Pila ka Saksi ni Jehova ro kilaea mo? Basi ro pila kamon hay imo nga kaeapit it baeay, katrabaho, kaklase, o hakaibahan mo eon sa pagtuon it Biblia. Sin-o gid baea kami, ag ham-an gaturo kami sa iba it among ginapatihan?

Mga ordinaryong tawo kami. Naghalin kami sa nagkaeain-eain nga rasa ag estado it kabuhi. Kato anay, ro iba kamon hay gapati sa iba nga relihiyon ag ro iba owa gapati sa Dyos. Bago kami nangin Saksi, gintun-an namon it mayad ro Biblia. (Binuhatan 17:11) Nagpati gid kami sa among natun-an, ag ginpili namon nga simbahon si Jehova nga Dyos.

Nakabenepisyo kami sa pagtuon it Biblia. Haagyan man namon ro mga problema ag kaeuyahon kapareho ku iba. Kat gin-aplikar namon ro ginturo it Biblia nagnami ro among pangadlaw-adlaw nga pagkabuhi. (Salmo 128:1, 2) Ruyon ro rason kung ham-an gaturo kami sa iba parti sa Biblia.

May diosnanon kami nga pamatasan. Ginturo ku prinsipyo it Biblia rayang pamatasan sa pagpakita it pagtaha sa iba, mangin tampad, ag mabuot. Nakabulig man ra nga mangin mayad sa isigkatawo mahiusa ro pamilya ag may mataas nga moral. Matuod gid nga “paeareho ro pagkabig it Dyos sa tanan nga mga tawo,” ngani sa bilog nga kalibutan nagahiusa kami bilang mag-igmanghod ag owa it ginaapinan nga pulitika o rasa. Kada isaea kamon hay ordinaryo eang pero iba kami sa kaabuan tungod gapakita kami it paghiusa.—Binuhatan 4:13; 10:34, 35.

• Ham-an ro mga Saksi ni Jehova hay pareho man sa ibang tawo?

• Ano nga mga pamatasan ro natun-an nanda sa Biblia?

Ginaisip it kaeabanan nga tawo nga ro Saksi ni Jehova hay ngaean it bag-ong relihiyon. Pero sobra 2,700 ka dag-on, gintawag ro alagad it Dyos nga anang “saksi.” (Isaias 43:10-12) Halin ku 1931, nakilaea kami nga Estudyante sa Biblia. Ham-an ginatawag kami nga mga Saksi ni Jehova?

Makilaea ro among Dyos. Sa sinauna nga sinueatan, makita sa Biblia it linibo ka beses ro ngaean ni Jehova. Pero ginduea ku iba nga nagsueat ro ngaean ni Jehova ag ginbaylohan nanda ra it Ginuo o Dyos. Pero, ginpakilaea it Dyos ro anang ngaean kay Moises. Si Jehova naghambae: “Raya ro akong ngaean hasta sa owa’t katapusan.” (Exodo 3:15) Ginpakita nana nga eain imaw sa butig nga mga dyos. Ginapabugae gid naton ro baeaan nga ngaean it Dyos.

Ginpakita ro among bueohaton. Ku una nga tyempo, abu nga mga matutom ro nagpakita it mabakod nga pagtuo kay Jehova. Sambilog eon karon hay si Abel. Una man si Noe, Abraham, Sara, Moises, David, ag iba pa nga nangin “abu nga mga saksi.” (Hebreo 11:4–12:1) Kaparehas it sambilog ka testigo sa korte para sa owa it saea nga tawo, gusto man naton ipakilaea ro matuod parti sa Dyos.

Ginatuead namon si Jesus. Gintawag imaw it Biblia nga “matutom ag matuod nga saksi.” (Pahayag 3:14) Ginhambae ni Jesus nga ‘ginpakilaea na ro ngaean it Dyos’ ag magpadayon sa pagturo it kamatuoran parti sa Dyos. (Juan 17:26, NW; 18:37) Ro matuod nga sumueonod ni Jesus hay magadaea it ngaean ni Jehova ag ipakilaea ra. Ruyon ro ginatinguhaan nga obrahon it mga Saksi ni Jehova.

• Ham-an ro mga Estudyante it Biblia hay gintawag nga mga Saksi ni Jehova?

• Maunot buhay eon nga may mga saksi si Jehova iya sa eugta?

• Sin-o ro bantog nga Saksi ni Jehova?

Kat namatay si Cristo ginsugid it Biblia nga abu ro nagguwa nga buko’t matuod nga manogturo nga nagpatiko it kamatuoran sa Biblia ku unang mga Cristiano. (Binuhatan 20:29, 30) Ruyon gid ro natabo. Gin-eaktan nanda it pagano nga pagpati ro pagturo ni Jesus ag may nagpakuno-kuno nga mga Cristiano. (2 Timoteo 4:3, 4) Paano kami nakasigurado makaron nga haeubtan gid namon ro ginaturo it Biblia?

Nag-abot eon ro tyempo nga isugid ni Jehova ro kamatuoran. Ginsugid na nga ‘maeapit eon ro katapusan, ag ro matuod nga kaaeam magaeapnag.’ (Daniel 12:4) Ku 1870, nataeopangdan it maisot nga grupo nga nagausoy it kamatuoran ro pagturo it abu nga simbahan nga owa nagahisanto sa Biblia. Umpisa kato, gin-usoy gid nanda it mayad ro ginhalinan ku matuod nga pagturo it Biblia ag ginbuligan sanda ni Jehova nga makabaton it espiritwal nga kaaeam.

Ro sinsero nga mga eaki mahaeongon nga nagtuon it Biblia. Mahugod nga mga Estudyante sa Biblia, ruyon ro tawag kamon dati, ag ro andang paagi it pagtuon hay ginagamit hasta makaron. Ginatun-an nanda ro Biblia suno sa kada punto. Kung indi nanda maeubtan ro Biblia, gausoy sanda it eain nga bersikulo agud mapaathag rato. Kon may makita sanda nga sabat nga gahisanto sa Biblia, ginalista nanda ra. Paagi kara ginpabay-an nanda ro Biblia nga magpaathag sa anang sarili, hasayran nanda it uman ro kamatuoran parti sa ngaean it Dyos ag sa Ginharian, ro anang pagaobrahon sa paeaabuton iya sa eugta, kahimtangan it patay, ag pag-eaum nga pagkabanhaw. Ro andang pagtuon naghilway kanda sa saea nga pagpati ag mga obra.—Juan 8:31, 32.

Ku 1879, nasayran ku mga Estudyante sa Biblia nga kinahang-ean isugid ro kamatuoran sa tanan. Ngani gin-umpisahan man kato ro pag-obra it mga baeasahon nga ginagamit man hasta makaron ro, Ang Lalantawan Nagabantala sang Ginharian ni Jehova. Makaron, gaturo kami sa mga tawo sa 240 ka lugar ag sobra 750 ka linggwahe. Makaron eang natabo ro pag-eapnag it kamatuoran!

• Pagkamatay ni Jesus, ano ro natabo sa kamatuoran it Biblia?

• Paano ro kamatuoran sa Bisaea it Dyos hasayran it uman?

Dinikada eon nga ginagamit it mga Saksi ni Jehova ro haimprinta nga baeasahon ag gapanao it eain-eain nga bersyon it Biblia. Pero hakita namon nga kinahang-ean gid mag-obra it bag-o nga translation nga makabulig sa mga tawo nga makatuon it insakto nga “paghibaeo ku kamatuoran,” ruyon ro gusto it Dyos nga matabo. (1 Timoteo 2:3, 4) Ku 1950, ginpaguwa namon ro pila ka parte it moderno nga linggwahe it Biblia, ro New World Translation. Nangin madinaeag-on ag insakto ro pag-translate kara sa sobra 130 ka linggwahe.

Kinahang-ean ro madali maeubtan nga Biblia. May pagbag-o man ro linggwahe kung gabuhay ag abu nga translation ro indi maeubtan o madaeum eubton. Ag hadiskubrehan nga may katu-kato pa nga sinueatan it Biblia nga insakto ag maeapit sa hauna nga sinueatan, ag mas madali eubton sa Biblia nga Hebreo, Aramaiko, ag Griego.

Kinahang-ean ro insakto nga translation sa Bisaea it Dyos. Indi dapat pagbayluhan it mga naga-translate ro sueod it Biblia. Dapat nanda sundon ro orihinal nga sinueatan. Sa iba nga sinueatan it Biblia ginduea nanda ro Baeaan nga ngaean ni Jehova.

Kinahang-ean nga magtao it dungog ro Biblia sa tag-ana kara. (2 Samuel 23:2) Sa New World Translation, ginbalik ro ngaean nga Jehova nga nagguwa it 7,000 ka beses sa pinakaluma nga sinueatan it Biblia pareho ku makita nga halimbawa sa idaeum. (Salmo 83:18) Tungod dinag-on nga gintun-an it mayad ro Biblia manami ro resulta, nangin klaro ra nga nagasugid ku painu-ino it Dyos, ag maeomo basahon. Bisan owa ka it New World Translation sa imong linggwahe, ginakangay ka namon nga basahon ro Bisaea ni Jehova adlaw-adlaw.—Josue 1:8; Salmo 1:2, 3.

• Ham-an kinahang-ean namon mag-obra it bag-o nga translation nga Biblia?

• Ano ro obrahon mo kada adlaw agud masayran mo ro pagbuot ku Dyos?