TUEON-AN NGA ARTIKULO 26
KANTA 123 Mainunungon nga Magpasakop sa Kahimusan sang Dios
Batuna it Mapainubuson nga May mga Bagay nga Owa Mo Nasayran
“Indi naton maintindihan ro tanan nga bagay parti sa Eabing Gamhanan.”—JOB 37:23.
RO ATONG MATUN-AN
Maskin owa kita kasayod kon ano ro mga matabo, matiis naton ro mga kalisdanan kon isipon naton ro mga bagay nga sayod naton, ag magsalig kay Jehova.
1. Ano ro mga ikasarang nga gintao katon ni Jehova, ag ham-an?
GIN-OBRA kita ni Jehova nga may ikasarang nga makaisip, makatuon it bag-ong mga bagay, ag maintindihan kon paalin naton maaplikar ro atong mga natun-an. Ham-an makara ro pag-obra na katon? Dahil gusto ni Jehova nga makaobra kita it mayad nga mga desisyon base sa insakto nga kaaeam ag mag-alagad kana.—Hulu. 2:1-5; Roma 12:1.
2. (a) Ano ro atong limitasyon? (Job 37:23, 24) (Tan-awa man ro piktyur.) (b) Paalin kita makabenepisyo kon batunon naton it mapainubuson ro atong limitasyon?
2 Maskin may ikasarang kita nga makatuon it abung mga bagay, may limitasyon gihapon ro atong kayang masayran. (Basaha ro Job 37:23, 24.) Tan-awon ta ro halimbawa ni Job. Ginpangutana ni Jehova si Job it abung mga pangutana nga nagbulig kana nga makita nga abu pa ro owa nana nasayran. Nakabulig ra kana nga marealisar nga kinahang-ean nang mangin mapainubuson ag bag-uhon ro anang kaisipan. (Job 42:3-6) Makabenepisyo man kita kon batunon naton nga owa naton nasayran ro tanan. Kon dumdomon naton ra, makabulig ra katon nga mangin mapainubuson ag magsalig nga isugid pirme ni Jehova ro kinahang-ean gid natong masayran agud makaobra it mayad nga mga desisyon.—Hulu. 2:6.
Pareho kay Job, makabenepisyo kita kon batunon naton nga bukon naton it sayod ro tanan (Tan-awa ro parapo 2)
3. Ano ro atong pagatalakayon sa rayang artikulo?
3 Sa rayang artikulo, pagatalakayon naton ro pilang mga bagay nga owa naton nasayran ag ro mga kalisdanan nga pwede natong maeksperyinsyahan dahil kara. Tun-an man naton kon ham-an mayad gid nga owa naton nasayran ro pilang mga bagay. Ro atong mga matun-an kara hay makabulig katon nga magsalig kay Jehova, ro “Isaea nga perpekto sa kaaeam,” nga isugid na katon kon ano gid ro kinahang-ean natong masayran.—Job 37:16.
OWA KITA KASAYOD KON HIN-UNO MAABOT RO KATAPUSAN
4. Base sa Mateo 24:36, ano ro sambilog nga kamatuoran nga owa naton nasayran?
4 Basaha ro Mateo 24:36. Owa kita kasayod kon hin-uno matapos rayang sistema it mga bagay. Maskin si Jesus, kat iya imaw sa eugta hay owa man kasayod kon anong “adlaw ag oras” ra matabo.a Ku ulihi, ginhambae na sa anang mga apostoles nga si Jehova ro isaea nga makadesisyon kon hin-uno na ipahanabo ro mga bagay. (Binu. 1:6, 7) Si Jehova ro nagdesisyon kon hin-uno matapos rayang sistema, pero owa kita kasayod kon hin-uno gid ra matabo.
5. Dahil owa kita kasayod kon hin-uno ro katapusan, ano ro pwedeng mangin epekto kara katon?
5 Owa kita kasayod kon mauno’t buhay kita nga magahueat hasta mag-abot ro katapusan. Ngani posibleng madismaya kita o mangin bukon it mapinasensyahon, eabi eon gid kon mabuhay eon kita nga nagahueat sa adlaw ni Jehova. Posible man kitang maeuyahan it buot kon intrimison kita it pila sa mga myembro it atong pamilya o it iba. (2 Ped. 3:3, 4) Ag kon sayod naton ro insaktong adlaw kon hin-uno mag-abot ro katapusan, basi isipon naton nga mas maeumo nga maghueat ag indi kita maeuyahan it buot kon intrimison it iba.
6. Ham-an mayad nga owa naton nasayran kon hin-uno maabot ro katapusan?
6 Dahil owa katon ginhambae ni Jehova ro insaktong adlaw kon hin-uno maabot ro katapusan, may tsansa kita nga mapakita nga nagaalagad kita kana dahil palangga naton imaw ag nagasalig kita kana. Gusto natong alagaron it dayon si Jehova, bukon eang it hasta nga mag-abot ro katapusan. Ngani imbes isipon naton pirme kon hin-uno maabot ro “adlaw ni Jehova,” mas mayad nga isipon naton ro mayad nga mga bagay nga matabo pagkatapos kara. Makabulig ra katon nga mangin mas maeapit kay Jehova, magsalig kana, ag obrahon ro tanan para mapasadya imaw.—2 Ped. 3:11, 12, NWT.
7. Ano ro sayod naton?
7 Mayad gid kon magpukos kita sa kon ano ro sayod naton. Sayod naton nga nag-umpisa ro katapusan nga mga inadlaw ku 1914. Ginpasueat ni Jehova ro mga hula sa Biblia nga nagapamatuod nga ro dag-on nga 1914, ro umpisa it katapusan nga mga inadlaw. Ag ginasugid man it Biblia ro mga detalye kon ano ro mga matabo sa kalibutan umpisa sa ruyong dag-on. Ngani, kumbinsido kita nga “ro mabahoe nga adlaw ni Jehova hay maeapit eon.” (Sof. 1:14) Sayod man naton ro ueobrahon nga gusto ni Jehova nga obrahon naton, gusto na nga isugid naton ro “Mayad nga Balita nahanungod sa Ginharian” sa mas maabu nga tawo. (Mat. 24:14) Rayang mayad nga balita hay ginasugid naton sa mga 240 nga nasyon ag sa sobra 1,000 nga mga linggwahe. Indi naton kinahang-ean masayran ro “adlaw ag oras” para mangin mahugod sa rayang importanteng ueobrahon.
OWA KITA KASAYOD KON PAALIN KITA BULIGAN NI JEHOVA
8. Sa ano nagatukoy ro “inubrahan it matuod nga Dyos”? (Manugwali 11:5)
8 Indi naton masayran pirme ro “inubrahan it matuod nga Dyos.” (Basaha ro Manugwali 11:5.) Nagatukoy ra sa kon ano ro ipahanabo ni Jehova o kon ano ro anang pasugtan nga matabo para matuman ro anang kabubut-on. Owa kita kasayod sa tanan nga rason kon ham-an ginapasugtan ni Jehova nga matabo ro sangka bagay o kon paalin na gid kita buligan. (Sal. 37:5) Indi gid naton ra kayang matungkad pareho sa kon paalin nga indi man naton kayang maintindihan it mayad kon paalin ro unga hay nagabahoe sa tiyan it nanay, nga indi man maintindihan it mayad maskin it mga scientist.
9. Dahil owa kita kasayod kon paalin kita buligan ni Jehova, ano ro pwede natong batyagon?
9 Dahil owa kita kasayod kon paalin kita buligan ni Jehova, posibleng indi kita makadesisyon it mayad. Posibleng magdaywang-isip kita nga magsakripisyo para mapaeapad ro atong pagministeryo, o magsaylo kon siin ro may mas mabahoe nga pagkinahang-ean it mga manogwali. O posibleng isipon naton nga owa naton napasadya si Jehova kon indi naton maabot ro atong espiritwal nga mga goal, kon owa it mayad nga mga resulta ro atong pagtinguha sa pagministeryo, o kon makaatubang kita it mga kalisdanan maskin ginaobra man naton ro atong bilog nga masarangan sa sangka proyekto it organisasyon.
10. Ano ro importanteng mga ugali nga mapauswag naton dahil owa kita kasayod kon paalin kita buligan ni Jehova?
10 Dahil owa kita kasayod kon paalin kita buligan ni Jehova, makabulig ra katon nga mapauswag ro importanteng mga ugali pareho it pagkamapainubuson ag kaugdang. Makabulig ra katon nga maintindihan nga sayod ni Jehova ro pinakamayad para katon. (Isa. 55:8, 9) Makabulig man ra katon nga magsalig it mayad kay Jehova nga buligan na kita sa tanan nga bagay. Kon may mayad nga resulta sa atong pagministeryo o sa sangka teokratiko nga proyekto, ginatao naton ro pagdayaw kay Jehova. (Sal. 127:1; 1 Cor. 3:7) Ag kon may matabo nga owa naton ginapaabot, tandaan naton nga nakikita ra ni Jehova. (Isa. 26:12) Ginaobra naton ro atong bilog nga masarangan, ag nagasalig nga buligan gid kita pirme ni Jehova. Ngani makasalig kita nga ana kitang giyahan, maskin indi na ra pag-obrahon sa milagruso nga paagi pareho sa gin-obra na kato.—Binu. 16:6-10.
11. Ano ro importanteng mga bagay nga sayod naton?
11 Sayod naton nga si Jehova hay mapinalanggaon, makatarungan, ag maaeam. Sayod man naton nga ginaapresyar na gid ro atong mga ginaobra para kana ag para sa atong mga igmanghod. Ag sayod naton nga ginapakamayad pirme ni Jehova ro mga mainunongon kana.—Heb. 11:6.
OWA KITA KASAYOD KON ANO RO MATABO HIN-AGA
12. Base sa Santiago 4:13, 14, ano ro owa naton nasayran?
12 Basaha ro Santiago 4:13, 14. Owa naton nasayran kon ano ro matabo katon hin-aga. Abung mga bagay ro pwedeng matabo katon nga owa naton ginapaabot o indi naton makontrol. (Man. 9:11) Ngani, owa kita kasayod kon mangin madinaeag-on ro atong mga plano, o kon buhi pa kita hin-aga para maobra ra.
13. Ano ro atong ginabatyag kon amat dahil owa kita kasayod kon ano ro matabo sa paeaabuton?
13 Posibleng malisdan kita nga magtiis dahil owa kita kasayod kon ano ro matabo sa paeaabuton. Ham-an? Dahil posible kitang magkabaeaka it sobra sa kon ano ro pwedeng matabo nga makaduea it atong kasadya. Ro owa ginapaabot nga mga trahedya ag mga hitabo hay pwedeng makapasubo ag makapaakig katon. Ag kon indi matabo ro atong mga ginaeauman, posibleng madismaya kita ag maeuyahan it buot.—Hulu. 13:12.
14. Sa ano nakadepende ro atong matuod nga kasadya? (Tan-awa man ro piktyur.)
14 Kon ginatiis naton ro mga kalisdanan, mapamatud-an naton nga maskin ano man ro matabo, nagaalagad kita sa atong Ama sa eangit dahil palangga naton imaw. Ginahambae it Biblia nga indi dapat kita magpaabot nga protektahan kita ni Jehova sa tanan nga kalisdanan ag owa na man ginaplano ro tanan nga matabo sa atong kabuhi. Sayod na nga owa nagadepende ro atong kasadya sa kon ano ro atong nasayran sa paeaabuton. Kundi, nagadepende ra sa atong pagpagiya ag pagsunod kana. (Jer. 10:23) Kon nagapagiya kita kana sa pag-obra it mga desisyon, matsa ginahambae man naton nga, “Kon itugot [ni Jehova,] magakabuhi kita ag magahimo kara ukon karon.”—Sant. 4:15.
Kon nagapagiya kita kay Jehova ag ginatuman imaw, nagatao ra it masaligan nga proteksyon (Tan-awa ro parapo 14-15)b
15. Ano ro sayod naton parti sa paeaabuton?
15 Owa kita kasayod kon ano ro matabo sa kada adlaw, pero sayod naton nga nagpromisa katon si Jehova it kabuhi nga owa’t katapusan, sa eangit man ra o sa eugta. Sayod naton nga bukon imaw it purilon ag owa it makapugong kana sa pagtuman it tanan nanang promisa. (Tito 1:2) Imaw eang ro ‘makasugid sa matabo, ag sa mga bagay nga owa pa matabo.’ Ro anang mga ginhambae kato hay natuman eon, ag matuman man ro anang mga ginhambae sa paeaabuton. (Isa. 46:10) Makasigurado kita nga owa it may makapugong sa pagpalangga ni Jehova katon. (Roma 8:35-39) Taw-an na kita it kaaeam, paumpaw, ag kusog nga kinahang-ean naton para matiis ro mga kalisdanan. Makasalig kita nga buligan ag pakamayron kita ni Jehova.—Jer. 17:7, 8.
INDI NATON MASAYRAN IT MAYAD KON MAUNO KITA KAKILAEA NI JEHOVA
16. Ano ro sayod ni Jehova parti katon, ag ano ing ginabatyag kara? (Salmo 139:1-6)
16 Basaha ro Salmo 139:1-6. Sayod it atong Manogtuga ro tanan parti katon. Sayod na kon ham-an ruyon ro atong ginaisip ag ginabatyag. Naintindihan na ro mga bagay nga ginahambae naton, ag kon ano ro una sa atong tagipusuon. Sayod na man ro tanan nga ginaobra naton ag kon ham-an ginaobra naton ra. Ginhambae ni Haring David nga si Jehova hay handa pirme nga magbulig katon. Ano ing ginabatyag dahil sayod mo nga ro Eabing Gamhanan nga Dyos, nga Eabing Mataas, ag nagtuga it tanan nga bagay hay interesado gid kimo? Naghambae si David: “Rayang kaaeam hay daeayawon gid para kakon. Kadaeum gid ra ag indi ko matungkad.”—Sal. 139:6, ftn.
17. Ham-an posibleng malisdan kita nga magpati nga kilaea gid kita ni Jehova?
17 Dahil sa atong ginbahuean nga pamilya, kultura, o dating mga pagpati, posibleng malisdan kita nga patihan nga si Jehova hay sangka mapinalanggaon nga Ama ag interesado gid katon. O posibleng nabatyagan naton nga ro atong mga saea dati hay kaeain gid nga indi eon kita gustong kilaeahon ni Jehova ag maeayo imaw katon. Maskin si David hay nakabatyag man kara. (Sal. 38:18, 21) O posible nga ro sangka tawo nga nagatinguha nga bag-uhon ro anang kabuhi ag sundon ro matarung nga mga pagsueondan it Dyos hay mag-isip, ‘Kon kilaea gid man ako it Dyos, ham-an gusto na nga aywanan ko ro kabuhi nga nakasanayan ko eon?’
18. Ham-an importante nga batunon naton nga mas kilaea kita ni Jehova kaysa sa atong sarili? (Tan-awa man ro piktyur.)
18 Importante nga batunon naton nga mas kilaea kita ni Jehova kaysa sa atong sarili ag nakikita na ro mayad katon nga owa naton nakikita. Maskin sayod na ro atong mga kaeuyahon, naintindihan na kon ham-an raya ro atong ginabatyag ag ginaobra, ag palangga na gihapon kita. (Roma 7:15) Ngani kon sayod naton nga ginatan-aw ni Jehova ro mayad katon, nagadugang ro atong kompyansa nga alagaron imaw it matutom ag may kasadya.
Ginabuligan kita ni Jehova nga matiis ro mga kalisdanan sa rayang sistema paagi sa pagpabakud it atong pagtuo sa manami nga kabuhi nga nagahueat katon sa bag-ong kalibutan (Tan-awa ro parapo 18-19)c
19. Ano ro sigurado nga sayod naton parti kay Jehova?
19 Sayod naton nga mapinalanggaon si Jehova. Sigurado gid kita parti kara. (1 Juan 4:8) Sayod man naton nga ro anang mataas nga mga pagsueondan hay nagapakita it anang pagpalangga katon ag gusto na ro pinakamayad para katon. Sayod pa gid naton nga gusto ni Jehova nga mabuhi kita sa owa’t katapusan. Gintao na ro pangtubos para mangin posible ra. Ro regalo nga pangtubos hay nagapasalig katon nga pwede natong mapasadya si Jehova maskin bukon kita it perpekto. (Roma 7:24, 25) Ag sayod naton nga “ro Dyos eabaw pa sa atong tagipusoon, ag nakasayod imaw kung tanan.” (1 Juan 3:19, 20) Nakikita ni Jehova ro tanan parti katon, ag sigurado imaw nga mangin madinaeag-on kita sa pag-obra it anang kabubut-on.
20. Ano ro makabulig katon nga indi mabaeaka it sobra?
20 Ginasugid katon ni Jehova ro tanan nga kinahang-ean gid natong masayran. Ngani indi naton kinahang-ean magkabaeaka sa kon ano ro owa naton nasayran, kundi magpukos kita sa kon ano ro importante. Paagi kara, mapakita naton nga mapainubuson kita ag nagsalig gid kay Jehova, ro “Isaea nga perpekto sa kaaeam.” (Job 36:4) Maskin owa naton nasayran ro pila nga mga bagay makaron, sayod naton nga padayon kitang tur-an ni Jehova it bag-ong mga bagay sa owa’t katapusan. Ag excited kita nga padayon natong matun-an ro bag-ong mga bagay parti sa atong daeayawon nga Dyos.—Man. 3:11.
KANTA 104 Ang Dulot sang Dios nga Balaan nga Espiritu
a Si Jesus ro magapanguna sa inaway kontra sa maeain nga kalibutan ni Satanas, ngani mahambae naton nga sayod na eon makaron ro adlaw it Armagedon ag kon hin-uno na “perdihon tanan ro anang mga kaaway.”—Pah. 6:2; 19:11-16, Ro Bag-o nga Kasugtanan, TAP.
b PIKTYUR: Ginapahaum it magtatay ro go bag para handa ro andang pamilya kon may emergency.
c PIKTYUR: Ro sangka brother nga may problema hay ginaisip ro manami nga kabuhi sa bag-ong kalibutan.