Јуундарга канайып белетензе јакшы болор?

Слер Агару Бичикти Иегованыҥ Керечилериле ӱренип турган болзогор, ӱредӱге озодоҥ белетенип аларга албаданып турган болорор. Туштажуларга озодоҥ белетенип турза база јакшы болор эди. Мынайып белетенери јаҥжыгу болуп калза, сӱреен јакшы једимдер экелер.

Кайда ла качан ӱренерин шӱӱп алыгар. Слерге кандый ӧйдӧ ӱренерге јеҥил? Иштеҥ озо эрте таҥла ба? Эмезе балдар уйуктап калган тушта орой эҥирде бе? Ӱренерге ӧй ас та болзо, је канча кире ӧйгӧ ӱренетенин шӱӱп алыгар. Анайып амадап алган ӧйигерге не де чаптыгын јетирбезин деп албаданыгар. Слерге не де чаптыгын јетирбезин деп, табыш јок, амыр јер табып алыгар. Радионы, телевизорды ла мобильный телефонды токтодып салыгар. Ӱренердеҥ озо ончо шакпыртту немелерди туура эдип, Кудайдыҥ Сӧзине тереҥ ајару эдерге мӱргӱӱл болужар (Филиппыдагыларга 4:6, 7).

Материалды шиҥдеп, јартамалдар айдарга шӱӱп алыгар. Озо баштап материалла таныжып алыгар. Јӧрмӧлдиҥ эмезе бажалыктыҥ ады керегинде сананып кӧрӱгер. Кажы ла бӧлӱк канайып тӧс темала колбулу деп, сананып кӧрӱгер. Јуруктарга ла тӧс шӱӱлтелерди аҥылап турган такып кӧрӧриниҥ сурактарына ајару эдигер. Мыныҥ кийнинде абзацты кычырып, тӧмӧнги берилген суракка карууны табыгар. Агару Бичикти ачып, скобкаларда кӧргӱзилген ӱлгерлерди кычырыгар. Бу шӱӱлтелер материалла кандый колбулу болгонын сананып кӧрӱгер (Апостолдордыҥ ижи 17:11). Карууны чокум белетеп, бойыгардыҥ сананып алганарды эске алынып ийерге болужатан тӧс сӧстӧрди эмезе эрмектерди аҥылап, алдынаҥ чийӱ тартып алыгар. Мынайып слер јуунда колыгарды кӧдӱрип, јартамалды бойыгардыҥ сӧстӧрӧрлӧ кыскарта айдар аргалу болорор.

Кажы ла неделеде туштажуларда шӱӱжип турган башка-башка темаларды шиҥдеп, слер Агару Бичиктеҥ алынган билгирлерлӱ эрјинениҥ кайырчагын јаҥы шӱӱлтелерле толтырарар (Матфей 13:51, 52).

• Слер туштажуларга качан ла кайда белетенер аргалу?

• Јуундарда јакшы јартамалдар айдарга кандый белетениш болужар?