LEKSYON 45
Kon Ano ro Buot Hambaeon nga Mangin Neutral
Ginturo ni Jesus sa anang mga sumoeunod nga dapat “bukon eon kamo it ana ku rayang kalibutan.” (Juan 15:19) Ro mangin neutral hay nagakahueogan nga owa kita it ginaapinan sa politika ag inaway. Ro matuod, bukon it maeumo pirme nga mangin neutral. Tungod kara, pwede kita pahuy-an o intrimison it mga tawo. Paano kita makapabilin nga neutral ag mainunongon kay Jehova nga Dyos?
1. Ano ro pagtan-aw it matuod nga mga Cristyano sa gubyerno it tawo?
Ginarespeto it mga Cristyano ro gubyerno. Ginasunod naton ro ginhambae ni Jesus nga “itao ninyo sa Emperador ro ana ku Emperador”—ngani, ginasunod naton ro kasugoan it gubyerno kapareho ku pagbayad it buhis. (Marcos 12:17) Ginahambae it Biblia nga nagagahum eang ro gubyerno it tawo tungod ginsugtan sanda ni Jehova nga maggahum. (Roma 13:1) Ngani sayod naton nga relatibo o limitado eang ro awtoridad ku gubyerno it tawo. Nagasalig kita sa atong Dyos ag sa anang eangitnon nga Ginharian nga ruyon eang ro makasulbar sa problema it mga tawo.
2. Paano naton mapakita nga neutral kita?
Pareho ni Jesus, owa kita nagaintra sa politika. Kat nakita it mga tawo ro sambato sa mga milagro ni Jesus, ginpilit imaw nga mangin hari nanda, pero ginbalibaran na ra. (Juan 6:15) Ham-an? Tungod naghambae rayon si Jesus: “Ro akong ginharian bukon it sa rayang kalibutan.” (Juan 18:36) Bilang mga disipulo ni Jesus, ginapakita naton nga neutral kita sa abung paagi. Halimbawa, owa kita nagaintra sa inaway. (Basaha ro Miqueas 4:3.) Ginarespeto naton ro simbolo it nasyon pareho it bandera, pero owa naton ra ginasimba. (1 Juan 5:21) Ag owa man kita nagaapin o nagakontra sa alin man nga partido o kandidato it politika. Sa rayang paagi ag sa iba pa, ginapakita naton ro atong pagkamainunongon sa gubyerno it Dyos—ro anang Ginharian.
TUN-I PA GID
Sayura ro mga sitwasyon nga pwede matestingan ro atong neutralidad, ag tun-i kon paano ka makaobra it mga desisyon nga makapasadya kay Jehova.
3. Neutral ro matuod nga mga Cristyano
Nagtao it halimbawa si Jesus ag ro anang mga sumoeunod para katon. Basaha ro Roma 13:1, 5-7 ag 1 Pedro 2:13, 14. Tan-awa ro VIDEO, ag talakaya rayon rayang mga pangutana.
Ham-an dapat naton respetuhon ro gubyerno it tawo?
Ano ro pila nga paagi nga mapakita naton nga nagapasakop kita kanda?
Sa panahon it inaway, ro pilang nasyon hay nagahambae nga neutral sanda. Pero ginasuportahan man nanda ro parehong nasyon nga nagainaway. Ano gid ro buot hambaeon nga mangin neutral? Basaha ro Juan 17:16. Tan-awa ro VIDEO, ag talakaya rayon rayang pangutana.
Ano ro buot hambaeon nga mangin neutral?
Paano kon may ginapaobra kimo ro gubyerno nga kontra sa kasugoan it Dyos? Basaha ro Binuhatan 5:28, 29. Tan-awa ro VIDEO, ag talakaya rayon rayang mga pangutana.
Kon may ginapaobra ro kasugoan it tawo nga kontra sa kasugoan it Dyos, anyong kasugoan ro dapat natong sundon?
May maisip ka baea nga mga sitwasyon nga indi pagsundon it mga Cristyano ro gubyerno it tawo?
4. Mangin neutral sa ing ginaisip ag ginaobra
Basaha ro 1 Juan 5:21. Tan-awa ro VIDEO, ag talakaya rayon rayang mga pangutana.
Sa video, ham-an owa nag-intra si Ayenge sa partido it politika o nagsaludo sa bandera?
Kon kimo, tama baea ro anang desisyon?
Ano pa ro ibang sitwasyon nga matestingan ro atong neutralidad? Tan-awa ro VIDEO, ag talakaya rayon rayang mga pangutana.
Paano kita makapabilin nga neutral kon nagatan-aw kita it sports nga nagakueontrahan ro kada nasyon?
Paano kita makapabilin nga neutral kon kita mismo hay naapektuhan it desisyon it mga politiko?
Paano ro balita ag ro atong mga kaibahan makaimpluwensya sa atong neutralidad?
Sa anong mga sitwasyon dapat magpabilin nga neutral ro sangka Cristyano sa andang ginaisip ag ginaobra?
KON MAY MAGPANGUTANA: “Ham-an owa ka nagasaludo sa bandera o nagakanta it national anthem?”
Ano ing isabat?
SUMARYO
Ginatinguhaan gid it mga Cristyano nga mangin neutral sa politika paagi sa andang ginaisip, ginahambae, ag ginaobra.
Review
Ano ro atong obligasyon sa gubyerno it tawo?
Ham-an dapat kita nga magpabilin nga neutral sa politika?
Ano ro mga sitwasyon nga pwede matestingan ro atong neutralidad?
SAYURA
Ano nga mga sakripisyo ro pwede natong obrahon agud makapabilin nga neutral?
Ano ro pwedeng obrahon it mga pamilya agud handa sanda kon testingan ro andang neutralidad?
Ham-an ro pag-apin sa sangka nasyon hay buko’t ro pinakamataas nga dungog nga mabaton it sangka tawo?
Sayura kon paano makapabilin nga buko’t parte it kalibutan kon nagadesisyon parti sa trabaho.
“Ang Tagsatagsa Magadala sang Iya Kaugalingon nga Lulan” (Ang Lalantawan, Marso 15, 2006)