Иегова ла Иисус чылап сананарга ӱренигер

1, 2. а) Кудайды сӱӱрине не кирет? б) Иисус Иегованы бастыра санаазыла сӱӱп турган деп канайып кӧргӱскен?

«ИЕГОВА Кудайыгарды бастыра јӱрегерле, бастыра бойыгарла, бастыра ийде-кӱчигерле, бастыра санаагарла сӱӱп јӱрӱгер» (Лука 10:27, ЈТ). Иисустыҥ айтканыла, бу јасак Моисейдиҥ јасактарыныҥ эҥ јааны болот. Бу јасакла болзо, бис Иегованы бастыра јӱрегисле сӱӱр учурлу. Јӱрекке дезе бистиҥ сезимдерис ле кӱӱн-санааларыс кирет, анайда ок биске Иеговага ончо јанынаҥ чындык болор керек ле ого ончо ийде-кӱчисти берер керек. Кудайды сӱӱрине бис канайып сананып турганыс база кирет. Эйе, бис Иегованыҥ санаазын качан да јетире аайлап болбозыс, је биске Иегованыҥ кӧрӱм-санаазын јакшы оҥдоорго, «Христос чылап санан[арга]» ӱренер керек (1 Кор. 2:16). Нениҥ учун дезе Иисус Адазы канайып сананып турган, ол анайып ла сананып јат.

² Иисус Иегованы бастыра санаазыла сӱӱген. Иегова оноҥ нени сакып турганын ол билген. Иисус Адазыныҥ табын бӱдӱрип тура, шыралаар деп оҥдогон до болзо, ол недеҥ де коркыбаган. Нениҥ учун дезе Иисустыҥ јӱрӱминде Иегованы сӱӱндиретени эҥ баштапкы јерде болгон.

3. Пётр Иисустаҥ неге ӱренген ле христиандарды неге кӱӱнзеткен? (1 Пётр 4:1).

³ Пётр ла апостолдор Иисусла кӧп ӧй ӧткӱрген. Мынайып олордо Иисустыҥ кӧрӱм-санаазын јакшы оҥдоп алатан арга болгон. Пётр баштапкы самаразында христиандарды мынайып кӱӱнзеткен: «Слер де оныҥ [Христостыҥ] санаазылаa јепсенигер» (1 Пётр 4:1, ЈТ кычырыгар.) Бу ӱлгерде «јепсенигер» деген сӧс јуула колбулу термин болот. Айдарда, христиандар Иисус канайып сананып турган, анайып ла сананарга ӱренип алза, олор јаан јепсел тудунып алган деп айдарга јараар. Мынайып олордо, кинчектӱ кӱӱн-санаала тартыжатан ийде-кӱч болор (2 Кор. 10:3—5; Эф. 6:12).

4. Бу јӧрмӧлдӧ бис нени шӱӱжерис?

⁴ Бу јӧрмӧлдӧҥ бис Иисустыҥ кӧрӱм-санаазын јакшы билип аларыс. Бу биске ӱч јанынаҥ болужар: 1) Иегова чылап сананарга, 2) јобош болорго ло 3) ойгор болорго.

ИЕГОВА ЧЫЛАП САНАНАРГА ӰРЕНИГЕР

5. Пётр айалгага Иегова чылап кӧрбӧгӧн учуралды куучындап беригер.

⁵ Пётрла болгон бир учуралды кӧрӱп ийектер. Иисус апостолдорына ого Иерусалим барар керек деп ле анда јаҥдар оны тудуп алала, кыйнап, ӧлтӱрер деп айткан (Матф. 16:21). Пётрдыҥ санаазыла, Иисус Израильди аргадайтан Кудайдыҥ майлатканы болордо, Иегова ого ӧлӧргӧ бербес (Матф. 16:16). Оныҥ учун Пётр Иисусты туура апарып: «Кайракан, сен анайып айтпа! Сениле андый неме качан да болбозын!» — деп айткан (Матф. 16:22, ЈТ). Бу айалгада Пётр ла Иисус эки башка кӧрӱмдӱ болгон. Нениҥ учун? Нениҥ учун дезе Иисуска кӧрӧ, Пётр бу айалгага Иегова чылап кӧрбӧгӧн.

6. Иисус Иегова ла чылап сананган деп недеҥ кӧрӱнген?

⁶ Иисус ончо немеге теҥеридеги Адазыныҥ кӧрӱмиле кӧргӧн. Ол Пётрга айткан: «Менеҥ кеде тур, Сатана! Сен меге бӱдӱрилетен таш болуп јадыҥ, нениҥ учун дезе сен Кудайдыйын эмес, кижинийин сананып тургаҥ» (Матф. 16:23, ЈТ). Иисус Иегованыҥ кӱӱн-табын бӱдӱрерге, ого кыйналып ӧлӧр керек деп билген. Оныҥ учун Пётр јакшы сананып айткан да болзо, Иисус оныҥ айтканын чек јууктатпады. Бу учуралдаҥ Пётр неге ӱренип алган? Иегованыҥ кӧрӱм-санаазын оҥдоп алала, Кудай чылап сананарга ӱренип алар керек. Бу биске де јаан ӱредӱ болот.

7. Пётр улуска Кудайдыҥ кӧрӱмиле кӧрӧргӧ белен болгонын канайып кӧргӱскен? (Кадарындагы јурукты.)

⁷ Кийнинде Пётр Иегова чылап сананарга ӱренип аларга турганын кӧргӱскен. Еврей укту эмес улус Кудайдыҥ албатызы болор ӧйи једип келерде, Кудай Пётрды Корнилийге јарлазын деп аткарган. Еврейлер ол тушта ӧскӧ укту албатылардыҥ улузыла куучындашпай туратан. Оныҥ учун Пётрга Кудайдыҥ бу јакылтазын бӱдӱрерге кӱч болгон. Ол Иегованыҥ еврей укту эмес улуска кӧрӱмин билип алала, бойыныҥ да кӧрӱмин солыган. Оныҥ учун ол «мойнобой», Корнилийдиҥ айылына барды (Ап. ижи 10:28, 29). Пётр Корнилийге ле оныҥ айылдагы улузына јарлаарда, ончозы сууга чӧҥӱрилген. Олор еврей укту эмес улустыҥ ортозынаҥ баштапкы христиандар болуп калды (Ап. ижи 10:21—23, 34, 35, 44—48).

8. Бис Иегова ла чылап сананып турганыс деп канайып кӧргӱзерис? (1 Пётр 3:8).

⁸ Канча јылдар ӧткӧн кийнинде Пётр ака-эјелерге «санаагар јаҥыс болзын» деп бичиген. (1 Пётр 3:8, ЈТ кычырыгар.) Бистиҥ кажыбыс ла Кудайдыҥ кӧрӱм-санаазыла јӱрзе, ончобыстыҥ санаагыс јаҥыс болор. Је Кудайдыҥ кӧрӱм-санаазын бис Агару Бичиктеҥ билип аларыс. Кандый учуралдарда санаагыс јаҥыс деп кӧргӱзерис? Темдектезе, Иисус ӱренчиктерин Кудайдыҥ Башкарузын баштапкы јерге тургуссын деп кӱӱнзеткен (Матф. 6:33). Оныҥ учун слердиҥ јуунаарда кем-кем ӧйин толо берип иштеер деп шӱӱп алган болзын. Је слер ого «бойыҥды киле» деп айдардыҥ ордына, карын оны мактап, ого болужып туругар.

ЈОБОШ БОЛУГАР

9, 10. Иисус јобош болорын канайып кӧргӱскен?

⁹ Иисус божоор алдында бир кӱн озо, эҥирде, Пётр ла апостолдорго јобош болоры нени темдектеп турганын кӧргӱзип берген. Бу учурал олор Иисусла калганчы катап кожо ажанган тушта болгон. Ол кӱн, тӱште, Иисус Пётрды ла Иоаннды эҥирге ӱзе белетеп салзын деп сураган. Олор барып, ӱзе немени, ол тоодо тасты ла арчынатан бӧсти белетеп салган болор. Не дезе келген айылчылардыҥ буттарын јунар керек болгон. Је мындый јабыс ишти кем эдер?

¹⁰ Оноҥ ары болгон немеге апостолдор сӱреен тыҥ кайкаган болгон. Иисус тыш кийимин уштып, бӧслӧ курчанып, таска сууны урала, ӱренчиктериниҥ буттарын јунуп баштаган (Иоанн 13:4, 5). Анайып ол јобош болоры нени темдектеп турганын јарт кӧргӱзип берген, не дезе, бу ишти јалчылар эдип туратан болгон. Је Иисус ончо ӱренчиктериниҥ буттарын, ол тоодо оны садатан Иуда Искариоттыҥ буттарын јунуп салган. Мыны эдерге кӧп ӧй керек те болгон болзо, Иисус јобош болуп, бу ишти учына јетире эдип салды. Оноҥ Иисус ӱренчиктерине мынайып айткан: «Слерге нени эткенимди билип туругар ба? Мени слер Ӱредӱчи ле Кайракан дейдигер, айтканыгар чын: Мен ол болорым. Анайдарда, Мен, Кайракан ла Ӱредӱчи Бойым, будыгарды јунарымда, слер де бой-бойыгардыҥ будыгарды јунужар учурлу» (Иоанн 13:12—14).

11. Пётр јобош болорына ӱренип алган деп недеҥ кӧрӱнет? (1 Пётр 5:5). (Јурукты база кӧрӱгер.)

¹¹ Пётр Иисустаҥ јобош болорына ӱренип алган. Бир катап Пётр, Иисус теҥериге јӱре берген кийнинде, энезинеҥ аксак болуп чыккан эр кижини јазып ийген (Ап. ижи 1:8, 9; 3:2, 6—8). Бу кайкалды кӧрӧргӧ, ал-камык улус јӱгӱрижип келген (Ап. ижи 3:11). Эмди Пётр бойын канайып тудунар? Оныҥ чыккан-ӧскӧн јеринде улустыҥ алдында тоомјыда јӱрерине ле јарлу болорына јаан ајару эдилетен. Андый болордо, Пётрга улустыҥ ајару эткени јарай берер бе? Јок, Пётр карын ајаруны бойына этпей, бу кайкал учун Иегова Кудайды ла Иисусты мактаар керек деп оҥдогон. Оныҥ учун ол айткан: «Оныҥ [Иисустыҥ] адына бӱткенис учун слердиҥ кӧрӱп турган ла билер бу кижигер Оныҥ адыла бек-чыдым болуп калды» (Ап. ижи 3:12—16). Кийнинде Пётр самаразында христиандарды јобош болорыла курчанып алзын деп кӱӱнзеткен. Бу биске Иисустыҥ бӧслӧ курчанып, апостолдордыҥ буттарын канайып јунганын эске алындырат. (1 Пётр 5:5, ЈТ кычырыгар.)

12. Јобош болорына канайып ӱренип аларга јараар?

¹² Бис Пётр чылап јобош болорына база ӱренер аргалу. Чыннаҥ ла јобош болоры дегени јӱк ле јакшы, чын сӧстӧр айдарын темдектебей јат. Пётрдыҥ тузаланган «јобош болоры» деген сӧс кижиниҥ санааларыла колбулу. Бис чыннаҥ ла јобош по деп, бойыс керегинде ле улус керегинде нени сананып турганыстаҥ кӧрӱп ийерис. Бис нени-нени этсеес, улустыҥ алдына јакшы кӧрӱнерге болуп эмес, је Иегованы ла улусты сӱӱп турганыстаҥ улам эдедис. Бис јобош болзоос, Иеговага иштегенис ле ака-эјелерге болушканыс биске сӱӱнчи экелер. Оноҥ, улус бистиҥ јакшы керектеристи кӧрӱп турган ба, јок по деп сананбазыс (Матф. 6:1—4).

ОЙГОР БОЛУГАР

13. Ойгор болоры нени темдектейт?

¹³ Христиан кижини качан ойгор деп айдарга јараар? (1 Пётр 4:7). Ойгор кижи јӧп чыгарып тура, Кудайдыҥ кӧрӱм-санаазын ајаруга алып јат. Оныҥ Иеговала колбулары јӱрӱминде эҥ баштапкы јерде турат. Андый кижи бойы керегинде ӧйинеҥ ӧткӱре кӧп сананбай јат. Кезик сурактардыҥ карууларын ол билбес деп оҥдоп јат. Анайда ок ол јаантайын мӱргӱп јат. Мынайып ол Кудайдаҥ јӧп сурап, ого иженип турганын кӧргӱзетb.

14. Нениҥ учун Пётр јастырган?

¹⁴ Божоор алдында бир кӱн озо тӱнде Иисус апостолдорына айткан: «Бу тӱнде слер мени артыргызып салараар». Је Пётр айтты: «Сени бастыразы да артыргызып салза, мен сени качан да артыргыспазым!» Эмеш оноҥ Иисус тоолу ӱренчигине јӧп берди: «Ченелтеге кирбеске, ойгу болугар, јаантайын мӱргӱгер» (Матф. 26:31, 33, 41, ЈТ). Је Пётр дезе бу јӧпти ајаруга албаган. Оныҥ да учун ол Иисустыҥ ӱренчиги деп айдарга коркый берген болор. Ол Ӱредӱчизин билбес деп айдала, мынаҥ улам тыҥ ыйлаган (Матф. 26:69—75).

15. Божоор алдында тӱнде Иисустыҥ ойгор болгоны недеҥ кӧрӱнген?

¹⁵ Иисус толо кеминде де болгон болзо, бойына эмес, је Иеговага акту јӱрегинеҥ иженген. Оныҥ учун божоор алдында тӱнде кӧп мӱргӱген. Бу ого Иегованыҥ кӱӱн-табын бӱдӱрерге коркыбаска болушкан (Матф. 26:39, 42, 44; Иоанн 18:4, 5). Иисустыҥ мынайып мӱргӱӱлди баалап турганын кӧрӱп, Пётр бастыра јӱрӱмине бойына јакшы ӱредӱ алган.

16. Пётр ойгор болорына ӱренип алган деп недеҥ кӧрӱнет? (1 Пётр 4:7).

¹⁶ Бир эмеш ӧйдӧҥ Пётр нени-нени эдер алдында Иеговага мӱргӱп, оноҥ јӧп сурап турар керек деп оҥдоп алган. Тирилген кийнинде Иисус Пётрга ла апостолдорго јарлаарга болужатан агару тын берилер деп айдып салган. Је ӧй келгенче, олорго Иерусалимде артар керек болгон (Лука 24:49; Ап. ижи 1:4, 5). Бу ӧйди Пётр канайып тузаланды? Ол ака-эјелерле кожо «улам сайын јуулыжып, бирлик кӱӱн-санаалу мӱргӱгендер» (Ап. ижи 1:13, 14, ЈК 2003). Кийнинде Пётр баштапкы самаразында ака-эјелерди ойгор болуп, јаантайын Кудайга мӱргӱп турзын деп кӱӱнзеткен. (1 Пётр 4:7 кычырыгар.) Айдарда, Пётр Иеговага иженерге ӱренип алган, оныҥ учун јуунныҥ улузы да ого иженер аргалу болгон (Гал. 2:9).

17. Биске јаантайын нени эдер керек? (Јурукты база кӧрӱгер.)

¹⁷ Бистиҥ ойгор болгоныс јаантайын мӱргӱп турганыстаҥ кӧрӱнер. Оок-теек те сурактарда бис бойыска эмес, карын Иеговага иженип, оноҥ јӧп сурап јадыс. Је јаан учурлу јӧп чыгарар тушта биске анчада ла Иегованаҥ болуш сураар керек. Не дезе кандый јӧп чыгарза чын болор деп, Иегова бистеҥ јакшы билер.

18. Иегованыҥ кӧрӱм-санаазын оноҥ јакшы оҥдоорго не болужар?

¹⁸ Бис Иеговага бисти бойына тӱҥей эдип јайаганы учун јаан быйанду (Баш. 1:26). Је бис оныҥ кылык-јаҥын толо кеминде кӧргӱзип болбозыс (Иса. 55:9). Андый да болзо, бис Пётрдаҥ тем алып, Иегова канайып сананып турганын оноҥ јакшы оҥдоорго ӱренип алар аргалу. Оныҥ учун бойыстыҥ кӧрӱм-санаабысты Иегованыҥ кӧрӱм-санаазына келиштирип, јобош ло ойгор болорго албаданактар.