Чындык ангелдердеҥ тем алыгар

1, 2. а) Ангелдер бистеҥ незиле башка? б) Ангелдер биске незиле тӱҥей?

ИЕГОВА бисти бойыныҥ јаан, нак билезине кычырган. Оныҥ билезинде башка-башка јерлерде јадып турган ака-эјелер ле канча-канча миллион чындык ангелдер бар (Дан. 7:9, 10). Ангелдер керегинде сананып турзаас, озо ло баштап, олордыҥ бистеҥ чек башка болгонын кӧрӱп турган болорыс. Нениҥ учун дезе олор улустаҥ канча киреге озо јайалган (Иов 38:4, 7). Оноҥ олор улустаҥ канча киреге кӱчтӱ. Анайда ок олор андый агару, андый чындык! Бистиҥ кинчектӱ меегис оны јетире оҥдобой до јат (Лука 9:26).

² Је бисте ангелдерле тӱҥей де немегис бар. Темдектезе, бис те, ангелдер де канайып јӱрерин бойыс талдаар аргалу. Анайда ок Иегованыҥ сӱреен јараш кылык-јаҥдарына ӱренип алар аргалу. Олордо до, бистерде де ады-јолыс бар. Канайып јердиҥ ӱстинде бир тӱҥей кижи јок, анайып ла ангелдер де бой-бойынаҥ башка. Олорго до, бистерге де Иегова јакылталар берет. Је бистиҥ база бир тӱҥей немегис, олор до, бистер де Јайаачыга бажырар кӱӱндӱ эдип јайалганыс (1 Пётр 1:12).

3. Чындык ангелдердеҥ бис неге ӱренер аргалу?

³ Кӧрӧр болзо, бис ангелдерге кӧп немеде тӱҥей. Айдарда, бис олордоҥ ӱренер аргалу. Оныҥ учун олордыҥ јобош болгонын, улусты сӱӱгенин, турумкай болгонын ла јуунды ару тутканын кӧрӱп ийектер. Анайда ок бис олордоҥ кандый тем аларысты шӱӱжип ийерис.

АНГЕЛДЕР ЈОБОШ

4. а) Ангелдердиҥ јобожы недеҥ кӧрӱнет? б) Ангелдер нениҥ учун јобош? (Сарын 89:7).

⁴ Ангелдер сӱреен јобош. Олор коркышту ченемелдӱ, ийде-кӱчтӱ ле ойгор до болзо, Иеговага сӧсуккур болот (Сар. 103:20). Олор Иегованаҥ алган јакылталарын сӱреен јакшы бӱдӱрип турганыла да мактанбай јат, улустаҥ бийик аргаларыла да тыҥзынбай јат. Олордыҥ ижин кем де билбейтен де болзо, олор бого бир де санааркабай, Иегованыҥ табын сӱӱнип бӱдӱрип јат (Баш. 32:24, 29; 2 Каан. 19:35)a. Иегованыҥ магын олор бойына бир де јууктатпай јат. Олор нениҥ учун андый јобош? Нениҥ учун дезе Иегованы сӱреен тыҥ сӱӱп турган ла тооп турган. (Сарын 89:7 кычырыгар.)

5. Апостол Иоанн јастырып ийерде, ангел јобош болгонын канайып кӧргӱсти? (Јурукты база кӧрӱгер.)

⁵ Ангелдердиҥ јобожын кӧргӱзип турган бир учурал кӧрӱп ийектер. Бистиҥ эраныҥ 96-чы јылы кирезинде бир ангел, бис оныҥ адын билбезис, апостол Иоаннга кайкамчылу кӧрӱлте кӧргӱскен (Ачыл. 1:1). Апостол Иоанн дезе бу кӧрӱлтени кӧрӧлӧ, ангелдыҥ алдына тизеленип, ого бажырып ийерге сананган. Је бу ла ӧйдӧ ангел оны токтодып ийеле: «Јок, онойтпо. Мен... сендий ле сениҥ карындаштарыҥдый ла ок кул. Кудайга бажыр!» — деп айткан (Ачыл. 19:10). Кандый јобош ангел! Ол бойына мак аларга бир де кӱӱнзебеген. Оныҥ учун тӱрген ле макты бойына эмес, је Кудай дӧӧн ууландырган. Ол Иоаннга кӧрӧ, Кудайга узак иштеген ле ийде-кӱчтӱ де болгон болзо, оны бир де јабыс кӧрбӧгӧн. Ангелдыҥ јобош болгоны бойын апостолдый ок кул деп айтканынаҥ кӧрӱнет. Иоанн дезе јастырып та ийерде, ангел оны арбанбай, карын јажы јаанап калган апостолло јымжак, јалакай эдип куучындашкан. Нениҥ учун дезе ол, байла, Иоанн сезимдерине алдыртала анайып эткен деп оҥдоп турган болгон.

6. Ангелдердий јобош болорго, биске нени эдер керек?

⁶ Бистерге ангелдердий јобош болорго, нени эдер керек? Улустаҥ аҥылу ајару сакыбай, анайда ок мактанбай, Иеговага кӧптӧдӧ иштенер керек (1 Кор. 4:7). Бис ака-эјелерге кӧрӧ, Иеговага узак иштеген болзоос эмезе ака-эјелерде јок јакылталарлу болзоос, олорды јабыс кӧрбӧй јадыс. Карын, канча ла кире кӧп молјуларлу болзоос, ончо ло кире јобош болор керек (Лука 9:48). Улус бистиҥ јаныста бойлорын уйан деп сеспезин деп, бистер ангелдердеҥ тем алып, олорго болужарга кӱӱнзейдис.

7. Кижиге јастыразын айдып берер эмезе јӧп берер керек болзо, бойысты канайып јобош тудунарыс?

⁷ База качан јобош болор керек? Кезикте бис кемниҥ-кемниҥ јастырып турганын кӧрӱп турган болорыс. Андый ӧйдӧ кижиниҥ јастыразын айдып берер керек ол эмезе ого јӧп берер керек. Ол бистиҥ балагыс эмезе јуунныҥ кижизи болордоҥ айабас. Кезикте кижиниҥ јастыразын кӧзине айдар керек, је бу ла ӧйдӧ оны кату этире айтпас керек. Бис кижиниҥ кӱӱнин ӧчӱрип саларга кӱӱнзебей јадыс эмей. Мындый ӧйдӧ ангелдыҥ Иоаннла канайып куучындашканын ундыбай турактар. Улусты бойыстаҥ бийик тургузып турзаас, Агару Бичиктиҥ шӱӱлтелерин улуска тоомјылу ла јалакай этире кычырарыс (Кол. 4:6).

АНГЕЛДЕР УЛУСТЫ СӰӰП ЈАТ

8. а) Ангелдер улусты сӱӱп турган деп недеҥ кӧрӱнет? (Лука 15:10). б) Ангелдер биске јарлаар иште канайып болужат? (Кадарындагы јурукты база кӧрӱгер.)

⁸ Ангелдер улусты бойынаҥ јабыс деп сананбай турган. Карын бисле јилбиркеп, биске болужарга кӱӱнзейт. Олор улусты сӱӱп јат. Качан кинчектӱ кижи кинчегин алынып турза, ӧскӧртӧ айтса јылыйган кой Иеговага кайра јанып келзе, ол эмезе кижи чындыкты уккан кийнинде јӱрӱмин солып турза, олор сӱреен тыҥ сӱӱнип јат. (Лука 15:10 кычырыгар.) Анайда ок ангелдер биске Кудайдыҥ Башкарузын куучындаарга болужат (Ачыл. 14:6). Олор улуска барып, бойлоры куучындабай турган да болзо, бисти Иегова керегинде билерге турган кижиле јолыгыштырып койор аргалу. Је бастыра учуралдарда ангелдер болушкан деп айдып болбозыс, нениҥ учун дезе Иегова улусты чындыкка ӧскӧ дӧ аргаларла экелип јат. Темдектезе, Иегова агару тыны ажыра бисти улуска барзын деп кӱӱнзедип ийет (Ап. ижи 16:6, 7). Је андый да болзо, бис ангелдердиҥ болужына тӱҥей ле иженер аргалу, нениҥ учун дезе олорго биске болужатан јакылта берилген. («Олор мӱргӱӱлдериниҥ каруузын алган» деген рамканы кӧрӱгерb.)

9. Бис улусты ангелдер чилеп сӱӱрге нени эдер аргалу?

⁹ Бис улусты ангелдер чилеп сӱӱрге нени эдер аргалу? Бистиҥ јуунда кемди-кемди орныктырып салган деп јар угуп ийзеес, бис ангелдер ле чилеп сӱӱнер аргалу. Кайра јанып келген ака-эјелер, бис олорды сӱӱп турганыс ла олор учун сӱӱнип турганысты сезип турзын деп кӱӱнзейдис (Лука 15:4—7; 2 Кор. 2:6—8). Анайда ок јарлаар иште акту кӱӱнистеҥ туружып турзаас, ангелдердеҥ тем аладыс (Эккл. 11:6). Бис олор ло чылап ака-эјелерге сӱӱнчилӱ јарды јарлаарга, болужып турар аргалу. Темдектезе, ченемели ас јарчыла кожо јарлап барып келзеес, кайдаар? Анайда ок јажы јаанап калган ол эмезе суу-кадыгы уйан ака-эјеле иштенип ийзеес, кайдаар?

10. Саранаҥ бис неге ӱренедис?

¹⁰ Бис Иеговага алдындагызындый чылап кӧп иштеп болбой турган болзоос, канайдар? Јарлайтан ӧскӧ эп-аргалар табар керек. Индияда јадып турган Сараc деп эјениҥ учуралын кӧрӱп ийектер. Ол 20 јыл кире пионер болгон. Је оноҥ тыҥ ооруп калган. Оорунаҥ улам Сара эје базардаҥ болгой, орынынаҥ туруп та болбой барган. Эјеге эмоциональный јанынаҥ коркышту кӱч боло берген. Је ака-эјелердиҥ болужынаҥ улам, анайда ок Агару Бичикти бойы кычырып турганынаҥ улам эје ойто сӱӱнип баштаган. Је эјеге тӱҥей ле јарлаар ижин бойыныҥ айалгазына келиштирер керек болгон. Темдектезе, самара бичиирге, отурып алар керек, је эје отурып болбой турганынаҥ улам, улуска јӱк ле телефон согор аргалу болгон. Сара эје кемге-кемге экинчи катап телефон соксо, ол кижи Агару Бичик керегинде куучындашкадый таныжыныҥ номерин берип ийетен. Анайып эједе тоолу ла айга 70 ӱредӱ табылган! Ӱредӱлердиҥ кӧбинеҥ улам эјеге бастыразын ӧткӱрерге ӧйи јетпей барган. Оныҥ учун олордыҥ кезигин јуунныҥ ӧскӧ ака-эјелерине берген. Эмди ол ӱренип турган улустыҥ кезиги јуунныҥ туштажуларына јӱрӱп јат. Бу агару ишке, канча кире аргазы бар, туружып турган Сарала да, ӧскӧ дӧ ака-эјелерле кожо иштенерге, ангелдерге не аайлу јарап турган не деп сананып ийзеер де!

АНГЕЛДЕР ТУРУМКАЙ

11. Чындык ангелдерди нениҥ учун турумкай деп айдарга јараар?

¹¹ Чындык ангелдер Кудайга турумкай артканыла биске тем кӧргӱзип јат. Олор канча муҥ јылдардыҥ туркунына калју ла јаман керектер болуп турганын кӧрӱп јат. Олор кожо иштеген Сатана ла ӧскӧ дӧ ангелдер Кудайга канайып ӧштӱлер болуп калганын кӧргӧн (Баш. 3:1; 6:1, 2; Иуда 6). Темдектезе, Агару Бичикте айдылганыла, бир чындык ангел коркышту кӱчтӱ кӧрмӧслӧ тартышкан (Ап. ижи 10:13). Анайда ок ангелдер, кижиликтиҥ тӱӱкизин кӧрзӧ, Иегованыҥ јанын ас улус талдаганын кӧргӧн. Андый да болзо, бу чындык ангелдер Кудайга оноҥ ло ары эрчимдӱ, сӱӱнчилӱ иштеп јадылар. Олор Кудай удабас бу ӱзе јаман керектерди јоголтып салар деп билер.

12. Турумкай болорго биске не болужар?

¹² Ангелдер чилеп турумкай болорго, бис нени эдер аргалу? Калју керектерди бис база кӧп кӧрӱп јадыс. Је келер ӧйдӧ Иегова јаман керектерди јоголтып салар деп, ангелдер ле чилеп алаҥзыбай јадыс. Оныҥ учун јакшыны эдерге чӧкӧбӧй јадыс (Гал. 6:9). А Иегова биске бастыра кӱчтерди ӧдӧргӧ ийде-кӱч берер деп, сӧзин берип салган (1 Кор. 10:13). Чыдамкай болорго ло сӱӱнчилӱ болорго, Иегованаҥ агару тын сурап турар керек (Гал. 5:22; Кол. 1:11). Је слер эм тура истежӱлерге табарткан болзоор, канайдар? Санааркабагар, Иеговага иженигер. Ол слерге чыдажарга ийде-кӱч берер (Евр. 13:6).

АНГЕЛДЕР ЈУУНДЫ АРУ ТУДАТ

13. Бу калганчы кӱндерде ангелдер аҥылу кандый јакылта бӱдӱргилейт? (Матфей 13:47—49).

¹³ Бу калганчы кӱндерде Иегова ангелдерге аҥылу јакылта берген. (Матфей 13:47—49 кычырыгар.) Сӱӱнчилӱ јарды бастыра јердиҥ ӱстинде канча миллион улус угат. Олордыҥ кезиги Иегованыҥ нормаларыла јӱрӱп, христиандар болуп калат, је кезиги — јок. Ангелдерге дезе акту улусты акту эместердеҥ башкалайтан јакылта берилген. Ӧскӧртӧ айтса олор јуунды ару тудар учурлу. Је јууннаҥ јӱрӱп калган кандый бир ака эмезе эје ойто кайра јуунга качан да јанып болбос деп сананбас керек. Анайда ок јуунда кӱчтер болбос деп база сананбас керек. Андый да болзо, ангелдер јуунды ару тударга, бастыра ийде-кӱчинеҥ иштенет деп, бир де алаҥзыбас керек.

14, 15. Јуунды нравственный ла кӧгӱс јанынаҥ ару тударга, ангелдердеҥ кандый тем аларыс? (Јуруктарды база кӧрӱгер.)

¹⁴ Јуун ару болзын деп, бис ангелдердеҥ канайып тем аларыс? Бистиҥ кажыбыс ла јууныс кӧгӱс јанынаҥ ла нравственный јанынаҥ ару болзын деп албаданып јадыс. Оныҥ учун каршу јетиргедий немелердеҥ бойысты чеберлеп јадыс. Иегованы сӱӱп турган улусла најылажадыс, је Кудайдаҥ туураладып салатан не-немеге јууктабай да јадыс (Сар. 101:3). Анайда ок бис ака эјелерге Иеговага чындык артарга болужар аргалу. Темдектезе, бистиҥ ака эмезе эје уур кинчек эткен болзо, нени эдерис? Бис оны сӱӱп турганыстаҥ улам, аксагалдарла куучындажып ийзин деп кӱӱнзедерис. Је куучындашпаза, бис оныҥ кинчегин бойыс куучындап берерис. Нениҥ учун дезе уйадап калган ака эмезе эје капшай болуш алзын деп кӱӱнзейдис! (Иак. 5:14, 15).

¹⁵ Кезикте, уур кинчек эделе, кинчегин алынбай турган кижини јууннаҥ туураладарга келижет. Бис андый кижиле куучындашпай барадыс (1 Кор. 5:9—13)d. Мындый алтам јуунды ару тударга болужат. Је мында база да јакшы немези бар. Бис андый кижиле куучындашпай барзаас, бис ого ло јакшы эдедис. Нениҥ учун мынайып айдарга јараар? Нениҥ учун дезе анайып ол Иеговага кайра јанар керек деп тӱрген аайлап ийер болор. Аайлап ийеле јанып келзе, бис Иегова ла оныҥ ангелдериле кожо бастырагыс сӱӱнерис! (Лука 15:7).

16. Слер ангелдердеҥ кандый тем алар эдеер?

¹⁶ Иегова биске ангелдер керегинде андый кӧп неме јартап бергенине ле олорло кожо иштенетен арга бергенине јаан быйанду болодыс! Ангелдердеҥ тем алып, јобош ло турумкай артып, улусты сӱӱп турактар. Анайда ок јуунды кӧгӱс ле нравственный јанынаҥ ару тударга албаданактар. Чындык ангелдердеҥ тем алзаас, бис Иегованыҥ билезинде јажын-чакка јӱрерис.