Иегова сени чын ла сӱӱп турган деп бӱдӱп тур

1. Нениҥ учун сен Иеговага иштеерге шӱӱп алгаҥ? (Јурукты база кӧрӱгер.)

ИЕГОВАГА бастыра јӱрӱмиҥе иштеериҥ деп айтканыҥды эске алып ийзеҥ де. Сен мындый јӧпти Иегованы билип алала, оны сӱӱй бергениҥнеҥ улам чыгаргаҥ. Мӱргӱӱлде оныҥ кӱӱн-табын баштапкы јерге тургузып, оны бастыра јӱрегиҥле, бастыра бойыҥла, бастыра санааҥла, бастыра ийде-кӱчиҥле сӱӱриҥ деп айткаҥ (Марк 12:30). Ӧй ӧдӱп, сениҥ сӱӱжиҥ ого оноҥ тыҥ болуп калган. Оноҥ кем-кем: «Сен Иегованы чын ла сӱӱп тургаҥ ба?» — деп сураза, сен: «Эйе! Мен јӱрӱмимде эҥ ле тыҥ Иегованы сӱӱп јадым» — деп алаҥзыбай айдарыҥ.

2, 3. Бойысты неде бӱдӱмјилеер керек, бу јӧрмӧлдӧ нени шӱӱжерис? (Иеремия 31:3).

² Је кем-кем: «А Иегова чыннаҥ ла сени сӱӱп турган ба?» — деп сураза, сен алаҥзыбай каруу берип болорыҥ ба? Эмезе сен бойыҥды оныҥ сӱӱжине турбас кижи деп сананарыҥ ба? Јаш тужы кӱч болгон эје мынайып айдат: «Мен Иегованы сӱӱп јадым. Мында бир де алаҥзу јок. Је кезикте Иегова мени сӱӱп турган ба деп алаҥзып јадым». А Иегова чыннаҥ ла сеге канайып кӧрӧт?

³ Иегова сени оныҥ сӱӱжине бир де алаҥзыбазын деп кӱӱнзеп јат. (Иеремия 31:3 кычырыгар.) Ол сени сӱӱп турганынаҥ улам бойына јууктаткан. А качан сен ого јӱрӱмиҥди учурлап, сууга чӧҥӱрилериҥде, Иегова сеге аҥылу сыйды, чындык сӱӱжин, сыйлаган. Бу сӱӱш сӱреен тыҥ, ол качан да ӧтпӧй јат. Иегова чындык ишчилерин — ол тоодо, сени де — «аҥылу байлыгым» деп айдат (Мал. 3:17, сноска). Канайып апостол Павел Кудайдыҥ сӱӱжине алаҥзыбаган, анайып Иегова слерди де оныҥ сӱӱжине алаҥзыбазын деп кӱӱнзеп јат. Римдегилерге 8:38, 39-та Павел мынайып бичиген: «Ӧлӱм де, јӱрӱм де, ангелдер де, ӧрӧги јаҥдар да, эмди болуп турганы да, келер ӧйлӧрдӧ дӧ болотоны, кандый да ийде-кӱч, бийиктези де, тереҥ јердези де, јайалганныҥ бирӱзи де бисти Кудайдыҥ... сӱӱжинеҥ айрып болбос деп, мен бӱдӱп јадым». Бу јӧрмӧлдӧ Иегова бисти сӱӱп турган деп, нениҥ учун бӱдӱмјиленер керек деп, анайда ок бӱдӱмјиленерге биске не болужар деп кӧрӱп ийерис.

ИЕГОВА БИСТИ СӰӰП ТУРГАН ДЕП, НЕНИҤ УЧУН БӰДЕР КЕРЕК

4. Сатана кӧп сабада кандый эп-арга тузаланат, биске не болужар?

⁴ Иегова бисти сӱӱп турган деп бӱткенис биске Сатананыҥ сӱмелӱ керектерине удура турарга болужар (Эф. 6:11). Сатана бисти Кудайга иштебей барзын деп канайып ла сӱмеленер. Оныҥ кӧп сабада тузаланып турган эп-аргазы — Иегова бисти сӱӱбей турган деп санандырары болот. Је бу кӧк тӧгӱн! Агару Бичикте Сатана карагулала тӱҥейлештирилет (1 Пётр 5:8, 9). Карагула уйадап калган ла коруланып болбос тындуларга табарат. Анайып ла Сатана биске уйадап калган тужыста, анчада ла алдында болгон јаман немелердеҥ улам, бӱгӱнги кӱчтердеҥ улам эмезе келер ӧй керегинде санааркап турганыстаҥ улам бистиҥ ийде-кӱчис астап калган тушта табарат (Укаа 24:10). Је Сатанага удура турарга, биске не болужар? Иегова бисти сӱӱп турган деп, бӱткенисти тыҥыдар керек (Иак. 4:7).

5. Иегованыҥ сӱӱжин сезип турары нениҥ учун андый керектӱ болот?

⁵ Иегова бисти сӱӱп турган деп бӱткенис биске ого јууктаарга болужат. Бис сӱӱр аргалу болодыс, анайда ок бисти кем-кем сӱӱзин деп кӱӱнзейдис. Мынайып бисти Иегова јайаган. Кемниҥ-кемниҥ сӱӱжин сезип, бойыс та сӱӱжисти кӧргӱзерге кӱӱнзейдис. Оныҥ учун Иегованыҥ сӱӱжин канча ла кире тыҥ сезип турзаас, ончо ло кире бистиҥ ого сӱӱжис тыҥып јат (1 Иоанн 4:19). А бистиҥ ого сӱӱжис тыҥыганы сайын, оныҥ да сӱӱжи биске тыҥып јат. Иаков 4:8-те бу ла керегинде айдылат: «Кудайга јууктагар, ол слерге јууктаар». Је Иегова бисти сӱӱп турган деп, бӱдерге тӱҥей ле кӱч болзо, канайдар? Ол бисти сӱӱп турган деп, бойысты канайып бӱдӱмјилеер?

ИЕГОВА БИСТИ СӰӰП ТУРГАН ДЕП, БОЙЫСТЫ КАНАЙЫП БӰДӰМЈИЛЕЕР

6. Иегова бисти сӱӱп турган деп бӱдерге кӱч болзо, нени эдер керек?

⁶ Иегова сени нениҥ учун сӱӱп турган деп оҥдоорго болушсын деп, оноҥ ло ары мӱргӱп тур (Лука 18:1; Рим. 12:12). Иегованаҥ — керек болзо, кажы ла кӱн кӧп катап — бойыҥа оныҥ кӧзиле кӧрӧргӧ, болуш сура. Бис бойысты та неде де бурулап турган болзоос, Иегова бисти сӱӱп турган деп бӱдерге кӱч болуп јат. Је Иегова бистиҥ јӱрегистеҥ јаан деп ундыба (1 Иоанн 3:19, 20). Ол бисти сӱреен јакшы билер, оныҥ учун бойыстаҥ кӧрбӧй турган јакшы кылык-јаҥдарысты кӧрӧт (1 Сам. 16:7; 2 Лет. 6:30). Иеговага јӱрегиҥде не барын айдып, ол сени сӱӱп турган деп бӱдерге болушсын деп мӱргӱп тур (Сар. 62:8). Оноҥ бу јӧрмӧлдӧ берилген јӧптӧрди тузалан.

7, 8. Сарында бичилген сӧстӧр Иегова бисти сӱӱп турган деп, канайып бӱдӱмјилейт?

⁷ Иегованыҥ айткан сӧзине бӱдӱп тур. Агару Бичик Кудайдыҥ тыныла бичилген. Оныҥ учун бу бичикте Кудай керегинде айдылган ончо неме чын болот. Темдектезе, Давид Иегованыҥ улуска сӱӱжи керегинде мынайып бичиген: «Иегова кунугып јӱрген улусты артыргыспай јат. Санааркап калган улусты ол аргадап јат» (Сар. 34:18). Кунугып калган тушта сен бойыҥды чек јаҥыскан деп сезип турган болорыҥ. Је сен јаҥыскан эмезиҥ, Иегова сениҥ јаныҥда. Мындый ӧйлӧрдӧ сен оны тыҥ керексип турганыҥды ол билер. База бир сарынында Давид мынайып бичиген: «Кӧзимниҥ јаажын јыракыга јууп алзаҥ» (Сар. 56:8). Кудай сеге нени ӧдӧргӧ келижип турганын билер. Сеге ачу, кунукчылду болуп турганын ол оҥдоп јат. Сениҥ шыралап турганыҥды кӧрӧргӧ, ого коркышту кӱч болот. Айдарга јараар, Иегова кӧзиҥнеҥ тӧгӱлген кажы ла јаашты јууп, бойына чеберлеп алат. Канайып чӧл јерде јӱрген кижи сууны баалап јат, анайып Иеговага да сениҥ кажы ла тӧгӱлген јаажыҥ баалу болот. Сарын 139:3 мынайып айдылат: «Ончо јолдорымды сен билериҥ». Эйе, Иегова сениҥ ончо јолдорыҥды билер. Је анчада ла сениҥ јакшы керектериҥе ајару эдет (Евр. 6:10). Нениҥ учун? Нениҥ учун дезе ол сениҥ оны сӱӱндирерге турганыҥды баалап јатa.

⁸ Агару Бичикте јӱректи томулткадый ӧскӧ дӧ кӧп ӱлгерлер бар. Олор ажыра Иегова сеге: «Мен сени андый тыҥ сӱӱп јадым, сен меге сӱреен баалу болодыҥ. Мыны билип јӱр» — деп айткандый болот. Је Сатана Иегова сени сӱӱбей турган деп тӧгӱндеерге јат. Оныҥ учун Иегова сени чын ла сӱӱп турган деп алаҥзып баштазаҥ, токтой тӱжеле, бойыҥнаҥ сура: «Мен кемге бӱдерим — „тӧгӱнниҥ адазына“ ба эмезе „чындыктыҥ Кудайына“ ба?» (Иоанн 8:44; Сар. 31:5).

9. Иегова оны сӱӱп турган улуска не деп сӧзин берет? (Чыгыш 20:5, 6).

⁹ Иегова оны сӱӱп турган улуска нени сезип турганын сананып тур. Иегова Моисейге ле Израиль албатыга нени айтканын эске алып ийектер. (Чыгыш 20:5, 6 кычырыгар.) Кудай оны сӱӱп турган улусты чындык сӱӱжиле сӱӱр деп сӧзин берет. Эйе, Иегова чындык Кудай. Оны сӱӱп турган улусты ол канайып сӱӱбес? (Неем. 1:5). Оныҥ учун Иегова сени сӱӱп турган деп алаҥзып турзаҥ, токтой тӱжеле, бойыҥнаҥ мынайып сура: «Мен Иегованы сӱӱп тургам ба?» Оноҥ мынайып сананып кӧр: сен Иегованы сӱӱп, оны сӱӱндирерге албаданып турган болорыҥда, айдарда, ол сени де тыҥ сӱӱп јат (Дан. 9:4; 1 Кор. 8:3). Сен Иегованы сӱӱп тургаҥ деп алаҥзыбай турарыҥда, ол сени сӱӱп турган деп не алаҥзыйтан? Иегова Адабыстыҥ чындык сӱӱжи сеге качан да ӧчпӧс, ол сени бир де артыргыспас.

10, 11. Биске Иисустыҥ толынты тайылгазына кандый кӧрӱмдӱ болор керек? (Галаттарга 2:20).

¹⁰ Толынты керегинде шӱӱп сананып тур. Иисус Христостыҥ толынты тайылгазы — бу Иегованыҥ ончо улуска берилген коркышту јаан сыйы болот (Иоанн 3:16). Је Иисус сен учун јӱрӱмин берген деп айдарга јараар ба? Эйе. Апостол Павелди сананып ийектер. Ол Иисустыҥ ӱренчиги болордоҥ озо уур кинчектер эткен. Сууга чӧҥӱрилген де кийнинеҥ Павел бойыныҥ уйан јандарыла тартыжып туратан (Рим. 7:24, 25; 1 Тим. 1:12—14). Је андый да болзо, ол толынтыны Иегованыҥ ого берген сыйы деп кӧргӧн. (Галаттарга 2:20 кычырыгар.) Иегова бу керегинде Павелди Агару Бичикке бичип салзын деп кӱӱнзеткен. Нениҥ учун? Биске ӱредӱ болзын деп (Рим. 15:4). Иегова сени де толынтыга андый кӧрӱмдӱ болзын деп кӱӱнзейт. Толынтыга анчада ла сеге берилген сый деп кӧрӱп турзаҥ, Иегова сени сӱӱп турган деп, оноҥ тыҥ бӱдӱмјиленериҥ.

¹¹ Иегова Иисусты јерге бис учун јӱрӱмин берзин деп ийген. Оныҥ учун теҥеридеги Адабыска сӱреен быйанду болодыс. Је Иисустыҥ јерге келгениниҥ база бир шылтагы бар. Ого Кудай керегинде чынды улуска ачар керек болгон (Иоанн 18:37). Темдектезе, Иегова балдарын кандый тыҥ сӱӱп турганы керегинде.

ИЕГОВА БИСТИ СӰӰП ТУРГАН ДЕП БӰДЕРГЕ, ИИСУС КАНАЙЫП БОЛУЖАТ

12. Иисустыҥ Иегова керегинде айтканына нениҥ учун бӱдерге јараар?

¹² Иисус јерде болордо, ого улуска Иегова керегинде куучындаарга јарап туратан (Лука 10:22). Оныҥ сӧстӧрине бӱдерге јараар, нениҥ учун дезе јерге келердеҥ озо, ол теҥериде Кудайла канча миллиард јылдар кожо болгон (Кол. 1:15). Иисус Иегованыҥ сӱӱжин бойы да сезип туратан. Анайда ок Кудайдыҥ улуска ла ангелдерге сӱӱжин кӧргӧн. Иегова бойыныҥ чындык уулдарын ла кыстарын тыҥ сӱӱп турган деп Иисус билер. Кудайдыҥ Уулы биске теҥеридеги Адабыстыҥ сӱӱжине бӱдерге канайып болужар аргалу?

13. Иисус биске Иегова јӱк ле Кудай эмес, је Ада деп кӧрӧргӧ канайып болужат?

¹³ Иисус бисти Иегова чыннаҥ ла биске кандый кӧрӱмдӱ болгонын билзин деп кӱӱнзейт. Иисус Сӱӱнчилӱ јарында Иегованы 160-наҥ кӧп катап Ада деп адаган. Ӱренчиктериле куучындажып тура, ол «Адагар», «теҥеридеги Адагар» деп сӧстӧр тузаланган (Матф. 6:8, 26). «Агару Бичиктиҥ ӱренетен чыгармазында» Матфей 5:16-га мындый јартамал берилген: «Јебрен ӧйдӧги Кудайдыҥ ишчилери ого баштанар тушта эмезе Иегова кандый Кудай деп айдып тура, „Кӱчтӱдеҥ Кӱчтӱ“, „Эҥ Бийик“, „Улу Јайаачы“ деп титулдар тузаланган. Је Иисус кӧп сабада Кудайды тегин, јарт сӧслӧ — „Ада“ деп адайтан». Бу Иегованыҥ ишчилеринде оныла кандый јуук колбулар болгонын кӧргӱзет. Иисус бисти Иегованы балдарын тыҥ сӱӱп, кичееп турган Ада эдип кӧрзин деп кӱӱнзейт. Иисустыҥ «Ада» деп сӧс тузаланган эки учуралын кӧрӱп ийектер.

14. Теҥеридеги Адабыс бистиҥ кажыбысты ла баалап турган деп кӧргӱзерге, Иисус кандый тем тузаланган? (Матфей 10:29—31). (Јурукты база кӧрӱгер.)

¹⁴ Озо баштап Матфей 10:29—31-де Иисустыҥ сӧстӧрин шӱӱжип ийектер (кычырыгар). Анда боро кушкаштар керегинде айдылат. Бу кучыйактар Иегованы сӱӱп, ого бажырар эдип јайалбаган да болзо, Кудай олордыҥ кажызын ла ајаруга алат. Андый болордо, Иегова бисти, оны сӱӱп турган, ого иштеп турган улусты, кандый тыҥ сӱӱп јат! 30-чы ӱлгерде мынайып айдылган: «Слердиҥ дезе бажыгардыҥ кажы ла кылы тоололып калган». Бу сӧстӧргӧ «Агару Бичиктиҥ ӱренетен чыгармазында» мындый јартамал берилген: «Иегова андый оок-теек неме билер болордо, ол Иисустыҥ кажы ла ӱренчиги керегинде ӱзе билер деп алаҥзыбаска јараар». Јарт кӧрӱнип јат: Иегова бистиҥ кажыбысты ла кандый тыҥ баалап, карузып турган деп, Иисус бисти билзин деп кӱӱнзеп јат.

15. Иоанн 6:44-ги Иисустыҥ айткан сӧстӧринеҥ теҥеридеги Адабыс керегинде нени билип аладыс?

¹⁵ Иисус «Адам» деген сӧсти тузаланган экинчи учуралды кӧрӱп ийектер. (Иоанн 6:44 кычырыгар.) Кудай сени чындыкка бойы јууктаткан — сеге оныла јууктада таныжып аларга, оны сӱӱй берерге болушкан. Нениҥ учун ол анайып эткен? Ол сениҥ јӱрегиҥде јакшыны кӧрӱп ийген (Ап. ижи 13:48). «Агару Бичиктиҥ ӱренетен чыгармазында» Иоанн 6:44-кӧ берилген јартамалда айдылганыла, Иисус бу сӧстӧрди Иеремия 31:3-теги сӧстӧргӧ тайанып айткан болор. Анда мынайып айдылат: «Мен... сени бойымга чындык сӱӱжимле јууктадып алдым [эмезе «јаантайын сеге чындык сӱӱжимди кӧргӱзедим», сноска]». (Осия 11:4 тӱҥдештиригер.) Айдарда, сен бойыҥда јакшыны кӧрбӧй дӧ турган болзоҥ, Иегова сенеҥ јакшыны јаантайын кӧрӱп јат.

16. а) Иисус неге ӱреткен, ого нениҥ учун бӱдерге јараар? б) Иегова — эҥ ле јакшы Ада деп, канайып бӱдӱмјиленип алар? («Иегова — эҥ ле јакшы, јалакай Ада» деген рамканы кӧрӱгер.)

¹⁶ Иисус Иегованы бистиҥ Адабыс деп адаганыла, мынайып айткандый болот: «Иегова јӱк ле мениҥ Адам эмес, је сениҥ де Адаҥ болуп јат. Ол сени чын ла тыҥ сӱӱп јат». Оныҥ учун Иегова сени сӱӱп турган деп алаҥзый ла берзеҥ, Иисустыҥ сӧстӧрин эске алып ий. Не дезе теҥеридеги Адабысты эҥ ле јакшы Иисус билер, анайда ок ол бир де тӧгӱндебей јат (1 Пётр 2:22).

ИЕГОВА СЕНИ СӰӰП ТУРГАН ДЕП, БӰДӰМЈИҤДИ ТЫҤЫТ

17. Иегова бисти сӱӱп турган деп, бойысты нениҥ учун јаантайын бӱдӱмјилеер керек?

¹⁷ Иегова бисти сӱӱп турган деп бойысты јаантайын бӱдӱмјилеер керек. Бу јӧрмӧлдӧ кӧргӧнисле, сӱмелӱ ӧштӱ, Сатана, бисти Иеговага иштебей барзын деп канайып ла албаданып јат. Ол бисти уйадап калзын, колысты бош салып ийзин деп кӱӱнзейт. Оныҥ учун ол оноҥ ло ары Иегова бисти сӱӱбей турган деп тӧгӱндеерге албаданар. Је бис бу тӧгӱнге бӱтпезис! (Иов 27:5).

18. Иегова бисти сӱӱп турган деп, бойысты канайып бӱдӱмјилеерис?

¹⁸ Иегова сени сӱӱп турган деп канайып бӱдӱмјиленер? Иеговага јаантайын мӱргӱп, бойыҥа оныҥ кӧзиле кӧрӧргӧ болушсын деп сура. Агару Бичиктеҥ Иегованыҥ бойыныҥ ишчилерин канайып эрке сӱӱп, кичееп турганы керегинде кычырып тур. Сен Иегованы сӱӱп турзаҥ, оныҥ сӱӱжи сеге качан да тӱгенбес деп, јаантайын бойыҥа эске алындырып тур. Толынтыны сеге эдилген сый деп кӧр. Оноҥ Иисустыҥ Иегова — сениҥ теҥеридеги Адаҥ деп айтканына бӱдӱп јӱр. Ол тушта кем-кем: «Иегова сени чын ла сӱӱп турган ба?» деп сураза, сен алаҥзыбай ла айдарыҥ: «Эйе, сӱӱп турган! А мен бойымныҥ јанымнаҥ кажы ла кӱн Иеговага сӱӱжимди кӧргӱзерге, бастыра ийде-кӱчимнеҥ албаданадым!»