Јаҥы телекейлик јуу-согуш болор бо? Агару Бичик нени айдат?

Калганчы 30 јылдыҥ туркунына кӧп улуска телекейдеги айалга амыр, керек дезе кезик улуска јӱрӱм јаранып барат деп билдирген. Је калганчы солундардаҥ улам, олорго бойыныҥ кӧрӱмин солыырга келишкен.

«Израиль ле „Хезболла“ Ливанныҥ границазында адыжып турганынаҥ улам, Газадагы болуп турган јуу-согуш јанындагы ороондорго таркай берер деп, улус санааркайт» (Рейтер, чаган ай 6, 2024 јыл).
«Иранныҥ башкарып турган группировкалары башка-башка јерлерге табарулар эдет. Иран кенетейин ядерный јепселдерин орныктырып баштаган. Бу ӱзе кӱн-бадыш јанындагы ороондорды коркыдат, нениҥ учун дезе Иранга Россия ла Китай јӧмӧжип јадылар» («Нью-Йорк таймс», чаган ай 7, 2024 јыл).
«Россияныҥ табарулары Украинаныҥ калаларына оноҥ ло ары јайраду, чаксыраш ла ӧлӱм экелет» (ООН-ныҥ солундары, чаган ай 11, 2024 јыл).
«Китайдыҥ мылтык-јепселдериниҥ тыҥыганы ла экономический ӧзӱми, Тайваньныҥ јайым учун тартыжып турганы ла Пекин ле Вашингтонныҥ ортозындагы колбулардыҥ уйадаганы јаан тартыжуга экелердеҥ айабас» («Джапан таймс», чаган ай 9, 2024 јыл).

Бӱгӱнги кӱнде бистиҥ кӧрӱп турган телекейдеги кӱч айалга керегинде Агару Бичикте не-не айдылат па? Мынаҥ улам јаҥы телекейлик јуу-согуш баштала бербес пе?

Бӱгӱнги айалга Агару Бичикте судурлалып калган

Агару Бичикте кайда ла кандый јуу-согуштар болор деп чике айдылбаган. Је анда калганчы кӱндерде кӧп јуу-согуштар болор ло јердиҥ ӱстинде амыр-энчӱ болбос деп айдылып калган (Ачылта 6:4).

Анайда ок Агару Бичикте «калганчы кӱндерде» бой-бойыла тартыжып турган телекейлик державалар јаҥ учун «јуулажар» деп айдылат. Олор бойлорыныҥ мылтык-јепселдерин кӧргӱзип, бу јуу-согушка айдары јок кӧп «эрјинелер», эмезе акча-манат чыгымдаар (Даниил 11:40, 42, 43).

Келип јаткан јуу-согуш

Агару Бичикле болзо, телекейдеги айалга јакшы јанындӧӧн солынардаҥ озо, там ла комойтыыр. Иисус Христос «јер бӱдердеҥ бери эмдиге јетире болбогон, соҥында да болбос андый улу тӱбек болор» деп судурлаган (Матфей 24:21, ЈТ). Бу «улу тӱбек» Армагеддонло — «кӱчтӱдеҥ кӱчтӱ Кудайдыҥ улу кӱнинде јуу-согушла» тӱгенип божоор (Ачылта 16:14, 16).

Је Армагеддон кижиликти јоголтпос, карын оны аргадап алар. Кудай улустыҥ ал-камык каанын тӧккӧн јуу-согуштар учун бурулу јердеги башкаруларды јоголтып салар. Армагеддонныҥ кийнинде јердиҥ ӱстинде јажын-чакка амыр болор. Бу керегинде кӧптӧдӧ алдындагы статьялардаҥ кычырып аларга јараар: