO AG RO MGA KANDING

3. Hin-uno pagahukman ni Jesus ro mga tawo?

³ Sa parabula it mga karnero ag mga kanding, ginsugid ni Jesus ro parti sa paghukom sa mga tawo nga may tsansa nga magbaton it mayad nga balita ag magsuporta sa anang mga pinili nga mga igmanghod. (Mat. 25:​31-46) Sa panahon it mabahoe nga kasakitan, pagahukman na sanda bago mag-umpisa ro Armagedon. (Mat. 24:21) Pareho it manogbantay nga ginapaeain ro mga karnero sa mga kanding, ipaeain man ni Jesus ro mga mainunongon nga nagasuporta sa anang mga pinili sa mga owa nagasuporta.

4. Base sa Isaias 11:​3, 4, ham-an makasigurado kita nga patas ro paghukom ni Jesus sa mga tawo? (Tan-awa man ro piktyur.)

⁴ Ginapakita it hula sa Biblia nga ro ginpili ni Jehova nga Hukom nga si Jesus hay mangin makatarungan sa anang paghukom. (Basaha ro Isaias 11:​3, 4.) Ginaobserbahan na ro ginaobra it mga tawo, ugali, ag andang mga ginahambae—pati man kon paano nanda ginatratar ro anang pinili nga mga igmanghod. (Mat. 12:​36, 37; 25:40) Makilaea ni Jesus kon sin-o ro mga nagasuporta sa anang pinili nga mga igmanghod ag sa andang ueobrahon.a Ro sambato sa importanteng paagi nga masuportahan it sangka tawo ro mga igmanghod it Cristo hay paagi sa pagbulig kanda sa pagwali nga ueobrahon. Ratong mga nagasuporta hay pagahukman bilang “matarung” ag may pag-eaum sanda nga mabuhi it “owa it katapusan” sa eugta. (Mat. 25:46; Pah. 7:​16, 17) Manami gid nga pagpakamayad ra sa mga owa nagkompromiso it andang integridad! Kon magpabilin sanda nga matutom sa panahon ag pagkatapos it mabahoe nga kasakitan, indi pagpaeaon ro andang pangaean sa “libro it kabuhi.”​—Pah. 20:15.

5. Ano ro leksyon nga atong matun-an sa parabula it mga karnero ag mga kanding, ag sin-o ro makabenepisyo kara?

⁵ Mangin matutom ag mainunongon. Ro panguna nga pukos it parabula ni Jesus parti sa mga karnero ag mga kanding hay para sa mga may pag-eaum nga mabuhi it owa’t katapusan iya sa eugta. Ginapakita nanda ro andang pagtuo indi eang sa pagsuporta sa mga igmanghod it Cristo sa pagwali nga ueobrahon, kundi sa mainunongon man nga pagpasakop sa maisot nga grupo nga ginpili ni Jesus. (Mat. 24:45) Pero ratong may pag-eaum nga mabuhi sa eangit hay kinahang-ean man mamati sa paandam it parabula. Ham-an? Tungod ginaobserbahan ni Jesus ro andang ginaobra, ugali, ag ginahambae. Kinahang-ean man nanda nga mangin matutom. Ro matuod, may daywa pang parabula nga ginsugid si Jesus nga may espisipikong paandam para sa mga pinili. Mabasa man naton ra sa Mateo kapitulo 25. Talakayon naton makaron ro parabula parti sa maaeam ag buko’t maaeam nga mga birhen.

RO MAAEAM AG RO BUKO’T MAAEAM NGA MGA BIRHEN

6. Paano ginpakita it limang ka birhen nga maaeam sanda? (Mateo 25:​6-10)

⁶ Sa parabula, ginsugid ni Jesus ro parti sa napueo nga birhen o daeaga nga nagguwa para sueangon ro kaeaslon nga nobyo. (Mat. 25:​1-4) Gusto nanda nga ibhan ro nobyo paagto sa anang kasae. Ginhambae ni Jesus nga ro lima kanda hay “maaeam” ag ro lima hay bukon. Ro maaeam nga mga birhen hay handa ag alerto. Handa gid sanda maghueat sa nobyo maskin hasta’t tungang gabii kon kinahang-ean. Nagdaea sanda it lampara agud may iwag sanda kon magdueom eon. Nagdaea man sanda it reserba nga eana engkaso nga mabuhayan it abot ro nobyo. Ngani, indi mapaeong ro andang lampara tungod nakahanda sanda. (Basaha ro Mateo 25:​6-10.) Pag-abot ku nobyo, gin-ibhan imaw it maaeam nga mga birhen paagto sa kasae. Pareho kara, mapakita man it pinili nga mga Cristyano nga handa sanda paagi sa pagpabilin nga alerto ag matutom hasta sa pag-abot it Cristo. Pagahukman sanda nga nagakadapat nga mangin kaibahan it nobyo nga si Jesus, sa anang eangitnon nga Ginharian.b (Pah. 7:​1-3) Hay paalin mat-a ro lima nga buko’t maaeam nga mga birhen?

7. Ano ro natabo sa lima nga buko’t maaeam nga mga birhen, ag ham-an?

⁷ Bukon it pareho sa lima nga maaeam nga mga birhen, ro lima nga buko’t maaeam nga mga birhen hay buko’t handa sa pag-abot ku nobyo. Ro andang lampara hay nagaigpat-igpat eon ag owa sanda kadaea it reserbang eana. Kat nasayran nanda nga manog-abot eon ro nobyo, nagpanaw sanda agud magbakae it eana ag kat nakapanaw eon sanda, ruyon man ro pag-abot ku nobyo. Sa ruyong oras, “ro lima nga nakapahaum nag-iba kana sa punsyon, ag ginsarhan ro pwertahan.” (Mat. 25:10) Kat nagbalik eon ro buko’t maaeam nga mga birhen gusto nandang magsueod, pero ro nobyo nagsabat: “Owa ako makakilaea kinyo.” (Mat. 25:​11, 12) Ratong mga birhen hay buko’t handa sa mabuhay nga paghueat sa nobyo kon kinahang-eanon. Ano ro leksyon para sa mga pinili?

8-9. Ano ro leksyon nga matun-an ku mga pinili sa parabula it mga birhen? (Tan-awa man ro piktyur.)

⁸ Mangin handa ag alerto. Owa ginasugid ni Jesus nga may daywang grupo it mga pinili—ro sambato hay handa maghueat hasta sa katapusan ku rayang sistema it mga bagay, ag ro sambato hay buko’t handa. Kundi, ginasugid na kon ano ro matabo sa mga pinili kon bukon sanda it handa nga magtiis it matutom hasta sa katapusan. Kon bukon sanda it handa, indi nanda mabaton ro premyo. (Juan 14:​3, 4) Seryoso gid nga bagay ron! Ano man ro atong pag-eaum, sa eangit man o sa eugta, kinahang-ean natong pamatian ro paandam parti sa parabula it mga birhen. Ro kada isaea katon hay dapat padayon nga magbantay, mangin handa, ag magtiis hasta sa katapusan.​—Mat. 24:13.

⁹ Pagkatapos isugid ni Jesus ro parabula parti sa mga birhen nga nagapakita ku importansya it pagiging handa ag alerto, ginsugid man rayon nana ro parabula parti sa mga talanton. Ginapabahoe it rayang parabula nga kinahang-ean mangin mahugod.

RO MGA TALANTON

10. Paano ginpakita it daywang ka sueoguon nga matutom sanda? (Mateo 25:​19-23)

¹⁰ Sa parabula it mga talanton, ginsugid ni Jesus ro parti sa daywang ka sueoguon nga nangin matutom sa andang amo ag ro sambato hay bukon. (Mat. 25:​14-18) Ginpakita it daywang ka sueoguon nga matutom sanda paagi sa pagtrabaho it mayad agud paabuon ro kwarta it andang amo. Bago imaw magpanaw sa iba nga lugar, ginsalig nana kanda ro mga talanton—ro mabahoe nga kantidad it kwarta. Ro daywang ka matutom nga sueoguon hay mahugod ag gingamit nanda it mayad ro kwarta. Ano ro resulta? Kat nagbalik eon ro andang amo, hapatubo nanda it doble ro kwarta nga gintao kanda. Gindayaw sanda ku andang amo ag nagkasadya sanda kaibahan nana. (Basaha ro Mateo 25:​19-23.) Pero kamusta mat-a ro pangatlong sueoguon? Ano ro anang gin-obra sa kwarta nga gintao kana ku anang amo?

11. Ano ro natabo sa “matamad” nga sueoguon, ag ham-an?

¹¹ Ro pangatlong sueoguon hay nakabaton it sangka talanton pero imaw hay “matamad.” Nagaeaum ro anang amo nga gamiton na it mayad ro talanton pero gin-eubong nat-a ra sa eugta. Kat nagbalik eon ro anang amo, gin-uli na ro sangka talanton nga gintao kana. Bukon gid it mayad ro batasan it ratong sueoguon. Imbes nga mangayo it pasensya tungod owa nana hapatubo ro kwarta ku anang amo, gintawag na pa imaw nga “mabudlay [o, istrikto] ka nga tawo.” Owa na hapasadya ro anang amo. Euwas karon, ginbuoe kana ro talanton ag ginhaboy imaw sa guwa it baeay ku anang amo.​—Mat. 25:​24, 26-30.

12. Sin-o ro ginarepresentar makaron it daywang ka matutom nga sueoguon?

¹² Ro daywang ka matutom nga sueoguon hay nagarepresentar sa matutom nga pinili nga mga Cristyano. Ginasampit sanda ku andang Agaeon nga si Jesus, nga magkasadya kaibahan nana. Mabaton nanda ro andang makaeangit nga premyo, ro una nga pagkabanhaw. (Mat. 25:​21, 23; Pah. 20:5b) Pero, ro maeain nga halimbawa it matamad nga sueoguon hay nagatao it paandam para sa mga pinili. Paano?

13-14. Ano ro leksyon nga matun-an it mga pinili sa parabula parti sa mga talanton? (Tan-awa man ro piktyur.)

¹³ Mangin mahugod ag masako. Sa parabula it mga talanton ag mga birhen, owa ginasugid ni Jesus nga mangin matamad ro mga pinili. Kundi, ginasugid na kon ano ro matabo kon indi sanda maghugod. Maduea nanda ro pribilehiyo nga ‘matawag ag mapili,’ ag indi sanda makasueod sa eangitnon nga Ginharian.​—2 Ped. 1:10.

¹⁴ Ginklaro ni Jesus sa parabula parti sa mga birhen ag mga talanton nga ro tanan nga pinili nga mga Cristyano hay dapat mangin handa ag alerto. Kinahang-ean man nanda mangin mahugod ag masako. Pero may una pa baea nga gintao nga paandam si Jesus para sa mga pinili? Huo, may una! Ro anang ginhambae sa Mateo 24:​40, 41 hay naangot man sa katapusan nga paghukom sa mga pinili.

SIN-O RO “PAGABUE-ON”?

15-16. Paano ginapabahoe it Mateo 24:​40, 41 nga kinahang-ean it mga pinili nga padayon nga magbantay?

¹⁵ Bago isugid ni Jesus ro tatlong parabula, ginsugid na anay ro katapusan nga paghukom sa mga pinili nga magapakita kon sin-o ro mga nahamut-an. Naghambae imaw parti sa daywang ka eaki nga nagaobra sa eanas ag sa daywang ka bayi nga nagagaling. Sa rayang sitwasyon, pareho malang sandang daywa nga nagaobra, pero ginhambae ni Jesus “ro sambato pagabue-on, ag ro sambato mabilin.” (Basaha ro Mateo 24:​40, 41.) Ginpalig-on rayon ni Jesus ro anang mga sumoeunod: “Magbantay kamo, ay owa kamo makasayod kon ano nga adlaw maabot ro inyong Ginuo.” (Mat. 24:42) Pareho man kara ro ginhambae ni Jesus pagkatapos nang isugid ro parabula parti sa mga birhen. (Mat. 25:13) May koneksyon baea ro mga ginhambae na? Posible. Rato eang nga mga matuod ag matutom nga mga pinili ro “pagabue-on,” ag batunon ni Jesus sa anang eangitnon nga Ginharian.​—Juan 14:3.

¹⁶ Padayon nga magbantay. Ro sangka pinili nga owa nagpabilin nga alerto sa espiritwal hay indi pagtipunon kaibahan sa “mga pinili.” (Mat. 24:31) Ngani, ano man ro pag-eaum it tanan nga mga alagad it Dyos, dapat nandang dumdomon ro paandam ni Jesus nga padayon nga magbantay ag magpabilin nga matutom.

17. Ham-an indi dapat kita mabaeaka kon magpili si Jehova it mga pinili sa atong panahon makaron?

¹⁷ Kilaea gid naton si Jehova, ngani makasalig kita sa anang paghukom. Owa kita nabaeaka kon magpili man imaw it matutom nga mga pinili sa atong panahon makaron.c Sa ilustrasyon parti sa taeamnan it ubas, matandaan naton nga ginsambit ni Jesus ro parti sa mga trabahador nga nag-umpisa it obra ku mga alas singko eon it hapon. (Mat. 20:​1-16) Ratong mga nagtrabaho it ulihi hay nakabaton it pareho nga sweldo sa mga nagtrabaho it temprano. Pareho kara, nauna man sanda o ulihi nga ginpili, mabaton nanda ro eangitnon nga premyo kon magpabilin sanda nga matutom.

PAMATII RO MGA PAANDAM

18-19. Ano ro mga leksyon ag mga paandam nga atong gintalakay?

¹⁸ Ano ro mga gintalakay naton? Ro parabula parti sa mga karnero ag mga kanding hay nagapabahoe nga kinahang-ean ku ratong may pag-eaum nga mabuhi it owa’t katapusan sa eugta nga magpabilin nga matutom ag mainunongon kay Jehova—makaron ag sa nagapaabot nga mabahoe nga kasakitan. Sa panahon ngaron, pagahukman ni Jesus ro mga matutom bilang nagakadapat nga magbaton it “kabuhi nga owa it katapusan.”​—Mat. 25:46.

¹⁹ Gintalakay man naton ro daywang ka parabula nga nagatao it paandam para sa mga pinili. Sa parabula ni Jesus parti sa maaeam ag buko’t maaeam nga mga birhen. Ginpakita it lima kanda nga maaeam sanda. Handa ag alerto sanda nga maghueat sa nobyo, maskin mabuhay kon kinahang-ean. Pero ro buko’t maaeam nga mga birhen hay buko’t handa. Ngani owa sanda ginsugtan it nobyo nga makaibahan sanda sa anang kasae. Dapat handa man kita maghueat nga tapuson ni Jesus rayang sistema it mga bagay maskin mauno man it buhay. Sa parabula mat-a parti sa mga talanton, gintalakay naton ro daywang ka matutom nga mga sueoguon nga mahugod ag masako. Nagtrabaho gid sanda it mayad ag nabaton nanda ro pabor ku andang amo. Pero, ro matamad nga sueoguon hay ginpahalin. Ano ro leksyon? Dapat padayon kita nga mangin masako sa pag-alagad kay Jehova hasta sa katapusan. Ku ulihi, gintalakay man naton nga dapat magpabilin nga nagabantay ro mga pinili para “pagabue-on” sanda ni Jesus sa andang eangitnon nga premyo. Eksayted gid ag nagaeaum sanda nga ‘tipunon’ ni Jesus paagto sa eangit. Pagkatapos ku inaway it Armagedon, kaslon sanda bilang nobya ni Jesus sa kasae it Kordero.​—2 Tes. 2:1; Pah. 19:9.

20. Ano ro obrahon ni Jehova sa ratong mga nagapamati sa anang mga paandam?

²⁰ Habang nagapaeapit ro paghukom, owa kita’t rason nga mahadlok. Kon magpabilin kita nga matutom, ro atong mapinalanggaon nga Ama sa eangit hay magatao katon it “eabing mabahoe nga gahum” agud “makatindog [kita] sa atubangan ku Unga it Tawo.” (2 Cor. 4:7; Luc. 21:36) Sa eangit man o sa eugta ro atong pag-eaum, mapasadya naton ro atong Ama kon pamatian naton ro mga paandam sa mga parabula ni Jesus. Paagi sa owa’t tupong nga kabuot ni Jehova, ro atong mga pangaean hay masueat sa “libro it kabuhi.”​—Dan. 12:1; Pah. 3:5.