Sin-o Ro Dyos?

1, 2. Ano ro pirme natong ginapangutana?

RO MGA unga abu it pangutana. Bisan hasabat mo eon sanda, gapangutana gihapon, ‘Ham-an?’ Ag kon masabat mo eon, pangutan-on ka eon man, ‘Pero, ham-an?’

² Tanan kita may pangutana, unga man o magueang. Pirme naton ginapangutana kon ano ro atong kan-on, suksukon o bakeon. Nagapundo kita sa pagpangutana tungod owa kita nakakita it insakto nga sabat sa rayang mga pangutana.

3. Ham-an nagpundo ro iba sa pag-usoy it sabat sa importante nga mga pangutana?

³ Sa Biblia baea makita ro sabat sa importante naton nga mga pangutana? Hambae it iba, “Huo.” Pero, nagabatyag sanda nga malisud eubton ro Biblia. Para kanda ro maestro ag pari eang ro makasabat. Ro iba nahuya mag-aku nga owa sanda kasayod sa sabat. Ano kon kimo?

4, 5. Ano ro mga pangutana nga gusto mo gid masabat? Ham-an padayon mo gid nga usuyon ro mga sabat?

⁴ Basi gusto mo masayran ro sabat sa mga pangutana, pareho it: Ham-an iya ako? Ano ro matabo kon mamatay ako? Anong klasi imaw nga Dyos? Si Jesus ro kilaea nga Manogturo, naghambae: “Magpangayo kamo, ag kamo pagataw-an; mag-usoy kamo, ag kamo makakita; magpanuktok kamo, ag ro pwertahan pagaabrihan para kinyo.” (Mateo 7:7) Indi magpundo hasta makita mo ro masaligan nga sabat.

⁵ Huo, kon “padayon nga mag-usoy,” makita mo ro sabat sa Biblia. (Hulubaton 2:1-5) Rayang sabat buko’t malisud eubton. Ro imong matun-an magatao kimo it masadya nga kabuhi makaron ag manami nga pag-eaum sa paeaabuton. Hambaean naton ro isaea ka pangutana nga ginapaligban it abu nga tawo.

RO DYOS BAEA MAPINTAS O NAGAKABAEAKA KATON?

6. Ham-an nagaisip ro iba nga owa sanda ginakabaeak-an it Dyos?

⁶ Abu ro nagaisip nga owa kita ginakabaeak-an it Dyos. Para kanda, kon nagakabaeaka gid imaw, buko’t makaraya ro kalibutan. May pag-ilinaway, kaugot, ag kalisdanan bisan siin. Nagabaeatian ro mga tawo, nagaantus, ag nagakamatay. Nangawa ro iba, ‘kon nagakabaeaka katon ro Dyos, ham-an owa nana ginatapos ro tanan nga pag-antus?’

7. (a) Ham-an ginaturo ku lider it relihiyon nga ro Dyos mapintas? (b) Ham-an indi gid naton mabasoe ro Dyos sa maeain nga nagakatabo?

⁷ Kon amat, ginaturo ku lider it relihiyon sa mga tawo nga ro Dyos mapintas. Kon may maeain nga nagakatabo ginahambae nanda nga pagbuot ra it Dyos ag naila imaw nga matabo ra. Ginabasoe nanda imaw. Pero, ginaturo it Biblia nga owa naghalin sa Dyos ro kaeainan. Nagasugid katon ro Santiago 1:13, “Kon ro isaeang ka tawo ginasueay, indi imaw maghambae, ‘Raya nga pagsueay nagahalin sa Dyos.’ Ay ro Dyos indi masueay sa paghimo it maeain, ag owa imaw nagasueay bisan kanyo.” Buot hambaeon nga bisan owa gintapos it Dyos ro maeain nga nagakatabo, owa man kana ra maghalin. (Basaha ro Job 34:10-12.) Maggamit kita it halimbawa.

8, 9. Ham-an saea nga basoeon ro Dyos sa atong mga problema? Magtao it halimbawa.

⁸ Isipa ro miron nga unga nga nagaestar kaibahan ku anang ginikanan. Palangga gid imaw it anang tatay ag gintur-an kon paano magdesisyon it tama. Pero nagrebelde imaw ag naghalin sa andang baeay. Nag-obra it maeain ag naggulo ro anang kabuhi. Mabasoe mo baea ro tatay sa natabo tungod owa na ginpunggan ro anang unga? Syempre indi! (Lucas 15:11-13) Kapareho it tatay, owa ginpunggan it Dyos ro mga tawo nga mag-obra it maeain ag magrebelde kana. Kon may maeain nga matabo, tandaan naton nga owa ron naghalin sa Dyos. Saea gid nga basoeon ro Dyos.

⁹ Ro Dyos may rason kon ham-an owa na ginpunggan ro mga maeain nga nagakatabo. Sa Kapitulo 11, matun-an mo ro ginahambae it Biblia parti kara. Pero makasigurado ka nga palangga kita it Dyos ag owa kana naghalin ro atong problema. Ngani, imaw eang gid ro makasulbar sa atong mga problema.​—Isaias 33:2.

10. Ham-an makasalig kita nga kayang kaadyon it Dyos ro ginsamad it maeain nga mga tawo?

¹⁰ Ro Dyos baeaan. (Isaias 6:3) Tanan nga ginaobra na hay putli, malimpyo, ag mayad. Makasalig gid kita kana. Buko’t makaron ro mga tawo tungod kon amat gaobra sanda it saea. Bisan ro mayad nga manoggahum indi kayang kaadyon ro ginsamad it maeain nga mga tawo. Owa gid it makatupong sa gahum it Dyos, ro tanan nga ginsamad it tawo kaya na kaadyon. Dueaon na ro mga maeaut.​—Basaha ro Salmo 37:9-11.

ANO RO GINABATYAG IT DYOS KON NAGAANTUS RO TAWO?

11. Ano ro ginabatyag it Dyos sa imong pag-antus?

¹¹ Ano ro ginabatyag it Dyos kon makita na ro nagakatabo sa kalibutan ag sa imong pag-antus? Ginaturo it Biblia nga ro Dyos “mapinalanggaon sa katarungan.” (Salmo 37:28) Importante gid kana ro tama ag saea. Owa imaw naila sa pag-antus ku mga tawo. Ro Biblia nagahambae nga “nasakitan gid ro anang tagipusoon” kat hakita na nga puno it kaeainan ro kalibutan kato. (Genesis 6:5, 6) Owa nagabag-o ro Dyos. (Malaquias 3:6) Ro Biblia nagahambae nga ro Dyos nagakabaeaka gid kimo.​—Basaha ro 1 Pedro 5:7.

12, 13. (a) Ham-an nagapalangga kita ag nagakabaeaka sa iba, ag ano ro atong ginabatyag sa pag-antus it kalibutan? (b) Ham-an makasigurado kita nga dueaon it Dyos ro pag-antus ag inhustisya?

¹² Nagahambae man ro Biblia nga gintuga kita it Dyos sa anang larawan. (Genesis 1:26) Buot hambaeon nga gintuga kita it Dyos nga may pareho kana nga ugali o kinaiya. Kon nasakitan ka makita ro owa’t saea nga mga tawo nga nagaantus, mas eabi eon gid ro Dyos! Paano naton nasayran?

¹³ Ro Biblia nagaturo katon nga “ro Dyos gugma.” (1 Juan 4:8) Tanan nga ginaobra it Dyos ginapahueag it gugma. Nagapalangga kita tungod ro Dyos gugma. Isipa ra: Kon may gahum ka, dueaon mo baea ro tanan nga pag-antus ag inhustisya sa kalibutan? Syempre! Tungod palangga mo ro mga tawo. Kamusta man sa Dyos? May gahum imaw, ag tungod palangga na kita dueaon na tanan nga pag-antus ag inhustisya. Makasigurado ka nga tanan nga ginpromisa it Dyos sa umpisa it rayang libro matabo gid! Agud makasalig ka sa rayang mga promisa, dapat kilaeahon mo pa gid ro Dyos.

GUSTO IT DYOS NGA MAKILAEA MO IMAW

14. Ano ro ngaean it Dyos, ag ham-an dapat mo nga gamiton ra?

¹⁴ Ano ro una mong obrahon kon may gusto ka nga mangin amigo? Magpakilaea. May ngaean baea ro Dyos? Abung relihiyon ro nagahambae nga ro anang ngaean hay Dyos o Ginuo, bukon ra it mga ngaean. Mga titulo ra, kapareho it “hari” o “presidente.” Ro Dyos naghambae katon nga ro anang ngaean Jehova. Ro Salmo 83:18 naghambae: “Kunta masayran it mga tawo nga ikaw, nga ro ngaean Jehova, ikaw eamang ro Eabing Mataas sa bilog nga eugta.” Gingamit ku mga manogsueat it Biblia ro ngaean it Dyos linibo ka beses. Gusto ni Jehova nga masayran mo ro anang ngaean ag gamiton ra. Nagpakilaea imaw agud mangin amigo ka nana.

15. Ano ro kahueogan it ngaean ni Jehova?

¹⁵ Ro ngaean nga Jehova may madaeum nga kahueogan. Nagakahueogan ra nga kaya na tumanon ro anang promisa ag katuyoan. Ag owa it makapugong kana. Si Jehova eang ro may makarang ngaean.a

16, 17. Ano ro kahueogan it (a) “Makagagahum sa tanan”? (b) “Hari nga owa-it-katapusan”? (c) “Manogtuga”?

¹⁶ Nabasa naton sa Salmo 83:18, ro parti kay Jehova: “Ikaw eamang ro Eabing Mataas.” Sa Pahayag 15:3, nagahambae man: “Ginuo, Dyos nga Makagagahum sa tanan.” Ano ro kahueogan it “Makagagahum sa tanan”? Nagakahueogan ra nga si Jehova eang ro pinakagamhanan sa bilog nga uniberso. Ag sa 1 Timoteo 1:17, gintawag si Jehova nga “Hari nga owa-it-katapusan.” Nagakahueogan ra nga nag-euntad eon imaw. Ginahambae it Salmo 90:2, nga owa gid imaw it katapusan hasta sa owa it katapusan. Makangawa-ngawa gid!

¹⁷ Si Jehova eang ro Manogtuga. Sa Pahayag 4:10, nagahambae: “O Ginuo ag Dyos namon! Takus ka nga magbaton it himaya, kadungganan, ag gahum. Ay gintuga mo ro tanan nga mga butang, ag sa imong kabubot-on gintuga mo sanda ag gintaw-an it kabuhi.” Huo, umpisa sa mga anghel sa eangit, mga bituon, mga prutas sa puno, hasta sa mga isda sa dagat​—gin-obra ni Jehova ro tanan nga bagay nga maisip mo.

PWEDE KA BAEA MANGIN AMIGO NI JEHOVA?

18. Ham-an nagaisip ro iba nga imposible mangin amigo ro Dyos? Ano ro ginahambae it Biblia parti karon?

¹⁸ Kon masayran it iba ro daeayawon nga ugali o kinaiya ni Jehova, nagakatahap sanda ag nagaisip, ‘Ro Dyos gamhanan, importante, ag maeayo, ham-an kabaeak-an na ako?’ Ruyon baea ro gusto it Dyos nga mabatyagan naton? Bukon gid! Gusto ni Jehova makapaeapit katon. Hambae it Biblia nga ro Dyos “bukon it maeayo sa kada isaea katon.” (Binuhatan 17:27) Gusto it Dyos nga magpaeapit ka kana, nagpromisa imaw ‘ako magapaeapit kinyo.’​—Santiago 4:8.

19. (a) Paano ka mangin amigo it Dyos? (b) Ano ro mga ugali ni Jehova nga nailaan mo gid?

¹⁹ Paano ka mangin amigo it Dyos? Naghambae si Jesus: “Ag makaraya ro kabuhi nga owa it katapusan, nga ro mga tawo magkilaea kimo, nga ikaw eamang ro matuod nga Dyos, ag si Jesu-Cristo nga imong ginpadaea.” (Juan 17:3) Padayon nga magtuon ag makilaea mo si Jehova ag si Jesus. Ag makabaton ka it kabuhi nga owa it katapusan. Halimbawa, hatun-an naton nga “ro Dyos gugma.” (1 Juan 4:16) Pero abu pa imaw it daeayawon nga mga ugali. Nagasugid ro Biblia nga si Jehova “maeueoy-on ag mabuot, buko’t madali maakig, bugana sa mainunongon nga gugma ag kamatuoran.” (Exodo 34:6) Si Jehova “mayad ag handa sa pagpatawad.” (Salmo 86:5) Ro Dyos mapinasensyahon ag mainunongon. (2 Pedro 3:9; Pahayag 15:4) Sa pagbasa it Biblia, matun-an mo pa gid ro anang daeayawon nga mga ugali.

20-22. (a) Paano ka makapaeapit sa Dyos kon indi mo imaw makita? (b) Ano ing obrahon kon papunduhon ka it iba nga tun-an ro Biblia?

²⁰ Paano ka makapaeapit sa Dyos kon indi mo imaw makita? (Juan 1:18; 4:24) Kon tun-an mo ro Biblia, makilaea mo pa gid si Jehova bilang matuod nga Persona. (Salmo 27:4; Roma 1:20) Sa dugang mo nga pagtuon parti kay Jehova, gadugang pa gid ro imong pagpalangga kana ag mabatyagan mo nga maeapit imaw kimo.

²¹ Matun-an mo nga si Jehova ro atong Ama. (Mateo 6:9) Gintaw-an na kita it kabuhi, ag gusto na ro pinakamanami nga kabuhi para katon. Ruyon ro gusto it mapinalanggaon nga tatay para sa anang mga unga. (Salmo 36:9) Huo, ginaturo it Biblia nga pwede ka mangin amigo it Dyos. (Santiago 2:23) Isipa ron. Si Jehova, ro Manogtuga it uniberso, gusto ka gid nana mangin amigo!

²² May iba nga gusto ka papunduhon sa pagtuon it Biblia. Nabaeaka sanda nga bayluhan mo ro imong relihiyon. Indi pagsugti nga punggan ka nga mangin amigo it Dyos, ro pinakamayad nga amigo.

23, 24. (a) Ham-an padayon ka nga magpangutana? (b) Ano ro matun-an naton sa masunod nga kapitulo?

²³ Buko’t tanan nga matun-an sa Biblia, maeubtan mo. Indi mahuya nga magpangutana o mangayo it bulig. Si Jesus naghambae nga dapat kita magpaubos, pareho it unga. (Mateo 18:2-4) Ag ro mga unga hay abu it pangutana. Gusto it Dyos nga masayran mo ro sabat. Ngani, tun-i it mayad ro Biblia agud masigurado mo nga ro imong natun-an matuod.​—Basaha ro Binuhatan 17:11.

²⁴ Ro pinakamayad nga paagi agud makilaea mo si Jehova hay tun-an ro Biblia. Matun-an naton sa masunod nga kapitulo kon ham-an eain gid ro Biblia sa ibang mga libro.