Siin Kita Gaagto Kon Mamatay?

1-3. Ano ro pirmeng ginapangutana it mga tawo parti sa kamatayon, ag ano ro ginasabat it ibang relihiyon?

NAGPROMISA ro Biblia katon nga magaabot ro panahon nga “owa eon it kamatayon.” (Pahayag 21:4) Natun-an naton sa Kapitulo 5 nga paagi sa pantubos makabaton kita it kabuhi nga owa’t katapusan. Pero gakamatay gihapon ro mga tawo. (Manugwali 9:5) Sambilog sa pirme naton ginapanguta, Ano ro matabo kon mamatay kita?

² Ro sabat sa ruyong pangutana importante gid kapin pa kon may palangga kita nga namatay. Gaisip kita: Siin imaw nag-agto? Gatan-aw baea imaw katon? Mabuligan na baea kita? Makita pa baea naton imaw it uman?

³ Eain-eain ro sabat it mga relihiyon. Ro iba nagaturo nga kon mabuot, gaagto ka sa eangit ag kon maeain, masunog ka sa impyerno. Ro iba man nagahambae nga kon mamatay ka mangin espiritu ag makaibahan ro namatay mo nga pamilya. Ag ro iba pa gid nagahambae nga pagkatapos mamatay may paghukom, matawo kat uman, o mabuhi sa iba nga eawas, basi kon sa ibang tawo o sapat.

4. Ano ro ginaturo it mga relihiyon parti sa kamatayon?

⁴ Eain-eain ro ginaturo it mga relihiyon. Pero kaeabanan kanda nagaturo it paeareho nga ideya. Nagaturo sanda nga kon mamatay ro sang ka tawo may parte it anang eawas ro nagakabuhi gihapon. Matuod baea ron?

SIIN KITA GAAGTO KON MAMATAY?

5, 6. Ano ro matabo kon mamatay kita?

⁵ Si Jehova nakasayod kon ano ro matabo katon kon mamatay kita, ag naghambae imaw katon nga kon mamatay ro sang ka tawo, maduea eon ro anang kabuhi. Ro kamatayon kabaliskaran it kabuhi. Ngani kon mamatay ro sang ka tawo, ro anang baeatyagon ag isip owa eon nagakabuhi bisan siin.a Kon kita mamatay indi eon kita makakita, makabati, ag makaisip.

⁶ Si Haring Solomon nagsueat, ro mga patay owa eon it hasayran. Ro mga patay indi makapalangga o maakig, “owa eon it obra o pagplano o kaaeam sa Eubnganan.” (Basaha ro Manugwali 9:5, 6, 10.) Ro Biblia nagasugid katon sa Salmo 146:4, nga kon ro sang ka tawo mamatay ro “anang painu-ino” patay man.

RO GINHAMBAE NI JESUS PARTI SA KAMATAYON

7. Ano ro ginhambae ni Jesus parti sa kamatayon?

⁷ Kat namatay ro mayad nga amigo ni Jesus nga si Lazaro, naghambae imaw sa anang mga disipulo: “Ro atong amigo nga si Lazaro nagakatueog.” Pero owa ron nagakahueogan nga gapahuway eang imaw. Hambae ni Jesus: “Namatay si Lazaro.” (Juan 11:11-14) Ngani ginkumpara ni Jesus ro kamatayon sa pagkatueog. Owa imaw naghambae nga si Lazaro idto sa eangit o kaibahan ro anang pamilya nga namatay. Ag owa man imaw naghambae nga nag-antus si Lazaro sa impyerno o nabuhi sa ibang eawas o sapat. Kundi si Lazaro pareho ku nagakatueog it hamuok. Ginkumpara it ibang kasueatan ro kamatayon sa hamuok nga katueogon. Naghambae ro Biblia kat ginpatay si Esteban, ‘nagtueog imaw sa kamatayon.’ (Binuhatan 7:60) Si apostol Pablo nagsueat man nga ro ibang mga Cristyano ‘nagtueog eon sa kamatayon.’​—1 Corinto 15:6.

8. Ham-an nasayran naton nga owa gintuga it Dyos ro mga tawo agud mamatay?

⁸ Gintuga baea it Dyos si Adan ag Eba agud mamatay? Owa! Gintuga sanda ni Jehova agud mangin masadya ro andang kabuhi sa owa’t katapusan ag may mayad nga pang-eawas. Kat gintuga ni Jehova ro mga tawo, gintaw-an na sanda it handum nga mabuhi sa owa’t katapusan. (Manugwali 3:11) Owa naila ro mga ginikanan nga makita ro andang mga unga nga nagatigueang ag nagakamatay, makaruyon man si Jehova katon. Pero kon gintuga kita it Dyos nga mabuhi it owa’t katapusan, ham-an gakamatay kita?

HAM-AN GAKAMATAY KITA?

9. Ham-an buko’t malisud sundon ro sugo nga gintao ni Jehova kay Adan ag Eba?

⁹ Sa hardin it Eden, naghambae si Jehova kay Adan: “Makapaayaw ka it kaon sa tanan nga bunga it kahoy iya sa hardin. Pero ayaw gid pagkan-a ro kahoy nga nagatao it kaaeam kon ano ro mayad ag maeain, ay kon kan-on mo ron mamatay ka gid.” (Genesis 2:9, 16, 17) Ruyong klaro nga sugo buko’t malisud sundon, ag si Jehova may awtoridad sa paghambae kay Adan ag Eba kon ano ro mayad ag maeain. Sa pagtuman kay Jehova, ginapakita nanda ro pagtahod sa anang awtoridad. Mapakita man nanda ro pagpasaeamat sa tanan nga gintao kanda.

10, 11. (a) Paano ginpataeang ni Satanas si Adan ag Eba? (b) Ham-an owa gid it kapatawaran ro gin-obra nanday Adan ag Eba?

¹⁰ Makapasubo, owa nagtuman si Adan ag Eba kay Jehova. Naghambae si Satanas kay Eba: “Matuod gid baea nga naghambae ro Dyos nga indi kamo kakaon sa tanan nga bunga it kahoy iya sa hardin?” Nagsabat si Eba: “Pwede kami makakaon it tanan nga bunga iya sa hardin. Pero kon sa bunga it kahoy nga una sa tunga it hardin, naghambae ro Dyos: ‘Ayaw gid ninyo pagkan-a, o bisan pagtabinga, ay kon obrahon ninyo ra, mamatay kamo.’”​—Genesis 3:1-3.

¹¹ Si Satanas naghambae: “Indi kamo mamatay. Hasayran it Dyos nga kon makakaon kamo karon, magamukeat ro inyong mga mata ag mangin pareho eon dayon kamo it Dyos nga nakasayod kon ano ro mayad ag maeain.” (Genesis 3:4-6) Gusto ni Satanas nga isipon ni Eba nga pwede imaw makadesisyon sa anang sarili kon ano ro tama ag saea ag nagpinuril imaw sa kon ano ro matabo kay Eba, kon indi magtuman. Naghambae si Satanas kay Eba nga indi imaw mamatay, ngani nagkaon si Eba it bunga ag gintaw-an naman ro anang asawa. Nakasayod si Adan ag Eba sa ginhambae ni Jehova nga indi sanda magkaon it bunga. Kat nagkaon sanda, ginpili nanda nga indi pagtumanon ratong klaro nga sugo. Gapakita ra nga owa nanda gintahod ro andang mapinalanggaon nga Ama sa eangit. Owa gid it kapatawaran ro andang gin-obra!

12. Ham-an makapasubo nga owa nagtuman si Adan ag Eba kay Jehova?

¹² Makapasubo ro gin-obra it atong unang ginikanan nga owa nagtahod sa andang Manogtuga! Ano ing mabatyagan kon ro imong ginpabahoe ag gindipara nga mga unga hay nagrebelde kimo ag owa nagtuman sa ing gusto? Masakitan gid baea ro imong tagipusoon?

13. Ano ro kahueogan kat naghambae si Jehova nga “sa tapu-tapo ka man mabalik”?

¹³ Kat owa sanda nagtuman, haduea nanday Adan ag Eba ro tsansa nga mabuhi it owa’t katapusan. Si Jehova naghambae kay Adan: “Tungod tapu-tapo ka, sa tapu-tapo ka man mabalik.” (Basaha ro Genesis 3:19.) Nagakahueogan ron nga magabalik si Adan sa tapu-tapo, nga matsa owa imaw gintuga. (Genesis 2:7) Pagkatapos ni Adan makasaea, namatay imaw ag owa eon nag-euntad.

14. Ham-an nagakamatay kita?

¹⁴ Kon nagtuman eang si Adan ag Eba sa Dyos, buhi pa kunta sanda makaron. Pero, tungod owa sanda nagtuman, nagkasaea sanda, ag namatay. Ro saea kapareho it baeatian nga namana naton sa atong unang ginikanan. Tanan kita natawo nga makasasaea, ngani nagakamatay kita. (Roma 5:12) Pero buko’t ruyon ro katuyoan it Dyos sa mga tawo. Owa naila ro Dyos nga mamatay ro tawo, ag gintawag it Biblia ro kamatayon nga “kaaway.”​—1 Corinto 15:26.

RO KAMATUORAN MAGAEUWAS KATON

15. Paano ro kamatuoran parti sa patay magaeuwas katon?

¹⁵ Ro kamatuoran parti sa kamatayon hay nakabulig katon nga maeuwas sa saea nga mga ideya. Ginaturo katon it Biblia nga ro patay indi eon kabatyag it sakit o kasubo. Indi eon kita makaistorya kanda, ag indi man sanda kaistorya katon. Indi naton mabuligan ro patay, ag indi man sanda makabulig katon. Indi sanda makahalit katon, ngani indi kita mahadlok kanda. Pero may mga relihiyon nga nagasugid katon nga ro patay hay nagakabuhi bisan siin ag mabuligan naton sanda kon magtao kita it kwarta sa mga pari o sa iba pa nga ginataha nanda. Pero kat hatun-an naton ro kamatuoran parti sa patay, indi eon kita madaya sa rayang kapurilan.

16. Ano ro buko’t matuod nga ginaturo it abu nga relihiyon parti sa patay?

¹⁶ Ginagamit ni Satanas ro buko’t matuod nga relihiyon agud dayaon kita ag tur-an nga ro patay nagakabuhi pa. Halimbawa, ro ibang relihiyon nagaturo nga kon mamatay kita, may parte ku atong eawas nga nagakabuhi bisan siin. Ruyon baea ro ginaturo it imong relihiyon, o ginatur-an ka sa ginahambae it Biblia parti sa patay? Nagapuril si Satanas agud ipaeayo ro mga tawo kay Jehova.

17. Ham-an insulto kay Jehova ro pagturo nga sunugon ro mga tawo sa impyerno?

¹⁷ Makapakibot ro ginaturo it abung relihiyon. Halimbawa, ro iba nagaturo nga ro maeain nga mga tawo masunog sa impyerno sa owa’t katapusan. Insulto kay Jehova ruyong kapurilan. Indi na gid pagsugtan ro mga tawo nga mag-antus sa ruyong paagi! (Basaha ro 1 Juan 4:8.) Ano ing mabatyagan kon pinahan it sang ka tawo ro unga paagi sa pagsunog it anang alima sa kaeayo? Maisip mo nga kapintas gid kana. Owa ka naila nga kilaeahon imaw. Ruyon ro gustong matabo ni Satanas nga batyagon naton kay Jehova!

18. Ham-an indi kita mahadlok sa mga patay?

¹⁸ Ro ibang relihiyon nagaturo nga kon mamatay ro tawo, mangin espiritu sanda. Sa ruyong pagturo basi magtahod kita o mahadlok sa ruyong mga espiritu tungod pwede ra sandang mangin may gahum nga amigo o kahaeadlok nga kaaway. Abu ro nagapati sa ruyong kapurilan. Nahadlok sanda sa patay, ngani ginasimba nanda ra imbes si Jehova. Tandai nga indi makabatyag it bisan ano ro mga patay, ngani indi kita kanda mahadlok. Si Jehova ro atong Manogtuga. Imaw ro matuod nga Dyos, ag imaw eang dapat ro atong simbahon.​—Pahayag 4:11.

19. Paano makabulig katon ro kamatuoran parti sa mga patay?

¹⁹ Kon matun-an naton ro kamatuoran parti sa mga patay, maeuwas kita sa buko’t matuod nga ginaturo it mga relihiyon. Ag makabulig katon rayang kamatuoran nga maeubtan ro manami nga mga promisa ni Jehova nga gin-obra para katon ag sa atong paeaabuton.

20. Ano ro matun-an naton sa masunod nga kapitulo?

²⁰ Mabuhay eon nga panahon, ro alagad it Dyos nga si Job nagkutana: “Kon ro tawo mamatay, mabuhi pa baea imaw it uman?” (Job 14:14) Posible gid baea sa tawo nga namatay nga mabuhi it uman? Manami gid ro sabat it Dyos nga makita sa Biblia. Tan-awon naton sa masunod nga kapitulo.