Ro Pantubos​—Pinakaimportante Nga Regalo It Dyos

1, 2. (a) Ham-an maapresyar mo ro regalo? (b) Ham-an pinakaimportante nga regalo it Dyos ro pantubos?

ANO ro pinakamanami nga regalo nga habaton mo? Indi kinahang-ean nga maeahaeon ro regalo agud mangin importante. Maapresyar mo ro regalo kon makapasadya kimo ag kinahang-ean mo gid.

² Sa tanan nga regalo nga gintao katon it Dyos, may isaeang ka regalo nga kinahang-ean gid naton. Raya ro pinakaimportante nga regalo it Dyos sa mga tawo. Sa rayang kapitulo, matun-an naton nga ginpadaea ni Jehova ro anang Unga, si Jesu-Cristo, agud mabuhi kita sa owa’t katapusan. (Basaha ro Mateo 20:28.) Sa pagpadaea kay Jesus iya sa eugta bilang pantubos, ginpamatud-an ni Jehova nga palangga na gid kita.

ANO RO PANTUBOS?

3. Ham-an gakamatay ro mga tawo?

³ Ro pantubos hay paagi ni Jehova agud maeuwas ro mga tawo sa saea ag kamatayon. (Efeso 1:7) Agud maeubtan kon ham-an kinahang-eanon ro pantubos, sayuron naton ro natabo linibo ka dag-on ro nagtaliwan sa hardin it Eden. Ro atong unang ginikanan, si Adan ag Eba, nagkasaea. Tungod sa saea, namatay sanda. Gakamatay man kita tungod namana naton ro saea halin kay Adan ag Eba.​—Tan-awa ro Endnote 9.

4. Sin-o si Adan, ag ano ro may una kana?

⁴ Kat gintuga ni Jehova ro una nga tawo, si Adan, gintaw-an na imaw it hamili nga regalo. May una imaw perpekto nga kabuhi, isip, ag eawas. Indi imaw magmasakit, magtigueang ag mamatay. Tungod gintuga ni Jehova si Adan, matsa tatay na eon imaw. (Lucas 3:38) Si Jehova pirme nagaistorya kana. Klaro nga ginhambae it Dyos kay Adan kon ano ro anang ginaeauman kana ag gintaw-an imaw it makapasadya nga mga ueobrahon.​—Genesis 1:28-30; 2:16, 17.

5. Ano ro buot hambaeon it Biblia kat gintuga si Adan sa “larawan it Dyos”?

⁵ Si Adan gintuga sa “larawan it Dyos.” (Genesis 1:27) Gintaw-an imaw ni Jehova it mga ugali o kinaiya kapareho kana, nga may gugma, kaaeam, katarungan, ag gahum. Gintaw-an na si Adan it kahilwayan. Bukon imaw it robot. Gintuga imaw it Dyos agud makapili it tama ag saea. Kon gintuman na ro Dyos, mabuhi kunta imaw sa Paraiso sa owa’t katapusan.

6. Kat owa nagtuman si Adan sa Dyos, ano ro naduea na? Paano ra nakaapekto katon?

⁶ Kat owa imaw nagtuman sa Dyos ag ginpinahan it kamatayon, nagbayad si Adan it mabahoe nga bili. Naduea na ro manami nga kaangtanan kay Jehova, perpektong kabuhi, ag paraiso nga ilestaran. (Genesis 3:17-19) Ginpili ni Adan ag Eba nga indi magtuman sa Dyos, ngani owa sanda it pag-eaum. Sa gin-obra ni Adan, “Ro saea nagsueod sa kalibutan paagi sa sambatong ka tawo, ag ro anang saea nagdaea it kamatayon. Tungod kara ro kamatayon nag-abot sa tanan nga mga tawo, ay ro tanan nga mga tawo hay nagpakasaea.” (Roma 5:12) Kat nagkasaea si Adan, “ginbaligya” na ro anang kaugalingon pati kita sa pagkaulipon sa saea ag kamatayon. (Roma 7:14) May pag-eaum pa baea kita? Huo, may una gid.

7, 8. Ano ro pantubos?

⁷ Ano ro pantubos? May daywang ka rason nga nadaeahig sa pantubos. Una, ro pantubos bili nga ginabayad agud matubos o mabawi ro sang ka bagay. Pangaywa, ro pantubos bili nga ginatabon o ginabayad para sa kantidad it sang ka bagay.

⁸ Owa’t tawo nga makabayad sa grabi nga kasamaran nga gin-obra ni Adan kat nagkasaea imaw ag nagdaea it kamatayon katon. Pero nagtao si Jehova it paagi agud maeuwas kita sa saea ag kamatayon. Matun-an naton kon paano ro pantubos makabulig ag paano kita makabenepisyo.

PAANO NI JEHOVA GINTAO RO PANTUBOS?

9. Paano mabayran ro pantubos?

⁹ Owa it bisan sin-o katon ro makabayad it pantubos para sa perpekto nga kabuhi nga ginduea ni Adan. Ham-an it owa? Tungod tanan kita buko’t perpekto. (Salmo 49:7, 8) Ro pantubos nga ibayad dapat sang ka perpekto man nga kabuhi it tawo. Ngani gintawag ra nga ‘katumbas nga pantubos.’ (1 Timoteo 2:6) Ro pantubos may pareho man nga balor sa ginduea nga kabuhi ni Adan.

10. Paano gintao ni Jehova ro pantubos?

¹⁰ Paano gintao ni Jehova ro pantubos? Ginpadaea ni Jehova ro anang palangga nga Unga iya sa eugta. Rayang Unga, si Jesus, ro anang unang gintuga. (1 Juan 4:9, 10) Handa gid si Jesus nga aywanan ro anang Ama ag anang ilestaran sa eangit. (Filipos 2:7) Ginsaylo ni Jehova si Jesus halin sa eangit paagto sa eugta, ag gin-unga si Jesus bilang perpekto nga tawo, nga owa’t saea.​—Lucas 1:35.

11. Paano ro sang ka tawo mangin pantubos para sa tanan?

¹¹ Ginduea ni Adan ro anang perpektong kabuhi para sa tanan nga tawo kat owa imaw nagtuman kay Jehova. May una baea sang ka tawo nga makaduea it kamatayon para sa mga inunga ni Adan? Huo. (Basaha ro Roma 5:19.) Si Jesus nga owa’t saea, nagtao it anang perpekto nga kabuhi bilang pantubos. (1 Corinto 15:45) Paagi sa anang perpekto nga kabuhi maduea ro kamatayon para sa mga inunga ni Adan.​—1 Corinto 15:21, 22.

12. Ham-an kinahang-ean mag-antus si Jesus?

¹² Ginasugid it Biblia kon paano nag-antus si Jesus bago imaw namatay. Ginbunae, gineansang sa usok, ag amat-amat nga ginpaantus sa masakit nga kamatayon. (Juan 19:1, 16-18, 30) Ham-an kinahang-ean mag-antus si Jesus? Tungod ginhambae ni Satanas nga owa’t tawo nga matutom sa Dyos kon makaagi it kabudlayan. Ginpamatud-an ni Jesus nga ro perpekto nga tawo makapabilin nga matutom sa Dyos bisan sa grabi nga pag-antus. Ginapabugae gid ni Jehova si Jesus!​—Hulubaton 27:11; tan-awa ro Endnote 15.

13. Paano ginbayad ro pantubos?

¹³ Paano ginbayad ro pantubos? Gintao ni Jesus ro balor it anang kabuhi sa anang Ama. Sa Judiyo nga kalendaryo, ku dag-on 33 C.E, Nisan 14 ginsugtan ni Jehova ro mga kaaway ni Jesus nga patyon imaw. (Hebreo 10:10) Pagtaliwan ku tatlong adlaw, ginbalik ni Jehova ro kabuhi ni Jesus, buko’t bilang tawo kundi bilang espiritu nga persona. Kat nagbalik si Jesus sa anang Ama sa eangit, gintao na kay Jehova ro balor it anang perpekto nga kabuhi bilang pantubos. (Hebreo 9:24) Makaron nga ginbayad eon ro pantubos, may tsansa kita nga mahilway sa saea ag kamatayon.​—Basaha ro Roma 3:23, 24.

PAANO KA MAKABENEPISYO SA PANTUBOS?

14, 15. Agud mapatawad ro atong mga saea, ano ro atong obrahon?

¹⁴ Nakabenepisyo eon kita sa rayang importante nga regalo it Dyos. Tan-awon naton kon paano kita makabenepisyo makaron ag sa paeaabuton.

¹⁵ Mapatawad ro atong saea. Mabudlay pirme obrahon ro tama. Nagakasaea kita, ag kon amat nagaobra o nagahambae kita it maeain. (Colosas 1:13, 14) Paano kita mapatawad? Mangayo kita it pasensya sa atong saea nga haobra ag mapainuboson nga mangabay it patawad kay Jehova. Makasalig gid kita nga patawaron ro atong mga saea.​—1 Juan 1:8, 9.

16. Ano ro atong obrahon agud makabaton it mayad nga konsensya?

¹⁶ Makabaton kita it mayad nga konsensya. Kon nakaobra kita it maeain, nakonsensya kita ag nagabatyag nga owa’t pag-eaum o owa’t pueos. Pero indi madueaan it pag-eaum. Kon mangayo kita it patawad kay Jehova, makasalig gid kita nga gapamati ag gapatawad imaw katon. (Hebreo 9:13, 14) Bilang resulta, may una kita paghidait sa Dyos.

17. Ano nga mga pagpakamaayo ro atong mabaton tungod namatay si Jesus?

¹⁷ May pag-eaum kita nga mabuhi sa owa’t katapusan. “Ay ro kamatayon ruyon ro bayad sa saea, pero ro regalo it Dyos hay ro kabuhi nga owa it katapusan sa paghiusa kay Cristo Jesus nga atong Ginuo.” (Roma 6:23) Tungod namatay si Jesus para katon, may kabuhi kita nga owa’t katapusan ag perpekto nga pang-eawas. (Pahayag 21:3, 4) Pero, ano atong obrahon agud mabaton rayang pagpakamaayo?

BATUNON MO BAEA RO PANTUBOS?

18. Paano naton nasayran nga palangga kita ni Jehova?

¹⁸ Isipa ing mabatyagan kon may magtao kimo it manami nga regalo. Ro pantubos ro hamili nga regalo sa tanan, ag magapasaeamat gid kita kay Jehova tungod kara. Nagasugid ro Juan 3:16 katon nga “ginhigugma gid it Dyos ro kalibutan sa bagay nga gintao nana ro anang bugtong nga Unga.” Huo, palangga kita ni Jehova ngani gintao na ro anang hamili nga Unga, si Jesus. Ag sayod man naton nga palangga kita ni Jesus, tungod handa imaw mamatay para katon. (Juan 15:13) Ro regalo nga pantubos makapakumbinsi kimo nga palangga ka ni Jehova ag ni Jesus.​—Galacia 2:20.

19, 20. (a) Paano ka mangin amigo ni Jehova? (b) Paano mo mapakita nga ginabaton mo ro sakripisyo nga pantubos ni Jesus?

¹⁹ Makaron nga hatun-an mo ro mabahoe nga pagpalangga kimo it Dyos, paano ka nana mangin amigo? Buko’t madali palanggaon ro isaea nga bukon mo it kilaea. Sa Juan 17:3 nagahambae nga pwede naton makilaea si Jehova. Sa pag-obra mo kara, magadaeum ro pagpalangga mo kana, gusto mo madayaw imaw, ag mangin imong amigo.​—1 Juan 5:3.

²⁰ Batuna ro sakripisyo nga pantubos ni Jesus. Ro Biblia nagahambae nga “ro bisan sin-o nga nagatuo sa Unga may kabuhi nga owa it katapusan.” (Juan 3:36) Ano ro kahueogan it nagatuo? Nagakahueogan ra nga obrahon naton ro ginturo ni Jesus. (Juan 13:15) Indi eang basta maghambae nga nagapati kita kay Jesus. Agud mabaton ro pantubos, dapat maghueag kita suno sa atong pagtuo. Sa Santiago 2:26, mabasa naton: ‘ro pagtuo kon owa it mga binuhatan patay.’

21, 22. (a) Ham-an dapat kita mag-attend sa Memoryal it kamatayon ku Cristo kada dag-on? (b) Ano ro matun-an naton sa Kapitulo 6 ag 7?

²¹ Mag-attend sa Memoryal it kamatayon ku Cristo. Kat gabii bago namatay si Jesus, nagturo imaw katon nga iselebrar ro anang kamatayon. Kada dag-on ginaobra naton ra, ginatawag ra nga Memoryal o “Paihapon ku Ginuo.” (1 Corinto 11:20; Mateo 26:26-28) Gusto ni Jesus nga dumdomon naton ro pagtao na it anang perpektong kabuhi bilang pantubos. Naghambae imaw: “Himoa ninyo raya sa handumanan nakon.” (Basaha ro Lucas 22:19.) Kon mag-attend ka sa Memoryal, mapakita mo nga ginadumdom mo ro mabahoe nga pagpalangga ni Jehova ag ni Jesus para katon.​—Tan-awa ro Endnote 16.

²² Ro pantubos hay pinakaimportante nga regalo nga mabaton mo. (2 Corinto 9:14, 15) Makabenepisyo ro minilyon nga tawo nga namatay sa rayang hamili nga regalo. Matun-an naton sa Kapitulo 6 ag 7, kon paano ra mangin posible.