LEKSYON 51

Paano Mo Mapasadya si Jehova Paagi sa Imong Ginahambae?

Naimprinta nga Edisyon

Kat gintuga kita ni Jehova, gintaw-an na kita it manami nga regalo—ro ikasarang sa paghambae. Importante baea kana kon paano naton gamiton rayang regalo? Syempre huo! (Basaha ro Santiago 1:26.) Ngani, paano naton gamiton ro atong ikasarang sa paghambae sa paagi nga mapasadya si Jehova?

1. Paano naton dapat gamiton ro atong ikasarang sa paghambae?

Ginahambae it Biblia nga padayon nga “magmalig-on ag magbueoligan kamo.” (1 Tesalonica 5:11) May naisip ka baea nga nagakinahang-ean it pagpalig-on? Ano ing obrahon agud mapalig-on sanda? Pasaliga sanda nga importante sanda kimo. Pwede mong hambaeon ro mga nailaan mo parti kanda. May naisip ka baea nga teksto nga makapalig-on sa iba? Abung teksto ing pwedeng gamiton. Tandai man nga ro imong paagi it paghambae hay makapalig-on gid kanda. Ngani, tinguhai pirme nga maghambae sa mabuot ag kalmado nga paagi.—Hulubaton 15:1.

2. Ano nga klasi it paghambae ro dapat natong likawan?

Nagahambae ro Biblia: “Indi kamo maghambae it maeain nga mga bisaea.” (Basaha ro Efeso 4:29.) Buot hambaeon, indi kita maggamit it maeain nga mga pamisaea o maghambae it makasakit sa iba. Ag dapat man naton likawan ro pagtsismis ag pagpanamad sa iba.—Basaha ro Hulubaton 16:28.

3. Ano ro makabulig katon nga maghambae sa makapalig-on nga paagi?

Ro atong ginahambae pirme hay nagapakita kon ano gid ro sa sueod it atong tagipusuon ag isip. (Lucas 6:45) Ngani kinahang-ean natong sanayon ro atong sarili nga magpukos sa positibo nga mga bagay—mga bagay nga matarung, malimpyo, mapinalanggaon, ag dungganon. (Filipos 4:8) Agud maobra ra, dapat natong pilion it mayad ro atong kalingawan ag mga amigo. (Hulubaton 13:20) Makabulig man ra katon nga mag-isip anay bago maghambae. Isipa kon ano ro epekto kara sa iba. Nagahambae ro Biblia: “Ro paghambae nga owa ginaisipa it mayad hay pareho sa buno it espada, pero ro dila it maaeam hay nagapamayad.”—Hulubaton 12:18.

TUN-I PA GID

Tun-i kon paano maghambae sa paagi nga mapasadya si Jehova ag mapalig-on ro iba.

4. Maghaeong sa ing ginahambae

Kon amat, makahambae kita it mga bagay nga nuoean rayon naton. (Santiago 3:2) Basaha ro Galacia 5:22, 23, ag talakaya rayon rayang mga pangutana:

Alin sa mga ugali ngara ro pwede mong ipangamuyo agud makabulig kimo nga maghaeong sa ing ginahambae? Paano rayang mga ugali makabulig kimo?

Basaha ro 1 Corinto 15:33, ag talakaya rayon rayang pangutana:

Paano ing ginpili nga mga kalingawan ag mga amigo hay makaimpluwensya sa ing paagi it paghambae?

Collage: Makita sa hueag it asawang eaki nga ginapangisgan na ro anang asawa. 1. Nagapamati imaw it magalis nga musika. 2. Masadya gid imaw nga nagatan-aw sa TV it boksing kaibahan it anang amigo. — Ano ro pwedeng makaimpluwensya sa paagi it imong paghambae?

Collage: Makita sa hueag it asawang eaki nga mabuot imaw nga nagaistorya sa anang asawa. 1. Nagabasa imaw it Biblia. 2. Nagaistorya sandang mag-asawa sa andang amigo sa Kingdom Hall. — Ano ro pwedeng makaimpluwensya sa paagi it imong paghambae?

Basaha ro Manugwali 3:1, 7, ag talakaya rayon rayang pangutana:

Ham-an maaeamon nga maghipos o maghueat anay it tama nga panahon bago maghambae?

5. Maghambae it positibo sa iba

Paano naton likawan nga makasakit sa iba ag makahambae it buko’t manami nga mga bagay? Tan-awa ro VIDEO, ag talakaya rayon rayang mga pangutana.

VIDEO: Maghambae it Makapalig-on sa Iba (4:07)

Sa video, ham-an gustong bag-uhon it brother ro anang paagi it paghambae parti sa iba?
Ano ro anang gin-obra agud mabag-o ra?

Basaha ro Manugwali 7:16, ag talakaya rayon rayang pangutana:

Ano ro dapat natong tandaan kon matentar kita nga maghambae it negatibo parti sa iba?

Basaha ro Manugwali 7:21, 22, ag talakaya rayon rayang pangutana:

Paano rayang teksto makabulig kimo nga indi eagi maakig kon may naghambae it negatibo parti kimo?

6. Mangin mabuot kon nagaistorya sa ing pamilya

Gusto ni Jehova nga mag-istorya kita sa atong pamilya sa mabuot ag mapinalanggaon nga paagi. Tan-awa ro VIDEO, ag talakaya rayon rayang pangutana.

VIDEO: Pagpalangga ag Pagrespeto ro Nagapaeapit sa Pamilya (3:08)

Ano ro makabulig kimo nga mangin mabuot sa pag-istorya sa ing pamilya?

Basaha ro Efeso 4:31, 32, ag talakaya rayon rayang pangutana:

Anong klasi it panghambae ro makapalig-on sa relasyon it pamilya?

Ginhambae ni Jehova kon ano ro anang ginabatyag parti sa anang Unga, nga si Jesus. Basaha ro Mateo 17:5, ag talakaya rayon rayang pangutana:

Paano mo matuead si Jehova kon nagaistorya ka sa ing pamilya?

Ginakomendahan it nanay ro anang unga nga bayi nga bag-ong tapos eang mag-drawing. — Mag-usoy it tsansa nga taw-an it komendasyon ro iba

KON MAY MAGHAMBAE: “Pagusto tang kon ano ang hambaeon. Owa ta ako nahakat kon owa nanda nailaan ang nahambae.”

Tama baea ron? Ham-an ruyon ing sabat?

SUMARYO

May mabahoe gid nga epekto sa iba ro atong ginahambae. Kinahang-ean naton nga isipon it mayad kon ano ro atong ihambae, hin-uno naton ra ihambae, ag kon paano naton ra ihambae.