Kà-gichi-nikibìgobanen​—Awenen Kà-bizindang? Awenen Egà?

Apìch Noah kà-danizigobanen òndaje akìng kegàd kakina kì-madjitwàg. Genesis 6:5

Adam ashidj Eve ogì-ayàwàwàn abinòdjìnshan, kì-bi-màneg pemàdizidjig wagidakamig. Nànàge, nànind ànjeniwag kì-madjitwàg ogì-nòsanewàwàn Satanan.

Kì-bi-nìsàndaweg dash òndaje akìng kidji-ojitamadizowàdj ininì owìyawan kidji-gashkitòwàdj kidji-wìdigemàwàdj ikwewan. Ogo ikwewag ogì-nitàwigihàwàn ogwisisiwàn kà-gichi-mashkawizìdjig ashidj dash kà-nanìzànizidjig.

Miziwekamig dash kì-mòshkine màmawe pemàdizidjig kà-madji-ijiwebizidjig. Kije-Manidò Odikidowin ikidomagad: ‘Ininì omadji-ijiwebiziwin kì-mànedine akìng ashidj kà-iji-madjitwàwenindang odeying kàgige kì-dagwanine.’

Noah ogì-bizindawàn Kije-Manidòn ogì-ojitòn dash kichi-nàbikwànigamig. Genesis 6:13, 14, 18, 19, 22

Noah dash kì-mino ininìwe. Jehovah dash Noan ogì-inàn oga-ishkwàyenimàn pemàdizinidjin ogo kà-madji-ijiwebizidjig màmawe kichi-nikibì.

Kije-Manidò kaye ogì-wìndamawàn Noan kidji-ojitòdj kichi-nàbikwàn, “ark” dash ogì-ijinikàdàn, ashidj kidji-odàpinàdj odikweman, ogwisisiwan kaye odikwemowan, màmawe kakina enayagizidjig awesìnzag.

Noah dash ogì-ayàngwàmimàn pemàdizinidjin kada-gichi-nikibì, kàwin dash kìwì-bizindazìg. Nànind ogì-bàpinodawàwàn Noan; kodagag dash ogì-zhìngenimàwàn.

Apìch dash kichi-nàbikwànigamig kà-gìjitòdj, Noah ogì-bìnàn awesìnzan pìndjehì.