Mga Pangutana Halin sa mga Manogbasa

Ano nga “kaisipan” ro ibutang ni Jehova sa tagipusuon it mga nasyon sa indi magbuhay?

Parti sa pag-umpisa it mabahoe nga kasakitan, ro Pahayag 17:16, 17 hay nagahambae: “Ro napueong ka mga sungay nga imong nakita, ag ro sapat, magadumot sa babayi nga nagabaligya it anang dungog. Pagabue-on nanda ro tanan nga una kana ag pagapabay-an nanda imaw nga owa it eambong. Pagakaunon nanda ro anang unod, ag sunogon nanda imaw sa kaeayo. Ay ro Dyos nagbutang it handum sa andang mga tagipusoon sa pagtuman sa anang tinutoyo [o, kaisipan], sa andang paghilisugot ag pagtugyan sa sapat it andang gahum sa pagdumaea.” Ginhambae dati sa atong mga publikasyon nga ro “kaisipan” nga ibutang ni Jehova sa tagipusuon it mga nasyon hay ro pagduea sa buko’t matuod nga relihiyon.

Pero, may pagbag-o. Ro “kaisipan” nga ibutang ni Jehova sa tagipusuon it mga nasyon hay ro pagtao “sa sapat it andang gahum sa pagdumaea.” Para maintindihan kon paalin ra matuman, talakayon ta ro sabat sa masunod nga mga pangutana.

Sin-o ro panguna nga mga karakter sa rayang hula? Ro “babayi nga nagabaligya it anang dungog” hay ginatawag man nga “Bantug nga Babilonia”; ginarepresentar na ro bilog kalibutan nga emperyo it buko’t matuod nga relihiyon. Ro “puea nga sapat” hay nagarepresentar sa United Nations. Rayang organisasyon hay una nga gintukod ku 1919 para mapadayon ro kalinong sa bilog nga kalibutan ag ginatawag kato nga League of Nations. (Pah. 17:3-5) Ro “napueong ka mga sungay” hay nagarepresentar sa tanan nga gubyerno nga nagasuporta sa United Nations.

Ano ro relasyon it bayi nga nagabaligya it anang dungog ag ku puea nga mapintas nga sapat? Ro bayi hay “nagasakay” sa mapintas nga sapat, kon siin nagatukoy ra sa anang pagsuporta ag pagtinguha nga maimpluwensyahan o makontrol ro mapintas nga sapat.

Ano ro matabo sa bayi nga nagabaligya it anang dungog? Ro mapintas nga sapat pati man ro napueong ka sungay hay “magadumot sa babayi.” Bue-on nanda ro tanan nanang mga pagkabutang ag ipakita sa tanan kon mauno imaw kaeain. Ag pahanabuon nanda kon ano ro ginhambae ni Jehova sa bayi nga nagabaligya it anang dungog, nga dueaon eon gid imaw. (Pah. 17:1; 18:8) Raya ro mangin katapusan it tanan nga buko’t matuod nga relihiyon. Pero bago ron matabo, pahanabuon anay ni Jehova nga obrahon it mga nasyon ro bagay nga owa pa gid natabo sa pagginahum it tawo.

Ano ro pahanabuon ni Jehova nga obrahon it mga nasyon? Ibutang ni Jehova ro “anang kaisipan” sa mga gubyerno kon siin ‘itao nanda ro andang gahum ag awtoridad sa puea nga mapintas nga sapat’—ro United Nations. (Pah. 17:13) Isipa kon ano ro buot hambaeon kara. Ro mga gubyerno baea ro magadesisyon nga itao nanda ro andang gahum ag awtoridad sa mapintas nga sapat? Bukon! Ginapakita it hula nga ro Dyos mismo ro magapahanabo nga obrahon nanda ra. (Hulu. 21:1; ikumpara ro Isaias 44:28.) Amat-amat baea nga matabo rayang pagbag-o? Bukon! Gulpi eang ra nga matabo. Obrahon rayon it mapintas nga sapat ro paghukom ni Jehova sa tanan nga buko’t matuod nga relihiyon paagi sa pagduea kara.

Ano rayon ro atong mapaabot? Indi dapat kita magpaabot it mga balita nga ro mga gubyerno hay amat-amat nga magasuporta sa United Nations. Kundi, raya ro atong mapaabot: Gulping ibutang ni Jehova sa tagipusuon it mga nasyon nga itao nanda ro andang gahum sa United Nations. Kon matabo ron, sayod naton nga magaumpisa eon ro mabahoe nga kasakitan. Ngani, “magtener nga bugtaw, perming haum ag klaro ro painu-ino” dahil magaabot ro gulpi nga mga pagbag-o!—1 Tes. 5:6.