KAPITULO 11
Ham-an Abu Ro Pag-antus?
1, 2. Ano ro ginapangutana it abu nga tawo?
GINWASAK it tsunami ro banwa. Nagpamaril ro eaki sa simbahan, abu ro naigo ag may mga namatay. Ro sang ka nanay namatay tungod sa cancer, may anang limang ka unga nga haaywan.
2 Kon may kapareho karon nga mga kalamidad ag trahedya, abu nga tawo ro nagapangutana, “Ham-an?” Nangawa sanda kon ham-an abu nga kaakig ag pag-antus sa kalibutan. Hapangutana mo man baea ra?
3, 4. (a) Ano ro ginpangutana ni Habacuc? (b) Ano ro ginsabat ni Jehova kana?
3 Sa Biblia, natun-an naton ro sang ka eaki nga may madaeum nga pagtuo sa Dyos nagkutana man. Halimbawa, si propeta Habacuc nagpangutana kay Jehova: “Ham-an gin-obra mo akong saksi sa kaeautan? Ag ham-an ginpabay-an mo ro pag-eupig? Ham-an nakita ko ro pagwasak ag pagpamintas? Ag ham-an abu ro nagailinaway ag nagasilinangag?”—Habacuc 1:3.
4 Sa Habacuc 2:2, 3, mabasa naton ro sabat it Dyos kay Habacuc ag ro Anang promisa agud makay-ad ro sitwasyon. Mabahoe ro pagpalangga it Dyos sa mga tawo. Ro Biblia naghambae: “Nagakabaeaka imaw kinyo.” (1 Pedro 5:7) Sa pagkamatuod, owa naila ro Dyos sa grabi nga pag-antus. (Isaias 55:8, 9) Tun-an naton ro pangutana nga, Ham-an grabi ro pag-antus sa kalibutan?
HAM-AN GRABI RO PAG-ANTUS?
5. Ano ro pirmeng ginahambae it mga manogturo it relihiyon sa pag-antus? Ano ro ginaturo it Biblia?
5 Ro mga pastor, pari, ag manogturo it relihiyon pirme nagahambae nga pagbuot it Dyos nga mag-antus ro mga tawo. Ro iba nagahambae nga tanan nga nagakatabo sa tawo, kaibahan ro mga trahedya, naghalin sa Dyos ag owa kita kasayod kon ham-an. Ro iba mat-a nagapati nga ro mga tawo, kaibahan ro mga eapsag, namatay agud makaibahan it Dyos sa eangit. Pero buko’t matuod ron. Owa naghalin sa Dyos ro maeain nga nagakatabo. Ro Biblia naghambae: “Imposible sa matuod nga Dyos nga mag-obra it maeaut, nga ro Eabing Gamhanan mag-obra it saea!”—Job 34:10.
6. Ham-an abu nga tawo ro nagabasoe sa Dyos tungod sa tanan nga pag-antus?
6 Abu nga tawo ro nagabasoe sa Dyos tungod sa tanan nga pag-antus, gapati sanda nga ro Dyos ro nagagahum sa kalibutan. Pero hatun-an naton sa Kapitulo 3, si Satanas nga Yawa ro manoggahum it kalibutan.
7, 8. Ham-an may grabi nga pag-antus sa kalibutan?
7 Nagasugid katon ro Biblia nga “ro bilog nga kalibutan una sa idaeum ku paggahum kung Yawa.” (1 Juan 5:19) Ro manoggahum it rayang kalibutan, si Satanas, maeain ag mapintas. Imaw ro “nagpataeang kung bilog nga kalibutan.” (Pahayag 12:9) Abu ro nagtuead kana, ag ruyon ro sambatong rason kon ham-an abu it kapurilan, kaakig, ag kapintas sa kalibutan.
8 Abu pa it rason kon ham-an may grabi nga pag-antus sa kalibutan. Pagkatapos magrebelde si Adan ag Eba, ginpasa nanda ro saea sa andang mga unga. Ag tungod sa saea, ginapaantus ku iba ro andang isigkatawo. Gusto nanda nga mangin importante kaysa iba. Nagainaway sanda, nagaagto sa gera ag ginadaug-daog ro iba. (Manugwali 4:1; 8:9) Kon amat nagaantus ro mga tawo tungod sa “owa ginapaabot nga matabo.” (Manugwali 9:11) Basi una sanda sa lugar nga may maeain nga natabo ag naapektuhan sanda.
9. Ham-an masigurado naton nga may mayad nga rason si Jehova nga ginapasugtan na ro pag-antus?
9 Owa naghalin kay Jehova ro mga pag-antus. Buko’t imaw ro baeasoeon sa inaway, krimen, ag pagmaltrato sa iba. Owa kana naghalin ro mga linog, bagyo, ag baha. Pero basi mangawa ka, ‘Kon si Jehova ro gamhanan sa bilog nga uniberso, ham-an owa na ginduea ro maeain nga nagakatabo?’ Sayod naton nga nagakabaeaka katon ro Dyos, ngani may mayad imaw nga rason kon ham-an ginapasugtan na ro pag-antus.—1 Juan 4:8.
HAM-AN GINPASUGTAN IT DYOS RO PAG-ANTUS?
10. Paano ginhangkat ni Satanas si Jehova?
10 Sa hardin it Eden, ginpataeang it Yawa si Adan ag Eba. Ginhangkat ni Satanas ro Dyos nga maeain nga Manoggahum. Naghambae imaw nga mahikaw si Jehova sa pagtao it manami nga butang kanday Adan ag Eba. Gusto ni Satanas nga magpati sanda nga mas mayad imaw nga manoggahum kaysa kay Jehova ag bukon nanda it kinahang-ean ro Dyos.—Genesis 3:2-5; tan-awa ro Endnote 27.
11. Ano ro pangutana nga sabton naton?
11 Owa nagtuman si Adan ag Eba kay Jehova ag nagrebelde kana. Abi nanda may kinamatarung sanda sa pagdesisyon sa andang sarili kon ano ro tama ag saea. Paano ginpamatud-an ni Jehova nga saea sanda ag imaw eang ro nakasayod kon ano ro mayad para kanda?
12, 13. (a) Ham-an owa eagi ginduea ni Jehova ro mga nagrebelde? (b) Ham-an ginpasugtan ni Jehova si Satanas nga gamhan ro kalibutan ag ro mga tawo nga gamhan ro andang sarili?
12 Owa eagi ginduea ni Jehova sanday Adan ag Eba. Ginsugtan pa sanda nga mag-unga. Ginpapili rayon ni Jehova ro mga unga ni Adan ag Eba kon sin-o ro manoggahum nga gusto nanda. Katuyoan ni Jehova nga pun-on it perpekto nga mga tawo ro eugta, ag matabo gid ron maskin ano pa ro obrahon it Yawa.—Genesis 1:28; Isaias 55:10, 11.
13 Ginhangkat ni Satanas si Jehova sa atubang it minilyon nga anghel. (Job 38:7; Daniel 7:10) Ngani, gintaw-an pa imaw ni Jehova it tyempo agud pamatud-an kon matuod ro anang ginpabangud. Ginpasugtan na man ro mga tawo nga magtukod it gubyerno sa idaeum ku pagdumaea ni Satanas agud ipakita kon kaya nanda nga owa’t bulig it Dyos.
14. Ano ro napamatud-an?
14 Linibo eon ka dag-on nga ginagamhan it mga tawo ro andang sarili, pero owa sanda nagmadinaeag-on. Napamatud-an nga purilon si Satanas. Kinahang-ean gid it mga tawo ro bulig it Dyos. Tama si propeta Jeremias kat paghambae na nga: “O Jehova, nasayran ko gid nga owa it ikasarang ro tawo sa paggiya it anang daeanon. Owa it ikasarang ro tawo sa paggiya it anang tikang.”—Jeremias 10:23.
HAM-AN NAGHUEAT IT MABUHAY SI JEHOVA?
15, 16. (a) Ham-an ginsugtan ni Jehova nga magbuhay ro pag-antus? (b) Ham-an owa ginduea ni Jehova ro problema nga halin kay Satanas?
15 Ham-an ginsugtan ni Jehova nga magbuhay ro pag-antus? Ham-an owa na ginduea ro maeain nga nagakatabo? Nagakinahang-ean it tyempo agud makita nga owa nagmadinaeag-on si Satanas. Gintestingan it mga tawo ro tanan nga paagi it paggubyerno, pero owa nagmadinaeag-on. Maskin pa nag-uswag sanda sa syensya ag teknolohiya, abu man gihapon nga inhustisya, gutom, krimen, ag inaway makaron. Indi kita magmadinaeag-on kon owa ro Dyos.
16 Pero owa ginduea ni Jehova ro problema nga naghalin kay Satanas. Kon gin-obra na ra, matsa nagsuporta imaw sa paggahum ni Satanas, ag indi Na gid pag-obrahon ron. Ag magapati man ro mga tawo nga kaya nanda gamhan ro andang sarili. Pero kapurilan ron, ag indi gid sanda pagsuportahan ni Jehova. Bukon imaw it purilon.—Hebreo 6:18.
17, 18. Ano ro obrahon ni Jehova sa tanan nga ginsamad ni Satanas?
17 Makay-ad baea ni Jehova ro tanan nga ginsamad it pagrebelde ni Satanas ag ku mga tawo? Huo. Sa Dyos, tanan nga butang posible. Nakasayod si Jehova kon hin-uno sabton ro tanan nga hangkat ni Satanas kana. Obrahon na rayon nga paraiso ro eugta. Tanan nga una sa “eubnganan” banhawon. (Juan 5:28, 29) Indi eon magmasakit o mamatay ro mga tawo. Dueaon ni Jesus ro tanan nga ginsamad ni Satanas. Gamiton ni Jehova si Jesus “sa pagwasak ku mga obra kung Yawa.” (1 Juan 3:8) Nagapasaeamat kita nga nangin mapinasensyahon si Jehova ngani nakilaea naton imaw ag napili imaw bilang atong Manoggahum. (Basaha ro 2 Pedro 3:9, 10.) Gabulig imaw katon agud mabatas ro pag-antus.—Juan 4:23; basaha ro 1 Corinto 10:13.
18 Owa kita ginapilit ni Jehova nga pilion imaw bilang atong Manoggahum. Gintaw-an na kita it regalo nga kahilwayan sa pagpili. Tan-awon naton kon ano para kimo rayang regalo.
PAANO MO GAMITON RO REGALO IT KAHILWAYAN SA PAGPILI?
19. Ano ro manami nga regalo nga gintao katon ni Jehova? Ham-an pasaeamatan naton rayang regalo?
19 Gintaw-an kita ni Jehova it manami nga regalo ro kahilwayan sa pagpili, ngani eain gid kita sa mga sapat. Nagahueag sanda tungod sa instincts o kinaugali, pero makapili kita kon paano magkabuhi ag makadayaw kay Jehova. (Hulubaton 30:24) Bukon man kita it robot nga naka-program kon ano ro obrahon. Hilway kita nga makapili kon ano ro atong gusto, sin-o atong mga amigo, ag kon ano ro obrahon sa atong kabuhi. Gusto ni Jehova nga masadyahan kita sa atong kabuhi.
20, 21. Ano ro mayad nga pagpili nga maobra mo makaron?
20 Gusto ni Jehova nga palanggaon naton imaw. (Mateo 22:37, 38) Kaparehas imaw it sang ka tatay nga naila makabati kon maghambae ro anang unga, “Palangga ko ikaw” nga halin sa tagipusoon ag owa napilitan. Gintaw-an kita ni Jehova it kahilwayan sa pagpili kon alagaron naton imaw o indi. Ginpili nanday Satanas, Adan, ag Eba nga sikwayon si Jehova. Paano mo gamiton ro regalo it kahilwayan sa pagpili?
21 Gamita ro kahilwayan sa pagpili agud maalagad si Jehova. Minilyon ro nagpili nga dayawon ro Dyos ag isikway si Satanas. (Hulubaton 27:11) Ano ro imong obrahon makaron agud igto ka sa bag-ong kalibutan it Dyos kon dueaon na eon ro mga pag-antus? Masabat ron sa masunod nga kapitulo.