Јуу-согушка 2 триллионноҥ ажыра доллар акча барган. База кандый баа тӧлӧлгӧн?

Јуу-согушка коркышту јаан акча-манат барган.

• «Јердиҥ ӱстинде башкарулар коруланарга, 2,2 триллион доллар акча чыгымдаган, мындый јаан чыгым качан да болбогон» («Вашингтон пост», кочкор ай 13, 2024 јыл).

Је јуу-согуштыҥ баазы јӱк акчада эмес. Темдектезе, Украинадагы јуу-согушты алза.

• Јуучылдардыҥ тоозы. Эки јылдыҥ туркунына 500 000 кире јуучыл божогон ло шыркалаткан.

• Тегин улустыҥ тоозы. ООН-ныҥ јетирӱзиле болзо, 28 000 ажыра кижи божогон ло шыркалаткан. Је ООН-ныҥ генеральный секретариниҥ болушчызы Мирослав Енчаныҥ айтканыла болзо, «бу калју јуу-согуш буру јок канча кире улуска ачу-корон экелгенин айдып та болбозыс»a.

Јуу-согуш бастыра јердиҥ ӱстинде улуска коркышту јаан кыйын-шыра экелет.

• 114 миллион кижиге јуу-согуштаҥ ла базыныштаҥ улам айыл-јуртын артырып саларга келишкен (ООН-ныҥ јетирӱзи, сыгын ай, 2023 јыл).

• 783 миллион кижи торолоп эмезе курсагы јетпей јӱрет. «Јуу-согуш тороныҥ эҥ јаан шылтагы болот, не дезе торолоп јӱрген улустыҥ 70 проценти јуу-согуш болуп турган јерлерде јадат» (ООН-ныҥ телекейлик продовольственный программазы).

Јуу-согуштар качан-бирде токтоор бо? Јердиҥ ӱстинде амыр-энчӱ качан-качан болор бо? Улус тороноҥ ло јоксыраштаҥ улам шыралап јӱрбезин деп, ар-бӱткенниҥ байлыгы аайлу-башту тузаланылатан ӧй качан-бирде келер бе? Бу керегинде Агару Бичикте не айдылат?

Коркынчылу ӧй

Агару Бичиктиҥ судурлаганыла болзо, бастыра јердиҥ ӱстинде јуу-согуштар болор. Олор сӱрлеп, атту чабып барып јаткан кижиле тӱҥдештирилип калган.

• «От-кызыл ӧҥдӱ ӧскӧ ат чыгып келген. Атка мингенге јердеҥ амырды алзын, улус бой-бойын ӧлтӱришсин деп, јӧп берилген. Ого јаан кылыш берилген» (Ачылта 6:4).

Бу аттыҥ кийнинеҥ база эки ат чыкты. Олор оору-јоболдоҥ ло ӧскӧ дӧ шылтактардаҥ улам болуп турган ӧлӱмди ле тороны темдектейт (Ачылта 6:5—8). Бу судур керегинде ле бу сӧстӧр бистиҥ ӧйдӧ бӱдӱп турган деп нениҥ учун алаҥзыбаска јараар деп, «Четыре всадника. Тайна раскрыта» деген статьяда айдылат.

Амыр-энчӱниҥ ӧйи

Удабас бастыра телекейдиҥ ресурстары јуу-согушка ӱрелбес. Је мындый неме улустыҥ колыла эдилбес.

• Агару Бичикте айдылганыла, Кудай «бастыра јердиҥ ӱстинде јуу-согушты» токтодып салар (Сарын 46:9).

• Кудай јуу-согуштыҥ кийнинеҥ болуп турган кыйын-шыраны јоголтып салар. «Кудай олордыҥ кӧзинеҥ ончо јашты арчыыр. Ӧлӱм де, ачу-корон до, сыгыт та, јобол до база болбос, нениҥ учун дезе озогызы ӧдӱп калган» (Ачылта 21:4, ЈТ).

• Ол бастыра јердиҥ ӱстинде кем де бузып болбойтон амыр-энчӱ јайаар. «Мениҥ албатым амыр јурттарда, бек тураларда, тымык јерлерде јадар» (Исайя 32:18).

Агару Бичиктиҥ судурлаганыла болзо, јуу-согуштардаҥ ла ӧскӧ дӧ јаман немелердеҥ амыр-энчӱ јӱрӱм чек јууктап келген деп кӧрӱнет.

Кудай бойыныҥ теҥеридеги башкарузыныҥ болужыла (Агару Бичикте бу башкару Каандык деп адалат) јердиҥ ӱстине амыр јайаар (Матфей 6:10). Кудайдыҥ Каандыгы ол не, бу Кандык улуска нени эдер деп билип аларга, «Кудайдыҥ Каандыгы ол не?» деп кыска видеоны кӧрӱгер.