Иегова слерди сӱреен тыҥ баалап јат!

1. Иегова ишчилерин канайып баалап јат?

«ИЕГОВА слерди сӱреен тыҥ баалап јат» (Јаҥ. т. 7:7). Кандый јакшы сӧстӧр дезеер! Иегова бистиҥ јакшы кылык-јаҥысты баалап јат, нени эдер аргабысты кӧрӱп јат, анайда ок оныҥ најызы болуп каларга болужат. Бис Иеговага чындык болзоос, ол бисти јажын-чакка артыргыспас (Иоанн 6:44).

2. Кезик ака-эјелерге Иегова олорды сӱӱп турган деп бӱдерге нениҥ учун кӱч болот?

² Иегованыҥ кезик ишчилери мынайып сананып турган болор: «Кудай бойыныҥ албатызын сӱӱп турган эмей. Је мени сӱӱп турган деп, мен айдып болбозым». Нениҥ учун кезикте мындый санаа келип турган? Темдектезе, Оксанаb деп эје куучындаган: «Сууга чӧҥӱрилип, пионер болуп иштеп турала, мен тыҥ сӱӱнип турган болгом. Је 15 јыл ӧдӧрдӧ, кичинек тужымда болгон учуралдар санаамга кирип, амыр бербей барган. Оноҥ улам Иегова мени сӱӱбей барган деп сананып, кунугып баштагам». Эмди Юа деген эјениҥ темин кӧрӱп ийектер. Оныҥ кичинек тужындагы јӱрӱми база кӱч болгон, ол мынайып айдат: «Мен Иегованы сӱӱндирерге кӱӱнзегем, оныҥ учун сууга чӧҥӱрилгем. Је Иегова мени сӱӱр деп качан да бӱтпегем».

3. Бу јӧрмӧлдӧ кандый сурактар шӱӱжерис?

³ Слер де бу эјелер чылап Иегованы акту јӱрегердеҥ сӱӱп турган болороор. Је Иегова слерди сӱӱп турган деп алаҥзып турган болороор. Је нениҥ учун Иегова бисти сӱӱп турган деп, бир де алаҥзыбас керек? Анайда ок Иегова бисти сӱӱбей турган деп санаалар келип турза, нени эдер керек? Бу сурактарды шӱӱжип ийектер.

ИЕГОВАНЫҤ СӰӰЖИНДЕ АЛАҤЗЫГАНЫ КАРШУЛУ

4. Иегованыҥ сӱӱжине алаҥзыганы неге экелердеҥ айабас?

⁴ Сӱӱштиҥ ийдези сӱреен јаан, сӱӱштеҥ улам кижи кӧп неме эдер аргалу. Оныҥ учун Иегова бисти сӱӱп турган ла биске болужып турган деп бӱдӱп турзаас, бис ого акту јӱректеҥ сӱӱнип иштейдис. Је бӱтпей турган болзоос, ийде-кӱчис «ас болор» (Укаа 24:10). Андый ӧйдӧ, Сатанага бисти чындыктыҥ јолынаҥ тайкылтарга јеҥил болот (Еф. 6:16).

5. Иегованыҥ сӱӱжине алаҥзыган ака-эјелерле не болот?

⁵ Кезик христиандар Иегованыҥ сӱӱжине алаҥзып баштайла, кӧгӱс јанынаҥ уйадап калган. Джеймс деп бир аксагал куучындайт: «Мен Бет-Элде иштеген де болзом, је эткен ижим Иегованы сӱӱндирбей турган деп сананып туратам. База эмеш ӧйдӧҥ Иегова мениҥ мӱргӱӱлдеримди де укпай турган деп сананып баштагам». Ева деп эје база Бет-Элде иштейт, ол мынайда айдат: «Иегованыҥ сӱӱжине алаҥзып турзаҥ, ӱзе ле эткен ижиҥ келишпей барар. Кӧгӱс керектерди де эдер кӱӱниҥ келбей турар. Сӱӱнчиҥ де јылыйып јат». Аксагал болуп турган база бир ака, Майкл, мындый сӧстӧр айткан: «Иегова сени сӱӱп турган деп алаҥзып турзаҥ, сен оноҥ ырап каларыҥ».

6. Иегованыҥ сӱӱжине алаҥзып турган болзоос, биске нени эдер керек?

⁶ Ӧрӧги бичилген ака-эјелердиҥ темин кӧргӧнисле, Иегованыҥ сӱӱжине алаҥзыганыс, кӧгӱзиске каршузын јетирет. Андый санаалар келип турган болзо нени эдер керек? Андый санааларды баштаҥ чыгара сӱрер керек. Иеговага мӱргӱп, «не ле сагыштаҥ бийик амыр» берзин деп сурагар, ол тушта Кудайдыҥ амыры слердиҥ јӱрегерди ле санаагарды кандый ла каршулу санаадаҥ арутап салар (Сар. 139:23; Флп. 4:6, 7). Анайда ок ундыбагар: андый сезимдер јаҥыс слерде эмес, ӧскӧ дӧ ака-эјелерде болуп јат. Андый санаалар Иегованыҥ озогы да ишчилеринде болгон. Темдектезе, апостол Павелде. Оныҥ теминеҥ бис неге ӱренер аргалу деп кӧрӱп ийектер.

ПАВЕЛДИҤ ТЕМИНЕҤ НЕГЕ ӰРЕНЕДИС?

7. Павелде кандый кӱчтер болгон?

⁷ Слер бойоордыҥ молјулараарды бӱдӱрип болбой турганаар деп санааркап турганаар ба? Эйе болзо, Павелдиҥ темин эске алыныгар. Ол јаҥыс јуун учун эмес, бастыра јуундар учун санааркаган. Бу керегинде Павел мынайып айткан: «Кӱнӱҥ сайын ончо серкпелер [јуундар] керегинде сананып» јадым (2 Кор. 11:23—28). Эмезе хронический ооругардаҥ санааркап јадаар ба? Павел де ооруга табарткан болор. Ол оны «тегенек» деп адап, оноҥ айрыларга коркышту тыҥ кӱӱнзеген (2 Кор. 12:7—10). Ол эмезе бойоордыҥ јастыралараардаҥ улам кунугып, санааркап турганаар ба? Мында ойто ло Павелдиҥ теми болужар. Павел де кӱнӱҥ сайын бойыныҥ јастыраларыла тартышкан, мынаҥ улам кезикте кунугып туратан (Рим. 7:21—24).

8. Павелге кӱчтердиҥ ӧйинде Иеговага чындык артарга не болушкан?

⁸ Павелде кандый да кӱчтер болгон болзо, ол оноҥ ло ары Иеговага чындык иштеген. Ого не болушкан? Ол толынтыга бир де алаҥзыбай бӱткен. Ол мындый сӧстӧрди билген: «Ого бӱткен кажы ла кижи... ӱргӱлји јӱрӱмдӱ болзын деп, Кудай бу телекейдиҥ улузына карузыган учун сок јаҥыс Уулын берген» (Иоанн 3:16; Рим. 6:23). Уур кинчек те эткен кижи кинчегин алынып турган болзо, оныҥ кинчеги ташталар деп, Павел бӱткен (Сар. 86:5).

9. Галаттарга 2:20-деги сӧстӧр бисти неге ӱредет?

⁹ Анайда ок Павел, Иегова оны сӱреен тыҥ сӱӱп турган деп бӱткен, нениҥ учун дезе ол бойыныҥ Уулыныҥ јӱрӱмин Павел учун берген. Оныҥ бӱткени бу сӧстӧрдӧҥ кӧрӱнет: «Ол [Кудайдыҥ Уулы] мени сӱӱп јат, мен учун бойын берген». (Галаттарга 2:20 кычырыгар, ЈК 2003.) Иегованы бисти сӱӱрге не де буудактап болбос. Оныҥ учун ол мынайып сананбаган: «Иегова ака-эјелерди сӱӱп јат, је мендий кижини ол канай сӱӱйтен?» Ол Римдеги ака-эјелерге мындый сӧстӧр бичиген: «Кинчектӱ тужыбыста Христос бис учун ӧлгӧн» (Рим. 5:8). Айдарда, Иегова ишчилериниҥ кажызын ла сӱӱп јат!

10. Римдегилерге 8:38, 39-тагы сӧстӧрдӧҥ бис неге ӱренедис?

¹⁰ Римдегилерге 8:38, 39 кычырыгар. Павелдиҥ Иегова Кудайдыҥ сӱӱжине бир де алаҥзыбаганы мындый сӧстӧринеҥ кӧрӱнет: «Бисти [не де]... Кудайдыҥ сӱӱжинеҥ айрып болбос». Павел билетен болгон, Иегова јаҥыс ла израильтяндардыҥ кинчегин эмес, је оныҥ да кинчегин таштаган деп. Ӧскӧртӧ айтса, Павел мынайып бӱткен: «Иегова мен учун бойыныҥ Уулын берген болордо, оныҥ сӱӱжине мен канай алаҥзыйтам? Алаҥзыйтан шылтак јок» (Рим. 8:32).

11. Павел Иегова оныҥ 1 Тимофейге 1:12—15-теги кинчектерине де кӧрбӧй, оны сӱӱп турган деп нениҥ учун бӱткен?

¹¹ 1 Тимофейге 1:12—15 кычырыгар. Павелге кезикте алдындагы эткен јастыралары амыр бербей туратан болор. Оныҥ учун бойын: «Менеҥ јаман кижи јок» — деп сананып туратан. Ол дезе христиан болордоҥ озо Иисустыҥ ӱренчиктерин истежип, канча калаларды да эбирип келетен. Ол олорды тӱрмелеген, оныҥ јарадузынаҥ улам кезик ӱренчиктер де божогон (Ап. ижи 26:10, 11). Оныҥ учун Павелдиҥ јарадузынаҥ улам божогон улустыҥ бала-барказы Павелге туштаган болзо, ол олордыҥ кӧзине канай кӧрӧр эди?! Је Павел алдындагы эткен јастыраларын эмди тӱзедип болбос деп билген. Иисус ол учун јӱрӱмин берген деп бӱдӱп, мындый сӧстӧр айткан: «Кудайдыҥ јакшылыгыла мен эмди кем, ол болорым» (1 Кор. 15:3, 10). Мынаҥ слер неге ӱренер аргалу? Слерде Иеговала најылажатан арга болзын деп, Иисус слер учун јӱрӱмин берген деп бӱдӱмјиленигер (Ап. ижи 3:19). Иегова слердиҥ Керечил болгон до, болбогон до тужыгарда эткен озогы јастыралараарга ајару этпей јат. Карын бӱгӱнги кӱнде нени эдип турганаарды ла келер ӧйдӧ нени эдереерди ајаруга алат (Иса. 1:18).

12. «Мен кемге де керек јок, мени кем де сӱӱбей турган» деп сананып турзаас, 1 Иоанн 3:19, 20-деги сӧстӧр биске канай болужар?

¹² Је слерге мындый санаа келип турган болор: «Иисус мен учун јӱрӱмин берген деп бӱдӱп јадым, је мен андый сый аларга турбас кижи». Андый санаалар толо кеминде эмес болгоныстаҥ улам болот. Оноҥ улам бис кемге де керек јок, бисти кем де сӱӱбей турган деп сананып јадыс. (1 Иоанн 3:19, 20 кычырыгар.) Је Агару Бичикте айдылганыла, «Кудай јӱрегистеҥ јаан» деп ундыбагар. Иегова слерди сӱӱп јат, ол слердиҥ кинчектеригерди таштаарга белен деп, бойоорды бӱдӱмјилеп туругар. Оныҥ учун Кудайдыҥ кӧзинде кандый кижи болгоноорды јакшы оҥдоп турарга, Агару Бичикти јаантайын ӱренигер, кӧптӧдӧ мӱргигер, анайда ок ака-эјелерле куучындажып турыгар. Нениҥ учун мынайып эдер керек?

АГАРУ БИЧИК, МӰРГӰӰЛ ЛЕ НАЈЫЛАР БИСКЕ КАНАЙЫП БОЛУЖАТ?

13. Агару Бичикти ӱренгенистеҥ кандый болуш аладыс? («Кудайдыҥ Сӧзи канайып болужат?» деген рамканы кӧрӱгер.)

¹³ Кудайдыҥ Сӧзин кажы ла кӱн ӱренигер. Анайып Кудайдыҥ кылык-јаҥын јакшы билип алараар, ол слерди тыҥ сӱӱп турган деп кӧрӧрӧӧр. Кудайдыҥ Сӧзин шӱӱп сананып турзаар, кӧрӱм-санаагар чын болор. Нениҥ учун дезе Агару Бичик слердиҥ јастыра санаалараарды ла сезимдереерди тӱзедип турар (2 Тим. 3:16). Аксагал болуп турган, бойын јабыс кӧргӧн Кевин ака мынайып куучындайт: «Мен 103-чи Сарынды кӧп шӱӱп сананып јадым, нениҥ учун дезе бу Сарын меге бойымга чын кӧрӱмду болорго ло Иегованыҥ кӧзинде кандый кижи болгонымды јакшы оҥдоп турарга болужып јат». Ӧрӧги айдылган Ева эје куучындайт: «Мен кажы ла эҥир Иегованыҥ кӧрӱм-санаазын, сезимдерин шӱӱп сананып јадым. Бу мениҥ бӱдеримди тыҥыдат ла меге токунал берет».

14. Мӱргӱӱл биске канайып болужат?

¹⁴ Јаантайын мӱргӱгер (1 Фес. 5:17). Слер кемле-кемле најылажып аларга турган болзоор, оныла кӧп куучындажып јадаар, бой-бойыгарга сезимдереерди айдадаар. Иеговала бис база анайып ла најылажып јадыс. Иеговага мӱргӱп, бойыгардыҥ санаалараарды, сезимдереерди, санааркаштараарды ӱзе куучындап турзаар, Иегова слерди сӱӱп турган деп бӱдӱп турганаарды кӧргӱзип јадаар (Сар. 94:17—19; 1 Иоанн 5:14, 15). Юа эје куучындайт: «Мен Иеговага мӱргӱп, кӱн туркунына јӱк ле не болгонын куучындаган эмезим, је анайда ок сезимдеримди де ӱзе куучындап беретем. Анайып мен Иегованы јаан компанияныҥ директоры деп эмес, је кажы ла балазын сӱӱп турган Ада деп кӧрӱп баштагам». («Слер бу бичикти кычырганаар ба?» деген рамканы кӧрӱгер.)

15. Иегова бисти баалап турган деп, бис нениҥ учун бӱдӱп јадыс?

¹⁵ Ака-эјелерле куучындажып туругар. Најылар — Иегованыҥ сыйы (Иак. 1:17). Иегова бисти баалап турган деп, бис нениҥ учун бӱдӱп јадыс? Нениҥ учун дезе ол биске кӧгӱс биле берген. Ол ака-эјелер бисти сӱӱп јат (Укаа 17:17). Темдектезе, апостол Павел Колоссыдагыларга самара бичип турарда, ого ака-эјелер болушкан деп бичиген (Кол. 4:10, 11). Анайда ок Иисуска да улустыҥ ла ангелдердиҥ болужы сӱреен керектӱ болгон (Лука 22:28, 43).

16. Најылар биске Иеговага јууктаарга канайып болужат?

¹⁶ Слер ака-эјелердеҥ болуш сурап турганаар ба? Олордыҥ болужын алып турганаар ба? Болуш сураганаар слерди кӧгӱс јанынаҥ уйан деп кӧргӱспей јат. Карын најылар слерге болуш болуп јат. Бу керегинде ӧрӧги айдылган Джеймс ака айдат: «Кӧгӱзи тереҥ ака-эјелерле најылашканым меге јаан болуш болот. Мен олорго бойымныҥ јаман санааларымды куучындап турзам, олор мени угуп, бойыныҥ сӱӱжинде бӱдӱмјилеп јат. Олордыҥ болужы ажыра мен Иегованыҥ сӱӱжин ле болужын кӧрӱп јадым». Айдарда, ака-эјелерле јууктада најылажар керек.

ИЕГОВАНЫҤ СӰӰЖИНДЕ АРТЫГАР

17, 18. Биске кемди угар керек, нениҥ учун?

¹⁷ Сатана бисти чын кӧрӱм учун тартышпай барзын деп кӱӱнзейт. Ӧскӧртӧ айтса, Иегова бисти сӱӱбей турган деп ле бисти аргаданышка турбас кижи деп санандырарга албаданат. Је бу јӧрмӧлдӧҥ кӧргӧнисле, бу Сатананыҥ коркышту јаан тӧгӱни болуп јат.

¹⁸ Иегова слерди сӱӱп турган. Ол слерди баалап јат. Слер Иисус ла чылап Иеговага сӧсуккур болзоор, ол слерди јажын-чакка сӱӱр (Иоанн 15:10). Оныҥ учун Сатананы да укпагар, бойыгарды бурулап турган јӱрегерди де укпагар. Оныҥ ордына кажы ла ишчизин сӱӱп турган Иегованы угугар. Бир де алаҥзыбагар: Иегова кажы ла ишчизин, ол тоодо слерди де, баалап јат!