Dapat Eon Baea Ako Magpundo sa Pag-drive?

Pareho man baea kara ing sitwasyon? Kon huo, ano ro makabulig kimo nga masayran kon dapat ka eon baea nga magpundo sa pag-drive?

Sa ibang bansa, ro magueang nga mga drayber nga gustong mag-renew it andang lisensya hay dapat magbuoe anay it permiso sa doktor kon pwede pa sanda nga mag-drive. Ginasunod it mga Cristyano nga nagaestar sa rayang mga bansa rayang layi. (Roma 13:1) Pero maskin siin ka man nga lugar nagaestar, may mga suhistyon nga makabulig kimo kon baea pwede ka pa nga mag-drive.

USISAA KON KAYA MO PANG MAG-DRIVE

Nagtao it suhistyon ro National Institute on Aging (NIA) nga website sa United States nga pwedeng usisaon it mga magueang nga naga-drive ro andang sarili paagi sa rayang mga pangutana:

• Nalisdan eon baea ako magbasa it mga karatula sa daean o makakita kon gabii?

• Nalisdan eon baea ako maglingot para magtan-aw sa mga side mirror ag mga blind spot?

• Nalisdan eon baea ako maghueag, pareho it paghueag ku ang siki para tapakan ro preno?

• Ako baea ro rason it traffic dahil mahinay ako mag-drive?

• Sangkiri eang baea ako maaksidente, o may mga gasgas eon baea ang saeakyan dahil nahahapit ko ro mga bagay sa daean?

• Ginpapundo eon baea ako it pulis dahil sa ang pag-drive?

• Hakatueogan eon baea ako habang naga-drive?

• May ginainom baea ako nga bueong nga posibleng makaapekto sa ang pag-drive?

• Hahambaean eon baea ako it ang pamilya o mga amigo nga nabaeaka sanda sa ang pag-drive?

Kon huo ing sabat sa sambilog o daywa sa rayang mga pangutana, basi kinahang-ean mo eon nga mag-obra it mga pagbag-o sa ing pag-drive. Halimbawa, pwede mo eon limitahan ing pag-drive eabi eon gid kon gabii. Usisaa pirme ing sarili kon kaya mo pang mag-drive. Pwede mong pangutan-on ro sambilog sa ing pamilya o amigo para mahambae nanda ro andang naobserbahan sa ing pag-drive. Basi pwede kang mag-enroll sa sangka driving course para mangin mas safe ing pag-drive. Pero, kon mas abu ing sabat nga huo sa rayang mga pangutana, mas mayad para kimo nga magpundo eon sa pag-drive.a

MAGPAGIYA SA MGA PRINSIPYO IT BIBLIA

Basi nalisdan kang batunon nga bukon ka eon it mayad mag-drive kumpara dati. Ag owa ka naila nga istoryahan ro topiko nga indi ka eon pwedeng mag-drive. Ngani, ano nga mga prinsipyo sa Biblia ro makabulig kimo nga makaisip ag makaobra it mayad nga desisyon? Talakayon ta ro daywa kara.

Mangin mapainubuson. (Hulu. 11:2) Habang nagagueang kita, nagahina ro atong panan-aw, pamatin-an, kusog, ag kaabtik. Halimbawa, abung tawo ro nagapundo sa paghampang it sports kon nagaedad eon sanda dahil narealisar nanda nga indi eon nanda ra kaya. Pareho man ra sa pag-drive. Ro mapainubuson nga tawo hay indi eon mag-drive kon narealisar na nga bukon eon it safe para kana nga mag-drive. (Hulu. 22:3) Ag kon may naghambae kana it andang pagkabaeaka parti sa anang pag-drive, ginabaton na ra ag ginapamatian.—Ikumpara ro 2 Samuel 21:15-17.

Likawi nga makasaea sa dugo. (Deut. 22:8) Kon owa nagahaeong ro sangka tawo sa pag-drive, pwede imaw makadisgrasya o makapatay it tawo. Kon naga-drive gihapon imaw maskin bukon eon it safe para kana, ginabutang na sa peligro ro anang kabuhi ag ro kabuhi it iba. Ag kon imaw ro rason sa kamatayon it iba, nakasaea imaw sa dugo.

Kon narealisar mo nga dapat ka eon magpundo sa pag-drive, indi pag-isipa nga indi ka eon pagrespetuhon it iba o owa ka eon it pueos. Palangga ka ni Jehova dahil sa ing manami nga mga ugali, eakip kara ing pagkamaugdang, pagkamapainubuson, ag pagkabaeaka sa kamaeayran it iba. Ag nagapromisa imaw nga buligan ka nana ag paumpawan. (Isa. 46:4) Indi ka nana pagpabay-an. Ngani, pangabaya si Jehova nga buligan ka nga gamiton ro praktikal nga kaaeam ag mga prinsipyo sa Biblia agud makadesisyon kon baea dapat ka eon magpundo sa pag-drive.