LEKSYON 37
Ano ro Ginahambae it Biblia Parti sa Trabaho ag Kwarta?
Naeksperyinsyahan mo eon baea nga magkabaeaka sa trabaho o sa kwarta? Basi nalisdan ka nga balansehon ro pagsuporta sa ing kinahang-eanon ag sa pagsimba kay Jehova. May ginatao nga praktikal nga bulig ro Biblia katon.
1. Ano ro ginahambae it Biblia parti sa trabaho?
Gusto it Dyos nga ma-enjoy naton ro atong trabaho. Ginahambae it Biblia nga “owa eon it mas mayad para sa tawo kundi . . . magkasadya sa anang ginkabudlayan.” (Manugwali 2:24) Mahugod si Jehova. Kon tuearon naton ro anang kahugod, mapasadya naton imaw ag mangin masadya man kita.
Importante ro trabaho. Pero indi naton pagpasugtan nga mangin mas importante ra kaysa sa atong pagsimba kay Jehova. (Juan 6:27) Ginpromisa na nga kon unahon naton imaw, itao nana ro atong mga kinahang-eanon.
2. Ano ro balanse nga pagtan-aw sa kwarta?
Ginahambae it Biblia nga “ro kwarta hay proteksyon,” pero ginahambae man kara nga bukon eang it kwarta ro makapasadya katon. (Manugwali 7:12) Ngani, ginapalig-on kita nga indi pagpalanggaon ro kwarta kundi ‘mangin kontento kita ku una katon.’ (Basaha ro Hebreo 13:5.) Kon mangin kontento kita sa mga bagay nga una katon, indi eon kita mag-isip it abu pang bagay nga owa katon. Malikawan naton ro pagpangutang. (Hulubaton 22:7) Malikawan man naton ro maeain nga resulta it pagsugae ag ro pag-intra sa mga negosyo nga madali kuno magmanggaranon.
3. Paano naton gamiton ro atong kwarta sa pagbulig sa iba?
Maatag nga Dyos si Jehova, ag matuead naton imaw kon kita hay “magmaalwan ag haum sa pagpakig-ambit” it atong pagkabutang sa iba. (1 Timoteo 6:18) Magamit naton ro atong kwarta paagi sa pagsuporta sa kongregasyon ag sa pagbulig sa mga nagakinahang-ean, eabi eon sa atong isigka-tumoeuo. Mas importante kay Jehova ro atong motibo sa pagtao, kaysa sa kon mauno’t abu ro atong ginatao. Kon maatag kita nga nagatao halin sa atong tagipusuon, mangin masadya kita ag pati man si Jehova.—Basaha ro Binuhatan 20:35.
TUN-I PA GID
Sayura ro mga benepisyo sa balanse nga pagtan-aw sa trabaho ag sa pagkakontento.
4. Padunggi si Jehova paagi sa imong pagtrabaho
Ro atong relasyon kay Jehova hay dapat makaapekto sa atong pagtan-aw sa trabaho. Tan-awa ro VIDEO, ag talakaya rayon rayang mga pangutana.
Sa video, ano ing nailaan sa ugali ni Jason sa anang trabaho?
Ano ro anang gin-obra agud mangin balanse sa trabaho?
Basaha ro Colosas 3:23, 24, ag talakaya rayon rayang pangutana:
Ham-an importante kon ano ro atong pagtan-aw sa trabaho?
Importante ro trabaho. Pero indi naton pagpasugtan nga mangin mas importante ra kaysa sa atong pagsimba kay Jehova
5. Makabenepisyo kita sa pagkakontento
Abung tawo ro nagatinguha nga makatipon pa gid it abu nga kwarta. Pero iba ro ginapalig-on it Biblia. Basaha ro 1 Timoteo 6:6-8, ag talakaya rayon rayang pangutana:
Ano ro ginapalig-on it Biblia nga obrahon naton?
Mangin masadya gihapon kita maskin sangkiri eang ro atong kwarta. Tan-awa ro VIDEO, ag talakaya rayon rayang pangutana.
Maskin pobre rayang mga pamilya, ham-an masadya sanda?
Pero paano kon may una eon kita ag gusto pa natong dugangan ra? May ginhambae si Jesus kon ham-an delikado ra. Basaha ro Lucas 12:15-21, ag talakaya rayon rayang pangutana:
Ano ing hatun-an sa ilustrasyon ni Jesus?—Tan-awa ro bersikulo 15.
Basaha ag ikompara ro Hulubaton 10:22 ag 1 Timoteo 6:10. Talakaya rayon rayang mga pangutana:
Kon kimo, ano ro mas importante, ro imong relasyon kay Jehova o ro pagtipon it abung kwarta? Ham-an?
Ano ro mangin problema kon gusto naton it abung kwarta?
6. Itao ni Jehova ro atong mga kinahang-eanon
Kon may problema kita sa trabaho o kwarta, matestingan ro atong pagsalig kay Jehova. Tan-awa ro VIDEO agud masayran kon ano ro pwede mong obrahon kon makaatubang ka it mga problema ngara, ag talakaya rayon rayang mga pangutana.
Sa video, ano nga mga problema ro gin-atubang it brother?
Ano ro anang gin-obra agud makaya na ro problema?
Basaha ro Mateo 6:25-34, ag talakaya rayon rayang pangutana:
Ano ro ginpromisa ni Jehova kon unahon naton imaw?
KON MAY MAGHAMBAE: “Kinahang-ean ko magtrabaho agud suportahan ang pamilya. Ngani indi ako maka-attend it mga miting kada domingo.”
Anong teksto ro nagkumbinsi kimo nga ro pag-una sa pagsimba kay Jehova hay ro pinakamayad nga desisyon nga maobra mo?
SUMARYO
Kinahang-ean ro trabaho ag kwarta, pero indi dapat ra makaapekto sa atong pag-alagad kay Jehova.
Review
Ano ro makabulig kimo nga mangin balanse ing pagtan-aw sa trabaho?
Paano ka makabenepisyo sa pagkakontento?
Paano ka makasalig sa mga promisa ni Jehova nga itao nana ro mga kinahang-eanon it anang katawhan?
SAYURA
Sayura kon ginahambae baea it Biblia nga ro kwarta hay maeain.
“Ro Kwarta Baea ro Ginahalinan it Tanan nga Kaeainan?” (Artikulo sa website)
Sayura kon paano naton magamit ro kwarta agud mapasadya ro Dyos.
“Ano ro Ginahambae it Biblia Parti sa Pagtao?” (Artikulo sa website)
Bukon baea it maeain ro pagsugae?
Basaha kon paano nagbag-o ro dating sugaroe ag manakaw.
“Nanamian Ako sa Karera sang Kabayo” (Ang Lalantawan, Nobiembre 1, 2011)