«Кемге иштеерин... талдап алыгар»

1. Бистерге чыннаҥ ла ырысту болорго нени эдер керек, нениҥ учун? (Исайя 48:17, 18).

ИЕГОВА бистерди сӱӱп јат. Ол бистерди бӱгӱнги кӱнде ле келер ӧйдӧ ырысту болзын деп кӱӱнзейт (Эккл. 3:12, 13). Анайда ок ол бисти башка-башка јайалталарлу эдип јайаган. Је бистер улусла да башкарып болбозыс, јаманныҥ ла јакшыныҥ нормаларын да тургузып болбозыс (Эккл. 8:9; Иер. 10:23). Оны јӱк Иегова билер. Оныҥ учун чыннаҥ ырысту болорго, ого сӧсуккур болор керек ле јӱк ого иштеер керек. (Исайя 48:17, 18 кычырыгар.)

2. Сатана бисти неде бӱдӱмјилеп саларга албаданат? Је Иегова оныҥ тӧгӱнин кӧргӱзерге нени эткен?

² Сатана бисти Иегова јогынаҥ ла ырысту болор деп ле кижиге Кудайдыҥ башкарузы керек јок деп бӱдӱмјилеерге албаданат (Баш. 3:4, 5). Бу тӧгӱнди кӧргӱзерге, Иегова улуска канай ла башкаратан арга берген. Бӱгӱнги кӱнде кижиниҥ башкарузы кандый да јакшы немеге экелбеди деп кӧрӱп јадыс. Је Агару Бичикте Иеговага иштегенинеҥ чыннаҥ ла ырысту болгон кӧп эр ле ӱй улустыҥ темдери бар. Олордыҥ эҥ ле ырысту болгоны — Иисус Христос. Ол нениҥ учун Иеговага иштеген? Нениҥ учун јӱк ле Иеговага бажырар керек? Анайда ок бис Иеговага нениҥ учун иштеерге шӱӱп алганыс деп кӧрӱп ийектер.

ИИСУС НЕНИҤ УЧУН ИЕГОВАГА ИШТЕЕРГЕ ШӰӰП АЛГАН

3. Сатана Иисусты неде ченеген? Је Иисус нени талдаган?

³ Иисуска јерде јӱрерде кемге иштеерин база талдаар керек болгон. Ол сууга чӧҥӱрилерде, Сатана оны ченеген. Иисус ого бир ле катап бажырып ийген болзо, ол ого бӱдӱн јерле башкаратан јаҥ берер эди. Је Иисус Сатанага: «Кеде тур, Сатана! Бичилген јок беди: „Иегова Кудайыгарга бажырыгар, јӱк ого иштегер“» — деп айткан (Матф. 4:8—10). Иисус нениҥ учун Иеговага бажырарын талдаган? Мыныҥ кезик шылтактарын кӧрӱп ийектер.

4, 5. Иисус нениҥ учун Иеговага иштеерин талдап алган?

⁴ Иисустыҥ Иеговага иштеп баштаганыныҥ тӧс шылтагы — ол Адазын тыҥ сӱӱген болгон (Иоанн 14:31). Анайда ок ол Иеговага бажырары — сок јаҥыс чын јол деп билген (Иоанн 8:28, 29; Ачыл. 4:11). Нениҥ учун дезе Иегова јӱрӱм јайаган, кысканбас ла тӧгӱндебес Кудай (Сар. 33:4; 36:9; Иак. 1:17). Ол Иисустаҥ нени де јажырбаган, анайда ок ого кӧп сыйлар берген (Иоанн 1:14). Је Сатана ӱзе немени тескери эдет. Оныҥ коркышту ла эдип бергени — ӧлӱм ле кинчек болот. Ол јаҥыс бойын сананып турганынаҥ ла ач болгонынаҥ улам тӧгӱндеп јат (Иоанн 8:44). Оныҥ учун Иисус Сатанага тӱҥей болуп, Иеговага удура болотон санааны ден бир де кичинек јууктатпаган (Флп. 2:5—8).

⁵ База кандый шылтактаҥ улам Иисус Иеговага иштеерин талдап алган? Ол Кудайга чындык артса, кандый туза болоры керегинде сананган (Евр. 12:2). Ол турумкай болуп артса, Адазыныҥ ады агарулалар ла кинчек ле ӧлӱм јоголтылып калар деп билетен болгон.

НЕНИҤ УЧУН ЈӰК ЛЕ ИЕГОВАГА БАЖЫРАР КЕРЕК

6, 7. Бӱгӱнги кӱнде кӧп улус нениҥ учун Иеговага иштебей турган? Је нениҥ учун бастыра улус јӱк ле ого бажырар учурлу?

⁶ Бӱгӱн кӧп улус Кудайдыҥ кандый болгонын, олорго нени эткенин билбезинеҥ улам Иеговага иштебей јат. Олор дезе апостол Павелдиҥ Афиныдагы јарлаган улуска тӱҥей (Ап. ижи 17:19, 20, 30, 34).

⁷ Павел олорго чындык Кудай «ончозына јӱрӱмди, тынышты ла бастыра немени берет» деп јартаган. Анайда ок: «Бис оноҥ улам кыймыктанып, јӱрӱм јӱрӱп јадыс ине, слердиҥ ӱлгерчилердиҥ кезиги айткан чылап: Бис ончобыс — оныҥ бала-барказы» — деп айткан (Ап. ижи 17:25, 26, 28). Оныҥ учун бастыра улус јӱк ле ого бажырар учурлу.

8. Иегова нени качан да этпес? Бисти тыҥ сӱӱп турганын ол канайып кӧргӱзет?

⁸ Иегова Јайаачы ла Јер-телекейдиҥ Башчызы болгонынаҥ улам улусты ого бажырзын деп некеер аргалу. Је ол оны качан да этпей јат ла этпес. Оныҥ ордына ол бойыныҥ бар болгонын ла бисти тыҥ сӱӱп турганын башка-башка эп-аргаларла кӧргӱзип јат. Ол канча ла кире кӧп улусты јажын-чакка оныҥ најылары болуп калзын деп кӱӱнзейт (1 Тим. 2:3, 4). Оныҥ учун ол бисти ӱредип, улуска Кудайдыҥ кайкамчылу амадузын куучындазын деп кӱӱнзедет (Матф. 10:11—13; 28:19, 20). Анайда ок ол бойыныҥ улузын христиан јуунга јууп, олорго јалакай аксагалдар сыйлаган (Ап. ижи 20:28).

9. Иегова бастыра улусты сӱӱп турган деп недеҥ кӧрӱнет?

⁹ Иегова ого бӱдер кӱӱни јок то улусты сӱӱп јат. Сананып ийектер: улустыҥ тӱӱкизин кӧрзӧ, канча миллиард улус Иегованыҥ сӧзин угар кӱӱндери јок болгон. Олор не јакшызын, не јаманын бойлоры кӧрӧтӧн. Андый да болзо, Иегова олорго сӱӱнчилӱ јӱрӱм јӱрзин деп, керектӱ немени ӱзе берип туратан (Матф. 5:44, 45; Ап. ижи 14:16, 17). Мынаҥ улам олор нак јаткан, олордыҥ билелери бек болгон, анайда ок эткен ижинеҥ сӱӱнчи алган (Сар. 127:3; Эккл. 2:24). Айдарда, бу улустыҥ јадын-јӱрӱминеҥ теҥеридеги Адабыс бастыра улусты сӱӱп турган деп кӧрӱнбейт пе? (Чыг. 34:6). Је эмди бис нениҥ учун Иеговага иштеерге шӱӱп алганысты ла ол биске бу учун кандый алкыштар берип турганын эске алып ийектер.

БИС НЕНИҤ УЧУН ИЕГОВАГА ИШТЕЕРГЕ ШӰӰП АЛГАНЫС

10. а) Иеговага иштеп турганыстыҥ эҥ јаан шылтагын айдып беригер (Матфей 22:37). б) Иегова слерге канайып чыдамкай болгонын айдып беригер (Сарын 103:13, 14).

¹⁰ Бис Иисус ла чылап Иегованы сӱӱп турганыстаҥ улам ого иштейдис. Бу эҥ јаан шылтак болот. (Матфей 22:37 кычырыгар.) Бис Кудайдыҥ кылык-јаҥын канча ла кире кӧп билип турзаас, ончо ло кире тыҥ кайкайдыс. Темдектезе, Иегованыҥ чыдамкай болгоны сӱреен кайкамчылу. Оныҥ бу кылык-јаҥы сӧсукпас Израиль албатыга баштанганынаҥ кӧрӱнет. Ол: «Сурап јадым слерди, јаман јолдороорды артыргызыгар» — деп айдып туратан (Иер. 18:11). Анайда ок Иегова бистиҥ тобрак болгонысты ла толо кемдӱ эмезисти ундыбай јат. (Сарын 103:13, 14 кычырыгар.) Слер Иегованыҥ чыдамкайы керегинде ле оныҥ кайкамчылу кылык-јаҥдары керегинде сананып турзаар, ого јажын-чакка иштеер кӱӱнеер келбейт пе?

11. Теҥериде Адабыска иштейтен база кандый шылтактар бар?

¹¹ Бис база нениҥ учун Иеговага иштеп турганыс? Нениҥ учун дезе анайып эткени чын (Матф. 4:10). Иеговага иштегенинде јакшы немези кӧп деп билерис. Иеговага чындык артсаас, оныҥ адын агарулайдыс, Сатананы тӧгӱнчи деп кӧргӱзип јадыс, Адабысты сӱӱндирип јадыс. Анайда ок Иеговага иштейтенин талдап алзаас, ӱргӱлји јӱрӱм талдап алган болодыс! (Иоанн 17:3).

12, 13. Джейн ле Пэмниҥ јӱрӱминеҥ бис неге ӱренедис?

¹² Керек дезе балдар да Иегованы тыҥ сӱӱп, оныла бек колбуларлу болор аргалу. Джейн ле Пэмa деген кожо чыккан сыйындардыҥ учуралын кӧрӱп ийектер. Олор Агару Бичикти ӱренип баштаарда, 11 ле 10 јашту болгон. Ол кыстардыҥ ада-энези олорго Керечилерле куучындажарга јараткан, је воскресен кӱндер сайын бастыра билезиле серкпеге барар учурлу болгон. Джейн куучындайт: «Керечилерле кожо Агару Бичикти шиҥдеп ӱренгеним мени тыҥ корулаган. Школдо кӧп саба балдар наркотик ле секстеҥ туура калбайтандар. Мен олорго бир де бирикпейтем».

¹³ Бир канча јылдаҥ ол кыстар сууга чӧҥӱрилген. Кийнинде олор пионердиҥ ижин баштаган, ол ло ӧйдӧ ада-энезин кичеегендер. Джейн јӱрӱмин эске алынып, мынайда айдат: «Иегова бойыныҥ чындык најыларын качан да артыргыспас деп бӱдӱмјиленип алгам. 2 Тимофейге 2:19-та „Иегова бойыныҥ улузын билер“ деп айдылган». Чын, бистиҥ Кудайыс оны сӱӱп, ого иштеп турган улусты бир де артыргыспас.

14. Бис Иегованыҥ адын јабарлаштаҥ бойыстыҥ сӧстӧрисле, эткен керектерисле канайып корулаарыс? (Јуруктарды база кӧрӱгер.)

¹⁴ Бис Иегованыҥ адын јабарлаштаҥ корулаарга кӱӱнзейдис. Темдектезе мындый учурал болгон болзын: слерде јалакай, кысканбас, килеҥкей најыгар бар. Је бир катап слердиҥ најыгарды та кем де актуга ла бурулап, јамандап турганын угуп ийедеер. Слер канайдараар? Слер бойоордыҥ најыгарды корулараар. Анайып ла Сатана ла оныҥ сӧзине киргендер Иегованыҥ тоомјылу адын јамандаарга, јӱзӱн-базын тӧгӱн таркадып турат. Је бис Кудайыстыҥ адын корулап, ол керегинде чынды улуска куучындайдыс (Сар. 34:1; Иса. 43:10). Анайып бис сӧстӧрисле, эткен керектерисле Иегова Кудайыска акту јӱрегистеҥ иштеерге турганысты кӧргӱзедис.

15. Апостол Павел бойыныҥ јӱрӱмин солып, кандый алкыштар алган? (Филиппыдагыларга 3:7, 8).

¹⁵ Бис Иегованы сӱӱндирерге ле ого кӧптӧдӧ иштеерге, бойыстыҥ јӱрӱмисти солыырга белен. Темдектезе, апостол Павел иудаизмге јаан једимдер экелгедий кижи болгон до болзо, Христостыҥ ӱренчиги болорго ло Иеговага иштеерге буудак болотон бастыра немени артыргызып салган (Гал. 1:14). Мынаҥ улам ол Кудайга чындык болуп јӱргенинеҥ, Христосло кожо теҥериде башкаратан арга алган. Ол мындый јӱрӱмди талдап алганына качан да санааркабаган. Бис те Иегованыҥ ишчилери болгоныска качан да санааркабазыс. (Филиппыдагыларга 3:7, 8 кычырыгар.)

16. Джулияныҥ учуралы бисти неге ӱредет? (Јуруктарды база кӧрӱгер.)

¹⁶ Иеговага иштейтенин баштапкы јерге тургусаас, бистерде бӱгӱн де, келер де ӧйдӧ кӧп алкыштар болор. Джу́лия эјениҥ учуралын кӧрӱп ийектер. Ол кичинек тужында серкпениҥ хорында кожоҥдогон. Бу кызычактыҥ јайалтазына бир профессионал кижи ајару эдерде, оны о́перада кожоҥдозын деп ӱреткендер. Удабай ла Джулия јарлу боло берген. Анайып ол, концерт кӧргӱзетен јаан залдарда кожоҥдоп баштаган. Качан ол ады јарлу музыкальный школдо ӱренип турарда, кожо ӱренип турган бир уул ого Кудайдыҥ ады — Иегова деп айдып берген. Удабай ла Джулия Агару Бичикти неделеде эки катап ӱренип баштаган. Оноҥ ол јӱрӱмин кожоҥчыныҥ карьеразына эмес, Иеговага учурлаарга шӱӱп алган. Мындый јӧп чыгарарга ого јеҥил эмес болгон. Кӧп улус меге: «Сен јайалтаҥды јерге кӧмӱп јадыҥ — деп айдыжып туратан. Је мен бастыра кӱчимди Иеговага берерге кӱӱнзегем». Джулия эје 30 јыл кайра чыгарган јӧби керегинде бӱгӱн нени сананат? Ол айдат: «Мениҥ јӱрегимде амыр. Келер ӧйдӧ Иегова мениҥ кандый ла кӱӱнимди бӱдӱрип салар деп алаҥзыбайдым» (Сар. 145:16).

ИЕГОВАГА ОНОҤ ЛО АРЫ ИШТЕГЕР

17. Ӧй ас артканы Кудайга иштеп турган улусты неде бӱдӱмјилейт? Је эм тура Иеговага иштебей турган улусты неге кӱӱнзедет?

¹⁷ Бис бӱгӱн бу телекейдиҥ чек ле учында јададыс. Апостол Павел мынайда айткан: «„База ла эмеш“, „келип јатканы једип келер, ол оройтыбас“» (Евр. 10:37). Бу сӧстӧрди канайып оҥдоор? Бу сӧстӧр Иеговага эм тура иштебей турган улуска Кудайдыҥ јанын талдап алатан ӧй ас деп кӧргӱзет (1 Кор. 7:29). Је Иеговага иштеп турган улусты олордыҥ кыйын-шыразы «база ла эмештеҥ» токтоп калар деп бӱдӱмјилейт.

18. Иисус ла Иегова бистеҥ нени сакыйт?

¹⁸ Иисус улусты оныҥ ӱренчиги болуп алала, оныҥ кийнинеҥ барзын деп кӱӱнзеткен (Матф. 16:24). Байла, слердиҥ Иеговага иштегенеер канча јыл боло берген болор. Андый болзо, слерди мактап јадыбыс! Оноҥ ло ары тартыжыгар! Иегова слерди бу јолдоҥ чыкпазын деп кӱӱнзейт. Бу јол чек ле јеҥил эмес те болзо, је анда слерди кӧп сӱӱнчи ле алкыштар сакыйт (Сар. 35:27).

19. Джин деп карындаштыҥ теми бисти неге ӱредет?

¹⁹ Кезик улустыҥ санаазыла болзо, Иеговага иштезеҥ, сен бир де сӱӱнчи јок, кунукчылду, ӱзе ле неме јарабас јӱрӱм јӱрериҥ. Сен јиит болзоҥ, сеге чын ла анайып билдирип турган болор. Темдектезе, Джин деп карындаштыҥ учуралын кӧрӱп ийектер. Ол куучындайт: «Мениҥ најыларым канай ла амырагылап турган, кыстар уулдарла, уулдар кыстарла тушташкылап јат, адыжатан видеоойындар ойногылап јат, а менийи — јӱк ле јуундаш ла јарлаш. Ӧскӧ нени де кӧрбӧй дӧ тургам, укпай да тургам деп билдирген». Джинниҥ мындый кӧрӱми неге экелген? Ол айдат: «Мен экијӱстенип баштагам. Озо баштап меге мындый јӱрӱм јарап турган болгон, је оноҥ јарабай барган. Ол ӧйдӧ ырысту да болгом деп айдып болбозым. Је оноҥ Агару Бичиктеги чындыктарды чек ӧскӧ јанынаҥ кӧрӱп ийеле, Иегова мени јакшы немеге ӱреткен эмтир деп оҥдоп ийгем. Меге јӱк ого сӧсуккур болор керек болгон. Оныҥ учун Иегова Кудайыма акту јӱрегимнеҥ иштеерим деп шӱӱп алгам. Оноҥ ло бери Иегова кажы ла мӱргӱӱлимге каруу берип јат».

20. Слер нени шӱӱп алдыгар?

²⁰ Давид Иеговага мынайда кожоҥдогон: «Сениҥ тураҥда јатсын деп, бойыҥа кемди талдап, јууктадып аларыҥ, ол кижи ырысту» (Сар. 65:4). Оныҥ учун бис те Иегова Кудайыска оноҥ ло ары иштеерге албаданактар. Иисус Навинниҥ: «Је мен ле мениҥ айылым — Иеговага иштеерис» — деп айтканы бистиҥ де јӱрегисте болзын (Иис. Н. 24:15).