Тӧгӱнди чыннаҥ ылгаштырып болороор бо?

1. Слер нениҥ учун чындыкты баалайдыгар?

ИЕГОВАНЫҤ ишчилери Агару Бичиктеги чындыкты сӱӱп јат. Бу чындык бистиҥ бӱдӱмјибистиҥ тӧзӧлгӧзи болот (Рим. 10:17). Иегова Кудай христиан јуунды «чындыктыҥ тӧзӧлгӧзи» болзын деп тӧзӧгӧнине бис бир де алаҥзыбай јадыс (1 Тим. 3:15). Оныҥ учун бистиҥ ортобыста «башкарар јаҥды алган улуска» багынып јадыс. Олор биске Агару Бичикти оҥдоорго ло Кудайдыҥ табын бӱдӱрерге болужат (Евр. 13:17, ЈТ).

2. Бис чындыкты билер де болзоос, кандый чочыду бар? (Иаков 5:19).

² Бис чындыкты ла Кудайдыҥ организациязын сӱӱп јадыс. Је андый да болзо, бис бу јолдоҥ туура јӱре берердеҥ айабазыс. (Иаков 5:19 кычырыгар.) Сатана мыны ла сакып јат эмей. Бис Агару Бичикке бӱтпей барзаас эмезе Кудайдыҥ организациязыныҥ башкартуларын укпай барзаас, Сатана сӱӱнип, маказыраар эди (Эф. 4:14).

3. Чындыктаҥ нениҥ учун бек тудунар керек? (Эфестегилерге 6:13, 14).

³ Эфестегилерге 6:13, 14 кычырыгар. Удабас Дьявол албатыларды Иеговага удура чыксын деп, коркышту јаан пропаганда эдер (Ачыл. 16:13, 14). Анайда ок Кудайдыҥ ишчилерин оноҥ тыҥ тӧгӱндеерге албаданар болор (Ачыл. 12:9). Оныҥ учун биске тӧгӱнди чыннаҥ аайлаштырып турар керек ле чындыкка сӧсуккур болор керек (Рим. 6:17; 1 Пётр 1:22). Мынаҥ, улу тӱбекти ӧдӱп чыгары́с-чыкпазы́с камаанду болор.

4. Бис бу јӧрмӧлдӧ нени шӱӱжип кӧрӧрис?

⁴ Бис бу јӧрмӧлдӧҥ тӧгӱннеҥ чынды ылгаштырып турарга ла Кудайдыҥ организациязына бӱдерге болужатан эки кылык-јаҥ кӧрӧрис. Анайда ок чындыктаҥ бек тудунарга болужатан ӱч јӧп кӧрӱп ийерис.

ТӦГӰНДИ ЧЫННАҤ ЫЛГАШТЫРАРГА НЕ БОЛУЖАР?

5. Иегованаҥ айап турары чынды ла тӧгӱнди ылгаштырарга канайып болужар?

⁵ Иегованаҥ айап турары. Иегованаҥ айап турары дезе Кудайды сӱӱриле колбулу. Бис Кудайды сӱреен тыҥ сӱӱгенистеҥ улам оны ачындыргадый не-немелерди эдерге коркып јадыс. Бистерге эҥ керектӱзи — ол Иегованыҥ јарадузы болот. Оныҥ учун дезе јакшыны ла јаманды, тӧгӱнди ле чынды ылгаштырарга ӱренип алар керек (Укаа 2:3—6; Евр. 5:14). Калак, улустаҥ коркыйла, Иегованыҥ сӱӱжинеҥ тууралап калдыс. Нениҥ учун дезе улуска јарап турган не-немелер, кӧп сабада Иеговага јарабай турган болот.

6. 10 кайучыл улустаҥ коркыйла нени айткан?

⁶ Бис улустаҥ тыҥ коркып турзаас, Кудайдыҥ кӧрӱмине јарабай турган немелерге бӱдӱп баштаарыс. Моисей 12 кайучылды Ханаан јердӧӧн ийерде не болгонын эске алып ийектер. Кайучылардыҥ он кижизи хананейлердеҥ коркый берген. Олор коркыйла, Иегованыҥ сӱӱжин ундып салган. Олор бойыныҥ улузына: «Бис ол албатыга удура јуулажып болбозыс, нениҥ учун дезе олор бистеҥ кӱчтӱ» — деп айдышкан (Тоол. 13:27—31). Олордыҥ бу айткан сӧстӧринде чын немези бар болгон. Не дезе хананейлер израильтяндардаҥ чыннаҥ ла кӱчтӱ болгон. Је израильтяндар бойлорыныҥ ӧштӱлерин јеҥип болбос деп айтканы чын болгон бо? Мындый сӧстӧрди јӱк ле Иегованы чек ундып салган кижи айдар эмей! Иегованыҥ Ханаан јерди израильтяндарга берер болгонын бу 10 кайучылга ундыбас керек болгон. Анайда ок олорго бу ла јуукта Иегова бойыныҥ албатызын канайып аргадап алганын сананар керек болгон. Ол тушта олор Иегова хананейлерге кӧрӧ канча кире кӱчтӱ деп оҥдоп ийер эди. Ол кайучылардыҥ бӱдӱмјизи, Иисус Навин ле Халевтиҥ бӱдӱмјизине кӧрӧ, чек уйан болгон. А ол экӱ мынайда айткан: «Иегова бисти сӱӱп турган болзо, ол сӱт ле мӧт агып турган јердӧӧн бисти кыйалта јогынаҥ апарар ла оны биске берип ийер» (Тоол. 14:6—9).

7. Иегованаҥ айап турарга нени эдер керек? (Јурукты база кӧрӱгер.)

⁷ Иегованаҥ айап турарга биске не болужар? Кандый бир тӱп-шӱӱлте чыгарган тужыгарда Иегованыҥ сезимдерин сананып турыгар (Сар. 16:8). Оныҥ учун Агару Бичиктиҥ кажы бир ӱзӱгин кычырган тужыгарда бойыгардаҥ мынайда сурагар: «Мен мындый айалгада болгон болзом нени эдер эдим?» Темдектезе, слер Израиль албатыныҥ ортозында болгон болзоор, 10 кайучылдыҥ коркымчылу сӧстӧрин уккан болзоор, канайдар эдеер? Бӱдереер бедеер? Коркый берер бедеер? Эмезе Иегованы сӱӱгенеер улустаҥ коркыбаска болужып ийер беди? Иисус Навин ле Халев чынды айткан, је албаты олорго бӱтпеген. Мынаҥ улам Ханаан јердӧӧн ол ӱйедеҥ, Иисус Навин ле Халевтеҥ ӧскӧ, кем де кирбеген (Тоол. 14:10, 22, 23).

8. Биске кандый кылык-јаҥга јазап ӱренер керек, нениҥ учун?

⁸ Јобош болоры. Иегова чындыкты јӱк ле јобош улуска ачып јат (Матф. 11:25). Агару Бичикти ӱренериҥ бе деп бистеҥ сураарда, бис јобожыдынып, јӧпсинип ийгенис. Нениҥ учун дезе оны болуш јогынаҥ оҥдоорго кӱч болгон (Ап. ижи 8:30, 31). Је бийиркене бербеске ајарыҥкай болор керек. Оноҥ башка Иегованыҥ организациязыныҥ башкартулары да, библиялык принциптери де јакшы, је мениҥ де кӧрӱмим уйан эмес деп санана берердеҥ айабазыс.

9. Јобош болуп артарга биске не болужар?

⁹ Јобош болуп артарга, биске Иеговага тӱҥейлежип болбозысты ундыбай турар керек (Сар. 8:3, 4). Анайда ок бис оноҥ тыҥ јобош болорго ло Иегованаҥ ӱренер кӱӱндӱ болорго мӱргӱӱр аргалу. Иегова бойыныҥ санааларын Агару Бичик ле организацияныҥ чыгарып турган материалдары ажыра ачат. Ол бойыныҥ санааларын биске баалап турарга ла бойыстыйынаҥ бийик тургузарга болужар. Агару Бичикти кычырып турзагар, Иегова јобош болорын сӱӱп турган деп ле тыҥзынчак, бийиркек, улуркак болорын кӧрӧр кӱӱни јок деп шӱӱлтелерге ајару эдип туругар. Је анчада ла качан биске јаҥ берилзе эмезе ајару эдилип турза, јобош болуп артар керек.

ЧЫНДЫКТАҤ БЕК ТУДУНАРГА НЕ БОЛУЖАР?

10. Јебрен ӧйдӧ Иегова башкартуларды кем ажыра берген? Бӱгӱнги кӱнде канайып берет?

¹⁰ Иегованыҥ организациязына јаантайын бӱдӱп туругар. Јебрен ӧйдӧ Иегова албатызына башкартуларды Моисей ажыра берген, оноҥ Иисус Навин ажыра (Иис. Н. 1:16, 17). Израильтяндар бу эр улусты Иегова тургузып салган деп оҥдоп, олорды тоор учурлу болгон. Олор мынайып эдип турарда, ӱзе ле немези јакшы болуп туратан. Канча чактар ӧдӧрдӧ христиан јуун тӧзӧлгӧн. Озо баштап башкартулар 12 апостол ажыра берилген (Ап. ижи 8:14, 15). А оноҥ олорго Иерусалимдеги ӧскӧ аксагалдар кожулган. Христиандар бу чындык эр улустыҥ башкартуларын бӱдӱрип турарда, «серкпелер [јуундар] бӱдетениле тыҥып, тоозыла кӱнӱҥ сайын арбындап тур[атан]» (Ап. ижи 16:4, 5). Анайып ла бӱгӱн, Кудайдыҥ организациязына бӱдӱп турзабыс, бӱдӱрип турган ижибис једимдӱ болот. Је Иегованыҥ тургузып салган эр улузын тообогон болзоос, Иегова нени сезер эди? Бу сурактыҥ каруузын билип аларга, израильтяндарла Ханаан јердӧӧн барып јадарда не болгонын кӧрӱп ийектер.

11. Моисейди тообогон израильтяндарла не болгон? (Јурукты база кӧрӱгер.)

¹¹ Израильдиҥ албатызы Ханаан јердӧӧн барып јадарда, олордыҥ ортозында тоомјылу кезик эр улус Моисейдиҥ албатыны башкаратан јаҥына удурлажып баштаган. Олор мынайда айдышкан: «Бастыра албаты агару [јаҥыс ла Моисей эмес], олорло кожо Иегова» (Тоол. 16:1—3). Иегованыҥ кӧрӱмиле болзо, бӱдӱн албаты агару, је Кудайдыҥ албатызын башкарар јаҥ јӱк ле Моисейге берилген болгон (Тоол. 16:28). Је Моисейге удурлашканы Иегованыҥ бойына удурлашканы эмей. Олор Иегованыҥ кӱӱнин бӱдӱрердиҥ ордына, бойлоры башкарар јаҥду болорго ло улустаҥ мак аларга кӱӱнзеген. Је Иегова тӱймеечилерди ле олорго кожулган улусты јоголтып салган (Тоол. 16:30—35, 41, 49). Бӱгӱнги де кӱнде кем-кем Кудайдыҥ организациязыныҥ башкартуларын тообой турза, Иеговага јарабай јат.

12. Бис Иегованыҥ организациязына нениҥ учун бӱдер аргалу?

¹² Бисте Иегованыҥ организациязына бӱтпейтен шылтак јок. Башкару јӧп библиялык чындыктардыҥ оҥдомолын чокумдаар керек деп кӧрӱп ийзе эмезе организацияныҥ ижинде та нени де солыыр керек деп оҥдоп ийзе, ӧйди бир де чӧйбӧй керектӱ немени эдип јат (Укаа 4:18). Нениҥ учун дезе Башкару јӧп эҥ ле озо Иегованыҥ кӱӱнин бӱдӱрерге кӱӱнзейт. Анайда ок олордыҥ чыгарган кажы ла јӧби Агару Бичикке тӧзӧлӧнӧт. А бис Агару Бичиктеги сӧстӧрдӧҥ тудунадыс эмей.

13. «Тузалу сӧстӧр» ол не, биске олордоҥ нениҥ учун тудунар керек?

¹³ «Тузалу сӧстӧрдӧҥ» тудуныгар (2 Тим. 1:13, ЈТ). «Тузалу сӧстӧр» — Агару Бичиктеги христиан ӱредӱлер (Иоанн 17:17). Бу ӱредӱлерге бистиҥ бӱдӱмјибис тӧзӧлӧнӧт. Иегованыҥ организациязы бисти бу тузалу сӧстӧрдӧҥ тудунзын деп ӱредет. Ол тушта олор биске кору болор.

14. Баштапкы чактыҥ кезик христиандары «тузалу сӧстӧрдӧҥ» канайып тууралай берген?

¹⁴ Бис тузалу сӧстӧрдӧҥ тудунбай барзаас, не болордоҥ айабас? Бир тем кӧрӱп ийектер. Баштапкы чактыҥ христиан јуунында Иегованыҥ кӱни једип келген деп табыш угулган. Кезик улустыҥ айтканыла болзо, апостол Павел бойыныҥ самаразында анайып айткан. Фессалоникадагы кезик христиандар бу суракты тереҥжиде шиҥдебей јадып, мындый тӧгӱнге бӱде берген, керек дезе улуска да оноҥ ары куучындаган. Је олор Павелдиҥ ӱредӱзин ундыбаган болзо, тӧгӱндетпес эди (2 Фес. 2:1—5). Оныҥ учун Павел ака-эјелерди бӱдӱҥкей болбозын деп кӱӱнзеткен. Мынаҥ ары тӧгӱнди чыннаҥ оҥдоштырып турарга, ол Фессалоникадагыларга бичиген экинчи самаразын мындый сӧстӧрлӧ божоткон: «Мен, Павел, бу уткуулды бойымныҥ колымла бичип турум. Кажы ла самарамды анайда темдектеп, анайда ла бичип јадым» (2 Фес. 3:17).

15. Чынга тӱҥей тӧгӱннеҥ бис канайып коруланарыс? Тем куучындап беригер. (Јурукты база кӧрӱгер.)

¹⁵ Павелдиҥ Фессалоникадагы ака-эјелерге бичиген самаразынаҥ бис неге ӱренедис? Бис те кайкамчылу солун эмезе библиялык чындыкка келишпей турган неме угар болорыс. Бу айалгада бис нени эдерис? Биске ойгор болор керек. Советский Союзтыҥ ӧйинде акалар тӧс башкарунаҥ келген деп бичилген самара алгандар. Бу самара акаларды алдынаҥ бойы организация тӧзӧзин деп кӱӱнзеткен. Бу самараны бистиҥ акалар бичиген деп билдирген, је чынынча болзо, оны ӧштӱлер бичиген. Чындык акалар бого тӧгӱндетпеди. Олор самарада бичилгени организацияныҥ ӱредӱзине келишпей турган деп оҥдоп ийгендер. Бӱгӱнги кӱнде чындыктыҥ ӧштӱлери бисти де булгап саларга эмезе чагыштырып саларга, эмдиги ӧйдиҥ технологияларын тузаланардаҥ айабас. Олордыҥ тӧгӱнине тӱрген ле кирбеске, биске кӧргӧн-уккан немегис библиялык чындыкка келижип турган ба деп кӧрӱп турар керек (2 Фес. 2:2; 1 Иоанн 4:1).

16. Јуунда кем-кем чындыкка келишпей турган неме айдып баштаза, биске Римдегилерге 16:17, 18-ле болзо, нени эдер керек?

¹⁶ Иеговага чындык улусла бирлик болугар. Кудай бойыныҥ ишчилерин ончозын бирлик болзын деп кӱӱнзейт. Оныҥ учун бистер чындыктаҥ бек тудунар учурлу. Је кем-кем чындыкка чек келишпес немелер айдып турза, јуунда бӧлӱништер башталат. Иегова бисти андый улустаҥ «кыйыжыгар» деп айдат. Оноҥ башка бис тӧгӱнге бӱделе, Кудайыска чындык артпай каларыс. (Римдегилерге 16:17, 18 кычырыгар.)

17. Нениҥ учун тӧгӱнди чыннаҥ ылгаштырар керек ле чындыктаҥ бек тудунар керек?

¹⁷ Тӧгӱнди чыннаҥ ылгаштырып турзаас ла чындыктаҥ бек тудунып турзаас, Иеговала колбуларысты јылыйтпазыс ла бӱдӱмјибис бек болор (Эф. 4:15, 16). Ол тушта Сатананыҥ пропагандазына тӧгӱндетпезис. Анайда ок улу тӱбектиҥ ӧйинде Иегованыҥ болужына бир де алаҥзыбай иженерис. Айдарда, чындыктаҥ бек тудуныгар, ол тушта «амырдыҥ Кудайы слерле кожо болор»! (Флп. 4:8, 9).