Иегова биске кӱчтерди турумкай ӧдӧргӧ болужат

1. Нениҥ учун биске турумкай болоры керек болот? Бис кемниҥ болужына иженер аргалу? (1 Пётр 5:10).

ЭМДИГИ коркышту кӱч ӧйдӧ Иегованыҥ ишчилерине анчада ла турумкай болор керек. Бистиҥ кезигис јазылбас оорунаҥ улам шыралап турган. Кезигис јуук улузын јылыйтып, тыҥ кунугып јат. Та кемигис те билезиниҥ ле јаҥдардыҥ удурлажуларына табартат (Матф. 10:18, 36, 37). А сенде кандый кӱчтер болуп турган? Иегова сеге кандый ла кӱчтерди турумкай ӧдӧргӧ болужар деп алаҥзыба. (1 Пётр 5:10 кычырыгар.)

2. Недеҥ улам бис турумкай артар аргалу?

² Турумкай болоры — Иеговага чындык артып, истежӱлерге, ченелтелерге, анайда ок ӧскӧ дӧ кӱчтерге кӧрбӧй, сӱӱнчисти јылыйтпай, Кудайга иштеерин темдектейт. Турумкай кижи ӱзе јакшы болор деп, ижемјизин јылыйтпай јат. Бистиҥ кажыбыс ла Иегованыҥ болужы јогынаҥ ченелтелерди ӧдӱп болбос, не дезе, јӱк ле ол «артыкташкан кӱчти» берет (2 Кор. 4:7). Бу јӧрмӧлдӧҥ Иегова биске канайып турумкай артарга болужып турган деп, тӧрт эп-арга шӱӱжип ийерис. Анайда ок оныҥ болужын аларга, бис нени эдер аргалу деп кӧрӧрис.

МӰРГӰӰЛ

3. Нениҥ учун мӱргӱӱлди кайкамчылу сый деп айдарга јараар?

³ Иегова бисти турумкай артсын деп болужарга, кайкамчылу сый сыйлаган — ол мӱргӱӱл. Бис кинчектӱ де болзоос, ол биске оныла куучындажатан арга берет (Евр. 4:16). Сананып ийзеер де, бис Иеговала кожо кандый ла ӧйдӧ, кандый ла тилге, нени ле куучындажар аргалу болодыс. Бис кайда да болзоос, тӱрмеде бе эмезе чек јаҥыскан ба, ол бисти угуп јат (Иона 2:1, 2; Ап. ижи 16:25, 26). Качан бис санааркап, айдар сӧс таппай турзаас, нени айдарга турганысты Иегова тӱҥей ле оҥдоп јат (Рим. 8:26, 27). Эйе, мӱргӱӱл — ол кайкамчылу сый!

4. Турумкай болорго болушсын деп сураганыска, Иегова каруузын берер деп нениҥ учун бӱдедис?

⁴ Агару Бичикте мынайып айдылат: «Кудайдаҥ оныҥ табы аайынча нени де суразабыс, ол бисти угуп јат» (1 Иоанн 5:14). А бис Иегованаҥ кӱчтерде турумкай болуп ӧдӧргӧ болушсын деп сураар аргалу ба? Эйе. Бу оныҥ кӱӱн-табы аайынча болот. Нениҥ учун мынайып айдарга јараар? Бис Иеговага чындык артсаас, ол Сатананыҥ јамандаганына каруу берер аргалу болор (Укаа 27:11). Керек дезе Агару Бичикте айдылганыла, «Иегова бастыра јӱрегиле ого чындык улуска болужарга» турган (2 Лет. 16:9). Кудайда биске турумкай артарга болужатан ийде-кӱчи де, кӱӱни де бар деп бӱдедис (Иса. 30:18; 41:10; Лука 11:13).

5. Мӱргӱӱл биске канайып токунал берет? (Исайя 26:3).

⁵ Бис неге санааркап турганысты Иеговага айдып турзаас, «кижиниҥ сагыжынаҥ бийик Кудайдыҥ амыры» јӱрегисти ле санаабысты корулап јат (Флп. 4:7). Бу не дегени? Иеговага иштебей турган улус база кӱчтерге табартып јат. Олор токунаарга кандый ла эп-аргалар бедирейт. Темдектезе, олордыҥ кезиги амыр јок санаалардаҥ айрыларга медитация эдет. Је бу јеткерлӱ болот, не дезе, кижи мындый айалгада кӧрмӧстӧрдиҥ тӧгӱнине јеҥил кире берердеҥ айабас. (Матфей 12:43—45 тӱҥдештиригер.) Анайда ок кандый да медитациялар кижиге чыннаҥ амыр берип болбос. Оны јӱк ле Иегова берер аргалу. Је бис мӱргӱп турзаас, Иегова бистиҥ ого бӱткӱлинче иженип турганысты кӧрӱп, биске «тӱгенбейтен амыр-энчӱ» берет. (Исайя 26:3 кычырыгар.) Ол оны канайып берет? Темдектезе, ол биске токунал беретен Агару Бичиктиҥ ӱлгерлерин эске аларга болужат. Мынаҥ улам Иегова бисти тыҥ сӱӱп ле кичееп турган деп сезедис. Анайып јӱрегис ле санаабыс амыр боло берет (Сар. 62:1, 2).

6. Не керегинде мӱргӱӱрге јараар? (Јурукты база кӧрӱгер.)

⁶ Сен нени эдер аргалу. Кӱчтерге табартып, «јӱгиҥди Иеговага артып береле», јӱрегиҥе амыр берзин деп мӱргӱп тур (Сар. 55:22). Анайда ок кӱчтердиҥ аайына чыгарга, Иегованаҥ ойгор сура (Укаа 2:10, 11). Оноҥ Иеговага быйаныҥды айдарга ундыба (Флп. 4:6). Ченелтелердиҥ ӧйинде ол сеге канайып болужып турганын ајарып, болушканы учун быйаныҥды база айдып тур. Кӱчтердеҥ улам эмди бар алкыштарыҥды ундып салдыҥ (Сар. 16:5, 6).

КУДАЙДЫҤ СӦЗИ

7. Агару Бичикти ӱренгенис биске турумкай болорго канайып болужар?

⁷ Иегова биске турумкай болорго болужарга, бойыныҥ Сӧзин берген. Агару Бичикте Кудай биске болужар деп кӧргӱзип турган кӧп ӱлгерлер бар. Темдектезе, Матфей 6:8-те: «Адагар слерге не керектӱзин сурагалагардаҥ озо билер» деп айдылган. Бу сӧстӧрди Иисус айткан, а ол Иегованы сӱреен јакшы билер. Оныҥ учун бис кандый да кӱчтерге табартсаас, Иегова биске не керектӱ болгонын кӧрӱп, кыйалта јогынаҥ болужар деп бӱдерге јараар. Агару Бичикте турумкай артарга болужатан оноҥ дӧ ӧскӧ ӱлгерлер бар (Сар. 94:19).

8. а) Агару Бичиктеги принциптер кӱчтерди ӧдӧргӧ канайып болужып турган? Тем айдып беригер. б) Керектӱ принциптерди керектӱ ӧйдӧ эске алып ийерге, не болужар?

⁸ Агару Бичикте кӱчтерди турумкай ӧдӧргӧ болужатан принциптер бар. Олордыҥ болужыла бис ойгор јӧптӧр чыгарар аргалу (Укаа 2:6, 7). Темдектезе, Агару Бичик бисти келер ӧйдӧ не болорына санааркабай, оныҥ ордына кажы ла кӱн Иеговага иженерге кӱӱнзедет (Матф. 6:34). Бис Агару Бичикти кажы ла кӱн кычырып, шӱӱп сананып турган болзоос, биске керектӱ принциптерди керектӱ ӧйдӧ эске аларга јеҥил болор.

9. Иегова бойыныҥ ишчилерине болужып турган деп библиялык учуралдар, бистиҥ бӱдӱмјибисти канайып тыҥыдат?

⁹ Анайда ок Агару Бичикте бис ле чилеп Иеговага иженип, оныҥ болужын алган улустыҥ учуралдары бичилген (Евр. 11:32—34; Иак. 5:17). Бис бу учуралдарды шӱӱп сананып турзаас, Иегова — «бистиҥ коруланатан јерис ле ийде-кӱчибис. Тӱбектиҥ ӧйинде алып турган болужыс» деп бӱдӱмјибис тыҥыыр (Сар. 46:1). Јебрен ӧйдӧ Иегованыҥ ишчилери ого канайып чындык артканы керегинде кычырып, олордыҥ бӱдӱмјизинеҥ ле турумкай болгонынаҥ тем аларга кӱӱнзейдис (Иак. 5:10, 11).

10. Кудайдыҥ Сӧзи слерге канайып болужар аргалу?

¹⁰ Сен нени эдер аргалу. Кудайдыҥ Сӧзин кажы ла кӱн кычырып тур. Кӱӱн-санааҥды кӧдӱрип турган бибилялык ӱлгерлерди бичип ал. Кӧп ака-эјелерге эртен тура «Бӱгӱнги ӱлгер» деп брошюраны кычырарга јарап јат. Эртен тура мынайып кычырып алганы кере тӱжине Агару Бичиктиҥ тузалу шӱӱлтелерин шӱӱп сананарга болужат. Мари́a деп эје бу чын деп бӱдӱмјиленип алган. Оныҥ ада-энези экилези ракла ооруган. Ада-энезиниҥ калганчы кӱндеринде олорды кичеерге Мари эјеге не болушкан? Ол айдат: «Кажы ла эртен тура мен „Агару Бичиктиҥ бӱгӱнги ӱлгери“ деп брошюраныҥ ӱлгерин кычырып тереҥ шӱӱп сананатам. Бу меге бойым керегинде ле бойымныҥ кӱч айалгамды кӧп сананбай, Иегова ла оныҥ сӱреен јакшы алкыштары керегинде сананарга болужатан» (Сар. 61:2).

АКА-ЭЈЕЛЕР

11. Ченелтелерди турумкай ӧдӱп турган ака-эјелер керегинде сананып, слер нени сезедеер?

¹¹ Иегова биске ака-эјелерди сыйлаган. Олор биске кӱчтердиҥ ӧйинде турумкай болуп артарга болужат. Бис јаҥыскан эмезис, нениҥ учун дезе «мындый кыйын-шырага... [бистиҥ] ончо ака-карындаштар табартат» (1 Пётр 5:9). Айалга кандый да кӱч болзо, бого тӱҥей айалганы ӧскӧ дӧ ака-эјелер ӧткӧн деп ундыбагар. Олор кӱчтерди ӧдӱп, Иеговага чындык арткан болордо, бис те кӱчтерди ӧдӱп ийер аргалу! (Ап. ижи 14:22).

12. Ака-эјелер биске канайып болужат? Бис олорго канайып болужар аргалу? (2 Коринфтегилерге 1:3, 4).

¹² Кӱч ӧйлӧрдӧ ака-эјелер биске сӧстӧриле, керектериле болужат. Апостол Павел керегинде сананып ийектер. Качан Павел айылда каруулда отурарда, ака-эјелер оныҥ кӱӱнин кӧдӱрерге келип, оны токунадып, болужын јетирген. Павел бойыныҥ самараларында ака-эјелердиҥ адын адап, быйанын айдып туратан (Флп. 2:25, 29, 30; Кол. 4:10, 11). Бӱгӱнги де кӱнде андый болот. Кӱчтерге табартсаас, ака-эјелер биске болужарга, тӱрген ле једип келет. Олорго болуш керек болзо, бис болужарга меҥдеп келедис. (2 Коринфтегилерге 1:3, 4 кычырыгар.)

13. Майяга ченелтеде турумкай артарга не болушкан?

¹³ Россияда јадып турган Майя эјеге ака-эјелер канайып болушканын кӧрӱп ийектер. 2020 јылда оныҥ айылында тинтӱ болгон. Кийнинде ол улуска бойыныҥ бӱткени керегинде куучындаганы учун јаргылаткан. Майя куучындайт: «Меге јаман болуп турарда, ака-эјелер телефон согуп, бичип, сӱӱжин кӧргӱзип туратан. Мен јаан биледе, бой-бойын сӱӱп турган ака-эјелердиҥ ортозында деп, јаантайын оҥдоп туратам. Је 2020 јылдаҥ ала мыны анчада ла сезип јадым».

14. Ака-эјелердиҥ болужын сезерге не болужар? (Јурукты база кӧрӱгер.)

¹⁴ Сен нени эдер аргалу. Эмди сенде кӱч ӧйлӧр болуп турган болзо, сеге анчада ла ака-эјелерле ӧй ӧткӱрип, олорло куучындажып турар керек. Анайда ок аксагалдардаҥ болуш аларга эбијоксынба. Не дезе, олор сеге «салкыннаҥ корудый ла јуттаҥ јабынтыдый» болор аргалу (Иса. 32:2). Је сениҥ ака-эјелериҥ база уур-кӱчтерге табартып турганын ундыба. Тӱбекке табарткан улуска јакшы та нени де эдерге албадан. Мынайып болушканыҥнаҥ улам кӱӱн-санааҥ да кӧдӱрилер, кӱчтерди ӧдӧргӧ, ийде-кӱч те болор (Ап. ижи 20:35).

ИЖЕМЈИ

15. Иисуска ижемји канайып болушкан, биске ол канайып болужат? (Еврейлерге 12:2).

¹⁵ Иегова биске кӱчтерде турумкай артсын деп болужарга бек ижемји сыйлаган (Рим. 15:13). Иисуска јерде эҥ кӱч ӧйлӧринде ижемји канайып болушканын эске алып ийектер. (Еврейлерге 12:2 кычырыгар.) Ол Кудайга чындык артса, Иегованыҥ јакшы адын корулаар деп билген. Анайда ок Иисус Адазына кайра келип, Каан болуп отурала, майлаткандарла кожо јерле башкаратан ӧйди сакыган. Анайып ла келер ӧйгӧ ижемјибис биске Сатананыҥ телекейинде табартып турган кандый ла ченелтелерди ӧдӧргӧ болужар.

16. Ижемји бир эјеге канайып болушкан, оныҥ сӧстӧри слерди неге ӱредет?

¹⁶ Россияда јадып турган Алла эјеге келер ӧйгӧ ижемјизи канайып болужып турганын кӧрӱп ийектер. Оныҥ ӧбӧӧнин арестке алала, следственный изоляторго отургызып салган. Алланаҥ ого кунукпаска не болужып турган деп сураарда, ол мынайып айтты: «Кӧп сабада мӱргӱӱл ле келер ӧйгӧ ижемји керегинде шӱӱп сананганым болужат. Анайда ок кӱчтер болуп та турган болзо, јӱрӱм оноҥ ло ары улалып јат деп, ундыбаска албаданып јадым. Иегова кыйалта јогынаҥ јеҥип алар, оныла кожо бис те јеҥип аларыс».

17. Иегованыҥ берген ижемјизи учун быйанду болгонысты канайып кӧргӱзерис? (Јурукты база кӧрӱгер.)

¹⁷ Сен нени эдер аргалу. Иегованыҥ сеге белетеп салган сӱреен јакшы келер ӧйи керегинде шӱӱп сананып турарга ӧй табып тур. Јаҥы телекейде јӱрӱмиҥ кандый сӱӱнчилӱ болор деп сананып ийзеҥ де! Бу јӱрӱмге кӧрӧ, эмдиги ӧйдӧ болуп турган кандый ла кӱчтер «кыска ӧйгӧ лӧ јеҥил» деп билдирер (2 Кор. 4:17). Анайда ок неге бӱдӱп турганыҥды улуска куучындаарга кажы ла арганы тузалан. Иеговага иштебей турган улусты сананып ийзеҥ. Олор бис ле чилеп кӱчтерге табартат. Је биске кӧрӧ, олор Иегованыҥ берген сӱреен јакшы ижемјизи керегинде билбес. Оныҥ учун олорло бир эмеш те куучындашканыҥ олорды Кудайдыҥ Башкарузы керегинде кӧптӧдӧ билип аларга кӱӱнзедер болор.

18. Иегованыҥ берген сӧзине нениҥ учун бӱдерге јараар?

¹⁸ Иовтыҥ јӱрӱминде коркышту кӧп уур-кӱчтер болгон. Ол оны турумкай ӧдӱп, Иеговага айткан: «Сениҥ эдип болбозыҥ јок. Сен бастыра амадуларыҥды бӱдӱредиҥ деп, мен эмди билерим» (Иов 42:2). Иеговага амадузын бӱдӱрерге, кем де, не де буудактап болбос деп, Иов оҥдоп алган. Бу шӱӱлте кӱчтердиҥ ӧйинде бистиҥ бӱдӱмјибисти тыҥыдар аргалу. Бир тем кӧрӱп ийектер. Ӱй кижи узак ӧйдиҥ туркунына јаан оорула ооруп турган. Ол кӧп врачтарга барып, кем де болужып болбогонынаҥ улам чӧкӧп баштаган. Је кийнинде ого јакшы специалист табылды. Ол бу ӱй кижиниҥ недеҥ улам ооруп турганын оҥдоп, оны канайып эмдеерин јартап берет. Ӱй кижи јазыла бербеген де болзо, је јӱк врачтыҥ сӧстӧрин угала, ого јеҥил боло берет. Бу ижемји ого колын бош салбаска болушкан. Нениҥ учун дезе, ол тӱҥей ле јазылар деп билер. Бис те ончо кӱчтерди ӧдӱп ийер аргалу, нениҥ учун дезе бис билерис келер ӧй керегинде Кудайдыҥ берген сӧзи удабас бӱдӱп калар.

19. Кӱчтерди турумкай ӧдӧргӧ, биске не болужар?

¹⁹ Бу јӧрмӧлдӧ шӱӱшкенисле, Иегова бистерге кандый ла кӱчтерди турумкай болуп ӧдӧргӧ болужып јат. Ол биске ого мӱргӱйтен арга берген, Агару Бичикти ле ака-эјелерди сыйлаган, анайда ок келер ӧйгӧ ижемји берген. Бис Иегованыҥ болужын алынып турзаас, ол јолыста туштап турган кандый ла кӱчтерди ӧдӧргӧ болужар (Флп. 4:13). Оноҥ бис бойыстыҥ кӧзисле Сатананыҥ телекейиниҥ јоголорын кӧрӧрис.