Тереҥ кӧгӱстӱ болорго јӱткӱйли

1. Иегова бисти кандый болзын деп кӱӱнзейт?

БАЛАЛУ болотон эш-нӧкӧрлӧр балазыныҥ чыгарын коркыш тыҥ сакып јадылар. Је олордыҥ эрке балазы јаантайын ла јаш болуп артпас эмей. Карын бала чыдабай турза, ада-энези капшай ла санааркай берер. Анайып ла ок Иегова бис христиан јолдо алтамдар эдип баштазаас, сӱреен тыҥ сӱӱнип јат. Је ол бисти јаш баладый артып калзын деп эмес, је кӧгӱзи тереҥ јаан улустый болзын деп кӱӱнзейт (1 Кор. 3:1; 14:20).

2. Бу јӧрмӧлдӧ нени шӱӱжерис?

² Кӧгӱзи тереҥ кижи ол кандый кижи? Тереҥ кӧгӱстӱ кижи болорго нени эдер керек? Кӧгӱс курсак кандый туза берет? Биске нениҥ учун јайымжыбас керек? Бу сурактардыҥ карууларын кӧрӱп ийектер.

ТЕРЕҤ КӦГӰСТӰ КИЖИ ОЛ КАНДЫЙ КИЖИ?

3. Кӧгӱс јанынаҥ ӧзӧргӧ нени эдер керек?

³ Агару Бичикте «јаанап калган» деп кӧчӱрилген грек сӧс, бийик кемине эмезе толо кемине јеткенин кӧргӱзет (1 Кор. 2:6)a. Канайып кичинек бала чыдап, јаан кижи болуп калат, анайып ла бис кӧгӱс јанынаҥ ӧзӱп, јаан кижи болуп калзаас, бисти кӧгӱзи тереҥ христиан деп айдарга јараар. Је кӧгӱзис тереҥ де болзо, биске оноҥ ло ары ӧзӧр керек (1 Тим. 4:15). Бастыра улустыҥ кӧгӱзи тереҥ болор аргалу, керек дезе балдардыҥ да. Кӧгӱзи тереҥ кижи кандый болот?

4. Тереҥ кӧгӱстӱ кижи ол кандый кижи?

⁴ Тереҥ кӧгӱстӱ кижи Кудайдыҥ јасактарын ла принциптерин кажызын тузаланар, кажызын тузаланбас деп талдабай јат. Ол бастыра јасактарды сӱӱйт. Је ол толо кеминде эмезинеҥ улам кезикте јастырып ийет. Андый да болзо, ол санааларыла, эткен керектериле кажы ла кӱн Кудайды сӱӱндирерге кӱӱнзейт. Андый христиан јаҥы кижиниҥ кийимин кийип алган ла Кудайдыҥ кӧрӱмиле јӱрерге албаданат (Эф. 4:22—24). Кажы ла алтамды Иегованыҥ јасактарына ла принциптерине тайанып эдет. Оныҥ учун ого кӧп ээжилер де керек јок. Анайда ок бойын тудунып билгениле кандый бир керекти баштап алза, оны тӱгезип салат (1 Кор. 9:26, 27).

5. Кӧгӱзи тереҥ эмес кижиле не болордоҥ айабас? (Эфестегилерге 4:14, 15).

⁵ Кӧгӱзи тереҥ эмес кижини тӧгӱндеп ийерге јеҥил. Андый кижи фейктер ле теория заговораларла јилбиркейт, јана баскандардыҥ тӧгӱнине бӱдӱп јатb. (Эфестегилерге 4:14, 15, ЈТ кычырыгар.) Андый кижи ачынчак, кӱйӱнчек, улусла саптажат, ченелтеге удура туруп болбой јат (1 Кор. 3:3).

6. Кӧгӱс ӧзӱм баланыҥ јаанаганына незиле тӱҥей? (Јурукты база кӧрӱгер.)

⁶ Ӧрӧги абзацтарда айдылганыла, Агару Бичик кӧгӱс ӧзӱмди баланыҥ јаанаганына тӱҥдештирет. Балдар дезе кӧп немени билбей јат. Оныҥ учун ада-энези олорды корулаарга, нени эдетенин, нени этпейтенин јартап берет. Темдектезе, энези јол кечерге јатса, кызычагын јединип алат. Ол кызычак эмеш јаанап келзе, энези оны јаҥыскан божодып ийер аргалу. Је тӱҥей ле оны ајарыҥкай болзын деп айдып турар. Кийнинде бу кыс јаан кижи болуп калза, ого јолды кечерге, энезиниҥ болужы керек јок болор. Анайып ла ок кӧгӱзи тереҥ эмес христиандар балдарга тӱҥей. Олорго ченелтелерге кирбеске ле ойгор тӱп-шӱӱлтелер эдерге, Иегованыҥ кӧгӱзи тереҥ ишчилериниҥ болужы јаантайын керек болот. Је кӧгӱзи тереҥ христиандар кемниҥ де болужы јогынаҥ ойгор тӱп-шӱӱлтелер эткилейт. Олор дезе Иегованыҥ кӧрӱм-санаазын оҥдоп аларга, библиялык принциптерди шӱӱп сананат. Анайып, нени эдетенин оҥдоп ийет.

7. Кӧгӱзи тереҥ христиандарга болуш керек пе?

⁷ Эмди не, кӧгӱзи тереҥ христиан кемнеҥ де болуш сурабас па? Андый эмес. Ол кезикте тӱҥей ле кемнеҥ-кемнеҥ болуш сураар аргалу. Је ол, болуш сураган кижи ого нени эдерин ӱзе айдып берер деп сакыбай јат. Нениҥ учун дезе Агару Бичикте: «Кажы ла кижи бойыныҥ јӱгин апарар» — деп айдылганын јакшы оҥдоп јат (Гал. 6:5).

8. Кӧгӱзи тереҥ христиандар ӱзези тӱҥей болор учурлу ба? Јартап беригер.

⁸ Канайып улус башка-башка болот, анайып ла кӧгӱс јаныс база башка болот. Кезигис дезе ойгор болодыс, кезигис јалтанбас, а та кемниҥ де колы арбынду, а кемигис те улусты јакшы оҥдоп турат. Анайда ок кӧгӱзи тереҥ эки христианныҥ кӧрӱми бир ле немеге эки башка болордоҥ айабас. Је онызыныҥ да, мынызыныҥ да кӧрӱми Агару Бичикле кӧрзӧ, јастыра эмес. Анчада ла мындый неме уйат аайынча сурактарда болот. Оныҥ учун бистиҥ кӧрӱмистеҥ башка кӧрӱмдӱ кижини бис јаргылабай јадыс. Карын, бис негисле тӱҥей деп сананып, бирлик болорго албаданадыс (Рим. 14:10; 1 Кор. 1:10).

ТЕРЕҤ КӦГӰСТӰ БОЛОРГО НЕНИ ЭДЕР КЕРЕК?

9. Кижиниҥ кӧгӱс јаны бойы ла ӧзӧт пӧ? Јартап беригер.

⁹ Баланыҥ эди-каны бойы ла ӧзӱп јат. Је кижи кӧгӱс јанын бойы ӧскӱрер учурлу. Темдектезе, Коринфтеги христиандар сӱӱнчилӱ јарды алынган, сууга чӧҥӱрилген, агару тын алган. Анайда ок олорды Павел ӱреткен (Ап. ижи 18:8—11). Је канча да јылдаҥ олордыҥ кӧп сабазыныҥ кӧгӱс ӧзӱми јаҥыс јерге туруп калган (1 Кор. 3:2). Нениҥ учун дезе олор кӧгӱс јанын оноҥ ары бойлоры ӧскӱрбеген. Бис анайып јастырбаска нени эдер аргалу?

10. Кӧгӱс ӧзӱм недеҥ башталат? (Иуда 20).

¹⁰ Тереҥ кӧгӱстӱ болорын кӱӱнзеер керек. Нениҥ учун дезе бӱдӱҥкей ле ченемел јок болорын јарадып турган улус кӧгӱс јанынаҥ ӧспӧй, јаш бала болуп артып калар (Укаа 1:22). Бис дезе јаан кижи болуп та калган болзоос, ада-энегистиҥ айдып берерин сакып турган јаш бала болуп отурарга кӱӱнзебей јадыс. Кӧгӱс јанынаҥ ӧзӧри бойыстыҥ молјугыс болор керек. (Иуда 20, ЈТ кычырыгар.) Оныҥ учун кажы јанынаҥ тӱзединетенин кӧрӱп ийзеес, Иеговага биске кӱӱн де, ийде-кӱч те берзин деп мӱргӱп турактар (Флп. 2:13).

11. Иегова биске кӧгӱс јанынаҥ ӧзӧргӧ канайып болужат? (Эфестегилерге 4:11—13).

¹¹ Иегова биске кӧгӱзисти тыҥыдарга болушпай турган деп айдып болорыс па? Јок, андый эмес. Темдектезе, ол биске христиан јуунда кӱдӱчилер ле ӱредӱчилер берген. Кӧгӱзи тереҥ бу акалар биске «Христостыҥ толо кемине» једерге болужат. (Эфестегилерге 4:11—13, ЈТ кычырыгар.) Анайда ок Иегова биске агару тынын берет. Бу тынныҥ болужыла бис «Христос чылап сананып јадыбыс» (1 Кор. 2:14—16). Бого ло коштой бисте Евангелиениҥ тӧрт бичиги бар. Бу бичиктердеҥ бис Иисус јерде јӱрерде нени айтканын, нени эткенин, оныҥ сезимдерин билип алар аргалу. Христостыҥ кӧрӱм-санаазын алынып, оныҥ темиле јӱрерге албаданзаас, амадубыска јединип аларыс — кӧгӱзи тереҥ христиан болуп каларыс.

КАТУ КӦГӰС КУРСАК

12. «Христостыҥ баштаҥы ӱредӱлерине» не кирет?

¹² Тереҥ кӧгӱстӱ христиан болорго, јӱк ле «Христостыҥ баштаҥы ӱредӱлериле», ӧскӧртӧ айтса христиан јаҥныҥ тӧс ӱредӱлериле, болорзынбас керек. Темдектезе, кинчегин алынары, Кудайга бӱдери, сууга чӧҥӱрилери ле тирилери керегинде ӱредӱлерле (Евр. 6:1, 2). Христиан јаҥ бу ӱредӱлерге тӧзӧлӧнӧт. Мыныҥ да учун Пётр Беженинчи кӱнде јарлап турарда бу керегинде куучындаган (Ап. ижи 2:32—35, 38). Христостыҥ ӱренчиги болорго, бу баштаҥы ӱредӱлерге бӱдер керек. Темдектезе, Павелдиҥ айтканыла, тирилишке бӱтпей турган кижи чындык христиан болор аргазы јок (1 Кор. 15:12—14). Ого баштаҥы ӱредӱлерди билип алган кийнинеҥ кӧгӱс јанын оноҥ ло ары тыҥыдар керек.

13. Еврейлерге 5:14-тӧ бичилген кату кӧгӱс курсак биске тузалу болзын деп нени эдер керек? (Јурукты база кӧрӱгер.)

¹³ Баштаҥы ӱредӱлерге кӧрӧ, кату кӧгӱс курсакка Иегованыҥ јӱк ле јасактары эмес, је принциптери де кирет. Принциптер биске Иегованыҥ кӧрӱм-санаазын билип аларга болужат. Је кӧгӱс курсактаҥ биске туза болзын деп, Агару Бичикти ӱренип, шӱӱп сананып, билип алганысты тузаланарга албаданар керек. Ол тушта Иегованы сӱӱндиретен тӱп-шӱӱлтелер эдип турарга ӱренип аларысc. (Еврейлерге 5:14 кычырыгар.)

14. Павел Коринфтеги христиандардыҥ кӧгӱс ӧзӱмине канайып болушкан?

¹⁴ Кӧгӱзи тыҥыбаган христиандарга јӱк ле принциптердиҥ болужыла башкарынатан сурактарда тӱп-шӱӱлтеге келерге кӱч болот. Олордыҥ кезиги кандый бир јасак берилбеген болордо, мен бойымныҥ санаамла эдер аргалу деп сананат. А кезиги дезе јасак керек јок то јерлерде ээжилер тургузып аларга албаданат. Коринфтеги христиандар чалуга тайган курсакты јиирге јараар ба, јок по деп, Павелдеҥ сурагылап турарда, Павел олорго нени эдерин айдып берзин деп сананган болор. Је Павел уйат керегинде айдала, кажы ла кижи бойы талдаар јаҥду деп, эске алындырган. Анайда ок олорло тоолу принциптерди шӱӱжип ийеле, кижи бойыныҥ да уйадына удура барбаска, улуска да бӱдӱрилетен таш болбоско, тӱп-шӱӱлтелерди канайып чыгаратанын кӧргӱзип берген (1 Кор. 8:4, 7—9). Павел олорды улустыҥ кӧрӱм-санаазына эмес, је Кудайдыҥ Сӧзине тайанзын деп кӱӱнзеген. Ол тушта олор кӧгӱзи тереҥ христиандар болуп калар эди.

15. Павел еврей укту христиандарга кӧгӱс јанынаҥ ичкери барарга канайып болушкан?

¹⁵ Павелдиҥ еврей укту христиандарга бичиген самаразынаҥ база да бир јакшы немеге ӱренедис. Олордыҥ кезиктери кӧгӱс јанынаҥ ӧспӧй, баштаҥы ла ӱредӱлердеҥ тудунган. Оныҥ учун Павел олорго: «Слерге [ойто ло] сӱт керек, кату курсак эмес» — деп айткан (Евр. 5:12). Олор дезе Иегованыҥ јуундар ажыра араайынаҥ ачып турган чындыктыҥ јаҥы оҥдомолынаҥ артып калган јӱрген (Укаа 4:18). Темдектезе, кезик еврейлер, Иисустыҥ јерге келип божогонынаҥ бери 30 јыл ӧдӱп калган да болзо, оноҥ ло ары Моисейдиҥ јасагын бӱдӱрип јӱргендер (Рим. 10:4; Тит. 1:10). А 30 јылдыҥ туркунына кижи канайтса да јаҥы немеге ӱрениже берер эмес пе, дезеер? Оныҥ учун Павел олорго самаразы ажыра бичиген чындыкты тереҥ оҥдоп аларга болушкан. Не дезе олор Христостыҥ јасагыла јӱргени Моисейдиҥ јасагыла јӱргенинеҥ канча катапка артык деп оҥдоп ийген болзо, олордыҥ бӱдӱмјизи тыҥый берер эди. Шак ла бу неме олорго јетпей турган болгон. Ол тушта олор иудейлердиҥ удурлажузынаҥ да коркыбай, јалтанбай јарлап јӱрер эди (Евр. 10:19—23).

МЕН ӰЗЕ БИЛЕРИМ ДЕП САНАНБАГАР

16. Тереҥ кӧгӱстӱ болуп калган христианга нени эдер керек?

¹⁶ Биске јаҥыс та тереҥ кӧгӱстӱ болор керек эмес, је кӧгӱзис уйадабазын деп албаданар керек. Оныҥ учун мен ӱзе немеге ӱренип алдым деп сананбай јадыс (1 Кор. 10:12). Анайда ок бойысты бир јерге туруп калбаганыс па деп шиҥдеп кӧрӱп јадыс (2 Кор. 13:5).

17. Колоссыдагыларга бичиген Павелдиҥ самаразынаҥ тереҥ кӧгӱстӱ болоры — јаан учурлу деп канайып кӧрӱнет?

¹⁷ Колоссыдагы христиандарга Павел тереҥ кӧгӱстӱ болоры јаан учурлу деп база бичиген. Је андагы христиандарды кӧгӱс јанынаҥ јаш балдардый болгон деп айдып болбозыҥ. Андый да болзо, Павел олорды ол ӧйдиҥ философиязыла јилбиркебезин деп айткан (Кол. 2:6—10). Анайда ок Колоссыдагы ака-эјелерди јакшы билер Эпафрас, олордыҥ «кӧгӱзи тереҥ болзын» деп јаантайын мӱргӱп туратан (Кол. 4:12, ЈТ). Айдарда, Павел де, Эпафрас та кижи бойы кӱӱнзебезе, анайда ок ого Кудай болушпаза, кӧгӱзи тереҥ болор аргазы јок деп јарт оҥдогон болгон. А олор дезе Колоссыдагы христиандардыҥ кӧгӱзи, јӱрӱмниҥ јолында кандый да буудактар болзо, бек артсын деп кӱӱнзеген.

18. Кӧгӱзи тереҥ христианла не болордоҥ айабас? (Јурукты база кӧрӱгер.)

¹⁸ Павел еврей христиандарга кӧгӱзи тереҥ де кижи Иеговала колбуларын јылыйтып салардаҥ айабас деп бичиген. Андый кижиниҥ јӱреги коркышту тыҥ катуланып калат. Оныҥ учун ол кинчегин алынып болбой јат. А кинчегин алынбаган кийнинде Иегова оныҥ кинчегин таштабас. Карын израильтяндардыҥ јӱреги ондый тыҥ катуланбаган болгон (Евр. 6:4—9). А бӱгӱнги кӱнде кандый болот? Јуунга јӱрбей барган, ол эмезе јууннаҥ чыгарылып калган, је кинчегин алынып, кайра келген ака-эјелер керегинде Иегова нени сананат? Олор јобожыдынып кинчегин алынганыла, јӱреги кату улустаҥ чек башка болгонын кӧргӱзет. Је Иеговага кайра јанып келген кийнинеҥ олорго болуш керек (Иез. 34:15, 16). Оныҥ учун аксагалдар ченемелдӱ кандый бир аканы эмезе эјени јанып келген кижиге болушсын деп кӧстӧп салат.

19. Биске кандый амадулар тургузар керек?

¹⁹ Амадугарга јединерге, тереҥ кӧгӱстӱ болорго албаданыгар. Кату кӧгӱс курсакла ажаныгар, кӧрӱмигер дезе Иегованыҥ кӧрӱм-санаазындый болзын. А тереҥ кӧгӱстӱ болуп калган болзогор, оны јылыйтпагар.