Иегова слердиҥ кӧзӧӧрдиҥ јаажын ундыбай јат

1, 2. Бис недеҥ улам ыйлайдыс?

КАЖЫ ла кижи јӱрӱминде ыйлап јат. Јӱрӱмисте јакшы та неде боло берзе, бис сӱӱнгенистеҥ улам ыйлап јадыбыс. Темдектезе, бала чыкса эмезе узак ӧйгӧ кӧрбӧгӧн јуук најыбыска туштазаас. А кезикте кандый бир јакшы учурал санаабыска кире берзе, кӧзис јаштала берет.

² Је кӧп сабада, биске коркышту јаман болзо ыйлайдыс. Темдектезе, јуук кижибис чӧкӧндирген болзо, кӧстиҥ јаажын тудуп болбой јадыс. Эмезе оору-јоболго табартып, оорузына чыдашпай ыйлап јадыбыс. А јуук кижибис божоп калза, не аайлу ачу болот. Мындый ӧйлӧрдӧ бисте Иеремияда ла ошкош сезимдер болот. Качан Вавилонныҥ черӱзи Иерусалимди јемирип койордо, Иеремия тыҥ кунугып, мындый сӧстӧр бичиген: «Кӧзимниҥ јаажы суу чылап агат... Мен ӧксӧп ыйлаарым, мениҥ ый-сыгыдым токтобос» (Ыйы 3:48, 49).

3. Иегова оныҥ ишчилери шыралап турза, нени сезет? (Исайя 63:9).

³ Биске ачу, јаман болгонынаҥ улам канча катап ыйлаганысты Иегова јакшы билер. Агару Бичикте айдылганыла болзо, кӱч айалгаларда биске нени ӧдӧргӧ келижип турганын Иегова кӧрӱп јат. Анайда ок болуш сурап јайнаганысты угуп јат (Сар. 34:15). Је Иегова јайнап сураганысты јӱк ле угуп турган эмес, је кыйын шырабысты кӧрӱп турган. Ол бисти, бойыныҥ балдарын, сӱӱп јат. Бис ыйлап турзаас, ого база јаман болот. Оныҥ учун ол капшай ла биске болужарга келет. (Исайя 63:9 кычырыгар.)

4. Агару Бичиктеҥ бис Иегованыҥ кандый ишчилери керегинде куучындажарыс? Иегова керегинде нени билип аларыс?

⁴ Иегова бойыныҥ сӧзинде оныҥ ишчилери ыйлап турза, ол нени сезип турган ла олорго канайып болужып турганын бичип салган. Бу јӧрмӧлдӧ Анна, Давид, Езекия нениҥ учун ыйлаган деп кӧрӧрис. Иегова олорго канайып болушкан? Анайда ок бистиҥ јуук кижибис божогонынаҥ улам, бисти кем-кем садып ийгенинеҥ улам, кандый да ижемји артпаган деп билдирип турганынаҥ улам бис ыйлап турзаас, Иегова биске канайып болужып турганын билип аларыс.

ЈУУК КИЖИГЕРДИ ЈЫЛЫЙТЫП ЫЙЛАЗААР

5. Анна кандый айалгада болгон ло ондо кандый сезимдер болгон?

⁵ Анна кӧп ыйлап туратан. Оныҥ ӧбӧӧниниҥ экинчи ӱйи, Пенинна, Аннаны кӧрӧр кӱӱни јок болгон. Мынаҥ улам Анна тыҥ кунугып туратан. Анайда ок Пениннада балдар болгон, је Аннада јок (1 Сам. 1:1, 2). Оныҥ учун Пенинна Аннаны шоодып, базынып туратан. Слер Аннаныҥ ордына болгон болзоор, нени сезер эдеер? Агару Бичикте айдылганыла болзо, Аннага «коркышту ачу болгон» ло ол «ыйлап, ажанбай туратан» (1 Сам. 1:6, 7, 10).

6. Недеҥ улам Аннага јеҥил боло берди?

⁶ Аннага недеҥ улам јеҥил боло берген? Ол агару байкандӧӧн — чындык бажырыштыҥ тӧс јерине барган. Анда ол агару байканныҥ кӱрентигиниҥ эжигинеҥ ыраак эмес јерде турган болор. Анна «Иеговага мӱргӱп, кӧзиниҥ јаажын токтодып болбой турды». Ол Иегованы оныҥ шыразын кӧрӱп, ого болушсын деп јайнап мӱргӱген (1 Сам. 1:10б, 11). Анна Иеговага бастыра сезимдерин ле санааларын куучындап берди. Адазы кару кызыныҥ ыйлап-сыктап турганын кӧрӱп, јӱрегине база ачу боло берген.

7. Анна Иеговага санааркаштарын айткан кийнинде не солына берди?

⁷ Улу абыс Илий Аннага Иегова сениҥ мӱргӱӱлиҥе каруу берер деп айтты. Мыны угала Анна нени этти? Агару Бичикте мынайып айдылат: «Ол айылына јанала, ажанып, база кунукпай барган» (1 Сам. 1:17, 18). Је ол туша Аннаныҥ айалгазы солынбаган да болзо, ол токунап калды. Амыр бербей турган санааркаштарын Анна ӱзе Иеговага берип салды. Иегова бойыныҥ јанынаҥ нени этти? Ол Аннаны јазап угала, оныҥ сезимдерин оҥдоп, кийнинде алкаган: Анна балдарлу болуп калган (1 Сам. 1:19, 20; 2:21).

8, 9. Нениҥ учун јуунныҥ туштажуларына келер керек? (Еврейлерге 10:24, 25). (Јурукты база кӧрӱгер.)

⁸ Бис неге ӱренедис. Сениҥ јӱрӱмиҥде база кӱч айалга болуп калган болор, оноҥ улам јаантайын ыйлап турган болорыҥ. Сениҥ јуук кижиҥ эмезе најыҥ божогон болор, мынаҥ улам јаҥыскан болорго турган болорыҥ. Мында јаман неме јок, је Аннаныҥ темин сананып ийзеҥ де. Ол јӱк ле агару байканга келерде, Иегова оны токунадып салган. Анайып ла сен де тыҥ санааркап, нени де эдер кӱӱниҥ јок то болзо, албаданып јуунга бар. (Еврейлерге 10:24, 25, ЈТ кычырыгар.) Ондо Иегова сеге ийде-кӱч ле токунал берер. Анайда ок анда Агару Бичиктиҥ ӱлгерлерин угуп, шӱӱп сананзаҥ јаман санааларыҥ ыраай берер. Иегова анайып сеге јакшы немелерди сананарга болужар. Эм тура айалга солынбаган да болзо, јӱрегиҥе тӱҥей ле јеҥил боло берер.

⁹ Анайда ок бис јуунныҥ туштажуларында ака-эјелерисле куучындажадыс. Олор бисти сӱӱп јат. Олордыҥ јанында болзоос, биске јакшы боло берет (1 Фес. 5:11, 14). Ӱйи божогон бир специальный пионер бойыныҥ сезимдери керегинде мынайып айдат: «Мен ӱйимди тыҥ јоктоп јадым. Кезикте јаҥыскан артып, ыйлап аладым. Је јуундар меге јаан болуш болот. Ака-эјелердиҥ каруулары ла јалакай сӧстӧри меге сызымды јазып турган эмдий. Кезикте јуунныҥ туштажуларыныҥ алдында, санааркап, кунугып та турган болзом, је јуунныҥ кийнинде андый сезимдердиҥ изи де артпай јат». Бис јуунныҥ туштажуларына келип турзаас, Иегова бисти ака-эјелер ажыра токунадат.

10. Тыҥ кунугып турзаас, Аннаныҥ теми биске канайып болужар?

¹⁰ Анна токунал аларга база нени этти? Ол Иеговага ичинде бастыра санааркаштарын чыгара айдып берген. Бис база амыр бербей турган санааркаштарысты бойыстыҥ ичиске тутпай, Иеговага берип ийер керек (1 Пётр 5:7). Не дезе ол бисти кыйалта јогынаҥ угар ла болужар деп бис билерис. Бир эјениҥ учуралын кӧрӱп ийектер. Оныҥ ӧбӧӧнин тонокчылар ӧлтӱрип салган. Бу эје айдат: «Мениҥ јӱрегим чек ооктолып калган немедий, эмди мен качан да сӱӱнип болбозым деп бодогом. Је Иеговага мӱргӱп, токунал сураарымда, ол меге амыр берген. Кезикте мен айдар сӧс тӧ таппай, јазап мӱргӱп те болбой барзам, је Иегова мениҥ сезимдеримди оҥдоп туратан. А качан мен эмоционально чыдажып болбозым деп сананзам, Иегованаҥ јӱрегиме амыр сурайтам. Мыныҥ кийнинде мениҥ јӱрегиме амыр келип, база бир кӱн јӱрерге ийде-кӱч кожулат». Качан бис ыйлап, јӱрегисте не барын ӱзе Кудайга ачып турзаас, ол бистиҥ сезимдеристи јакшы оҥдоп, бисле кожо ыйлап јат. Эм тура айалга солынбаган да болзо, јӱрегис бистиҥ токунап калат (Сар. 94:19; Флп. 4:6, 7). Бис турумкай болуп чындык артсаас, Иегова бисти кайралдаар (Евр. 11:6).

СЛЕРДИ КЕМ-КЕМ САДЫП ИЙЕРДЕ ЫЙЛАП ТУРЗААР

11. Давидте кандый кӱчтер болгон? Оныҥ сезимдерин куучындап беригер.

¹¹ Давид база кӧп ыйлаган, нениҥ учун дезе кӧп улус оны јаман кӧрӱп туратан. Керек дезе оныҥ бӱткен јуук улузы оны садып ийген болгон (1 Сам. 19:10, 11; 2 Сам. 15:10—14, 30). Јӱрӱминиҥ кӱч ӧйлӧринде Давид мындый сӧстӧр айткан: «Канчазын ӧксӧп, ыйлайын? Тӱниле ыйлаганыма тӧжӧгим кӧбӱп калды». Давидке нениҥ учун мындый јаман болгон? Ол: «Ӧштӱлеримнеҥ улам» — деп айдат (Сар. 6:6, 7). Улустыҥ јаман керектери Давидтиҥ јӱрегин коркышту тыҥ шыркалап турарда, Давид бойыныҥ ыйын токтодып болбойтон.

12. Сарын 56:8-те Давид Иегова керегинде нени бичиген?

¹² Давидтиҥ јӱрӱминде кӱчтер кӧп тӧ болгон болзо, Иегова оны сӱӱп турган деп ол алаҥзыбаган. Бир катап ол айткан: «Иегова мениҥ ыйымды угуп ийер» (Сар. 6:8). А Сарын 56:8-те ол Иегова керегинде сӱреен кайкамчылу сӧстӧр айткан (кычырыгар). Бу сӧстӧрдӧҥ Иегова бойыныҥ ишчилерин сӱреен тыҥ сӱӱп турган ла кичееп турган деп билип аладыс. Давид Кудай оныҥ јаажын јыракыга јууп, олорды бичигинде бичип алган деп айткан. Иегова оныҥ јӱрӱминде болгон ончо јаман учуралдарды билер ле ол олорды качан да ундыбас деп алаҥзыбаган. Сӱӱштӱ ада Давидтиҥ јӱк ле нени ӧдӧргӧ келишкенин кӧргӧн эмес, је оныҥ јӱрӱминде болгон бастыра јаман неме ого кандый каршузын јетиргенин билген.

13. Бисти кем-кем чӧкӧндирип эмезе садып ийген болзо, нени ундыбас керек? (Јурукты база кӧрӱгер.)

¹³ Бис неге ӱренедис. Сениҥ јӱрегиҥди эм тура кем-кем шыркалап салган болор бо? Сен јуук кижиҥнеҥ чӧкӧп калган болорыҥ эмезе сӱӱген кижиҥ сени таштап ийген болордоҥ айабас, темдектезе, сениҥ тушташкан кижиҥ эмезе эш-нӧкӧриҥ сени таштап ийген болор. Ол эмезе јуук кижиҥ Иеговага иштебей барган болор. Бир аканыҥ ӱйи ӧскӧ кижиле конып, ӧбӧӧнин таштап ийген. Ол ака айдат: «Меге коркыш јаман болгон, чек бӱтпей турган болгом. Бир јанынаҥ мен тыҥ ачынып туратам, је база бир јанынаҥ коркышту тыҥ кунуккам». Сени кем-кем садып ийген эмезе сен та кемнеҥ де чӧкӧп калган болзоҥ, Иегова сени бир де таштабас. Ака айдат: «Улус сени садып ийер аргалу, је Иегова качан да сатпас. Ол бистиҥ Кайа. Не де болотон болзо, ол јаантайын бистиҥ јаныста. Чындык улузын ол качан да артыргыспас» (Сар. 37:28). Ундыба: Иегова чылап сени кем де, качан да сӱӱп болбос. Сенле болгон јаман немедеҥ улам Иегова сени сӱӱбей барган деп бир де сананба (Рим. 8:38, 39). Улус сеге канай да баштанган болзо, сениҥ теҥеридеги Адаҥ сени јаантайын сӱӱр.

14. Сарын 34:18-теги сӧстӧр бисти неде бӱдӱмјилейт?

¹⁴ Бисти кем-кем садып ийген болзо, Сарын 34:18-те Давидтиҥ бичиген сӧстӧри бисти токунадар болор (кычырыгар). Бир справочникте айдылганыла, «санааркап калган улусты» «келер ӧйдӧҥ јакшы нени де сакыбай турган улус» деп айдарга јараар. Иегова андый улуска канайып болужат? Ол олорды «артыргыспай јат». Качан кичинек бала ыйлап турза, адазы ла энези капшай ла балазын алып, токунадып јат. Анайып ла Иегова эдет, бисти кем-кем садып ийген эмезе таштап ийген болзо, Иегова сезимдеристи оҥдоп, капшай ла болужарга кӱӱнзеп јат. Бис јӱрегистиҥ сызына чыдашпай, бойысты эш-кереги јок кижи деп сананып турзаас, Иегова бисти токунадып јат. Эмдиги кӱчтерди ӧдӧргӧ јеҥил болзын деп, Иегова келер ӧйдӧ болотон јакшы ла јараш јӱрӱмди биске эске алындырат (Иса. 65:17).

ИЖЕМЈИ ЈОК ДЕП БИЛДИРГЕНИНЕҤ ЫЙЛАП ТУРЗААР

15. Езекия недеҥ улам ачу ыйлаган?

¹⁵ Иудеяныҥ каанына, Езекияга 39 јаш болордо, ол јазылбас оорула оорып калган. Иегова судурчы Исайя ажыра оорунаҥ улам ол божоп калар деп айткан (2 Каан. 20:1). Бу јаман солунды Езекия угала, ачу ыйлай берген. Оноҥ Иеговага тыҥ мӱргӱп баштаган (2 Каан. 20:2, 3).

16. Иегова Езекияныҥ јайналганду мӱргӱӱлине кандый каруу берди?

¹⁶ Езекияныҥ јайналганду сӧстӧри Иегованыҥ јӱрегин томулткан. Иегова ого мындый јылу сӧстӧр айтты: «Мен сениҥ мӱргӱӱлиҥди уктым, сениҥ ыйлаганыҥды кӧрдим. Мен сени јазып саларым». Иегова Езекияны килеп, оныҥ јӱрӱмин узадып салар ла Иерусалимди Ассирияныҥ черӱзинеҥ корулаар деп, судурчы Исайя ажыра сӧзин берди (2 Каан. 20:4—6).

17. Бис ооруп турган болзоос, Иегова биске канайып болужат? (Сарын 41:3). (Јурукты база кӧрӱгер.)

¹⁷ Бис неге ӱренедис. Сениҥ су-кадыгыҥ коомой деп угуп ийген болзоҥ, сезимдериҥди Иеговага куучында. Мӱргӱӱлдиҥ ӧйинде ыйлаар кӱӱниҥ келген болзо, ыйла. Ол сени андый да ӧйдӧ угуп јат. Агару Бичикте айдылганыла: «Ол буурзак Ада, кандый ла токунал береечи Кудай» (2 Кор. 1:3, 4, ЈТ). Бӱгӱнги кӱнде Иегова бистиҥ бастыра кӱчтеристи јоголтып салар деп иженбей јадыс, је андый да болзо, оныҥ болужына иженип јадыс. (Сарын 41:3 кычырыгар.) Иегова агару тыны ажыра биске ийде-кӱч, ойгор ло јӱрегиске амыр берет (Укаа 18:14; Флп. 4:13). Анайда ок келер ӧйдӧ кем де качан да оорубас деп ижемји берет (Иса. 33:24).

18. Кӱч айалгаларда слерге кандый ӱлгер болужат? («Бисти токунадатан библиялык ӱлгерлер» деген рамканы кӧрӱгер.)

¹⁸ Езекияны Иегованыҥ сӧстӧри токунаткан. Кудай бисти де Агару Бичик ажыра токунадар аргалу. Анда ол биске кӱч айалгаларда болужатан кӧп ӱлгерлер бичидип салган (Рим. 15:4). Кӱнбадыш Африкада јадып турган бир эје, ондо рак деп угала, кӧп ыйлаган. Ол айдат: «Меге Исайя 26:3-теги ӱлгер сӱреен јарап јат. Кезикте бистиҥ јӱрӱмисте биске кем де болужып болбос айалгалар боло берет. Је бу сӧстӧр Иегова мениҥ јӱрегиме амыр берер ле кандый ла ченелтени ӧдӧргӧ болужар деп, мени бӱдӱмјилеп јат». А сеге, кем де болужар аргазы јок деп билдирип турган айалгада кандый библиялык ӱлгер болужат?

19. Келер ӧй кандый болор?

¹⁹ Бу телекейдиҥ учы јууктаганы сайын бис оноҥ кӧп ыйлаар болорыс. Бу јӧрмӧлдӧ кӧрӱлген Аннаныҥ, Давидтиҥ ле Езекияныҥ темдеринеҥ Иегова бойыныҥ ишчилериниҥ ыйлап турганын кӧрӱп ийзе, ого база ачу боло берет деп билип алдыс. Ол сениҥ ыйлап јӱргениҥди ундыбай јат. Оныҥ учун кӱч айалгада болуп калзаҥ, Иеговага сезимдериҥди куучында. Ака-эјелердеҥ тууралаба, не дезе олор сени сӱӱп јат. Је анайда ок Агару Бичикти кычырып тур, анда сен токунал берип турган кӧп сӧстӧр табарыҥ. Учы-учында Иегова сени чындык болгоныҥ учун кайралдап салар. Иегова бистиҥ кӧзистиҥ јаажын арчыыр. Јууктарыстаҥ база кем де божобос, кем де бисти сатпас, чӧкӧп эштеп кунугып јӱрбезис (Ачыл. 21:4). А кӧстиҥ јаажы тӧгӱлзе де, јӱк сӱӱнгенистеҥ улам тӧгӱлер.