KAPITULO 19
Padayon Nga Magpaeapit Kay Jehova
1, 2. Siin kita makakita it proteksyon makaron?
ISIPA nga nagatikang ka sa liwan sa mabagyo nga panahon. Nagdueom ro eangit, nagpangilat, ag nagpangdaeugdog. Tapos nagbunok ro uean. Nag-usoy ka it mapanilongan. Nagapasaeamat ka sa ruyong manami nga lugar!
2 Makaruyon man ro atong sitwasyon makaron. Nagaeain pa gid ro kalibutan. Mangawa ka, ‘Siin ako makakita it proteksyon?’ Ro salmista sa Biblia nagsueat: “Magahambae ako kay Jehova: ‘Ikaw ro akong daeangpan ag ro akong paeanaguan, ro Dyos nga akong ginasaligan.’” (Salmo 91:2) Huo, si Jehova magatao it paumpaw sa atong mga problema makaron, ag manami nga pag-eaum sa paeaabuton.
3. Paano kita ginaproteksyonan ni Jehova?
3 Paano kita ginaproteksyonan ni Jehova? Mabuligan na kita nga maatubang ro tanan nga problema, ag mas gamhanan imaw kumpara sa gusto maghalit katon. Bisan may maeain nga nagakaeatabo katon makaron, makasalig kita nga makay-ad ron ni Jehova sa paeaabuton. Ro Biblia nagpalig-on katon: “Tipigi ro inyong kaugalingon sa gugma it Dyos.” (Judas 21) Padayon kita nga magpaeapit kay Jehova agud mabaton ro anang bulig sa malisud nga sitwasyon. Pero paano naton ron maobra?
IPAKITA RO PAGPALANGGA SA DYOS NGA NAGAPALANGGA KIMO
4, 5. Paano ginpakita ni Jehova ro anang pagpalangga katon?
4 Para mag-eapit kay Jehova, dapat naton masayran kon mauno na kita kapalangga. Isipa ro tanan nga gin-obra na katon. Gintao na ro manami nga eugta, mga tanom, ag sapat. Gintaw-an na man kita it manami nga pagkaon ag malimpyo nga tubi. Paagi sa Biblia, ginturo katon ni Jehova ro anang ngaean ag ro anang mga kinaiya. Eabaw sa tanan, ginpakita na ro anang pagpalangga katon kat ginpadaea na ro anang bugtong nga Unga, si Jesus, sa eugta agud itao ro anang kabuhi katon. (Juan 3:16) Ag tungod sa anang pagsakripisyo, may una kita manami nga pag-eaum sa paeaabuton.
5 Nagtukod si Jehova it Mesianikong Ginharian, eangitnon nga gubyerno nga magatapos sa tanan nga pag-antus. Pagaobrahon it Ginharian nga paraiso ro eugta, ag mabuhi ro tanan nga may katawhay ag kasadya sa owa’t katapusan. (Salmo 37:29) Ro paagi pa ni Jehova sa pagpalangga katon hay ro pagturo kon paano magkabuhi it mayad makaron. Ginasampit na man kita nga magpangamuyo kana, ag handa imaw pirme magpamati katon. Klaro nga ginpakita ni Jehova ro anang pagpalangga sa kada isaea katon.
6. Paano mo dapat ipakita ro pagpalangga kay Jehova?
6 Paano mo dapat ipakita ro pagpalangga kay Jehova? Mangin mapinasaeamaton sa tanan nga gin-obra na kimo. Makasueobo, abu makaron ro buko’t mapinasaeamaton. Kapareho man kat iya si Jesus sa eugta. Sa sang ka sitwasyon, ginpamayad ni Jesus ro napueo nga aruon, pero sambato eang ro nagpasaeamat kana. (Lucas 17:12-17) Gusto naton tuearon ratong nagpasaeamat kay Jesus. Gusto natong pasaeamatan pirme si Jehova.
7. Mauno’t daeum dapat ro imong pagpalangga kay Jehova?
7 Dapat man naton ipakita ro pagpalangga kay Jehova. Naghambae si Jesus sa anang disipulo nga dapat nanda palanggaon si Jehova sa andang bug-os tagipusoon, bug-os kaeag, ag bug-os huna-hona. (Basaha ro Mateo 22:37.) Ano ro buot hambaeon karon?
8, 9. Paano pa naton mapakita ro pagpalangga kay Jehova?
8 Indi eang kita basta maghambae nga palangga naton si Jehova. Kon palangga naton imaw sa atong bug-os tagipusoon, kaeag, ag huna-hona, makita ron sa atong ginaobra. (Mateo 7:16-20) Klaro nga ginaturo it Biblia nga kon palangga naton ro Dyos, tumanon naton ro anang mga sugo. Mabudlay baea ron? Bukon, tungod ay Jehova nga “mga sugo bukon man it mabudlay.”—Basaha ro 1 Juan 5:3.
9 Kon tumanon si Jehova, may una kita masadya ag kontento nga kabuhi. (Isaias 48:17, 18) Pero ano ro makabulig katon agud padayon nga mangin maeapit kay Jehova? Tan-awon ta.
PADAYON NGA MAGPAEAPIT KAY JEHOVA
10. Ham-an dapat ka magpadayon sa pagtuon parti kay Jehova?
10 Paano ka nangin amigo ni Jehova? Paagi sa imong pagtuon it Biblia, mas nakilaea mo imaw ag nangin amigo. Rayang pagpakig-amigo hay kapareho it nagadabdab nga kaeayo. Kapareho it kaeayo nga nagakinahang-ean it gatong agud magdabdab, dapat padayon ka magtuon parti kay Jehova agud magbakod ro imong pagpakig-amigo kana.—Hulubaton 2:1-5.
Kapareho it kaeayo, ro imong pagpalangga kay Jehova nagakinahang-ean it gatong agud magdabdab
11. Ano ro epekto kimo it padayon nga pagtuon sa Biblia?
11 Sa padayon nga pagtuon it Biblia, makatuon ka it mga bagay nga makapahueag sa imong tagipusoon. Tan-awa kon ano ro ginbatyag it daywang ka disipulo ni Jesus kat ginturo na ro mga tagna sa Biblia kanda. Naghambae sanda: “Abi ko man gali nga nagdabdab pareho it kaeayo ro atong baeatyagon kat maghambae imaw katon sa daeanon ag magsaysay ku mga Kasueatan!”—Lucas 24:32.
12, 13. (a) Ano ro pwedeng matabo sa atong pagpalangga sa Dyos? (b) Paano naton mapabakod ro pagpalangga kay Jehova?
12 Kapareho it mga disipulo, napahueag ro andang tagipusoon kat hatun-an nanda ro Kasueatan, basi makaron man ro imong ginbatyag kat naeubtan mo ro Biblia. Nakabulig ra kimo nga makilaea ag palanggaon si Jehova. Owa ka naila nga magtahaw rayang pagpalangga.—Mateo 24:12.
13 Kon mangin amigo ka eon it Dyos, maghugod agud magbakod ro imong pagpakig-amigo. Dapat padayon ka nga magtuon parti kana ag kay Jesus, isipa ro imong natun-an ag iaplikar sa imong kabuhi. (Juan 17:3) Kon basahon ag tun-an mo ro Biblia, mangutana ka: ‘Ano ro ginaturo kara kakon parti kay Jehova nga Dyos? Ham-an dapat ko imaw palanggaon sa akong bug-os tagipusoon ag kaeag?’—1 Timoteo 4:15.
14. Paano pa gid magbakod ro atong pagpalangga kay Jehova?
14 Kon may mayad ka nga amigo, pirme kamo gaistorya agud magbakod ro inyong pag-amigo. Kapareho man kon mag-istorya kita kay Jehova paagi sa pangamuyo, magabakod ro atong pagpalangga kana. (Basaha ro 1 Tesalonica 5:17.) Manami nga regalo ro pangamuyo halin sa atong eangitnon nga Ama. Dapat pirme kita kana mag-istorya halin sa tagipusoon. (Salmo 62:8) Dapat bukon it memoryado ro pangamuyo, pero dapat seryoso gid ro atong ginahambae. Huo, kon tun-an naton ro Biblia ag mangamuyo halin sa tagipusoon, magabakod ro atong pagpalangga kay Jehova.
ISUGID SA IBA RO PARTI KAY JEHOVA
15, 16. Ano para kimo ro pagwali nga ueobrahon?
15 Agud padayon kita nga mag-eapit kay Jehova, dapat man naton isugid sa iba ro atong pagtuo. Mabahoe nga pribilehiyo ro pagsugid sa iba parti kay Jehova. (Lucas 1:74) Responsibilidad ra nga gintao ni Jesus sa tanan nga Cristyano. Kada isaea katon dapat magwali it mayad nga balita ku Ginharian it Dyos. Haobra mo eon ra?—Mateo 24:14; 28:19, 20.
16 Importante gid ro pagwali para kay apostol Pablo; gintawag na ra nga “manggad.” (2 Corinto 4:7) Ro pagsugid sa iba parti kay Jehova ag sa anang katuyoan ro pinakaimportante nga maobra mo. Raya ro paagi nga maalagad mo si Jehova, ag ginaapresyar na gid ra. (Hebreo 6:10) Paagi sa pagwali, mabuligan mo ro imong kaugalingon ag ro nagapamati kimo nga mangin maeapit kay Jehova ag makabaton it kabuhi nga owa’t katapusan. (Basaha ro 1 Corinto 15:58.) May mas masadya pa baea kara?
17. Ham-an ginasakuan ro pagwali nga ueobrahon?
17 Mangin masako sa pagwali. Dapat naton “iwali ro bisaea,” ag “magmahugod.” (2 Timoteo 4:2) Dapat nga makabati ro mga tawo ku Ginharian it Dyos. Ro Biblia naghambae: “Maeapit eon ro mabahoe nga adlaw ni Jehova! Maeapit eon ra ag madasig nga nagapaeapit!” Ro katapusan “indi maulihi!” (Sofonias 1:14; Habacuc 2:3) Huo, madali eon lang dueaon ni Jehova ro maeaut nga kalibutan ni Satanas. Bago ron matabo, dapat paandaman anay ro mga tawo agud pilion nanda si Jehova.
18. Ham-an dapat naton simbahon si Jehova kaibahan it matuod nga mga Cristyano?
18 Gusto ni Jehova nga simbahon naton imaw kaibahan it matuod nga mga Cristyano. Ro Biblia naghambae: “Magkabaeaka kita sa kada isaea, nga nagabueoligan sa pagpakita it gugma ag sa paghimo it mayad. Ag indi naton pagkalipatan ro mag-adto sa atong mga pagtililipon, pareho sa ginahimo it iba. Sa baylo, pabaskugon pa gid naton ro kabubot-on it kada isaea, kapin pa nga nasayran ninyo nga maeapit eon ro Adlaw ku Ginuo.” (Hebreo 10:24, 25) Dapat gid kita mag-attend sa tanan nga miting. Mapalig-on ag mapabakod kara ro kada isaea.
19. Ano ro makabulig katon nga mangin maeapit sa mga igmanghod?
19 Kon mag-attend sa mga miting, makakita ka it mayad nga mga amigo nga makabulig kimo agud masimba si Jehova. Eain-eain nga mga igmanghod ro imong makilaea ag kapareho mo nga nagasimba gid kana. Kapareho mo, bukon man sanda it perpekto ag nagakasaea man. Ngani, dapat handa ka magpatawad kanda. (Basaha ro Colosas 3:13.) Pirmeng magtan-aw sa mayad nga mga ugali it mga igmanghod, paagi karon mapalangga mo sanda ag mangin maeapit ka pa gid kay Jehova.
RO MATUOD NGA KABUHI
20, 21. Ano ro “matuod nga kabuhi”?
20 Gusto ni Jehova nga may manami nga kabuhi ro anang mga amigo. Ginaturo katon it Biblia nga ro atong kabuhi sa paeaabuton eain gid makaron.
Gusto ni Jehova nga masadyahan ka sa “matuod nga kabuhi.” Gusto mo man?
21 Sa paeaabuton, mabuhi kita sa owa’t katapusan, bukon eang it 70 o 80 ka dag-on. Mangin masadya gid kita sa “kabuhi nga owa it katapusan” nga may una mayad nga pang-eawas, katawhay, ag kasadya sa manami nga paraiso. Gintawag ron it Biblia nga “matuod nga kabuhi.” Nagpromisa si Jehova nga taw-an na kita it matuod nga kabuhi, pero obrahon naton ro tanan agud “manginmalig-on.”—1 Timoteo 6:12, 19.
22. (a) Paano kita ‘manginmalig-on para sa matuod-tuod nga kabuhi’? (b) Ham-an indi naton mabaton ro matuod nga kabuhi kon kita eang?
22 Paano kita ‘manginmalig-on para sa matuod-tuod nga kabuhi’? Ro “paghimo it mayad” ag ‘magmanggaranon sa mayad nga mga buhat.’ (1 Timoteo 6:18) Nagakahueogan ra nga dapat iaplikar ro atong natun-an sa Biblia. Pero ro matuod nga kabuhi indi naton mabaton kon kita eang, tungod owa ra nakadepende katon. Regalo ra ni Jehova sa anang matutom nga mga alagad, pagpakita it anang “owa it tupong nga kabuot.” (Roma 5:15) Gusto gid it atong eangitnon nga Ama nga itao ra sa anang matutom nga mga alagad.
23. Ham-an dapat ka mag-obra it mayad nga desisyon makaron?
23 Mangutana ka, ‘Ginasimba ko baea ro Dyos sa paagi nga nailaan na?’ Kon may dapat ka bag-ohon, bag-oha eagi. Kon magsalig kita kay Jehova ag obrahon ro tanan agud tumanon imaw, si Jehova mangin atong daeangpan. Protektahan na ro matutom nga mga tawo sa rayang katapusan nga mga adlaw sa maeaut nga kalibutan ni Satanas. Siguraduhon gid ni Jehova nga mabuhi kita sa owa’t katapusan sa Paraiso, suno sa anang ginpromisa. Huo, mabaton mo ro matuod nga kabuhi kon mag-obra ka it mayad nga desisyon makaron.