Ano Ro Katuyoan It Dyos Sa Mga Tawo?

1. Ano ro katuyoan it Dyos sa mga tawo?

MAY manami nga katuyoan ro Dyos sa mga tawo. Gintuga na ro una nga eaki ag bayi, si Adan ag Eba, agud mag-estar sa manami nga hardin. Katuyoan it Dyos nga magpangunga sanda, obrahon nga paraiso ro bilog nga eugta, ag diparahon ro mga sapat.​—Genesis 1:28; 2:8, 9, 15; tan-awa ro Endnote 6.

2. (a) Ham-an nasayran naton nga tumanon it Dyos ro anang katuyoan? (b) Ano ro ginahambae it Biblia parti sa kabuhi nga owa’t katapusan?

² Mapati ka baea nga magaestar kita sa paraiso? Si Jehova naghambae: “Gintuyo ko ra, ag tumanon ko man ra.” (Isaias 46:9-11; 55:11) Huo, obrahon na kon ano ro anang katuyoan, ag owa it makapugong kana. May rason si Jehova sa pagtuga it eugta, “owa [imaw] nagtuga kara sa owa it pueos.” (Isaias 45:18) Gusto na estaran it tawo ro bilog nga eugta. Ano nga klasi it tawo ro gusto it Dyos mag-estar sa eugta, ag hasta hin-uno? Ro Biblia naghambae: “Ro mga matarung ro magatag-ana it eugta, ag magaestar sanda dikara sa owa it katapusan.”​—Salmo 37:29; Pahayag 21:3, 4.

3. Tungod ro mga tawo nagamasakit ag nagakamatay, ano ro mapangutana mo?

³ Pero ro mga tawo makaron nagamasakit ag nagakamatay. Sa kaeabanan nga lugar may pag-inaway ag pagpaeatyan. Bukon gid it raya ro katuyoan it Dyos. Pero, ano ro natabo ag ham-an? Ro Biblia eang ro makasabat.

RO KAAWAY IT DYOS

4, 5. (a) Sin-o ro nag-istorya kay Eba sa hardin it Eden paagi sa sawa? (b) Paano ro isaea ka tampad nga tawo nangin manakaw?

⁴ Ro Biblia nagahambae nga ro Dyos may kaaway nga “gintawag nga Yawa ag Satanas.” Gingamit ni Satanas ro sawa sa pag-istorya kay Eba sa hardin it Eden. (Pahayag 12:9; Genesis 3:1) Ginpaguwa na nga ro sawa ro nagaistorya.​—Tan-awa ro Endnote 7.

⁵ Gintuga baea it Dyos si Satanas nga Yawa? Owa! Ro anghel nga idto anay sa eangit kat ginpreparar it Dyos ro eugta para kanday Adan ag Eba nagbag-o ag nangin Yawa. (Job 38:4, 7) Paano ron natabo? Paano ro isaea ka tampad nga tawo nangin manakaw? Owa imaw gin-unga nga manakaw. Pero naghandum imaw it butang nga buko’t ana. Ginaisip na ra pirme, ag ro anang maeain nga handum nagabinaskog. Ngani, kat may kahigayunan, gintakaw na ra. Gin-obra na ro anang kaugalingon nga manakaw.​—Basaha ro Santiago 1:13-15; tan-awa ro Endnote 8.

6. Paano ro isaea ka anghel nangin kaaway it Dyos?

⁶ Duyon ro natabo sa ruyong anghel. Sa tapos nga gintuga ni Jehova si Adan ag Eba, nagsugo imaw kanda nga magpangunga ag ‘pun-on ro eugta.’ (Genesis 1:27, 28) Basi gin-isip it anghel, ‘Tanan nga tawo pwede magsimba kakon kaysa kay Jehova!’ Sa pag-inisip na kara, nagbaskog ro anang handum sa butang nga ana ni Jehova. Gusto ku anghel nga simbahon imaw it mga tawo. Ngani, ginpurilan na ag gindaya si Eba. (Basaha ro Genesis 3:1-5.) Paagi karon, imaw hay nangin Satanas nga Yawa, ro kaaway it Dyos.

7. (a) Ham-an namatay si Adan ag Eba? (b) Ham-an nagagueang kita ag nagakamatay?

⁷ Si Adan ag Eba owa nagtuman sa Dyos, nagkaon sanda it prutas. (Genesis 2:17; 3:6) Nagkasaea sanda, ag ku ulihi namatay, suno sa ginhambae ni Jehova. (Genesis 3:17-19) Ro mga inunga ni Adan ag Eba makasasaea man, ngani namatay sanda. (Basaha ro Roma 5:12.) Agud maeubtan naton kon ham-an ro mga inunga ni Adan ag Eba makasasaea man, may halimbawa. Kon gaobra kat tinapay nga ro hurmahan eupi, ro tinapay eupi man. Kat owa gintuman ni Adan ro Dyos, nangin makasasaea imaw. Tungod mga unga kita ni Adan, tanan kita makasasaea, o “eupi” pareho kana. Ag tungod tanan kita makasasaea, nagagueang kita ag nagakamatay.—Roma 3:23; tan-awa ro Endnote 9.

8, 9. (a) Ano ro gusto ipapati ni Satanas kay Adan ag Eba? (b) Ham-an owa eagi ginpatay ni Jehova ro mga rebelde?

⁸ Gin-umpisahan ni Satanas ro pagrebelde kay Jehova, kat gin-impluwensyahan na si Adan ag Eba nga indi pagtumanon ro Dyos. Gusto na sanda papatihon nga si Jehova purilon, maeain nga manoggahum ag owa naila ku pinakamanami nga kabuhi para kanda. Ginpaguwa ni Satanas nga indi kinahang-ean ku mga tawo ro Dyos sa pagturo kanda, makadesisyon sanda kon ano ro tama ag saea. Ngani, ano ro obrahon ni Jehova? Pwede na kunta sanda patyon agud matapos ro pagrebelde. Pero mapamatud-an baea kara nga si Satanas purilon? Indi gid.

⁹ Ngani, owa eagi ginpatay ni Jehova ro mga rebelde. Gintaw-an na it panahon nga gamhan it mga tawo ro andang kaugalingon. Nangin klaro ra nga purilon si Satanas ag si Jehova ro nakasayod it pinakamayad para sa mga tawo. Abu pa kitang matun-an sa Kapitulo 11 parti kara. Ano ing mahambae sa desisyon ni Adan ag Eba? Tama baea nga patihan nanda si Satanas ag indi pagsundon si Jehova? Tanan gintao kanda ni Jehova. Gintaw-an sanda it perpekto nga kabuhi, manami nga ilestaran, ag makapasadya nga mga obra. Pero owa gid si Satanas it haobra nga mayad para kanda. Kon idto ka, ano ing obrahon?

10. Ano ro importante nga desisyon ro atong obrahon?

¹⁰ Makaron, kada isaea katon may desisyon man nga obrahon, ag kabuhi ro nadaeahig kara. Makapili kita kon sundon naton si Jehova bilang Manoggahum ag makapamatuod nga si Satanas purilon o pilion si Satanas bilang manoggahum. (Salmo 73:28; basaha ro Hulubaton 27:11.) Makaron, sangkiri lang ro tawo nga nagasunod sa Dyos. Ngani, bukon gid imaw ro nagagahum sa kalibutan. Kon buko’t ro Dyos, sin-o?

SIN-O RO NAGAGAHUM SA KALIBUTAN?

11, 12. (a) Ano ro matun-an naton kat gintao ni Satanas ro tanan nga ginharian kay Jesus? (b) Ano nga mga kasueatan ro nagapakita nga si Satanas ro nagagahum it kalibutan?

¹¹ Si Jesus nakasayod kon sin-o gid ro nagagahum sa kalibutan. Sa natabo kato, ay Satanas nga “ginpakita kana ro tanan nga mga ginharian kung kalibutan ag ro andang kadayawan.” Ag nagpromisa imaw kay Jesus: “Raya tanan itao ko kimo, kon mag-euhod ka ag magsimba kakon.” (Mateo 4:8, 9; Lucas 4:5, 6) Kutan-a ing sarili, ‘Kon buko’t ay Satanas ratong mga ginharian, matao na baea rato kay Jesus?’ Indi. Si Satanas ro tag-ana it tanan nga gubyerno.

¹² Basi mag-isip ka: ‘Paano si Satanas nangin manoggahum it kalibutan? Di baea si Jehova ro Makagagahum sa tanan ag nagtuga ku uniberso?’ (Pahayag 4:10) Huo, imaw gid, pero gintawag ni Jesus si Satanas, “ro nagagahum ku rayang kalibutan.” (Juan 12:31; 14:30; 16:11) Si apostol Pablo nagtawag kay Satanas nga Yawa “nga diyos it rayang kalibutan.” (2 Corinto 4:3, 4) Ag si apostol Juan nagsueat nga “ro bilog nga kalibutan una sa idaeum ku paggahum kung Yawa.”​—1 Juan 5:19.

PAANO MALAGLAG RO KALIBUTAN NI SATANAS?

13. Ham-an kinahang-ean naton ro bag-ong kalibutan?

¹³ Rayang kalibutan nagalala pa gid ag peligruso. Makita naton ro inaway, korapsyon, pagkahipokrito ag kapintas. Bisan ano pa ro pagtinguha it mga tawo, indi gid maduea ro mga problema. Pero, madali lang gid tapuson it Dyos rayang maeaut nga kalibutan sa inaway it Armagedon, ag islan na raya it matarung nga bag-ong kalibutan.​—Pahayag 16:14-16; tan-awa ro Endnote 10.

14. Sin-o ro ginpili it Dyos nga mangin Hari ku Anang Ginharian? Ano ro gintagna it Biblia parti kay Jesus?

¹⁴ Ginpili ni Jehova si Jesu-Cristo nga mangin Hari ku Anang eangitnon nga gubyerno o Ginharian. Linibo ka dag-on ro nagtaliwan, gintagna it Biblia nga si Jesus magagahum bilang “Prinsipe it Paghidait” ag ro anang pagginubyerno owa’t katapusan. (Isaias 9:6, 7) Gintur-an ni Jesus ro anang mga sumoeunod nga ipangamuyo rayang gubyerno kat ginhambae na: “Umabot ro imong Ginharian matuman ro imong pagbuot, iya sa eugta pareho man sa eangit.” (Mateo 6:10) Matun-an naton sa Kapitulo 8 kon paano islan ku Ginharian it Dyos ro gubyerno it tawo. (Basaha ro Daniel 2:44.) Obrahon rayon ku Ginharian it Dyos ro eugta nga paraiso.​—Tan-awa ro Endnote 11.

MAEAPIT EON RO BAG-ONG KALIBUTAN!

15. Ano ro “bag-ong eugta”?

¹⁵ Ro Biblia nagpromisa: “Nagahueat kita it bag-o nga mga eangit ag it bag-o nga eugta nga ginaharian it katarungan.” (2 Pedro 3:13; Isaias 65:17) Kon amat, nagasambit ro Biblia it “eugta,” nga nagapatungod sa mga tawo nga gaestar kara. (Genesis 11:1) Ngani ro matarung nga “bag-ong eugta” gapatungod sa tanan nga tawo nga nagatuman sa Dyos ag ginpakamaayo nana.

16. Ano ro manami nga regalo ro ginatao it Dyos sa mga magaestar sa bag-ong kalibutan, ag ano atong obrahon agud mabaton rayang regalo?

¹⁶ Si Jesus nagpromisa nga ro magaestar sa bag-ong kalibutan ku Dyos, taw-an it “kabuhi nga owa it katapusan.” (Marcos 10:30) Ano ro atong obrahon agud mabaton rayang regalo? Pangabay basaha ro Juan 3:16 ag 17:3 agud makita ro sabat. Tan-awon naton ro ginaturo it Biblia kon mauno ro kabuhi sa Paraiso nga eugta.

17, 18. Ham-an nasayran naton nga sa ulihi may paghidait ag katawhay sa bilog nga eugta?

¹⁷ Maduea eon ro kaeautan, inaway, krimen, ag kapintas. Owa eon it maeauton nga mabilin sa eugta. (Salmo 37:10, 11) Papunduhon ku Dyos ro mga inaway sa bilog nga eugta. (Salmo 46:9; Isaias 2:4) Mapuno ro eugta it tawo nga nagapalangga sa Dyos ag nagatuman kana. May paghidait sa owa it katapusan.​—Salmo 72:7

¹⁸ Ro katawhan ni Jehova makabatyag it katawhay. Sa panahon it Biblia, may seguridad ro mga Israelinhon kat gintuman nanda ro Dyos. (Levitico 25:18, 19) Sa Paraiso, owa eon kita it kahadlukan. Pirme kita makabatyag it katawhay.​—Basaha ro Isaias 32:18; Miqueas 4:4.

19. Ham-an makasigurado kita nga may bugana nga pagkaon sa bag-ong kalibutan it Dyos?

¹⁹ May bugana nga pagkaon. “Mangin bugana ro mga uyas sa eugta; sa alipungto it kabukiran magahapayhapay ra.” (Salmo 72:16) Si Jehova “nga atong Dyos, hay magapakamaayo katon” ag “ro eugta hay magatao it anang patubas.”​—Salmo 67:6.

20. Ham-an nasayran naton nga ro bilog nga eugta mangin paraiso?

²⁰ Ro bilog nga eugta mangin paraiso. Ro mga tawo may manami nga mga baeay ag hardin. (Basaha ro Isaias 65:21-24; Pahayag 11:18.) Ro bilog nga eugta mangin manami pareho sa hardin it Eden kato. Itao ni Jehova ro tanan nga kinahang-eanon naton. Ro Biblia naghambae parti kana: “Ginahumead mo ro imo nga alima ag ginatao ro handum it kada buhi nga butang.”​—Salmo 145:16.

21. Ham-an nasayran naton nga may paghidait sa tunga it mga tawo ag sapat?

²¹ May paghidait sa tunga it mga tawo ag sapat. Ro mga sapat indi eon makapanakit sa mga tawo. Ro mga unga indi eon mahadlok sa mga sapat nga delikado makaron.​—Basaha ro Isaias 11:6-9; 65:25.

22. Ano ro obrahon ni Jesus sa mga gamasakit?

²² Owa eon it gamasakit. Kat iya si Jesus sa eugta, abung tawo ro anang ginpamayad. (Mateo 9:35; Marcos 1:40-42; Juan 5:5-9) Pero, bilang Hari ku Ginharian it Dyos, pamayron ni Jesus ro tanan. Owa eon it magahambae: “Gamasakit ako.”​—Isaias 33:24; 35:5, 6.

23. Ano ro obrahon ku Dyos sa mga patay?

²³ Mabuhi it uman ro mga patay. Ginpromisa ku Dios nga banhawon ro minilyon nga tawo nga nagkaeamatay. “Pagabanhawon it Dyos halin sa mga minatay ro tanan nga tawo, matarung man ukon maeain.”​—Basaha ro Juan 5:28, 29; Binuhatan 24:15.

24. Gusto mo baea mag-estar sa paraiso?

²⁴ Tanan kita makapili. Pwede naton pilion nga magtuon parti kay Jehova ag alagaron imaw o obrahon eang ro gusto naton. Kon pilion ta nga alagaron si Jehova, may manami kita nga paeaabuton. Kat naghingyo ro tawo kay Jesus nga imaw hay dumdomon kon patay eon imaw, si Jesus nagpromisa: “Manginkaibahan ka nakon sa Paraiso.” (Lucas 23:43) Tun-an naton it dugang ro parti kay Jesu-Cristo ag kon paano na tumanon ro manami nga mga promisa it Dyos.