Padayon nga Magsalig sa Paggiya ni Jehova

1. Ano ro pila sa panguna nga mga kinahang-eanon it tawo? (Mateo 5:3)

GINTUGA ni Jehova ro mga tawo nga may panguna nga mga kinahang-eanon. Halimbawa, para mabuhi, kinahang-ean naton it pagkaon, eambong, ag ieistaran. Kon owa katon ro maskin sambilog kara, mangin malisud ro atong kabuhi o pwede kitang mamatay. Euwas sa pagkinahang-ean naton sa materyal nga mga bagay, gintuga man kita ni Jehova nga may espiritwal nga kinahang-eanon. (Basaha ro Mateo 5:3, NWT.) Kon gusto natong mangin matuod nga masadya, dapat sayod naton nga kinahang-ean naton ro anang paggiya ag padayon nga magsalig kana.

2. Iilustrar kon ano ro buot hambaeon it pagiging “paeaisip” sa atong “espiritwal nga kinahang-eanon.”

² Ano ro buot hambaeon it pagiging “paeaisip” sa atong “espiritwal nga kinahang-eanon”? Sa orihinal nga linggwahe, rayang ekspresyon hay nagatukoy sa nagapakalimos it espiritwal nga mga bagay. Isipa ro nagapakalimos nga tawo. Nagapungko imaw sa kilid it karsada, ag ro anang eambong hay gisi-gisi ag mahigko, ngani ginalikawan imaw it mga tawo. Maeuya imaw dahil owa haeos it makaon, una sa initan, ag ginaeamig kon gabii. Sayod it ruyong nagapakalimos nga kinahang-ean na it bulig para padayon nga mabuhi ag mangin mabaskog ro anang eawas. Pareho karon, sayod it mga paeaisip sa andang espiritwal nga kinahang-eanon nga kinahang-ean nanda ro bulig it Dyos sa andang kabuhi. Ngani gusto gid nanda nga makabenepisyo sa bugana nga espiritwal nga mga probisyon nga ginatao ni Jehova sa ratong mga nagapalangga kana.

3. Ano ro atong pagatalakayon sa rayang artikulo?

³ Sa rayang artikulo, pagatalakayon anay naton kon ano ro atong matun-an sa bayi nga taga-Fenicia nga nagpakit-euoy nga buligan imaw ni Jesus. Ginapabahoe kara ro tatlong ka ugali nga dapat paeambuon it ratong mga paeaisip sa andang espiritwal nga kinahang-eanon. Rayon, pagatalakayon man naton ro halimbawa nanday apostol Pedro ag Pablo pati man ni Haring David, nga nagsalig sa bulig ni Jehova.

TATLONG KA UGALI NGA KINAHANG-EAN GID NATON

4. Ano ro gusto it bayi nga taga-Fenicia nga obrahon ni Jesus?

⁴ Sang adlaw, nag-agto kay Jesus ro bayi nga taga-Fenicia. Ro anang unga nga bayi hay “ginsudlan it demonyo . . . ag grabi gid ro anang kahimtangan.” (Mat. 15:21-28) Nag-euhod ro bayi kay Jesus ag nagpakit-euoy nga buligan ro anang unga nga bayi. Ginpakita it bayi nga taga-Fenicia ro manami nga mga ugali kat nagpabulig imaw kay Jesus. Talakayon ta ro pila kara.

5. Ano nga mga ugali ro ginpakita it bayi nga taga-Fenicia, ag ano ro gin-obra ni Jesus? (Tan-awa man ro piktyur.)

⁵ Ginpakita it bayi nga taga-Fenicia ro pagkamapainubuson. Ham-an nahambae naton ra? Dahil owa imaw naakig maskin pa ginkumpara imaw ni Jesus sa maisot nga ayam, kon siin posibleng ginaalagaan ra it mga buko’t Judio sa andang baeay. Ano ing obrahon kon hambaeon kimo ron ni Jesus? Maakig ka baea ag indi eon magpangayo it bulig kana? Bukon gid it ruyon ro gin-obra ku bayi nga taga-Fenicia. Nangin mapainubuson imaw ag owa nagpundo sa pagpangayo it bulig kay Jesus. Ano ro nagpahueag kana nga obrahon ron? Ro anang pagtuo kay Jesus. Ag kat nakita ni Jesus ro anang mabakud nga pagtuo, ginbuligan na ra. Maskin ginhambae ni Jesus kana nga ginpadaea imaw para eang sa “naduea nga mga karnero it Israel,” ginbuligan gihapon imaw ni Jesus ag ginpaguwa ro demonyo sa anang unga nga bayi.

6. Paalin naton matuead ro bayi nga taga-Fenicia?

⁶ Kon gusto natong makabenepisyo sa bulig ni Jehova, kinahang-ean natong tuearon ro bayi nga taga-Fenicia. Kinahang-ean naton nga mangin mapainubuson ag indi magpundo sa pagpangayo it bulig sa Dyos. Kinahang-ean man nga may mabakud kita nga pagtuo kay Cristo Jesus ag saligan ro anang mga ginagamit para giyahan kita. (Mat. 24:45-47) Masadya gid si Jehova ag si Jesus kon mapainubuson kita, padayon nga nagapangayo it bulig kanda, ag nagatuo. Kon obrahon naton ra, buligan nanda kita ag giyahan. (Ikumpara ro Santiago 1:5-7.) Talakayon ta makaron kon paalin kita ginagiyahan ni Jehova ag ginataw-an it atong mga kinahang-eanon para mangin masadya. Talakayon man naton kon paalin naton matuead sanday apostol Pedro, apostol Pablo, ag Haring David.

PAREHO KAY PEDRO—PADAYON NGA MAGTUON SA BISAEA IT DYOS

7. Ano ro sugo nga nabaton ni Pedro, ag ano pa ro dapat nang obrahon? (Hebreo 5:14–6:1)

⁷ Tan-awa ro halimbawa ni apostol Pedro. Sambilog imaw sa mga Judio nga unang nakasayod nga si Jesus ro Mesias—ro isaea nga ginagamit ni Jehova para pakan-on ro Anang katawhan it “mga bisaea nga nagatao it kabuhi nga owa it katapusan.” (Juan 6:66-68) Bago si Jesus magbalik sa eangit, ginsugo na si Pedro: “Tatapa ro akong mga karnero.” (Juan 21:17) Gintuman gid ni Pedro rayang sugo, ag gingamit imaw ni Jehova nga obrahon ro daywang ka sueat nga nangin parte it Biblia. Pero kinahang-ean na man nga padayon nga tun-an ro Bisaea it Dyos. Halimbawa, gintun-an na ro mga hasueat eon ni Pablo. Aminado man imaw nga ro pila sa mga ginsueat ni Pablo hay “malisud eubton.” (2 Ped. 3:15, 16) Pero padayon ra nga gintun-an ni Pedro, nga nagatuo nga buligan imaw ni Jehova nga maintindihan ra ag maaplikar ro anang mga natun-an.—Basaha ro Hebreo 5:14–6:1.

8. Ano ro gin-obra ni Pedro kat nabaton na ro bag-ong instruksyon halin kay Jehova?

⁸ Ginpakita ni Pedro nga may pagtuo imaw kay Jehova paagi sa pagsunod sa instruksyon nga anang nabaton. Halimbawa, habang sa syudad it Joppe, nakakita si Pedro it paeanan-awon ag ginsugo imaw it anghel nga magkaon it karne ku mga sapat nga bawae kan-on it mga Judio base sa Mosaikong Kasugoan. Nakibot gid si Pedro nga sangka Judio sa instruksyon ku anghel. Ku una, nagsabat si Pedro: “Indi ako karon makahimo, Ginuo! Owa gid ako nagakaon it nadagtaan ukon mahigko.” Ginhambae rayon kana ku anghel: “Indi pagkabiga nga mahigko ro bisan ano nga butang nga ginhambae it Dyos nga malimpyo.” (Binu. 10:9-15) Ginsunod ra ni Pedro ag ginbag-o ro anang kaisipan. Paalin naton ra nasayran? Pagkatapos nang makita ro paeanan-awon, tatlong ka eaki ro nag-agto sa andang baeay. Ginhambae nanda nga gusto imaw makita ku andang amo nga si Cornelio nga sangka Hentil. Bago na nakita ro paeanan-awon, indi gid si Pedro mag-agto sa baeay it mga Hentil. Dahil para sa mga Judio, bukon sanda it malimpyo. (Binu. 10:28, 29) Pero ginbaton eagi ni Pedro ro bag-ong instruksyon nga gintao kana ni Jehova. (Hulu. 4:18) Ginwalihan na si Cornelio pati man ro anang mga kaibahan sa andang baeay. Nagtuo gid sanda kay Jesus, nakabaton it baeaan nga espiritu, ag nagpabautismo.—Binu. 10:44-48.

9. Ano ro daywang ka paagi nga makabenepisyo kita kon tun-an naton ro mga kamatuoran nga posibleng malisud intindihon?

⁹ Pareho kay Pedro, dapat natong tun-an it regular ro panguna nga mga kamatuoran sa Bisaea it Dyos. Pero, dapat man natong paeambuon ro atong kagustuhan nga tun-an ro mga kamatuoran nga posibleng malisud intindihon. Ngani, kinahang-ean natong magtao it oras ag magtinguha para maintindihan it mayad ro Bisaea it Dyos. Ham-an? Dahil makabenepisyo kita sa daywang ka paagi: Una, matun-an naton ro mga bagay parti kay Jehova nga nagapadaeum it atong pagpalangga ag pagrespeto kana. Ag pangaywa, mas mapalig-on kita nga isugid sa iba kon mauno kadaeayawon ro atong Ama sa eangit. (Roma 11:33; Pah. 4:11) Ro halimbawa ni Pedro hay nagaturo pa gid katon it sambilog pa nga leksyon: Kon makabaton kita it mga pagbag-o sa atong pag-eubot sa Bisaea it Dyos, kinahang-ean eagi naton nga bag-uhon ro atong kaisipan ag mga ginaobra. Paagi karon, padayon kita nga magiyahan ni Jehova ag padayon naton imaw nga maalagad it matutom.

PAREHO KAY PABLO—PADAYON NGA ISUKSOK RO BAG-ONG PERSONALIDAD

10. Base sa Colosas 3:8-10, ano ro kinahang-ean natong obrahon para mapasadya si Jehova?

¹⁰ Ginagiyahan man kita ni Jehova paagi sa pagbulig katon nga mapaeambo ro mga ugali nga nagapasadya kana. Ano ro buot hambaeon kara? Ginsueat ni apostol Pablo nga dapat natong ‘ubahon ro daan nga ugali’ ag isuksok ro “bag-o nga kinaugali [o, personalidad].” (Basaha ro Colosas 3:8-10.) Kinahang-ean it panahon ag pagtinguha para mapaeambo naton ro mga ugali nga nagapasadya sa Dyos. Tan-awa ro halimbawa ni Pablo. Halin kat bata pa imaw, gintinguhaan na gid nga mapasadya ro Dyos. (Gal. 1:14; Fil. 3:4, 5) Pero owa na gid naintindihan kon paalin simbahon ro Dyos sa tama nga paagi. Ag owa na nasayran ro kamatuoran parti sa mga ginturo ni Jesus. Bugaeon man si Pablo, ngani owa imaw nagkabuhi sa paagi nga makapasadya sa Dyos. Ginhambae na nga “mapintas” imaw nga tawo kato.—1 Tim. 1:13.

11. Ano nga ugali ro dapat bag-uhon ni Pablo? Ieksplikar.

¹¹ Bago nangin Cristyano si Pablo, madali imaw maakig. Ginasugid ku libro it Binuhatan nga naakig gid si Pablo sa mga disipulo ni Jesus ngani “grabi gid ro handum [nana] nga hingabuton ag patyon” sanda. (Binu. 9:1) Kat nangin Cristyano eon si Pablo, nagtinguha gid imaw nga ubahon ro anang dating personalidad. (Efe. 4:22, 31) Pero nagkasaea gihapon imaw. Kat owa sanda nagkaintindihan ni Bernabe, naakig gid si Pablo. (Binu. 15:37-39) Sa ruyong sitwasyon, owa napasadya ni Pablo ro Dyos. Pero padayon nang gintinguhaan nga mabag-o ro anang mga ugali para mapasadya si Jehova.—1 Cor. 9:27.

12. Ano ro nakabulig kay Pablo nga mabag-o ro anang maeain nga mga ugali?

¹² Nagmadinaeag-on gid si Pablo nga mabag-o ro anang maeain nga mga ugali dahil mapainubuson imaw. (Fil. 4:13) Pareho kay Pedro, nagsalig si Pablo sa “ikasarang nga gintao it Dyos kana.” (1 Ped. 4:11) Kon amat, naeuyahan gihapon si Pablo. Pero kon mabatyagan na ra, ginapamaeandungan na rayon ro mayad nga mga bagay nga gin-obra it anang Ama sa eangit para kana, ag ruyon ro nagapabakud kana nga padayon nga magtinguha.—Roma 7:21-25.

13. Paalin naton matuead si Pablo?

¹³ Matuead naton si Pablo kon padayon natong tinguhaan nga bag-uhon ro atong mga ugali, maskin pa mabuhay eon kita nga nagaalagad kay Jehova. Kon makaobra eon man kita it saea pareho it paghambae it buko’t mayad sa iba o indi naton makontrol ro atong kaakig, indi dapat naton pag-isipon nga indi eon naton mapasadya si Jehova. Kundi, dapat padayon kita nga mag-obra it mga pagbag-o. (Roma 12:1, 2; Efe. 4:24) Dapat man natong tandaan rayang importanteng bagay: Kon gusto natong padayon nga mapauswag ro atong ugali, kinahang-ean natong maintindihan it mayad kon ano ro gusto ni Jehova nga obrahon naton.

PAREHO KAY DAVID—MAGPABILIN SA PROTEKSYON NI JEHOVA

14-15. Sa anong mga paagi ginaprotektahan ni Jehova ro anang katawhan? (Salmo 27:5) (Tan-awa man ro piktyur.)

¹⁴ Para mangin matuod nga masadya, kinahang-ean man naton si Jehova para protektahan kita. Sa anong mga paagi ginaprotektahan kita ni Jehova, ag paalin kita makapabilin sa anang proteksyon?

¹⁵ Sigurado si Haring David nga protektahan imaw ni Jehova sa malisud nga mga sitwasyon. (Basaha ro Salmo 27:5.) Paalin ginaprotektahan ni Jehova ro anang katawhan makaron? Ginaprotektahan na sanda sa maskin sin-o ag maskin alin nga pwedeng makasamad sa andang pagtuo kana. Nagapromisa imaw nga owa it maskin ano nga armas nga gin-obra kontra katon ro magamadinaeag-on. (Sal. 34:7; Isa. 54:17) Maskin gamhanan si Satanas, ro mga demonyo, ag ro mga nagahingabot katon, indi kita nanda mahalitan it permanente. Maskin pa patyon nanda kita, buhion kita it uman ni Jehova. (1 Cor. 15:55-57; Pah. 21:3, 4) Buligan man kita ni Jehova nga makaya ro mga kabaeaka agud padayon kita nga makaalagad kana. (Hulu. 12:25; Mat. 6:27-29) Ag ginataw-an kita it atong mapinalanggaon nga Ama it mga igmanghod nga nagapalig-on ag nagabulig katon sa malisud nga mga sitwasyon. Ginataw-an na man kita it mga elder para tur-an ag buligan kita nga padayon nga mangin mabakud ro atong pagtuo. (Isa. 32:1, 2) Ag kon naga-attend kita sa mga miting, matun-an naton ro iba pang paagi kon paalin kita buligan ag protektahan ni Jehova.—Heb. 10:24, 25.

16. Sa anong mga paagi ginprotektahan ni Jehova si David?

¹⁶ Kat gintuman ni David si Jehova, ginbuligan imaw ni Jehova nga makaobra it mayad nga mga desisyon, ag mangin masadya. Sa ruyong paagi, ginprotektahan na si David. (Ikumpara ro Hulubaton 5:1, 2.) Pero kat owa imaw nagtuman kay Jehova, owa imaw ginprotektahan ni Jehova sa maeain nga resulta it anang mga gin-obra. (2 Sam. 12:9, 10) May mga panahon nga nag-antus si David dahil sa buko’t mayad nga pagtratar kana it iba. Kat natabo ron, ginsugid na kay Jehova sa pangamuyo ro tanan nanang ginabatyag ag ginprotektahan imaw ni Jehova. Paalin? Ginpaumpawan imaw ni Jehova paagi sa pagpasalig kana nga palangga na gid imaw ag nagakabaeaka imaw kana.—Sal. 23:1-6.

17. Paalin naton matuead si David?

¹⁷ Matuead naton si David kon mangamuyo man kita kay Jehova ag magpagiya sa Anang mga eaygay kon nagaobra kita it mga desisyon. Dapat natong tandaan nga kon indi naton tumanon si Jehova, indi na kita protektahan sa maeain nga resulta it atong desisyon. (Gal. 6:7, 8) Ag kon makaatubang kita it mga kalisdanan dahil sa gin-obra it iba katon, ginasugid naton kay Jehova sa pangamuyo ro tanan natong ginabatyag, nga nagasalig nga protektahan na ro atong tagipusuon ag isip.—Fil. 4:6, 7.

PADAYON NGA MAGSALIG SA PAGGIYA NI JEHOVA

18. Ano ro ginaisip it mga tawo parti sa paggiya it Dyos, ag ano ro dapat natong obrahon para padayon kita nga giyahan ni Jehova? (Tan-awa man ro piktyur.)

¹⁸ Ro atong teksto sa dag-on nga 2026 hay nagahambae: “Masadya ro mga paeaisip sa andang espiritwal nga kinahang-eanon.” Importante gid ra nga obrahon naton makaron pareho sa ginhambae ni Jesus ag magsalig sa paggiya ni Jehova. Ham-an? Dahil abung tawo makaron ro nagaisip nga bukon nanda it kinahang-ean ro Dyos ag ro anang paggiya. Ag ro iba hay nagapati sa Dyos, pero mas gusto nanda nga simbahon imaw sa andang sarili nga paagi. Ro iba mat-a hay nagasalig sa paggiya it mga tawo, pero nagpasubo eang ra kanda. Ngani, dapat natong likawan nga maimpluwensyahan it rayang mga tawo. Paalin? Paagi sa padayon nga pagtuon sa Bisaea ni Jehova, padayon nga pagsuksok it bag-o nga personalidad, ag sa pagpabilin sa anang proteksyon.