Sayod Mo Baea?

Mauno ka importante ro musika sa Israel kato?

IMPORTANTE gid ro musika sa kultura it Israel kato. Haeos ginasambit pirme it Biblia ro mga tawo nga nagapatukar it mga instrumento ag nagakanta. Ro matuod, mga pueong porsyento sa Kasueatan hay mga kanta. Ro mga halimbawa kara hay ro libro it Salmo, Ambahanon ni Solomon, ag Panalambiton. Base sa libro nga Music in Biblical Life, ro Biblia hay “klaro nga nagapakita nga ro musika hay parte it iba-ibang mga ueobrahon it sangka komunidad.”

Musika sa pang-adlaw-adlaw nga pagkabuhi. Nagapatukar it musika ro mga Israelita kato para ipakita ro andang ginabatyag. (Isa. 30:29) Nagapatukar ro mga bayi it mga tamborin, masadya nga nagakanta ag nagasaot kon may mga koronasyon, kapyestahan, ag pagdaog sa mga inaway. (Huk. 11:34; 1 Sam. 18:​6, 7; 1 Hari 1:​39, 40) Nagakanta man ro mga Israelita kato it makasueobo nga mga kanta kon may namatay. (2 Cron. 35:25) Ngani klaro nga ginapakita kara nga “ro mga Hebreo hay mahilig gid sa musika,” hambae it McClintock and Strong’s Cyclopedia.

Musika sa palasyo it hari. Naila nga magpamati it musika ro mga hari it Israel kato. Ginpaagto ni Haring Saul si David sa palasyo para magpatukar kana it harpa. (1 Sam. 16:​18, 23) Kat nangin hari si David, nag-imbento imaw it mga instrumento para sa musika, nagsueat it manami nga mga kanta, ag nag-organisar it orkestra nga nagapatukar sa templo ni Jehova. (2 Cron. 7:6; Amos 6:5) Si Haring Solomon hay may mga eaki ag bayi nga manogkanta sa anang palasyo.​—Man. 2:8.

Musika sa pagsimba. Importante gid sa mga Israelita kato ro paggamit it musika sa pagsimba kay Jehova. Ro matuod, 4,000 nga mga eaki ro nagapatukar it mga instrumento sa templo sa Jerusalem. (1 Cron. 23:5) Nagapatukar sanda it mga simbal, de-kwerdas nga mga instrumento, mga harpa, ag mga trumpeta. (2 Cron. 5:12) Pero, bukon eang it mga propesyonal nga musikero ro nagasimba kay Jehova paagi sa musika. Abu mang mga Israelita kato ro nagakanta habang nagapaagto sa Jerusalem. Ginatawag ra nga Mga Kanta sa Pagsaka. (Sal. 120-134) Ag base sa mga sinueatan it Judio, ro mga Israelita kato hay nagkanta it Hallel nga mga Salmoa sa panahon it Paskwa.

Importante gihapon ro musika sa katawhan ni Jehova makaron. (Sant. 5:13) Nagakanta kita bilang parte it atong pagsimba. (Efe. 5:19) Nagapahiusa katong mga Cristyano ro musika. (Col. 3:16) Ag nagapabakud ra katon kon may mga problema kita. (Binu. 16:25) Ro musika hay manami gid nga paagi para ipakita ro atong pagtuo kay Jehova ag ro atong pagpalangga kana.