Ano Ro Ginharian It Dyos?

1. Ano ro bantug nga pangamuyo nga atong tun-an?

MINILYON nga tawo ro nakasayod it bantug nga pangamuyo nga ginatawag Ama Namon, o Pangamuyo it Ginuo. Gingamit ra ni Jesus agud tur-an ro anang disipulo kon paano mangamuyo. Ano ro anang ginpangamuyo? Ag ham-an importante katon ra makaron?

2. Ano ro tatlong ka butang nga ginturo ni Jesus nga ipangamuyo naton?

² Si Jesus naghambae: “Dapat kamo magpangamuyo pareho kara: ‘Ama namon nga una sa eangit, dayawon [o, pakabaeaanon] ro imong ngaean. Umabot ro imong Ginharian, matuman ro imong pagbuot iya sa eugta pareho man sa eangit.’” (Basaha ro Mateo 6:9-13.) Ham-an ginturo ni Jesus nga ipangamuyo ratong tatlong ka butang?​—Tan-awa ro Endnote 20.

3. Ano ro dapat naton matun-an parti sa Ginharian it Dyos?

³ Nasayran ta nga ro ngaean it Dyos Jehova ag hatun-an naton ro kabubot-on it Dyos para sa mga tawo ag sa eugta. Pero ano ro buot hambaeon ni Jesus kat ginhambae na: “Umabot ro imong Ginharian”? Matun-an naton kon ano ro Ginharian it Dyos, ano ro anang obrahon, ag kon paano pakabaeaanon ro ngaean it Dyos.

ANO RO GINHARIAN IT DYOS?

4. Ano ro Ginharian it Dyos, ag sin-o ro Hari?

⁴ Nagtukod si Jehova it eangitnon nga gubyerno ag ginpili na si Jesus nga Hari. Ginatawag it Biblia rayang gubyerno nga Ginharian it Dyos. Si Jesus ro “Hari it mga hari ag Ginuo it mga ginuo.” (1 Timoteo 6:15) Kayang obrahon ni Jesus ro mayad kaysa bisan sin-o nga manoggahum it tawo, bisan ibahon sanda tanan mas gamhanan gihapon si Jesus.

5. Halin siin ro gubyerno it Dyos? Ag sin-o ro gamhan kara?

⁵ Kwarenta ka adlaw pagkatapos imaw ginbanhaw, nagbalik si Jesus sa eangit. Ngani, gintugyan kana ni Jehova ro Paghari sa Ginharian. (Binuhatan 2:33) Ro gubyerno it Dyos magagahum iya sa eugta halin sa eangit. (Pahayag 11:15) Ngani gintawag it Biblia ro Ginharian it Dyos nga “eangitnon nga Ginharian.”​—2 Timoteo 4:18.

6, 7. Ham-an eain gid si Jesus sa bisan sin-o nga hari it tawo?

⁶ Ginhambae it Biblia nga si Jesus mas eabaw sa bisan sin-o nga hari it tawo “imaw eang ro owa it kamatayon.” (1 Timoteo 6:16) Tanan nga manoggahum it tawo gakamatay, pero si Jesus owa it kamatayon. Magapadayon ro tanan nga mayad nga gin-obra ni Jesus katon.

⁷ Nagtagna ro Biblia nga si Jesus patas ag maeueoy-on nga Hari: “Magakunsad kana ro espiritu ni Jehova, ro espiritu it kaaeam ag pag-eubot, ro espiritu it pag-eaygay ag pagkagamhanan, ro espiritu it ihibaeo ag kahadlok kay Jehova. Magakasadya imaw sa pagkahadlok kay Jehova. Indi imaw maghukom kon ano eang ro makita na, ukon magsaway suno sa mabatian na. Magahukom imaw it patas sa mga kubos [o, pobre].” (Isaias 11:2-4) Gusto mo baea it Hari kaparehas karon?

8. Paano naton nasayran nga bukon eang si Jesus ro magahari?

⁸ Nagpili ro Dyos it mga tawo nga makaibahan ni Jesus nga maggahum sa eangitnon nga gubyerno. Halimbawa, si apostol Pablo naghambae kay Timoteo: “Kon kita man hay magtiis it kalisud sa kalibutan ngara, magagahum man kita kaibahan nana.” (2 Timoteo 2:12) Pila ro kaibahan ni Jesus nga magagahum bilang hari?

9. Pila ro kaibahan ni Jesus nga magagahum? Kan-o nag-umpisa ro pagpili it Dyos kanda?

⁹ Sa natun-an naton sa Kapitulo 7, si apostol Juan nagtao it paeanan-awon kat hakita na si Jesus nga Hari kaibahan ro 144,000 nga mga hari. Sin-o ro 144,000? Naghambae si Juan nga “may ngaean ni [Jesus] ag it anang Ama nga nasueat sa andang mga dahi.” Ag nagdugang imaw: “Nagasunod sanda sa Kordero bisan siin imaw mag-adto. Gintubos sanda halin sa nabilin nga mga tawo.” (Basaha ro Pahayag 14:1, 4.) Ro 144,000 mga matutom nga mga Cristiyano nga ginpili it Dyos “ag sanda magagahum sa eugta” kaibahan ni Jesus. Kon mamatay sanda, mabuhi sanda paagto sa eangit. (Pahayag 5:10) Umpisa sa panahon it mga apostoles, nagpili eon si Jehova it matutom nga mga Cristyano nga mangin parte it 144,000 nga hari.

10. Ham-an ro paggahum ni Jesus ag ku 144,000 nagapakita nga nagakabaeaka si Jehova sa mga tawo?

¹⁰ Nagakabaeaka katon si Jehova ngani may kahimusan imaw nga si Jesus ro magagahum sa mga tawo. Naintindihan kita ni Jesus, ngani mangin mayad imaw nga manoggahum katon. Hasayran na kon paano mangin tawo ag mag-antus. Naghambae si Pablo nga si Jesus, “nagabatyag man sa atong mga kaeuyahon,” ag “gintentar man imaw sa tanan nga bagay pareho katon.” (Hebreo 4:15; 5:8) Ro 144,000 nakasayod man kon paano mangin tawo. Nagkalisud man sanda tungod sa indi perpekto nga kahimtangan ag baeatian. Ngani, makasigurado kita nga nabatyagan ni Jesus ag ku 144,000 ro atong mga problema nga ginaatubang.

ANO RO OBRAHON KU GINHARIAN IT DYOS?

11. Ham-an gintur-an ni Jesus ro anang mga disipulo nga mangamuyo agud matuman ro kabubot-on it Dyos sa eangit?

¹¹ Si Jesus nagturo sa anang mga disipulo nga mangamuyo agud matuman ro kabubot-on it Dyos sa eangit. Ham-an? Natun-an naton sa Kapitulo 3 nga nagrebelde si Satanas nga Yawa kay Jehova. Pagkatapos magrebelde, ginsugtan pa imaw ni Jehova ag ro buko’t matutom nga mga anghel, o demonyo, nga magtenir sa eangit. Ngani buko’t tanan nga una sa eangit gaobra ku kabubot-on it Dyos. Sa Kapitulo 10, matun-an pa naton ro parti kay Satanas ag sa mga demonyo.

12. Ano ro daywang ka importante nga natabo sa Pahayag 12:10?

¹² Ginhambae it Biblia nga kat nangin Hari si Jesus sa Ginharian it Dyos, nagpakig-away imaw kay Satanas. (Basaha ro Pahayag 12:7-10.) Sa Bersikulo 10 may daywang ka importante nga natabo. Nag-umpisa ro Ginharian it Dyos kat naggahum si Jesu-Cristo bilang Hari, ag ginhueog si Satanas halin sa eangit paagto sa eugta. Natun-an naton nga natabo eon ra.

13. Ano ro natabo sa eangit kat ginpahalin si Satanas?

¹³ Ginasugid it Biblia ro kasadya it matutom nga mga anghel pagkatapos ginpahalin sa eangit si Satanas ag anang mga demonyo. Mabasa naton: “Magkalipay kamo, mga eangit ag tanan kamo nga nagaestar una!” (Pahayag 12:12) Makaron may paghidait ag paghiusa sa eangit tungod ro tanan nagaobra ku kabubot-on it Dyos.

14. Ano ro natabo kat ginhueog si Satanas sa eugta?

¹⁴ Pero nag-eain ro kabuhi sa eugta. Makahaeadlok ro kahimtangan it mga tawo “ay ro Yawa nagpanaog kinyo nga nagabalingasu sa kaakig, ay nasayran nana nga sangkurot eon lang ro anang tyempo nga nabilin.” (Pahayag 12:12) Naakig gid si Satanas nga ginhueog imaw sa eugta, ag nasayran na nga madali lang imaw tapuson. Gin-obra na ro tanan agud makapanggulo, makapanakit, ag makapaantus sa bilog nga eugta.

15. Ano ro kabubot-on it Dyos sa eugta?

¹⁵ Pero ro kabubot-on it Dyos sa eugta owa nagbag-o. Gusto na gihapon mabuhi it owa’t katapusan ro perpekto nga mga tawo sa paraiso nga eugta. (Salmo 37:29) Paano ra obrahon ku Ginharian it Dyos?

16, 17. Ano ro ginasugid katon it Daniel 2:44 parti sa Ginharian it Dyos?

¹⁶ Ro tagna sa Daniel 2:44 nagahambae: “Ag sa adlaw ku mga hari ngato, ro Dyos it eangit magatukod it ginharian nga indi gid maguba maskin hin-uno. Ag rayang ginharian hay indi pag-isaylo sa ibang mga tawo. Waskon kara ag pagatapuson ro tanan nga ginharian, ag raya hay magapadayon sa owa it katapusan.” Ano ro ginaturo katon it rayang tagna parti sa Ginharian it Dyos?

¹⁷ Una, ginasugid katon nga ro Ginharian it Dyos gaumpisa it paggahum “sa adlaw ku mga hari ngato.” Buot hambaeon nga ro ibang gubyerno una pa sa eugta kon maggahum eon ro Ginharian. Pangaywa, ginasugid katon nga ro Ginharian it Dyos magapadayon sa owa’t katapusan ag indi pagbuslan it ibang gubyerno. Pangatlo, may inaway sa tunga ku Ginharian it Dyos ag ku gubyerno it rayang kalibutan. Magadaog ro Ginharian it Dyos ag raya lang ro mabilin nga gubyerno sa bilog nga eugta. Raya ro pinakamayad nga gubyerno nga mabaton it mga tawo.

18. Ano ro pagtawag sa katapusan nga inaway sa tunga ku Ginharian it Dyos ag gubyerno it kalibutan?

¹⁸ Paano buslan ku Ginharian it Dyos ro paggahum it kalibutan? Bago ro katapusan nga inaway, ginatawag Armagedon, ro mga demonyo magapataeang sa “mga hari sa bilog nga kalibutan, sa pagtipon kanda para sa inaway sa mabahoe nga adlaw kung Dyos nga Makagagahum.” Huo, ro gubyerno it tawo magapakig-away kontra sa Ginharian it Dyos.​—Pahayag 16:14, 16; tan-awa ro Endnote 10.

19, 20. Ham-an kinahang-ean naton ro Ginharian it Dyos agud gamhan ro bilog nga eugta?

¹⁹ Ham-an kinahang-ean naton ro Ginharian it Dyos? May tatlo ka rason. Una, makasasaea kita, ngani nagamasakit ag nagakamatay. Pero nagahambae ro Biblia nga sa idaeum ku Ginharian it Dyos, mabuhi kita sa owa’t katapusan. Ro Juan 3:16 nagahambae: “Ginhigugma gid it Dyos ro kalibutan sa bagay nga gintao nana ro anang bugtong nga Unga, agud nga ro kada nagatuo kana indi eon mamatay, kundi may kabuhi nga owa it katapusan.”

²⁰ Ro pangaywa nga rason kon ham-an kinahang-ean naton ro Ginharian it Dyos tungod ginapalibutan kita it maeaut nga mga tawo. Abu ro nagapuril, nagapandaya, ag mga imoral. Owa kita’t maobra kara, pero kaya it Dyos nga dueaon ra. Ro mga tawo nga nagaobra it kaeautan tapuson sa Armagedon. (Basaha ro Salmo 37:10.) Ro pangatlo nga rason hay ro gubyerno it tawo mahina, mapintas, ag korap. Bukon sanda it interesado nga buligan ro mga tawo agud tumanon ro Dyos. Ro Biblia nagahambae nga “ginadumaeahan it tawo ro anang isigkatawo sa anang kasamaran.”​—Manugwali 8:9.

21. Paano tumanon it Ginharian ro kabubot-on it Dyos iya sa eugta?

²¹ Pagkatapos it Armagedon, tumanon ku Ginharian it Dyos ro kabubot-on ni Jehova sa eugta. Halimbawa, dueaon kara si Satanas ag ro anang mga demonyo. (Pahayag 20:1-3) Owa eon it magamasakit o mamatay. Tungod sa pantubos, tanan nga matutom nga mga tawo mabuhi it owa’t katapusan sa Paraiso. (Pahayag 22:1-3) Pakabaeaanon ku Ginharian ro ngaean it Dyos. Ano ro buot hambaeon kara? Nga kon maggahum eon ro gubyerno it Dyos sa eugta, tanan nga tawo magatao it kadungganan sa ngaean ni Jehova.​—Tan-awa ro Endnote 21.

KAN-O NANGIN HARI SI JESUS?

22. Paano naton nasayran nga owa eagi nangin Hari si Jesus kat iya imaw sa eugta o pagkatapos imaw ginbanhaw?

²² Gintur-an ni Jesus ro anang mga disipulo nga mangamuyo: “Umabot ro imong Ginharian.” Magaabot gid ro gubyerno it Dyos sa paeaabuton. Si Jehova ro unang nagtukod it gubyerno ag gin-obra si Jesus nga anang Hari. Nangin Hari baea eagi si Jesus pagbalik na sa eangit? Owa, naghueat pa imaw. Kat pagkatapos ginbanhaw si Jesus, klaro nga ginhambae nanday Pedro ag Pablo ro tagna sa Salmo 110:1 parti kay Jesus. Naghambae si Jehova: “Lumingkod ka iya sa akong tuo hasta nga mahimo ko ro imong mga kaaway nga tueongtongan it imong mga siki.” (Binuhatan 2:32-35; Hebreo 10:12, 13) Mauno’t buhay nga naghueat si Jesus hasta obrahon imaw ni Jehova nga Hari?

23. (a) Kan-o naggahum si Jesus bilang Hari sa gubyerno it Dyos? (b) Ano ro atong matun-an sa masunod nga kapitulo?

²³ Maeawig nga dinag-on bago ro 1914, naeubtan ku sinsero nga grupo it mga Cristyano nga ruyong dag-on importante sa tagna it Biblia. Ro mga nagkaeatabo umpisa ku 1914 nagpamatuod nga insakto sanda. Naghari si Jesus sa ruyong dag-on. (Salmo 110:2) Pagkatapos, ginhueog si Satanas sa eugta, ag makaron “sangkurot eon lang ro anang tyempo nga nabilin.” (Pahayag 12:12) Sa masunod nga kapitulo, makita naton ro abu pa nga pamatuod nga nagakabuhi eon kita sa ruyong tyempo. Matun-an naton nga maeapit eon lang tumanon ku Ginharian it Dyos ro kabubot-on ni Jehova iya sa eugta.​—Tan-awa ro Endnote 22.