Бис јаҥыскан эмезис

1, 2. а) Кӱч ӧйлӧрдӧ јаҥыскан артып каларыс деп, нениҥ учун коркыбас керек? б) Бу јӧрмӧлдӧ нени шӱӱжерис?

КӰЧТЕРДИҤ ӧйинде биске аҥданып јаткан талайда кичинек кемеде јаҥыскан артып калганыс деп билдирердеҥ айабас. Је чынынча болзо, бис качан да јаҥыскан артпай јадыс. Нениҥ учун дезе теҥеридеги Адабыс бистиҥ кӱчтеристи јаҥыс ла кӧрӱп турган эмес, је кӱчтерди ӧдӧргӧ болужар деп сӧзин берет. Ол бойыныҥ чындык ишчилерине: «Мен сеге болужарым» — деп, јылу сӧстӧр айдат (Иса. 41:10).

² Бис бу јӧрмӧлдӧ Иегова биске канайып болужып турганы керегинде шӱӱжерис. 1) Ол бисти башкарып јат, 2) јеткилдеп јат, 3) корулап јат, 4) токунадып јат. Иегова бисти јӱрӱмисте не де болзо, качан да ундыбас ла качан да артыргыспас деп бӱдӱмјилеп јат. Оныҥ учун кандый да айалга болотон болзо, бис јаҥыскан эмезис.

ИЕГОВА БИСТИ БАШКАРЫП ЈАТ

3, 4. Иегова бисти канайып башкарат? (Сарын 48:14).

³ Сарын 48:14 кычырыгар. Иегова бисти башкарту јок артыргыспаган — ол биске бу јӱрӱмде јол кӧргӱзип јат. Ол бойыныҥ чындык ишчилерине башкартуларды бӱгӱнги кӱнде канайып берет? Агару Бичик ажыра (Сар. 119:105). Оныҥ болужыла бис Иегованы сӱӱндирип турган јӧптӧр чыгарадысa ла јакшы кылык-јаҥдарга ӱренедис. Темдектезе, Иегова бисти улустыҥ јаманын таштаарына, тӧгӱндебей јӱрерине ле улусты акту јӱректеҥ сӱӱрине ӱредет (Сар. 37:8; Евр. 13:18; 1 Пётр 1:22). Бу немелерге ӱренип алзаас, бис эмдиги ӧйдӧ ырысту јӱредис, а келер ӧйдӧ ӱргӱлјиге јӱрерис. Иеговага сӧсуккур болзоос, бис јакшы ада-энелер, јакшы эш-нӧкӧрлӧр, јакшы најылар болодыс.

⁴ Анайда ок Кудайдыҥ Сӧзинде алдында ӧйдӧ јӱрген улустыҥ учуралдары бар. Олордо бистий ле ок кӱчтер ле санааркаштар болгон (1 Кор. 10:13; Иак. 5:17). Оныҥ учун олордыҥ темдери биске, ас ла салза, эки немеде тузалу. Баштапкызында, олор бойыныҥ кӱчтерин ӧдӱп ийген болзо, айса бис те ӧдӱп ийерис деп оҥдоп ийедис (1 Пётр 5:9). Экинчизинде, кӱчтердиҥ ӧйинде сӱӱнчисти јылыйтпаска нени эдер керек деп кӧрӱп ийедис (Рим. 15:4).

5. Иегова бисти башкарып апарарга, кемдерди тузаланат?

⁵ Анайда ок Иегова бисти ака-эјелердиҥ болужыла апарып јатb. Темдектезе, аймак кӧрӧӧчилер јаантайын јуунга келгилеп, бистиҥ кӱӱнисти кӧдӱргилейт. Олордыҥ куучын-эрмектери бистиҥ бӱткенисти тыҥыдып, бирлик артарга болужат (Ап. ижи 15:40—16:5). Аксагалдар јуунныҥ кажы ла кижизине Иеговала јуук колбуларлу болорго болужат (1 Пётр 5:2, 3). Ада-энелер балдарын Иегованы сӱӱп, ойгор тӱп-шӱӱлтелер эдерге болужат ла јакшы кылык-јаҥду болзын деп ӱреткилейт (Укаа 22:6). Кӧгӱзи тереҥ эјелер јиит сыйындарга јакшы тем болуп, олорго тузалу јӧптӧр берет ле мактап јадылар (Титке 2:3—5).

6. Иегованыҥ болужын баалап турганысты канайып кӧргӱзерис?

⁶ Иегова бойыныҥ јанынаҥ бисти чын шӱӱлтелер этсин деп ле ырысту јӱрзин деп, ӱзе немени берип јат. Је бу учун быйанысты Кудайга канайып кӧргӱзерис? Укаа сӧстӧр 3:5, 6-да мынайда айдылган: «Бойыҥныҥ оҥдомолыҥа иженбе, бастыра јӱрегиҥле Иеговага ижен». Бис анайып эдип турзаас, «ол [бисти] чын јолго ууландырар», ӧскӧртӧ айтса, биске кандый бир кӱчтерге тӱжӱп калбаска болужар. Иегова Кудайыска бисти сӱреен јакшы билетенине, бисти сӱӱп турганына ла кажыбыска ла керектӱ јӧптӧр берип турганына канайып быйанысты айтпазыс! (Сар. 32:8).

ИЕГОВА БИСТИ ЈЕТКИЛДЕП ЈАТ

7. Иегова бисти канайып јеткилдейт? (Филиппыдагыларга 4:19).

⁷ Филиппыдагыларга 4:19 кычырыгар. Иегова бисти јӱк ле кӧгӱс јанынаҥ јеткилдеп турган эмес, је анайда ок биске кийим-тудум, курсак-тамак, јадар јер керек деп билер. Оныҥ учун бойысты да, билегисти де јеткилдеерге албаданып турганыска алкыжын берет (Матф. 6:33; 2 Фес. 3:12). Је кезикте бис акчабыс тӱҥей ле бастыра немеге јетпей калар болор деп, санааркай берер болорыс. Андый сезимдерде јаман неме јок, је Иегова бисти ӧйинеҥ ӧткӱре санааркабазын деп айдат. («Агару Бичиктиҥ ӱренетен чыгармазында» Матфей 6:25-ке берилген јартамалды кӧрӱгер, орус.) Нениҥ учун дезе ол бистиҥ Ада, а ол бойыныҥ балазын кӱч ӧйдӧ канайып артыргызып салатан? (Матф. 6:8; Евр. 13:5). Ол болужар деп сӧзин берген болзо, сӧзине турар. Бисте бир де кичинек алаҥзыйтан шылтак јок.

8. Иегова Давидке канайып болушкан?

⁸ Иегова Давидке канайып болушканы керегинде сананып ийектер. Давид Саулдаҥ јажынып турарда, Иегова ого ло оныҥ улузына, олор ӧлӱп калбазын деп, керектӱ немени ӱзе берген. Давид ол ӧйлӧрдӧ Иегова канайып болушканын сананып турала: «Мен јиит болдым, эмди карыдым, је Кудай акту кижини артыргысканын ла оныҥ балдары калаш сурап турганын кӧрбӧдим» — деп бичиген (Сар. 37:25). Слерге де, ӧскӧ дӧ ака-эјелерге Иегова канайып болушканын слер куучындап берер аргалу.

9. Иегова кандый бир тӱбектиҥ ӧйинде бойыныҥ албатызына канайып болужат? (Јуруктарды база кӧрӱгер.)

⁹ Кандый бир тӱбек тушта Иегова бойыныҥ албатызына болужып јат. Темдектезе, баштапкы чакта торо болордо, башка-башка јерлерде јадып турган христиандар ака-эјелерге болуш ийген (Ап. ижи 11:27—30; Рим. 15:25, 26). Бӱгӱнги кӱнде Кудайдыҥ албатызы бой-бойына база анайып ла болужат. Иегова тӱбекке тӱшкен улуска ака-эјелер ажыра курсак-тамак, кийим-тудум, эм-тус, суу ийип јат. Ол эмезе бузылган тураларды ла Каандыктыҥ Тураларын јазайтан улус ийет. Анайда ок Иегова тӱбекке тӱшкен улуска кӧгӱс јанынаҥ ла эмоциональный јанынаҥ болуш јетиретc.

10, 11. Бористиҥ учуралынаҥ слер неге ӱренедеер?

¹⁰ Иегова эм тура ого иштебей турган улуска база болужып турган. Биске де Иегованаҥ тем алып, оныҥ керечизи болбой турган улуска болужатан эп-аргалар бедиреп турар керек (Гал. 6:10). Нениҥ учун дезе олор бистиҥ болужысты кӧрӧлӧ, бис керегинде ле бистиҥ Кудайыс керегинде кӧптӧдӧ билерге кӱӱнзей бередилер. Темдектезе, Украинада јадып турган школдыҥ директоры болуп турган Борис деп кижиниҥ учуралын кӧрӱп ийектер. Ол Иегованыҥ Керечизи эмес те болзо, је Иегованыҥ Керечизи болуп турган ӱренчиктерине тоомјылу ла јалакай баштанып туратан. Јуу-чак башталарда ол Украинаныҥ эмеш амыр јаткан јерине качарга сананарда, бистиҥ акалар ого болушкан. Кийнинде Борис Кайраканныҥ Эҥирине барып јӱрген. Ол Иегованыҥ Керечилери керегинде мындый сӧстӧр айткан: «Олор мени акту јӱрегинеҥ кӱндӱлеп, меге коркышту кӧп болуш јетиргилеген. Олорго јаан быйанымды айдадым!»

¹¹ Бистер де теҥеридеги килеҥкей Адабыс чылап, тӱбекке тӱшкен бистиҥ ака-эјелер эмес те улуска болужып, сӱӱжисти кӧргӱзер аргалу (Лука 6:31, 36). Бистиҥ сӱӱжис олордыҥ јӱрегин кайылтып ийзе, олор Христостыҥ ӱренчиги болорго кӱӱнзей берер деп иженедис (1 Пётр 2:12). Је андый болбозо до, бис тӱҥей ле сӱӱнерис, нениҥ учун дезе «алып турганы эмес, берип турганы оноҥ артык ырысту» деп бичилген (Ап. ижи 20:35).

ИЕГОВА БИСТИ КОРУЛАП ЈАТ

12. Иегова бойыныҥ албатызын канайып корулайт? (Сарын 91:1, 2, 14).

¹² Сарын 91:1, 2, 14 кычырыгар. Бӱгӱнги кӱнде Иегова бисти кӧгӱс јанынаҥ каршу болбозын деп корулап јат. Сатана ару бажырышты качан да јоголтып болбос (Иоанн 17:15). Анайда ок Иегова «улу тӱбектиҥ» ӧйинде бойыныҥ албатызын јӱк ле кӧгӱс јанынаҥ эмес, је эт-кан да јанынаҥ корулаар (Ачыл. 7:9, 14).

13. Иегова кажыбысты ла канайып корулайт?

¹³ Иегова кажыбысты ла канайып корулап јат? Ол биске Агару Бичик ажыра не јакшы ла не јаманын оҥдоп аларга болужат (Евр. 5:14). Бис јӱрӱмисте библиялык принциптерди тузаланып турзаас, Иегова Кудайысла најылыгыс тыҥыыр. Оноҥ улам бистиҥ јӱрӱмис ырысту ла амыр болот (Сар. 91:4). Анайда ок Иегова биске јуун берген (Иса. 32:1, 2). Бистиҥ ака-эјелер Кудайды сӱӱп јат ла оныҥ сӧзин угуп јат. Олорло кожо туштажуларда куучындажып, јарлаар ишке кожо барып турзаас, оноҥ кожо амырап турзаас, јаманга јайылбаска јеҥил болуп јат (Укаа 13:20).

14. а) Нениҥ учун Иегова бисти кезикте корулабай јат? б) Сарын 9:10 бисти неде бӱдӱмјилейт? (Сносканы база кӧрӱгер.)

¹⁴ Алдындагы ӧйдӧ Иегова бойыныҥ улузын чын ла корулап туратан. Је кезикте ол анайып этпейтен. Кижиниҥ јӱрӱми «ӧйдӧҥ лӧ... айалганаҥ камаанду» (Эккл. 9:11). Керек дезе Иегованыҥ кезик ишчилерин истешкилеп те јат, кезиги божоп то калат. Андый да болзо, олор учына јетире чындык артып, Сатананы тӧгӱнчи деп кӧргӱскилейт (Иов 2:4—6; Матф. 23:34). Бӱгӱнги кӱнде бисте де андый ченелтелер болордоҥ айабас. Ченелтелерди Иегова јоголтпой до турган болзо, ол бисти артырып салган эмезе сӱӱбей турган деп кӧргӱспей јат (Сар. 9:10)d.

ИЕГОВА БИСТИ ТОКУНАДЫП ЈАТ

15. Иегова бисти мӱргӱӱл, Агару Бичик ле јуун ажыра канайып токунадат? (2 Коринфтегилерге 1:3, 4).

¹⁵ 2 Коринфтегилерге 1:3, 4 кычырыгар. Кезикте бис тыҥ кунугып, јаҥысканзырап, та недеҥ де коркып турган болорыс. Эм ле тура слердиҥ јӱрӱмигерде кӱч ӧйлӧр болуп турган болор. Слердиҥ сезимдереерди кем-кем оҥдоп турган ба? Эйе, Иегова оҥдоп јат. Је ол бистиҥ ачубысты јӱк ле оҥдоп турган эмес, је «бисти кандый ла кӱчтеристе токунадып јат». Ол оны канайып эдет? Иеговага јӱрегисте не барын куучындап турзаас, ол бистиҥ јӱрегисти «кижиниҥ сагыжынаҥ бийик Кудайдыҥ амырыла» толтырып јат (Флп. 4:6, 7). Анайда ок Агару Бичикти кычырып турзаас, биске јеҥил боло берет. Бойыныҥ Сӧзи ажыра Иегова биске сӱӱжин кӧргӱзип јат, ойгор болорго ӱредип јат ла ижемјибисти јылыйтпаска болужып јат. Анайда ок бисти христиан туштажулар токунадып салат. Анда Агару Бичиктеҥ алынган кижиниҥ кӱӱнин кӧдӱрер шӱӱлтелер угуп јадыс ла бисти сӱӱп турган ака-эјелердиҥ болужын аладыс.

16. Слер Нейтан ла Присцилланаҥ неге ӱренип алдаар?

¹⁶ Иегова бойыныҥ ишчилерине Агару Бичик ажыра канайып болужып турганы керегинде бир учурал кӧрӱп ийектер. Канча да јыл кайра, США-да јадып турган Не́йтан ла Присци́лла јарчылар јетпей турган јерге кӧчӧргӧ санангандар. Нейтан айдат: «Иегова биске алкыжын берер деп, бис бир де алаҥзыбаганыс. Је барар јериске једип барала, иш табарга кӱч боло берген, экӱлегистиҥ су-кадыгыс уйадай берген. Учы-учында биске кайра јанарга келишкен, је айылыста да јаантайын акча јетпей барган». Нейтан эске алынат: «Сураганыска каруу болбой турарда, Иегова биске болушпай турган деп билдирген. Керек дезе мен та неде де јастырып ийген болбойым деп сананып баштагам». Је бир эмеш ӧйдӧҥ Нейтан ла Присцилла Иегова олорды кӱч ӧйлӧринде артыргыспаган, ол јаантайын јанында болгон деп оҥдоп баштагандар. Нейтан айдат: «Ол кӱч ӧйлӧрдӧ Агару Бичик биске чын најыдый болгон. Бис ары јакшы сӧстӧр угарга ла ойгор јӧптӧр аларга барып туратаныс. Бис бойыстыҥ кӱчтериске эмес, је Иегова биске ол кӱчтерди ӧдӧргӧ канайып болужып турганына ајарып баштаганыс. Бу дезе Иегова бисти эмди де ӧйдӧ, келер де ӧйдӧ артыргыспас деп бӱдӱмјилеп салган».

17. Иегова Хельга деп эјени канайып токунаткан? (Јурукты база кӧрӱгер.)

¹⁷ Иегова биске токуналды ака-эјелерис те ажыра берет. Нениҥ учун анайып айдарга јараар? Венгрияда јадып турган Хе́льга деп эјениҥ јӱрӱмин кӧрӱп ийектер. Оныҥ јӱрӱминде канча јылдарга улалган кӧп кӱчтер болгон. Мынаҥ улам ол јаантайын санааркап, бойынаҥ чӧкӧп туратан. Эмди бу эје кӱч ӧйлӧрдӧ Иегова ака-эјелер ажыра болушканын оҥдоп јат. Эје мынайда айткан: «Менде кӧп кӱчтер болгон: иште арып калатам, балам оору болгон. Је мениҥ кӱчим чыгып баратса ла, Иегова мени капшай ла токунадып салатан. Ол болужарым деп айдала, 30 јылдыҥ туркунына кажы ла кӱн јанымда болгон. Анайда ок Иегова ака-эјелер ажыра јаантайын болушкан. Олор эҥ ле керектӱ ӧйдӧ јылу сӧстӧр бичип койгон сообщениелер ийетен, эмезе кӱӱнимди кӧдӱретен ле мактап койгон открыткалар бичип туратан».

18. Бис улусты канайып токунадар аргалу?

¹⁸ Улусты токунадып турзаас, бис Иегованаҥ тем аладыс. Бис улусты канайып токунадар аргалу? Олор бойлорыныҥ санааркаштарын куучындап турза, бис олорды акту јӱрегистеҥ угуп јадыс, олорло јалакай куучындажадыс ла неле-неле болужып ийедис (Укаа 3:27). Је бис Иеговага иштебей де турган улусты токунадарга кӱӱнзейдис. Олордо кандый бир тӱбек болуп калза, олор оорып калза, эмезе та неге де санааркап турза, бис олордыҥ јанына келип, олорды јазап угуп, Агару Бичиктеҥ токунал берип турган сӧстӧр айдып бередис. «Токунал береечи Кудайдаҥ» тем алып, бис ака-эјелериске де ченелтелерди ӧдӧргӧ болужып јадыс, анайда ок эм тура Иеговага иштебей турган улуска да болужып јадыс. Олор бистиҥ болужысты кӧрӱп, јӱреги кайылып, бистиҥ Кудайыс керегинде кӧптӧдӧ билерге кӱӱнзей берер деп иженип јадыс (Матф. 5:16).

ИЕГОВА ЈААНТАЙЫН ЈАНЫСТА БОЛОР

19. Иегова биске нени эдет? Бис оноҥ кандый тем аларыс?

¹⁹ Иегова сӱӱп турган улузына кажызына ла болужып јат. Бис уур-кӱчтерге табартсаас, ол бисти качан да артыргыспас. Канайып ада-энелер балазын эркеледип чыдадат, анайып Иегова бойыныҥ чындык ишчилериле јаантайын кожо. Ол бисти кӧгӱс јанынаҥ ла эт-кан јанынаҥ јеткилдейт, анайда ок корулайт ла токунадып јат. Теҥеридеги сӱӱштӱ Адабыстаҥ тем алып, бу јеҥил эмес ӧйдӧги улуска болужадыс. Нениҥ учун дезе бу телекейде кӱчтер ле шыра-јобол јок јӱрӱм болбой јат. Је Иегова бисле кожо деп алаҥзыбай јадыс. Ол бойы айткан јок беди: «Коркыба, нениҥ учун дезе мен сенле кожо» (Иса. 41:10). Бу сӧстӧр, бис јаҥыскан эмезис, Иегова бистиҥ јаныста деп бӱдӱмјилеп јат!