Makabulig Katon ro Libro it Job Kon Nagatao Kita it Eaygay

1-2. Sa ano nalisdan ro tatlong amigo ni Job ag si Elihu?

KAT naduea kay Job ro tanan na nga manggad, nasayran it mga tawo sa andang rehiyon ro natabo kana. Nasayran it tatlong amigo ni Job nga sanday Elifaz, Bildad, ag Zofar ro natabo kana, ngani nag-agto rayon sanda sa Uz agud paumpawan imaw. Pero nakibot gid sanda kat nakita nanda ro sitwasyon ni Job.

² Imadyina ro natabo. Nagaantus si Job dahil naduea kana ro haeos tanan nga importante kana. Gintakaw ro anang mga baka, kamelyo, ag mga asno, ag ginpatay ro anang mga karnero. Ginpatay man ro kaeabanan sa anang mga sueoguon. Ag namatay ro tanan nana nga mga unga kat naguba ro baeay nga andang ginatipunan. Pagkatapos kara, nagmasakit man imaw. Napuno it uyapos ro anang eawas. Pag-abot nanday Elifaz, Bildad, ag Zofar, nakita nanda nga masubo gid si Job ag nagapungko sa abo. Ano ro andang gin-obra? Sa sueod it pitong adlaw, owa sanda it may ginhambae kay Job maskin nakita nanda nga grabi gid ro anang pag-antus. (Job 2:​12, 13) Rayon, nag-abot man ro bataon nga si Elihu ag nagpungko maeapit kanda. Ku ulihi, naghambae si Job ag ginsumpa na ro adlaw nga gin-unga imaw ag gusto na eon nga mamatay. (Job 3:​1-3, 11) Kinahang-ean gid ni Job ro bulig ku anang mga amigo pero nalisdan sanda kon ano ro andang ihambae para paumpawan imaw. Rayang mga eaki hay may tsansa nga palig-unon si Job ag ipakita nga matuod sanda nga mga amigo nga nagakabaeaka kana. Tan-awon ta kon ano ro andang gin-obra.

3. Ano ro atong pagatalakayon sa rayang artikulo?

³ Ginpasueat ni Jehova kay Moises kon ano ro mga ginhambae ag gin-obra ku tatlong amigo ni Job ag ni Elihu. Posibleng natandaan mo nga ro mga ginhambae ni Elihu hay halin kay Jehova. Pero, ro mga ginhambae ni Elifaz hay halin sa maeain nga espiritu. (Job 4:​12-16; 33:​24, 25) Ngani mabasa naton sa libro it Job ro pila sa pinakamayad nga eaygay ag ro pila sa pinakabulok nga eaygay nga gintao. Pagatalakayon naton kon paalin makabulig katon ro libro it Job kon nagatao kita it eaygay. Pero, pagatalakayon anay naton ro buko’t mayad nga halimbawa ku tatlong amigo ni Job. Rayon, ro mayad nga halimbawa ni Elihu. Pagatalakayon man naton kon paalin posibleng nakabulig ro libro it Job sa mga Israelinhon ag kon paalin ra makabulig katon makaron.

KON PAALIN GIN-EAYGAYAN SI JOB KU ANANG TATLONG AMIGO

4. Ham-an owa napaumpawan si Job ku anang tatlong amigo? (Tan-awa man ro piktyur.)

⁴ Ginahambae it Biblia nga kat nabalitaan ku tatlong amigo ni Job ro tanan nga maeain nga bagay nga natabo kana, nag-agto sanda para “unungan ag paumpawan imaw.” (Job 2:11) Pero ham-an owa napaumpawan si Job ku anang tatlong amigo? May tatlong ka rason. Una, owa nanda ginpamatian si Job ag owa nanda gintinguhaan nga maintindihan ro anang sitwasyon. Kundi, gin-isip nanda nga ginapinahan si Job dahil may haobra imaw nga saea.a (Job 4:7; 11:14) Pangaywa, ro kaeabanan nga andang ginhambae kay Job hay owa gid nakabulig kana maskin pa matsa mayad man ra pamatian. (Job 13:12) Naghambae man sanda it buko’t mayad nga mga bagay kay Job nga nakasakit kana. Halimbawa, daywang beses nga ginhambae ni Bildad kay Job nga gahinambae eang imaw it pinaumang. (Job 8:2; 18:2) Ag may mga beses nga mapintas gid sanda maghambae kay Job. Halimbawa, ginkumpara ni Zofar si Job sa sangka langu-lango nga tawo. (Job 11:12) Pangatlo, maskin owa nanda ginsinggitan si Job, ro andang ginhambae ag kon paalin nanda ra ginhambae hay nagapakita it pagkabugaeon, pag-intrimis, ag pagpabangud. (Job 15:​7-11) Rayang mga eaki hay nagtinguha gid nga pamatud-an nga makasasaea si Job kaysa paumpawan imaw ag pabakuron ro anang pagtuo.

5. Ano ro resulta it eaygay nga gintao ku tatlong amigo ni Job?

⁵ Ro eaygay ku tatlong amigo ni Job hay owa gid nakapalig-on kay Job kundi mas nag-euya pa ngani ro anang buot. (Job 19:2) Ngani maintindihan naton kon ham-an gusto nang pamatud-an nga inosente imaw. Nangin buko’t makatarungan si Job ag nakahambae imaw it padasu-daso. (Job 6:​3, 26) Ro mga ginhambae ku mga amigo ni Job hay owa nabase sa kaisipan ni Jehova ag owa nanda gintratar si Job nga may kaeuoy. Ngani, gingamit sanda ni Satanas para paeuyahon si Job. (Job 2:​4, 6) Paalin posibleng nakabulig ro libro it Job sa mga Israelinhon, ag paalin ra makabulig katon makaron?

6. Paalin posibleng nakabulig sa mga gueang sa Israel kato ro maeain nga halimbawa ku tatlong amigo ni Job?

⁶ Kon paalin ra posibleng nakabulig sa mga Israelinhon. Kat gintao ni Jehova ro anang mga sugo sa mga Israelinhon, nagpili imaw it mga gueang para maghukom sa anang katawhan ag buligan sanda nga sundon ro anang mga sugo. (Deut. 1:​15-18; 27:1) Kinahang-ean it rayang mga eaki nga pamatian it mayad ro katawhan bago sanda magtao it eaygay o maghukom. (2 Cron. 19:6) Kinahang-ean man nandang magpangutana kaysa isipon eagi nga sayod nanda ro tanan. (Deut. 19:18) Ag kinahang-ean nandang likawan nga maghambae it makapasakit sa mga nagapangayo kanda it bulig. Ham-an? Dahil kon naugot eagi sanda, posibleng indi lang isugid ku ratong nagapangayo it bulig kon ano gid ro anang ginabatyag. (Ex. 22:​22-24) Raya ro pila nga posibleng natun-an it mga gueang sa Israel kato sa libro it Job.

7. Euwas sa mga gueang sa Israel kato, sin-o pa ro pwedeng makatao it eaygay, ag paalin posibleng nakabulig kanda ro libro it Job? (Hulubaton 27:9)

⁷ Euwas sa mga gueang sa Israel kato, pwede man makatao it eaygay ro iba pang Israelinhon. Bataon man sanda o magueang, eaki man o bayi, pwede sandang makabulig sa andang amigo nga mangin mas maeapit kay Jehova o makatao it eaygay kon nakaobra it saea. (Sal. 141:5) Ro pagtao it sinsero nga eaygay hay tanda it pagiging matuod nga amigo. (Basaha ro Hulubaton 27:9.) Ngani posibleng nakabulig sa mga Israelinhon ro maeain nga halimbawa ku tatlong amigo ni Job sa kon ano ro indi dapat hambaeon ag obrahon kon nagatao it eaygay.

8. Ano ro dapat natong likawan kon nagatao kita it eaygay? (Tan-awa man ro piktyur.)

⁸ Kon paalin kita kara mabuligan. Kon nagaantus ro atong mga igmanghod, gusto gid naton sandang buligan. Pero para maobra ra, dapat natong likawan kon ano ro gin-obra it tatlong amigo ni Job. Una, dapat natong likawan nga magtao it eaygay kon owa pa naton nasayran ro mga detalye. Pangaywa, dapat natong likawan nga magtao it eaygay base sa atong sariling opinyon pareho sa pirmeng gin-obra ni Elifaz, kundi dapat nabase ra sa Biblia. (Job 4:8; 5:​3, 27) Pangatlo, dapat natong likawan nga maghambae it masakit o maghusga. Dumdomon naton nga ro pila nga ginhambae ni Elifaz ag ku anang mga amigo hay matuod. Ku ulihi, ginkutar pa ngani ni apostol Pablo ro pila sa mga ginhambae ni Elifaz. (Ikumpara ro Job 5:13 sa 1 Corinto 3:19.) Pero, ro kaeabanan nandang ginhambae parti sa Dyos hay bukon it matuod ag nakasakit ra kay Job. Ngani ginhambae ni Jehova nga owa sanda nagsugid it kamatuoran. (Job 42:​7, 8) Kon nagatao kita it eaygay sa iba, dapat siguraduhon naton nga mapakita nga buko’t mapintas si Jehova o ro anang mga alagad hay nagakadapat palanggaon. Talakayon ta makaron kon ano ro atong matun-an sa halimbawa ni Elihu.

KON PAALIN GIN-EAYGAYAN NI ELIHU SI JOB

9. Ham-an kinahang-ean gihapon ni Job it pagpalig-on maskin pa gin-eaygayan eon imaw it anang tatlong amigo ag paalin imaw ginbuligan ni Jehova?

⁹ Mabuhay nga nagbinais si Job ag ro anang tatlong amigo. Kaabu gid ro andang ginhambae, ngani umabot ra sa 28 nga kapitulo sa Biblia. Ag kaeabanan sa andang ginhambae hay nagapakita nga akig sanda ag naugot. Owa gid nanda napalig-on si Job! Kinahang-ean na gihapon it paumpaw ag pagtadlong. Paalin imaw ginbuligan ni Jehova? Gingamit ni Jehova si Elihu para eaygayan imaw. Pero, ham-an ginhueat ni Elihu nga matapos ro pagbinais ku tatlong ka eaki bago imaw maghambae? Naghambae imaw: “Bataon pa ako ag kamo hay magueang eon. Ngani owa eagi ako naghambae dahil sa ang pagtahod kinyo.” (Job 32:​6, 7) Sayod ni Elihu nga ro mga magueang hay may kaaeam dahil mas mabuhay sanda nga nagkabuhi ag abu sandang eksperyinsya kaysa sa mga bataon. Pero pagkatapos ni Elihu nga magpamati it mapinasensyahon kay Job ag sa anang tatlong amigo, owa na eon napunggan nga maghambae. Naghambae imaw: “Bukon eang it edad ro nagapaaeam sa sangka tawo, ag bukon eang it mga magueang ro nakasayod kon ano ro tama.” (Job 32:9) Ano rayon ro ginhambae ni Elihu, ag paalin na ra ginhambae?

10. Ano anay ro gin-obra ni Elihu bago imaw nagtao it eaygay kay Job? (Job 33:​6, 7)

¹⁰ Bago nagtao si Elihu it eaygay kay Job, ginhueat na anay nga mangin kalmado si Job ag handa nga magpamati sa kon ano ro anang ihambae. Ano ro gin-obra ni Elihu? Una, ginpakalma na anay ro anang sarili bago na istoryahon si Job. Nasayran naton ra dahil ginahambae it Biblia nga ku una hay naakig si Elihu. (Job 32:​2-5) Pero owa gid imaw naghambae it buko’t mayad nga mga bagay nga nakapasakit kay Job, kundi naghambae imaw it makapalig-on. Halimbawa, ginhambae na kay Job: “Tan-awa! Pareho eang ako kimo sa atubang it matuod nga Dyos.” (Basaha ro Job 33:​6, 7.) Rayon, ginpakita ni Elihu nga nagpamati imaw it mayad kay Job dahil bago na imaw eaygayan, gin-uman na ro pila nga panguna nga mga punto nga ginhambae ni Job. (Job 32:11; 33:​8-11) Ag raya man gihapon ro anang gin-obra kat gin-eaygayan na it uman si Job.​—Job 34:​5, 6, 9; 35:​1-4.

11. Paalin gin-eaygayan ni Elihu si Job? (Job 33:1)

¹¹ Kat gin-eaygayan ni Elihu si Job, owa na ginpabatyag kana nga owa imaw it pueos, kundi ginpakita na nga ginarespeto na imaw. Halimbawa, ginsambit na ro pangaean ni Job nga owa gid hasambit ku tatlong amigo ni Job. (Basaha ro Job 33:1.) Posibleng nadumdoman ni Elihu nga gusto na gid kunta nga magsabat kat nagabinais si Job ag ro anang mga amigo. Ngani, gintaw-an na it tsansa si Job nga makasabat kat tapos eon imaw nga mag-eaygay kana. (Job 32:4; 33:32) Ginhambaean na man si Job nga ro pila nga mga bagay nga anang ginhambae ag gin-obra hay buko’t mayad ag ginpadumdom na man kana ro parti sa ay Jehova nga kaaeam, gahum, katarungan, ag mainunongon nga pagpalangga. (Job 36:​18, 21-26; 37:​23, 24) Sigurado gid nga ro mayad nga eaygay ni Elihu hay nakabulig kay Job nga mangin handa sa pagbaton it mga eaygay ni Jehova. (Job 38:​1-3) Paalin posibleng nakabulig ro halimbawa ni Elihu sa mga Israelinhon, ag paalin ra makabulig katon makaron?

12. Paalin gingamit ni Jehova ro mga propeta para buligan ro anang katawhan, ag paalin posibleng nakabulig sa mga Israelinhon ro mayad nga halimbawa ni Elihu?

¹² Kon paalin ra posibleng nakabulig sa mga Israelinhon. Sa bilog nga kasaysayan it Israel, naggamit si Jehova it mga propeta para ipasayod kanda ro anang katuyuan. Halimbawa, ku panahon it mga Hukom, gingamit ni Jehova ro propeta nga si Debora para isugid ro anang mga instruksyon sa anang katawhan. Gingamit na man si Samuel bilang anang manoghambae maskin bata pa imaw. (Huk. 4:​4-7; 5:7; 1 Sam. 3:​19, 20) Rayon, ku panahon it mga hari, padayon nga naggamit si Jehova it mga propeta para buligan ro mga Israelinhon nga makapabilin sa matuod nga pagsimba ag para tadlungon kon nakasaea sanda. (2 Sam. 12:​1-4; Binu. 3:24) Ro halimbawa ni Elihu nga nasueat sa libro it Job hay posibleng nakabulig sa matutom nga mga eaki ag bayi nga masayran kon ano ro dapat ihambae ag obrahon kon nagatao it eaygay.

13. Paalin naton mapalig-on ro atong mga isigka-Cristyano?

¹³ Kon paalin kita kara mabuligan. Bilang mga Cristyano, kinahang-ean man natong isugid ro kabubut-on it Dyos nga makita sa anang Bisaea, ro Biblia. Ro sambilog pa nga paagi para maobra naton ra hay ro paghambae it makapaumpaw ag makapalig-on sa atong mga isigka-Cristyano. (1 Cor. 14:3) Kinahang-ean nga maghaeong gid ro mga elder kon ‘nagapalig-on’ sa mga igmanghod sa kongregasyon maskin pa ro andang ginabuligan hay akig o nakahambae kanda it “padasu-daso.”​—1 Tes. 5:14; Job 6:3.

14-15. Magtao it halimbawa kon paalin matuead it mga elder si Elihu kon nagatao it eaygay.

¹⁴ Halimbawa, nasayran it sangka elder nga naeuyahan it buot ro sangka sister sa kongregasyon. Ngani, ginbisitahan na ro sister kaibahan ro sambilog pa nga brother para palig-unon imaw. Sa andang pagbisita, ginsugid kanda it sister nga maskin pa naga-preaching man imaw ag naga-attend sa mga miting, nagabatyag gihapon imaw it kasubo. Ano ro obrahon it elder para mabuligan imaw?

¹⁵ Una, tinguhaan nang sayuron kon ano ro mga rason it kasubo ku sister. Para maobra ra, kinahang-ean na anay imaw pangutan-on ag pamatian it mayad. Nabatyagan na baea nga owa imaw nagakabagay sa pagpalangga it Dyos? O nagapaeuya baea kana ro “mga paealigban [o, kabaeaka] sa rayang kabuhi”? (Luc. 21:34) Pangaywa, tinguhaan it elder nga komendahan ro sister sa mayad nga mga bagay nga anang ginaobra dahil maskin nagabatyag imaw it kasubo, naga-attend gihapon imaw sa mga miting ag naga-preaching. Ag pangatlo, kon naintindihan eon it elder kon ham-an nasubuan ro sister, gamiton na rayon ro Biblia para ipakita kana nga palangga gid imaw ni Jehova.​—Gal. 2:20.

PADAYON KA NGA MAKABENEPISYO SA LIBRO IT JOB

16. Paalin kita padayon nga makabenepisyo sa libro it Job?

¹⁶ Padayon kita nga makabenepisyo kon tun-an naton ro libro it Job! Natun-an naton sa nagtaliwan nga artikulo kon ham-an ginapasugtan it Dyos ro pag-antus ag kon paalin naton ra matiis. Ag natun-an man naton sa rayang artikulo kon paalin kita makatao it mayad nga eaygay paagi sa pagtuead sa mayad nga halimbawa ni Elihu ag buko’t sa tatlong amigo ni Job. Ngani, kon may magpangayo kimo it eaygay sa masunod, pwede mo anay tun-an it uman ro libro it Job. Ag kon mabuhay mo eon nga owa habasa rayang libro, pwede mong obrahong goal nga basahon ra it uman. Siguradong makabenepisyo ka gid kon paalin nakabenepisyo ro iba kato kat ginsueat ra.