Суббот, сыгын ай 13
Сени Кудай баалап јат (Дан. 9:23).
Даниил јиит болордо, оны тӧрӧл јеринеҥ алып, ыраак Вавилондӧӧн олјого апарган. Ондо улус оны капшай ајарып ийген. Не дезе ол «кеберкек» ле јамылу биледеҥ болгон. Оныҥ учун Вавилонныҥ улузы оны каанныҥ ӧргӧӧзинде иштезин деп, белетеп баштагандар (Дан. 1:3, 4, 6; 1 Сам. 16:7). Иегова Даниилди бастыра јӱрегинеҥ оны сӱӱндирип турганы учун сӱӱген. Сананып ийзеер де: Даниил 20 јаштаҥ јаҥы ла ашкан болгон, је Иегова оны канча јылдардыҥ туркунына Кудайга чындык иштеген улузыныҥ, Иов ло Нойдыҥ, тоозына кошкон (Баш. 5:32; 6:9, 10; Иов 42:16, 17; Иез. 14:14). Даниил карыганча ла Иегованыҥ сӱӱжинде јӱрген, а оныҥ јӱрӱми сӱреен јилбилӱ ле кайкамчылу болгон (Дан. 10:11, 19). w23.08 2, абз. 1, 2
Воскресен, сыгын ай 14
Элбегин ле узунын, бийигин ле тереҥин оҥдо[гор] (Эф. 3:18).
Слер тура садып аларга турган болзоор, аларга турган турагардыҥ ичине кирип, оны бастыра јанынаҥ ширтеп кӧрӧргӧ кӱӱнзеер болороор. Анайып ла Агару Бичикти кычырып, ӱренип турганысты айдарга јараар. Слер бу бичикти тӱрген кычырып ийзеер, јӱк ле тӧс чындыктарды билип алараар (Евр. 5:12). Канайып тура алардаҥ озо слер ичиндӧӧн кирип јадаар, анайып ла Агару Бичиктиҥ ӱлгерлери бой-бойыла кандый колбулу болгонын кӧрӧргӧ албаданыгар. Слер јӱк ле кандый чындыкка бӱдӱп турганаар эмес, је нениҥ учун ого бӱдӱп турганаарды оҥдоп алыгар. Агару Бичикти јакшы оҥдоорго, биске оны тереҥжиде шиҥдеер керек. Апостол Павел бойыныҥ ака-эјелерин Кудайдыҥ Сӧзиниҥ «элбегин ле узунын, бийигин ле тереҥин оҥдоп алар[га]», Агару Бичикти јазап шиҥдезин деп кӱӱнзеткен. Ол тушта олордыҥ бӱдӱмјизи бек болор эди (Эф. 3:14—19). Биске де анайып эдер керек. w23.10 18, абз. 1—3
Понедельник, сыгын ай 15
Кайраканныҥ [Иегованыҥ] адынаҥ айткан јарлыкчылар кыйын-шырада узак чыдашкан. Карындаштарым, олорды тем эдип алыгар (Иак. 5:10).
Агару Бичикте чыдамкай болгон улустыҥ кӧп темдери бичилген. Биске ол улустыҥ јӱрӱмин не јакшы шиҥдеп кӧрбӧс? Темдектезе, Давидтиҥ јӱрӱмин. Давидти Иегова Израильдиҥ кааны эдип кӧстӧп турарда, ол јиит уул болгон. Је ол каан болуп башкаратан ӧйди узак јылдарга сакыган. Симеон ло Анна да келер болгон Мессияны узак сакып, чындык иштегендер (Лука 2:25, 36—38). Бу чындык улустыҥ јӱрӱмин шиҥдеп турала, бойыгарга мындый сурактар беригер: «Ого чыдамкай болорго не болушкан? Мынаҥ ого кандый туза болгон? Мен оноҥ неге ӱренер аргалу?» Је Агару Бичикте чыдамкай эмес те улустыҥ темдери бар. Бис олордоҥ до кӧп немеге ӱренер аргалу (1 Сам. 13:8—14). Бойоордоҥ сурагар: «Ого чыдамкай болорго не чаптыгын јетирген? Бу неге экелген?» w23.08 25, абз. 15