May Pagkabanhaw!

1-3. Tanan kita napriso sa alin, ag paano kita euwason ni Jehova?

ISIPA nga ginsentensyahan ka nga mapriso sa bilog mo nga kabuhi sa saea nga owa mo haobra. Owa ka eon it tsansa nga makaguwa. Ro imong paeaabuton owa eon it pag-eaum ag wa ka it maobra kara. Pero kat naduea eon ro imong pag-eaum, nakakita ka it makabulig kimo nga may gahum agud euwason ka ag ruyon ro anang ginpromisa. Ano ing mabatyagan?

² Tanan kita napriso sa kamatayon. Bisan ano ro atong obrahon, indi kita makapaeagyo. Pero si Jehova may gahum nga euwason kita sa kamatayon. Ag nagpromisa imaw, “ro katapusan nga kaaway nga pagadag-on ruyon ro kamatayon.”​—1 Corinto 15:26.

³ Isipa ro paumpaw nga mabatyagan mo kon maduea eon ro kamatayon! Pero bukon eang kamatayon ro dueaon ni Jehova. Ibalik man nana ro kabuhi it mga tawo nga namatay. Isipa kon ano ruyon para kimo. Nagpromisa imaw nga ‘mabuhi it uman ro mga patay.’ (Isaias 26:19) Gintawag ra it Biblia nga pagkabanhaw.

KON MAMATAY RO ISAEANG KA PALANGGA

4. (a) Ano ro paumpaw katon kon may namatay kita nga pamilya o amigo? (b) Sin-o ro mayad nga mga amigo ni Jesus?

⁴ Kon may namatay kita nga pamilya o maeapit nga amigo, nasubuan gid kita. Makabatyag nga owa’t pag-eaum. Owa kita’t maobra agud mabalik ro andang kabuhi. Pero may paumpaw ro Biblia katon. (Basaha ro 2 Corinto 1:3, 4.) Tan-awon ta ro halimbawa nga nagpakita kon paano ni Jehova ag ni Jesus ibalik ro kabuhi it atong mga palangga. Kat iya si Jesus sa eugta, pirme na ginabisita si Lazaro ag anang igmanghod nga sanday Marta ag Maria. Sanda ra hay mayad nga mga amigo ni Jesus. Naghambae ro Biblia: “Palangga ni Jesus si Marta ag ro anang igmanghod nga babayi, ag si Lazaro.” Ag isaeang ka adlaw namatay si Lazaro.​—Juan 11:3-5.

5, 6. (a) Ano ro gin-obra ni Jesus kat nakita na nga nagakasubo ro pamilya ag amigo ni Lazaro? (b) Ham-an makapaumpaw masayran nga nabatyagan ni Jesus ro atong nabatyag sa kamatayon?

⁵ Ginpaumpawan ni Jesus si Marta ag Maria. Kat habatian ni Marta nga gapaagto si Jesus, nagguwa imaw sa syudad sa pagsueang kana. Masadya imaw nga makita si Jesus, pero naghambae imaw: “Kon iya ka eang, owa konta namatay ro akong igmanghod!” Abi ni Marta ulihi eon si Jesus. Kat nakita ni Jesus si Maria nga nagatangis, nasakitan gid imaw ag nagtangis man. (Juan 11:21, 33, 35) Nabatyagan na gid ro kasakit kon madueaan kita it atong palangga.

⁶ Makapaumpaw gid masayran nga pareho kita’t ginabatyag ni Jesus kon parti sa kamatayon. Kapareho si Jesus sa anang Ama. (Juan 14:9) May gahum si Jehova nga dueaon ro kamatayon, ag maeapit na eon ra obrahon.

“LAZARO, GUMUWA KA!”

7, 8. Ham-an owa naila si Marta nga ipabuoe ro bato sa gin-eubngan ni Lazaro, pero ano ro gin-obra ni Jesus?

⁷ Pag-abot ni Jesus sa eubnganan kon siin si Lazaro ginhaya, natabunan ra it mabahoe nga bato. Naghambae si Jesus: “Bue-a ninyo ro bato.” Pero wa naila si Marta. Ap-at nga adlaw eon haeubong si Lazaro. (Juan 11:39) Owa imaw kasayod kon ano ro obrahon ni Jesus agud buligan ro anang igmanghod.

⁸ Naghambae si Jesus kay Lazaro: “Gumuwa ka!” Hangawa gid si Marta ag Maria sa andang nakita. “Ro namatay nga tawo nagguwa. Ro anang mga alima ag mga siki nasambuean it panapton nga pang-eubong.” (Juan 11:43, 44) Nabuhi it uman si Lazaro! Nakaibahan na’t uman ro anang pamilya ag mga amigo. Mabuytan nanda imaw, ag maistorya. Isaea gid ka milagro! Ginbanhaw ni Jesus si Lazaro.

“INDAY, GINAHAMBAE KO KIMO ‘BUMANGON KA!’”

9, 10. (a) Sin-o ro nagtao it gahum kay Jesus nga magbanhaw it mga patay? (b) Ham-an importante katon ro mga rekord it pagkabanhaw?

⁹ Ginbanhaw baea ni Jesus ro mga patay paagi sa anang gahum? Owa. Bago ginbanhaw ni Jesus si Lazaro, nagpangamuyo imaw kay Jehova, ag gintaw-an it gahum agud banhawon si Lazaro. (Basaha ro Juan 11:41, 42.) Bukon eang si Lazaro ro ginbanhaw. Nagasugid ro Biblia parti sa 12 anyos nga dalagita nga may grabi nga sakit. Ro anang tatay nga si Jairo nagapakit-euoy kay Jesus nga pamayron ro anang solong unga. Kat gaistorya imaw kay Jesus, may mga eaki nga nag-abot ag naghambae: “Namatay eon ro imong unga nga babayi. Ham-an pabudlayon mo pa ro manogturo?” Pero naghambae si Jesus kay Jairo: “Indi ka magkahadlok, magtuo ka eang ag magamayad imaw.” Nag-agto imaw sa baeay ni Jairo. Kat maeapit eon imaw sa anda nabatian ni Jesus ro mga tawo nga nagatangis. Naghambae si Jesus kanda: “Indi kamo magtangis, ay ro unga bukon it patay kundi nagakatueog eang.” Nangawa ro ginikanan ku unga sa ginhambae ni Jesus. Ginpangabay nana ro mga tawo nga magguwa ag gindaea na ro ginikanan sa kwarto nga idto ro unga. Ginbuytan ni Jesus ro alima ag naghambae: “Inday, ginahambae ko kimo, ‘Bumangon ka!’” Isipa ro kasadya nga nabatyagan it anang ginikanan kat insigida imaw nga nagbangon ag nagtikang! Ginbanhaw ni Jesus ro andang unga. (Marcos 5:22-24, 35-42; Lucas 8:49-56) Umpisa kato, kon makita nanda ro andang unga, nadumdoman nanda ro gin-obra ni Jehova paagi kay Jesus.a

¹⁰ Namatay man ku ulihi ro mga ginbanhaw ni Jesus. Pero importante gid ro atong nabasa sa rayang mga tawo nga nagtao it matuod nga pag-eaum. Gusto ni Jehova nga banhawon ro mga patay, ag obrahon na gid ra.

ANO RO MATUN-AN NATON SA MGA REKORD IT PAGKABANHAW?

11. Ano ro ginaturo katon it Manugwali 9:5 parti kay Lazaro?

¹¹ Klaro nga ginhambae it Biblia nga ro “mga patay owa gid it nasayran.” Matuod ron kay Lazaro. (Manugwali 9:5) Pareho sa ginhambae ni Jesus nga nagakatueog eang si Lazaro. (Juan 11:11) Kat igto imaw sa eubnganan, “owa gid it nasayran” si Lazaro.

12. Paano kita nakasayod nga natabo gid ro pagbanhaw kay Lazaro?

¹² Kat ginbanhaw ni Jesus si Lazaro, abu nga tawo ro nakakita. Maskin ro mga kaaway ni Jesus nakasayod sa gin-obra na nga milagro. Nabuhi si Lazaro, nagpamatuod ra nga ro pagbanhaw natabo gid. (Juan 11:47) Abu nga mga tawo ro nagbisita kay Lazaro, umpisa kato nagpati sanda nga si Jesus ro ginpadaea it Dyos. Owa naila ro mga kaaway ni Jesus, ngani nagplano sanda nga patyon si Jesus ag Lazaro.​—Juan 11:53; 12:9-11.

13. Ham-an makasigurado kita nga banhawon ni Jehova ro mga patay?

¹³ Naghambae si Jesus nga ro “tanan nga mga patay sa eubnganan makabati” ag banhawon. (Juan 5:28) Nagakahueogan ra nga ratong mga ginadumdom ni Jehova mabuhi it uman. Pero agud mabanhaw sanda ni Jehova, dapat kilaea na gid ruyong mga tawo. Maobra na baea ron? May una binilyon nga bituon sa uniberso. Nagahambae ro Biblia nga kilaea ni Jehova ro mga ngaean it mga bituon. (Basaha ro Isaias 40:26.) Kon nadumdoman na ro ngaean it kada bituon, makasigurado kita nga madumdoman na ro mga tawo nga buhion it uman. Gintuga ni Jehova ro tanan, ngani nakasayod kita nga may gahum imaw nga ibalik ro kabuhi it namatay.

14, 15. Ano ro ginhambae ni Job nga nagaturo katon parti sa pagkabanhaw?

¹⁴ Ro matutom nga si Job nagapati sa pagkabanhaw. Nagkutana imaw: “Kon ro tawo mamatay, mabuhi pa baea imaw it uman?” Ginhambae na rayon kay Jehova: “Magatawag ka, ag magasabat ako. Ginahandum mo gid nga makita ro imong inobrahan.” Huo, hasayran ni Job nga ginahueat ni Jehova ro panahon nga banhawon ro mga patay.​—Job 14:13-15.

¹⁵ Ano ro mabatyagan mo sa pag-eaum nga pagkabanhaw? Makaisip ka, ‘Paalin ro akong pamilya ag mga amigo nga namatay, mabanhaw man baea sanda?’ Makapaumpaw masayran nga gusto gid ni Jehova ibalik ro kabuhi it namatay. Tan-awon naton ro ginahambae it Biblia kon siin sanda maestar ag sin-o ro banhawon.

SANDA HAY “MAKABATI SA ANANG LIMOG AG MAGAGUWA”

16. Ano nga klasi it kabuhi ro mabaton it mga ginbanhaw iya sa eugta?

¹⁶ Kato anay, nakaibahan it uman ku mga ginbanhaw ro andang pamilya ag mga amigo iya sa eugta. Makaruyon man ro matabo sa paeaabuton, pero mas manami pa gid. Ham-an? Tungod ratong mga ginbanhaw iya sa eugta may tsansa nga mabuhi it owa’t katapusan ag indi eon mamatay. Ag mabuhi sanda sa kalibutan nga eain gid sa makaron. Owa eon it inaway, krimen, ag baeatian.

17. Sin-o ro banhawon?

¹⁷ Sin-o ro banhawon? Si Jesus naghambae nga “ro tanan nga mga patay sa eubnganan makabati sa anang limog ag magaguwa.” (Juan 5:28, 29) Ag ro Pahayag 20:13 nagasugid katon: “Dayon gin-euad ku dagat ro mga patay nga una kana. Ginbuhian man it kamatayon ag ku kalibutan it mga patay ro mga patay nga una kanda.” Huo, binilyon nga tawo ro mabuhi it uman. Si apostol Pablo naghambae nga ro “matarung man ukon maeain [o, buko’t matarung]” pagabanhawon. (Basaha ro Binuhatan 24:15.) Ano ro buot hambaeon kara?

18. Sin-o ‘ro mga matarung’ nga banhawon?

¹⁸ ‘Ro mga matarung,’ kaibahan ro matutom nga mga alagad ni Jehova nga nabuhi bago si Jesus nag-agto iya sa eugta. Parehas kanday Noe, Abraham, Sara, Moises, Rut, ag Ester banhawon man iya sa eugta. Mabasa mo ro parti sa rayang mga eaki ag bayi sa kapitulo 11 it Hebreo. Paalin ro mga matutom nga alagad ni Jehova nga namatay makaron? “Matarung” man sanda ngani mabanhaw man.

19. Sin-o ‘ro mga buko’t matarung’? Ano ro tsansa nga gintao kanda ni Jehova?

¹⁹ ‘Ro mga buko’t matarung,’ kaibahan sa binilyon nga tawo nga owa nakakilaea kay Jehova. Bisan namatay sanda, owa sanda ginakalipatan ni Jehova. Banhawon man sanda, ag may tsansa nga makatuon ag makaalagad kana.

20. Ham-an buko’t tanan nga namatay banhawon?

²⁰ Nagakahueogan baea ron nga tanan nga namatay mabanhaw? Indi. Naghambae si Jesus nga ro ibang namatay hay indi pagbuhion it uman. (Lucas 12:5) Sin-o ro magadesisyon kon sin-o ro banhawon ag indi? Si Jehova ro katapusan nga Hukom, pero gintaw-an nana si Jesus it awtoridad nga “huwis ku mga buhi ag ku mga patay.” (Binuhatan 10:42) Ro tanan nga ginhukman na nga maeaut ag owa naila magbag-o, indi pagbanhawon.​—Tan-awa ro Endnote 19.

PAGKABANHAW PAEANGIT

21, 22. (a) Ano ro buot hambaeon it pagkabanhaw paeangit? (b) Sin-o ro unang ginbanhaw nga mabuhi sa eangit?

²¹ Nagasugid man ro Biblia nga may ibang tawo nga magaestar sa eangit. Kon ro isaea mabanhaw paeangit, owa eon imaw it kabuhi bilang tawo kundi mangin espiritu nga persona.

²² Si Jesus ro una nga nakabaton it rayang pagkabanhaw. (Juan 3:13) Tatlong adlaw pagkatapos ginpatay si Jesus, ginbanhaw imaw ni Jehova. (Salmo 16:10; Binuhatan 13:34, 35) Owa imaw ginbanhaw bilang tawo. Si apostol Pedro naghambae nga si Jesus, “Ginpatay sa eawas, pero ginbuhi sa espiritu.” (1 Pedro 3:18) Ginbuhi si Jesus it uman bilang gamhanan nga espiritu nga persona! (1 Corinto 15:3-6) Ro Biblia naghambae nga bukon eang imaw ro katapusan.

23, 24. Sin-o ro “maisot nga panong” nga ginhambae ni Jesus, ag pila sanda?

²³ Bago si Jesus namatay, naghambae imaw sa anang matutom nga mga disipulo: “Ag magapanaw ako sa pagpahaum it lugar para kinyo.” (Juan 14:2) Nagakahueogan ra nga ro iba sa anang mga sumueonod banhawon agud mag-estar kaibahan na sa eangit. Pila sanda? Si Jesus naghambae nga sangkiri eang ro “maisot nga panong.” (Lucas 12:32) Si apostol Juan nagtao it insakto nga numero kat hakita na si Jesus, “nga nagatindog idto [eangitnon] sa Bukid Sion, kaibahan nana ro 144,000.”​—Pahayag 14:1.

²⁴ Hin-uno banhawon ro 144,000 nga Cristyano? Ginasugid it Biblia nga matabo ra sa panahon nga umpisahan it Cristo ro paggahum sa eangit. (1 Corinto 15:23) Nagakabuhi kita makaron sa ruyong panahon, ag eaban sa 144,000 habanhaw eon paeangit. Ro mga habilin iya sa eugta ag namatay makaron, insigida nga mabanhaw paeangit. Pero kaeabanan nga tawo banhawon sa paeaabuton iya sa paraiso nga eugta.

25. Ano ro matun-an naton sa masunod nga kapitulo?

²⁵ Maeapit lang gid euwason ni Jehova ro tanan sa kamatayon, ag maduea raya sa owa’t katapusan! (Basaha ro Isaias 25:8.) Pero ano ro obrahon idto it mga gapaeangit? Ro Biblia naghambae nga magagahum sanda kaibahan ni Jesus sa gubyerno it Ginharian. Matun-an naton sa masunod nga kapitulo ro parti sa rayang gubyerno.