Матфейдиҥ сӱӱнчилӱ јары
23 Оныҥ кийнинде Иисус албатыга ла бойыныҥ ӱренчиктерине баштанып, мынайда айтты: 2 «Фарисейлер ле јасактыҥ ӱредӱчилери бойлорын Моисей кире бодойдылар. 3 Оныҥ учун олордыҥ айтканын ончозын бӱдӱригер, је олор чылап этпегер. Нениҥ учун дезе олор нени эдерин айдып јат, је бойлоры бӱдӱрбейдилер. 4 Олор дезе улуска уур јӱк артып берет, је бойлоры дезе оны јеҥилтерге, сабарын да кыймыктатпай јадылар. 5 Олор нени де этсе, кижи кӧрзин деп эдедилер. Агару Бичиктиҥ ӱзӱктери чеберлелген тере каптарын* јаанададылар, кийиминиҥ эдегинде чачагын узададылар. 6 Олор тӧрдӧ отурарга ла синагогаларда баштапкы јерлерге отурарга сӱӱйдилер. 7 Олор садуныҥ јерлеринде уткыдарын, ӱредӱчи деп ададарын јакшызынат. 8 Је слер улуска ӱредӱчи деп адатпагар, нениҥ учун дезе Ӱредӱчигер јаҥыс, слер дезе ончогор карындаштар. 9 Јерде кемди де ада деп адабагар, нениҥ учун дезе Адагар јаҥыс — ол теҥеридеги Адагар. 10 Башчылар да деп адатпагар, нениҥ учун дезе слердиҥ Башчыгар јаҥыс — ол Христос. 11 Ортогордо эҥ јааныгар слерге кул болзын. 12 Бийиркенген кижи јабызадылар, јобош кижи бийиктедилер.
13 Ачу-корон слерге, јасактыҥ ӱредӱчилери ле фарисейлер, эки јӱстӱлер. Нениҥ учун дезе слер Кудайдыҥ Башкарузына киретен эжикти бӧктӧп јадыгар. Бойоор до ары кирбей јадыгар, улуска да кирерге бербей јадаар. 14 ——
15 Ачу-корон слерге, јасактыҥ ӱредӱчилери ле фарисейлер, эки јӱстӱлер. Слер талайла јӱзӱп, јерле јӱрӱп, бир де болзо кижини бойоордыҥ јаҥаарга кийдирип аларга албаданып јадыгар. Је кийдирип алала, оны гее́ннага ташталгадый, бойоордоҥ канча катапка јаман кижи эдип саладаар.
16 Ачу-корон слерге, јол баштап турган сокор улус. Нениҥ учун дезе слер айдып јадыгар: „Ӧргӧӧлӧ чертенип турган кижи сӧзин бӱдӱрбес аргалу, је ӧргӧӧниҥ алтыныла чертенип турган кижи сӧзин бӱдӱрер учурлу“. 17 Сокор, тенек улус! Нези баалу: алтын ба эмезе алтынды агарулаган ӧргӧӧ бӧ? 18 Слер мынайда база айдып јадыгар: „Тагылла чертенген кижи берген сӧзин бӱдӱрбес аргалу, је тагылга салган сыйла чертенген кижи берген сӧзин бӱдӱрер учурлу“. 19 Сокор улус! Кажызы баалу: сый ба эмезе сыйды агарулаган тагыл ба? 20 Оныҥ учун тагылла чертенген кижи тагылла да, тагылга салынганыла да чертенген болот; 21 ӧргӧӧлӧ чертенген кижи ӧргӧӧлӧ дӧ, ӧргӧӧдӧ јӱргениле де чертенген болот; 22 теҥериле чертенген кижи Кудайдыҥ ширеезиле де, анда отурганыла да чертенет.
23 Ачу-корон слерге, јасактыҥ ӱредӱчилери ле фарисейлер, эки јӱстӱлер. Слер мятаныҥ, укроптыҥ ла зираныҥ онынчы бӧлӱгин берип јадыгар, је јасакта эҥ керектӱзин — улусты ылгабай јӱрерин, килеҥкей болорын ла Кудайга чындык болорын бӱдӱрбей јадыгар. Онызын да јектебес керек, мынызын да бӱдӱрер керек. 24 Јол баштап турган сокор улус! Томонокты шӱӱп, тӧӧни дезе ажырып ийедеер!
25 Ачу-корон слерге, јасактыҥ ӱредӱчилери ле фарисейлер, эки јӱстӱлер. Слер айакты тыштынаҥ арутап јадаар, је айактыҥ ичи дезе ачыркашла, бойын тудунып болбозыла толо. 26 Сокор фарисей! Озо айактыҥ ичин арута, ол тушта айактыҥ тышты да ару болор.
27 Ачу-корон слерге, јасактыҥ ӱредӱчилери ле фарисейлер, эки јӱстӱлер. Нениҥ учун дезе слер агарта будуп салган сӧӧк салар јерлердий. Тышты јараш, је ичи ӧлгӧн улустыҥ сӧӧгиле, јескинчилӱ немелерле толо. 28 Слер де тыштыгарла Кудайзак болуп кӧрӱнедеер, је ичигер эки јӱстенишле, јаман керектерле толо.
29 Ачу-корон слерге, јасактыҥ ӱредӱчилери ле фарисейлер, эки јӱстӱлер. Слер судурчыларга ла Кудайга чындык улуска сӧӧк салар јерлер тудуп, оны јарандырып, 30 айдадыгар: „Бис ада-ӧбӧкӧлӧристиҥ ӧйинде јаткан болзоос, олорло кожо судурчылардыҥ канын тӧгӧринде турушпас эдис“. 31 Анайып бойоорды судурчыларды ӧлтӱрген улустыҥ уулдары деп кӧргӱзип јадыгар. 32 Андый болзо, ада-ӧбӧкӧлӧрӧӧрдиҥ баштаган керегин учына јетире эдигер!
33 Јыландар, коронду јыланныҥ балдары, слер канайып јаргылатпайтанаар, канайып гее́ннага барбайтанаар? 34 Оныҥ учун мен слерге судурчыларды, ойгор улусты ла ӱредӱчилерди ийип јадым. Слер олордыҥ кезигин ӧлтӱререер, тӧҥӧшкӧ кадаараар, кезигин дезе синагогаларда камчылап, каланаҥ калага сӱререер. 35 Анайып слер ончо чындык улустыҥ јерге тӧгӱлген каны учун бурулу болуп калараар — чындык Авельдиҥ канынаҥ ала ӧргӧӧниҥ ле тагылдыҥ ортозында ӧлтӱрткен Заха́рия деп, Вара́хияныҥ уулыныҥ канына јетире. 36 Чынын айдадым слерге: мыныҥ ончозы учун бу ӱйе бурулу болор.
37 Иерусалим, Иерусалим, сен судурчыларымды ӧлтӱргеҥ, сеге ийген улузымды ташла шыбалагаҥ... Мен сениҥ балдарыҥды, канадыныҥ алдына балдарын јууган такаадый канча катап јууп аларга санангам! Је слер кӱӱнзебедеер. 38 Оныҥ учун слердиҥ айлыгар, ээн туруп калар. 39 Айдып турум слерге: „Иегованыҥ адынаҥ келип јатканы алкышту!“ — деп айтпаганчаар, мени кӧрбӧзӧӧр!».