Сыгын ай

Иегова Иисуска улустыҥ уур-кӱчтериниҥ аайы-бажына чыгатан ийде-кӱч берген. Иисустыҥ кайкалдарынаҥ, ол улустыҥ кӱчтериниҥ аайы-бажына чыгып ийер аргалу деп кӧрӧдис. Улус бу кӱчтердиҥ аайына бойыныҥ ийде-кӱчиле качан да чыгып болбос эди. Темдектезе, Иисус кӱчтердиҥ тӧс шылтагын — кинчекти — јоголтор аргалу. Анайда ок бу кинчектеҥ улам болгон каршуны, ол тоодо ӧлӱмди ле оору-јоболды, јоголтор (Матф. 9:1—6; Рим. 5:12, 18, 19). Бого коштой Иисустыҥ кайкалдарынаҥ, ол кандый ла оору-јоболды јазып ийер аргалу, керек дезе божогон до улусты тирилтер аргалу деп кӧрӱнет (Матф. 4:23; Иоанн 11:43, 44). Ол тыҥ јотконды да токтодып ийер аргалу ла улусты калју тындардаҥ јайымдаар ийде-кӱчтӱ (Марк 4:37—39; Лука 8:2). Карын, Иисуста мындый ийде-кӱч бар! Кудайдыҥ берген сӧзи Каандык башкарза бӱдӱп калар. Иисустыҥ јердеги эткен кайкалдарынаҥ ол теҥеридеги Каандыктыҥ Кааны болуп башкарза, кандый кайкалдар эдери кӧрӱнет. w23.04 3—4, абз. 5—7

Јаан јуундарда слердиҥ кӧдӱрген колоор кӧрӱнбей калардаҥ айабас. Слер колоорды бош салып ийеле, бир де јартамал бербей, јӱк ле угуп отурайын деп сананар болороор. Је чӧкӧбӧгӧр. Кажы ла туштажуга бир канча каруулар белетеп алыгар. Ол тушта слерди јуунныҥ бажында сурабаза, јуунныҥ учында сурап ийер болор. «Каруулчы шибееге» белетенип јатсаар, кажы ла абзац темала канайып колболып турганын тереҥжиде шӱӱп сананыгар. Ол тушта слерде абзацта бичилбеген јакшы шӱӱлте кожуп ийетен арга болор. База бир јакшы арга — тереҥ чындыктарды јартап турган абзацтарга јакшы белетенип алары — нениҥ учун дезе мындый абзацтарга јартамал беретен улустыҥ тоозы астай берердеҥ айабас. Је слерди тӱҥей ле канча туштажулардыҥ туркунына бир де сурабай турган болзо канайдар? Келер туштажуны ӧткӱретен акага слер кандый абзацка каруу берерге турганаарды айдып салыгар. w23.04 22, абз. 9, 10

Иосиф Иегованыҥ башкартуларыла јӱрген. Оныҥ учун ол билениҥ бажы болотон молјузын сӱреен јакшы бӱдӱретен. Агару Бичикте ол Иегованыҥ берген јакылталарын, кӧп солынталар эдер керек те болзо, тӱрген ле бӱдӱрип туратаны керегинде бичилген ӱч учурал бар (Матф. 1:20; 2:13—15, 19—21). Мынаҥ бис Иосифтиҥ Марияны тыҥ баалап, кичееп јӱргенин кӧрӧдис. Мария дезе Кудайга сӧсуккуры учун ӧбӧӧнин оноҥ тыҥ сӱӱп, тооп јӱрген. Биледе баш болуп турган кару эр улус, слер Иосифтеҥ неге ӱренер аргалу? Билениҥ сурактарына болужатан јӧптӧрди Агару Бичиктеҥ бедиреп туругар. Табып алган јӧпти, јаан солынталар эдерге де келишсе, тузаланыгар. Анайып, ӱйлереерди оноҥ тыҥ сӱӱреер, билегер де качан да чачылбас. Вануа́туда јадып турган бир эјениҥ темин кӧрӱп ийектер. Оныҥ кижиге барганы 20 јылдаҥ ажып калган. Ол айдат: «Ӧбӧӧнимди Иегованыҥ башкартуларыла јӱрерге албаданып турганы учун сӱреен баалап јадым. Оныҥ да учун мен биледе кандый да сурак чыкса, ӧбӧӧним оны Кудайдыҥ башкартулары аайынча эдип салар деп иженип, бир де санааркабай јадым». w23.05 21, абз. 5

Вавилонноҥ јанып келген еврейлер Кудайдыҥ «агару албатызы» болор учурлу болгон (Јаҥ. т. 7:6). Је олорго оноҥ ло ары тӱзедилер керек болгон. Еврейлердиҥ кӧп сабазы Вавилондо чыкканынаҥ улам ондогы улустыҥ чӱм-јаҥдарын алынган. Анайып, бир канча ӧйдиҥ кийнинде Израильде чыккан балдардыҥ кезиги еврей тилди билбес болгонын Неемия коркышту кайкаган. А Кудайдыҥ Сӧзи еврей тилге бичилген (Јаҥ. т. 6:6, 7; Неем. 13:23, 24). Оныҥ учун бу уулчактар ла кызычактар Иегованы сӱӱп, ого канай бажыратан эди?! (Езд. 10:3, 44). Оныҥ да учун бу ӧйдӧ Израиль албатыга јаан-јаан солынталар эдерге келишкен. Је ару бажырыш орныктырылып јаткан Израиль јеринде мыны эдерге бир канча јеҥил болгон (Неем. 8:8, 9). w23.05 15, абз. 6, 7

Бис канча ла кире албаданзаас, канча да кире кӱӱнзезеес, кезикте амадуларыска јединерге келишпей јат. Темдектезе, сакыбаган айалганаҥ улам бисте амадубыска јединерге ӧй јок боло берердеҥ айабас (Эккл. 9:11). Ол эмезе кандый бир кӱчке туштап, кӱӱнис ӧчӱп, ийде-кӱчис ас болот (Укаа 24:10). Анайда ок толо кемдӱ эмезистеҥ улам кезикте јастыралар эдип јадыс. Бу јастыралар амадубыска јединерге чаптыгын јетирет (Рим. 7:23). А кезикте бис тыҥ арып калган болодыс (Матф. 26:43). Биске бу кӱчтерди ӧдӱп чыгарга не болужар? Амадугарга јединерге келишпеген болзо, чӧкӧбӧгӧр. Агару Бичикте бисте кӱчтер болбос деп айдылбаган. Карын андый ӧйдӧ Иегова биске болужар деп бӱдӱмјилейт. Чын ла, кӱчтердиҥ ӧйинде колоорды бош салбай, амадуга јединерге албаданып турзаар, Иегованы сӱӱндирерге турганаарды кӧргӱзедеер. А Иегова слердиҥ чӧкӧбӧй турганаарды кӧрӱп, тыҥ сӱӱнип јат! w23.05 30, абз. 14, 15

Пионердиҥ ижи карындашты башка-башка улусла куучындажарга ӱредет. Анайда ок акча-манатла ойгор тузаланарга болужат (Флп. 4:11—13). Текши пионердиҥ ижин баштаарга озо подсобный пионер болгоны болужат. Кӧп јииттер шак ла мынай эткен. А текши пионер болгон кийнинде јииттердиҥ алдында јаҥы аргалар ачылат, темдектезе, теократиялык туралар тударында туружары эмезе Бет-Элде иштеери. Анайда ок ончо карындаштарга аксагал болорго јӱткӱӱр керек. Олор аксагалдар болорго, библиялык некелтелерге келижип турар учурлу. Мындый амаду тургузып турган ака-карындаштарды Агару Бичик мактап јат (1 Тим. 3:1). Је карындашка баштап тарый бир канча ӧйгӧ болушчы ишчи болуп иштеер керек. Болушчы ишчилер аксагалдарга кандый ла сурактарда јаан болужын јетирет. Аксагалдар да, болушчы ишчилер де — јобош карындаштар ла акалар. Олор Иегованыҥ койлорын кичеейт ле јарлаар иште эрчимдӱ туружат. w23.12 28, абз. 14—16

Иосия каан 16 јаштуда Иегованы јакшы билип алала, оныҥ табын бӱдӱрерге кӱӱнзей берген. Је јиит каанныҥ јӱрӱми кӱчтер јок болбогон. Оныҥ албатызыныҥ кӧп саба улузы тӧгӱн кудайларга бажырган. Оныҥ учун ого тӧгӱн бажырышла тартыжарга коркышту јалтанбас болор керек болгон. 20 јажы толголокто, Иосия чалуларды јоголтып баштаган (2 Лет. 34:1, 2). Кару карындаштарыс ла сыйындарыс, слер Иосия чилеп Иегованы јакшы билип алар аргалу. Бу слерди ого јӱрӱмеерди учурлаарга кӱӱнзедер. Мындый алтам слердиҥ јӱрӱмеерди канайып солыыр? Лу́ка деп карындаш 14 јаштуда сууга чӧҥӱрилген. Ол мынайып айдат: «Бу ӧйдӧҥ ала Иеговага иштеери јӱрӱмимде эҥ учурлу болор ло оны јаантайын сӱӱндирерим деп бек шӱӱп алгам» (Марк 12:30). Слер мындый ла амаду тургузып алзаар, Иегова слерди бастыра јӱрӱмигерге алып, кичееп јӱрер! w23.09 11, абз. 12, 13

Апостол Павел Фессалоникадагы јуунга самара бичип турарда, бу јуунныҥ тӧзӧлгӧни бир де јыл болголок болгон. Оныҥ учун андагы аксагалдар ченемели јетпей турганынаҥ улам, јастырган да болор. Андый да болзо, олорды тоор керек болгон. Улу тӱбек там ла јууктап јат. Оныҥ учун келер ӧйдӧ биске јербойыныҥ аксагалдарыныҥ башкартулары бӱгӱнги кӱнге кӧрӧ, оноҥ тыҥ керек болордоҥ айабас. Ол ӧйдӧ бисте тӧс башкарула, эмезе филиалла колбожор арга јок болордоҥ айабас. Оныҥ да учун биске бӱгӱннеҥ ле ала кару аксагалдарысты сӱӱрге ле тоорго ӱренер керек. Айдарда, не де болотон болзо, аксагалдардыҥ јастыраларын чоттоп отурардыҥ ордына, карын олорло Иегова Иисус ажыра башкарып турган деп ундыбай јӱректер. Ижемјибис оноҥ ло ары бек болзын. Јуучылдыҥ бажын бӧрӱги канайып корулап турган, анайып ла келер ӧйгӧ ижемји бистиҥ санаабысты база корулап јат. Бу телекей биске бир де јакшы неме берип болбозын оҥдоп јадыс (Флп. 3:8). А ижемји биске кандый ла айалгада токуналу артарга болужат. w23.06 11—12, абз. 11, 12

«Тенек ӱй кижиниҥ» кычыртузын уккан улуска оныҥ айылына киретен бе, јок по деп сананар керек. Бисте балыр јӱрӱмнеҥ кыйып јӱретен јаан шылтактар бар. «Тенек ӱй кижи» мынайып айткан: «Уурдап ичкен суу тату». «Уурдап ичкен» дегенин канайып оҥдоор? (Укаа 9:17). Агару Бичикте эш-нӧкӧрлӧрдиҥ кожо конып турганы — изӱ кӱнде кижиниҥ суузын кандырып турган суула тӱҥдештирилет (Укаа 5:15—18). Эр ле ӱй кижи јасак аайынча алышкан болзо, сексуальный колбуларыла јакшызынар аргалу. Је олордыҥ андый колбулары ару болор учурлу. А Кудайдыҥ нормаларын бузуп, кожо конгонын — «уурдап ичкен суу» деп айдарга јараар. Кезик улус мындый керекти олорды кем де укпазын, кӧрбӧзин деп, уурчы чылап јажытту эдет. Андый улус олорды кем де кату каруузына тургуспас деп сананат. Анчада ла бу улус «уурдап ичкен суу тату» деп сананардаҥ айабас. Кандый јастыра санаа! Иегова Кудайыстыҥ кӧзинеҥ не де туура калбай јат. Андый тенек кижи оныҥ јарадузын јылыйтып јат. Бу кижиниҥ јӱрӱмин «тату» деп айдып болбозыҥ. Карын, ол ачу-коронго тӱжет (1 Кор. 6:9, 10). w23.06 22, абз. 7—9

Слердиҥ мӱргӱӱлдереер ле јарлаар ижеер коомойтый берген болор. Бу дезе Иегова слерге агару тынын бербей барган деп кӧргӱспей јат. Толо кемдӱ эмезистеҥ улам, сезимдерис капшай солына берет. Слердиҥ кӱӱнеер ӧчӱп бараткан болзо, апостол Павелдиҥ темин шӱӱп сананыгар. Павел Иисустаҥ тем аларга албаданган да болзо, је кезикте оныҥ Кудайга иштеер кӱӱни келбей турар деп билер болгон. Андый да болзо, кӱӱни бар да болзын, јок то болзын Павел Кудайдыҥ табын бӱдӱрерге тыҥ албаданган. Анайып ла слер де нени-нени эдерге турзагар, сезимдереерге башкартпагар. Кӱӱнзебей де турган болзоор, эдетен немени эдерге албаданыгар. Кудайга јарагадый немени эдерге албаданып турзаар, бир эмеш ӧйдӧҥ керектӱ сезимдер чыгып келер (1 Кор. 9:16). w24.03 11—12, абз. 12, 13

Бис ака-эјелеристи сӱӱп, олорды најыларыстыҥ тоозына кожуп алар аргалу (2 Кор. 6:11—13). Јуунда башка-башка культуралу, кылык-јаҥду ака-эјелер бар. Оныҥ учун биске олордыҥ јакшы кылык-јаҥына ајару эдер керек. Ол тушта бистиҥ олорго сӱӱжис тыҥыыр. Качан улуска Иегованыҥ кӧзиле кӧрӱп турзаас, олорго сӱӱжисти кӧргӱзип јадыс. Биске сӱӱшти анчада ла улу тӱбектиҥ ӧйинде кӧргӱзер керек болор. Ол ӧй башталза, Иегова бисти канайып корулаар? Мидо-Персияныҥ черӱзи Вавилонго табару эдип турарда, Кудайдыҥ албатызына нени эдер керек болгон? Агару Бичикте айдылат: «Мениҥ албатым, тӧриндеги кыптарыҥа кирип, эжиктерди бӧктӧп ал. Мениҥ чугулым ӧтпӧгӧнчӧ, бир эмеш ӧйгӧ јажынып ал» (Иса. 26:20). Бу сӧстӧр биске, улу тӱбектиҥ алдында јадып тургандарга, келижип турган ошкош. w23.07 6—7, абз. 14—16

Биске керсӱ болгонысла јарлу болор керек. Бойыгардаҥ мынайып сурагар: «Улус мени керсӱ, јымжак деп билер бе? Эмезе ӧчӧш, кату деп пе? Улусты јазап угуп, олордыҥ айтканын ајаруга аладым ба?» Бис канча ла кире керсӱ болзоос, ончо ло кире Иеговага ла Иисуска тӱҥей болорыс. Керсӱ болоры айалга солынза, эптежип аларын темдектейт. Айалга солынза, сакыбаган кӱчтер болордоҥ айабас, темдектезе, су-кадыгыс уйадай берер. Экономика ла политика солынза, јӱрӱмис оноҥ кӱч боло берер. Керек дезе организацияда эдип турган ижис солынза, биске јаан ченелте болордоҥ айабас (Эккл. 9:11). Је кандый да кӱчтер болотон болзо, оны ӧдӱп чыгатан тӧрт алтам болужар: 1) эмдиги айалгала јӱрӱгер, 2) ичкери кӧрӱгер, 3) јакшы јанын кӧрӱгер, 4) улуска болужыгар. w23.07 22, абз. 7, 8

Даниил јиит болордо, оны тӧрӧл јеринеҥ алып, ыраак Вавилондӧӧн олјого апарган. Ондо улус оны капшай ајарып ийген. Не дезе ол «кеберкек» ле јамылу биледеҥ болгон. Оныҥ учун Вавилонныҥ улузы оны каанныҥ ӧргӧӧзинде иштезин деп, белетеп баштагандар (Дан. 1:3, 4, 6; 1 Сам. 16:7). Иегова Даниилди бастыра јӱрегинеҥ оны сӱӱндирип турганы учун сӱӱген. Сананып ийзеер де: Даниил 20 јаштаҥ јаҥы ла ашкан болгон, је Иегова оны канча јылдардыҥ туркунына Кудайга чындык иштеген улузыныҥ, Иов ло Нойдыҥ, тоозына кошкон (Баш. 5:32; 6:9, 10; Иов 42:16, 17; Иез. 14:14). Даниил карыганча ла Иегованыҥ сӱӱжинде јӱрген, а оныҥ јӱрӱми сӱреен јилбилӱ ле кайкамчылу болгон (Дан. 10:11, 19). w23.08 2, абз. 1, 2

Слер тура садып аларга турган болзоор, аларга турган турагардыҥ ичине кирип, оны бастыра јанынаҥ ширтеп кӧрӧргӧ кӱӱнзеер болороор. Анайып ла Агару Бичикти кычырып, ӱренип турганысты айдарга јараар. Слер бу бичикти тӱрген кычырып ийзеер, јӱк ле тӧс чындыктарды билип алараар (Евр. 5:12). Канайып тура алардаҥ озо слер ичиндӧӧн кирип јадаар, анайып ла Агару Бичиктиҥ ӱлгерлери бой-бойыла кандый колбулу болгонын кӧрӧргӧ албаданыгар. Слер јӱк ле кандый чындыкка бӱдӱп турганаар эмес, је нениҥ учун ого бӱдӱп турганаарды оҥдоп алыгар. Агару Бичикти јакшы оҥдоорго, биске оны тереҥжиде шиҥдеер керек. Апостол Павел бойыныҥ ака-эјелерин Кудайдыҥ Сӧзиниҥ «элбегин ле узунын, бийигин ле тереҥин оҥдоп алар[га]», Агару Бичикти јазап шиҥдезин деп кӱӱнзеткен. Ол тушта олордыҥ бӱдӱмјизи бек болор эди (Эф. 3:14—19). Биске де анайып эдер керек. w23.10 18, абз. 1—3

Агару Бичикте чыдамкай болгон улустыҥ кӧп темдери бичилген. Биске ол улустыҥ јӱрӱмин не јакшы шиҥдеп кӧрбӧс? Темдектезе, Давидтиҥ јӱрӱмин. Давидти Иегова Израильдиҥ кааны эдип кӧстӧп турарда, ол јиит уул болгон. Је ол каан болуп башкаратан ӧйди узак јылдарга сакыган. Симеон ло Анна да келер болгон Мессияны узак сакып, чындык иштегендер (Лука 2:25, 36—38). Бу чындык улустыҥ јӱрӱмин шиҥдеп турала, бойыгарга мындый сурактар беригер: «Ого чыдамкай болорго не болушкан? Мынаҥ ого кандый туза болгон? Мен оноҥ неге ӱренер аргалу?» Је Агару Бичикте чыдамкай эмес те улустыҥ темдери бар. Бис олордоҥ до кӧп немеге ӱренер аргалу (1 Сам. 13:8—14). Бойоордоҥ сурагар: «Ого чыдамкай болорго не чаптыгын јетирген? Бу неге экелген?» w23.08 25, абз. 15

Пётр Иисуска чындык болгон. Оныҥ чындыгы бир учуралдаҥ јарт кӧрӱнген. Бир катап ӱренчиктер Иисустыҥ айтканын оҥдобой, оны таштайла, јӱре бергендер (Иоанн 6:68). Је бу айалгада Пётр оны таштабаган. Ол: «Сениҥ сӧстӧриҥ ӱргӱлји јӱрӱм берет» — деп, алаҥзыбай айткан. Је Иисус, Пётр ла апостолдор оны таштап ийеле, кача берер деп билген. Андый да болзо, Иисус, кийнинде Пётрдыҥ бӱдӱмјизи тыҥып, Кудайга чындык иштеер деп бӱткен (Лука 22:31, 32). Иисус «тын сергек, эт-канда дезе чине јок» деп билер болгон (Марк 14:38). Оныҥ да учун Пётр оноҥ ӱч катап јана тӱжерде, Иисус апостолынаҥ чӧкӧбӧгӧн. Тирилген кийнинде, Пётр јаҥыскан болордо, ого кӧрӱнген (Марк 16:7; Лука 24:34; 1 Кор. 15:5). Сананып ийзеер де, бу дезе ал-санаага тӱжӱп калган Пётрдыҥ бӱдӱмјизин не аайлу тыҥытты не! w23.09 22, абз. 9, 10

Кижи Кудайга бӱдӱп турза, Кудай оныҥ кинчегин таштап эмезе бӧктӧп салат. Оныҥ кинчегин эске албай да јат (Сар. 32:1, 2). Андый кижиде Кудайдыҥ кӧзинде бир де буру јок. Ол бӱдӱмјизи учун акту деп адалат. Авраам да, Давид те, Кудайдыҥ ӧскӧ дӧ чындык ишчилери акту деп адаткан да болзо, олор тӱҥей ле толо кемдӱ эмес, кинчектӱ болгон. Је олор бӱдӱмјизинеҥ улам Кудайдыҥ кӧзинде јек јок болгон, анчада ла Кудайга бӱтпей турган улуска кӧрӧ (Эф. 2:12). Апостол Павелдиҥ сӧстӧри јарт кӧргӱзип јат: Кудайдыҥ најызы болорго, бӱдӱмји керек. Бӱдӱмји Авраамга да, Давидке де керек болгон. Бӱдӱмји јогынаҥ бис те не де болбозыс. w23.12 3, абз. 6, 7

Бӱгӱнги кӱнде христиандардыҥ ончозында Иеговага тайылгалар эдетен сӱреен јакшы арга бар. Андый сыйлардыҥ тоозына Каандыктыҥ ижине берип турган ӧйис, ийде-кӱчис ле акча-јӧӧжӧбис кирет. Бис Иеговага эҥ артыгын берип турзаас, бажырар арганы баалап турганыс деп кӧргӱзерис. Је база апостол Павел ундыбайтан немелерди тоолоп салган (Евр. 10:22—25). Ол мӱргӱӱл, јарлаар иш, јуунныҥ туштажулары ла бой-бойына болужары. «Кайраканныҥ кӱни јууктап келеткенин» кӧрӱп тура, биске бу керектерде мынаҥ артык албаданар керек. Ачылта деп бичиктиҥ учында Иегованыҥ ангелы: «Кудайга бажыр!» — деп, эки катап кычырат (Ачыл. 19:10; 22:9). Ангелдиҥ бу сӧстӧрди эки катап айтканынаҥ биске ол сӧстӧрди угар керек деп кӧрӧдис. Оныҥ учун Иегованыҥ улу кӧгӱс ӧргӧӧзи керегинде тереҥ чындыктарды ундыбай, Кудайга бажырар арганы баалап јӱректер! w23.10 29, абз. 17, 18

Бис ончобыс бой-бойыбысты сӱӱрге кӱӱнзейдис. Је биске Иисустыҥ «кӧп улустыҥ сӱӱжи соор» деп айткан сӧстӧрин ундыбас керек (Матф. 24:12). «Кӧп улустыҥ» деп айдарда, Иисус бойыныҥ ӱренчиктерин айтпаган. Је андый да болзо, бу телекейдиҥ јаҥыс ла бойын сананып турган соок кӱӱни бисте болуп калбазын деп, ајарыҥкай болор керек. Ӧрӧги айдылганын ајаруга алып, бистиҥ ака-эјелериске сӱӱжис канча кире тыҥ болгонын билип аларга јараар ба? Мыны сананып ийектер. Сӱӱжисти шиҥдеп кӧрӧтӧн аргалардыҥ бирӱзи — јӱрӱмниҥ башка-башка айалгаларында бойысты канайып тудунып турарын кӧрӧри (2 Кор. 8:8). Темдектезе, апостол Пётр бичиген: «Элдеҥ озо бой-бойыгарды тыҥ сӱӱп јӱригер, нениҥ учун дезе сӱӱш кӧп кинчектерди таштаттырып јат» (ЈТ) (1 Пётр 4:8). Ака-эјелер јастырып, ол эмезе бисти ачындырып турза, бойысты канайып тудунып турганыстаҥ олорды канча кире тыҥ сӱӱп турганыс кӧрӱнет. w23.11 10, абз. 12, 13

Бис јуунда јӱк ле кезик ака-эјелерди сӱӱп турзаас, Иисустыҥ айткан јакылтазын бӱдӱрип турганыс деп айдып болбозыс. Је јуунда бис та кем ле де јуук најылажар болорыс. Иисуста да ончо ӱренчиктериле бир тӱҥей колбулар болбогон (Иоанн 13:23; 20:2). Је апостол Пётр биске јуунда ончо ака-эјелерди сӱӱр керек деп эске алындырат. Ол тушта кажы ла кижи бойын сӱӱштӱ, нак билеге кирип турган деп сезер (1 Пётр 2:17). Пётр бисти бой-бойыбысты акту јӱректеҥ, тыҥ сӱӱгер деп кӱӱнзеткен. Бу сӧстӧр биске јӱрегисти элбеде ачып, ары сӱӱрге јеҥил эмес улусты кийдирерин темдектейт. Темдектезе, слерди кем-кем ачындырып ийген болзын, бу тушта слердиҥ капшай ла ӧч алар кӱӱнеер келер. Иисус Пётрга Иегова мындый кылык-јаҥды јаратпай турган деп оҥдоорго болушкан (Иоанн 18:10, 11). Ол бичиген: «Јаманныҥ ордына јаман этпегер, айткылаштыҥ ордына айткылабагар. Карын, алкагар» (ЈТ) (1 Пётр 3:9, сноска). Айдарда, изӱ сӱӱш бисти ачындырып та ийген кижиге јалакай баштанарга ла ого ајару эдип турарга кӱӱнзетсин. w23.09 29, абз. 9—11

Балдар бойлоры ла јаанап калат. Је кӧгӱс ӧзӱм андый болбой јат (1 Кор. 13:11; Евр. 6:1). Кӧгӱс јанынаҥ ӧзӧргӧ, биске Иеговала јуук колбуларлу болор керек. Анайда ок агару тын керек болот. Јӱк ле оныҥ болужыла бис христиан кылык-јаҥдарга ӱренип аларыс, јӱрӱмге керектӱ не-немеге ӱренип, алатан молјуларыска белетенип аларыс (Укаа 1:5). Иегова эр кижини ле ӱй кижини јайаган (Баш. 1:27). Олордыҥ јайалган тыш бӱдӱми эки башка. Је ол экӱде база да башказы бар. Темдектезе, Иегова олорго башка-башка молјулар берип салган. Олорго ол молјуларды бӱдӱрерге, керектӱ кылык-јаҥдарга ла јӱрӱмге керектӱ немелерге ӱренип алар керек (Баш. 2:18). w23.12 18, абз. 1, 2

Иисус улусты Кудайдыҥ адын адап турзын деп кӱӱнзеген бе? Кӱӱнзеген эмей! Ол ӧйдиҥ кудай јаҥныҥ башчылары Кудайдыҥ ады сӱрекей агару, оныҥ учун оныҥ адын айтпас керек деп ӱредип туратан. Је Иисус андый немени бир де јаратпайтан. Оныҥ ӱреткениле болзо, оныҥ теҥеридеги Адазыныҥ адын мактаарга, улустыҥ чӱм-јаҥдары буудак болбос учурлу. Бир катап Герас деген јерде, кӧрмӧстӧр кирип калган бир эр кижини Иисустыҥ јасканын эске алынып ийзеер де. Улус мыны кӧрӧлӧ, Иисустаҥ коркып, оны кедери јӱрзин деп сурагандар (Марк 5:16, 17). Иисус олордыҥ айтканыла јӱре берген де болзо, бу улусты Иегованыҥ адын база билзин деп кӱӱнзеген. Оныҥ учун ол кӧрмӧстӧрдӧҥ јайымдалган эр кижини бу керегинде јууктарына куучындазын деп айткан. Је јаҥыс, ого мындый кайкалды Иисус эткен эмес, је Иегова эткен деп айдар керек болгон (Марк 5:19). Анайып ла бӱгӱнги кӱнде Иисус улусты Кудайдыҥ адын билзин деп кӱӱнзеп јат (Матф. 24:14; 28: 20). Оныҥ учун јарлап јӱреле, Кудайдыҥ адын адап турзаас, бистиҥ Каанысты, Иисусты, сӱӱндиредис. w24.02 10, абз. 10

Бу телекейде јӱрӱм там ла кӱч болуп бараткан. Је Иегованыҥ организациязында бис амыр-энчӱ јӱредис. Кудай биске бастыра јердиҥ ӱстинде ака-эјелерисле бирлик јӱрер арга сыйлаган (Сар. 133:1). Бистиҥ билелерис бек болзын деп болужып јат (Эф. 5:33—6:1). Анайда ок Иегова бисти амыр санаалу јӱрзин деп ӱредет. Је кезикте биске Иеговага иштеерге јеҥил эмес болот. Бисти ака-эјелердиҥ сӧстӧри эмезе керектери ачындырар болор. Ол эмезе бис бойыстыҥ јастыраларыстаҥ улам, анчада ла бир ле немеге канча катап бӱдӱрилип турган болзоос, кунугып турган болорыс. Је бойыстаҥ да, улустаҥ да чӧкӧбӧс керек. Иеговага оноҥ ло ары иштеер керек: 1) бисти ака эмезе эје ачындырып турза, 2) бис эш-нӧкӧристеҥ чӧкӧп турзаас эмезе 3) бойыстаҥ чӧкӧп турзаас. w24.03 14, абз. 1, 2

Кезик ака-эјелердиҥ Кудайга кӧптӧдӧ иштеерге албаданып турганын уккан болороор. Олордыҥ кезиги Каандыктыҥ јарчыларыныҥ сургалына ӱренип јат. Кезиги дезе јарчылар јетпей турган јерлердӧӧн барат. Слердиҥ айалгагарда мынайып эдерге келижип турган болзо, јол ачык — ичкери јӱткӱгер! Иегованыҥ Керечилери Кудайга кӧптӧдӧ иштейтен аргалар бедирегилейт (Ап. ижи 16:9). Је слердиҥ айалгагарда бӱгӱнги кӱнде мынай эдерге келишпей турган болзо, бойоордыҥ эдип турган ижеерди уйан кӧрбӧгӧр. Эҥ ле керектӱзи — бу јолдоҥ туура барбагар ла бойоордоҥ чӧкӧбӧгӧр (Матф. 10:22). Бойоорды улусла тӱҥдештирбей, Иеговага акту јӱректеҥ иштенигер. А бу дезе Иисустыҥ јолыла сууга да чӧҥӱрилген кийнинеҥ барарга болужар (Сар. 26:1). w24.03 11, абз. 11

Бистиҥ теҥеридеги Адабыс кинчектеристи акту јӱректеҥ алынып турзаас, јаманысты таштап саларга сӧзин берген (Сар. 86:5). Айдарда, бис Кудай нени айткан оны эдер деп бӱдер аргалу. Ундыбагар, Иегова бистеҥ эдип болбос неме некебей јат. Ол ӧткӱре кату эмес. Кудай бистиҥ канча кире аргабыс бар, ончо кире эдип турганысты кӧрӱп, сӱӱнет. База бир ундыбайтан неме: Иеговага бастыра ийде-кӱчинеҥ иштеген улустыҥ темдерин шӱӱп сананары. Темдектезе, апостол Павел. Ол Кудайга акту кӱӱнинеҥ бастыра ийде-кӱчин берип иштеген. Анайып, канча муҥ километр ӧткӧн, кӧп-кӧп јуундар тӧзӧгӧн. Је кезикте айалгалар солынганынаҥ улам, Павел кӧп јарлап болбой туратан. Мынаҥ улам Павелди Кудайдаҥ јараду албай барган деп айдарыс па? Јок. Нениҥ учун дезе ол Кудайга канча кире аргазы бар ончо ло кире иштеген, а Кудай дезе ого алкыжын берген (Ап. ижи 28:30, 31). Андый ла неме бисте де болуп јат. Кезикте бис Иеговага кӧп иштейдис, је кезикте ас иштеерге келижет. Је Кудай бисти ого кандый кӱӱнисле иштеп турганысты баалап јат. w24.03 27, абз. 7, 9

Иисус бойыныҥ ӱренчиктерине мӱргӱӱл јанынаҥ тем артыргыскан. Ол јерде болордо Иеговага јаантайын мӱргӱп туратан. Иисустыҥ јанында јаантайын ла улус болгон. Мынаҥ улам ого Адазына мӱргӱӱрге ӧй табарга јеҥил эмес болгон (Марк 6:31, 45, 46). Оныҥ учун улус тургалакта, ол таҥ-эрте туруп, мӱргӱйтен. Бир катап јаан учурлу алтам эдердеҥ озо ол тӱниле мӱргӱген (Лука 6:12, 13). Анайда ок Иисус јердеги јӱрӱминиҥ коркышту кӱч, је сӱреен јаан учурлу ӧйин ӧдӱп чыгарга, божоор алдында тӱнде, кӧп катап мӱргӱген (Матф. 26:39, 42, 44). Иисустаҥ бис, ижис-тожыс кандый да кӧп болзо, мӱргӱӱрге ӧй таап турар керек деп ӱренип јадыс. Мӱргӱӱрин ундыбаска, бис оны графигиске темдектеп алар аргалу. Темдектезе, биске Иисус ла чылап эрте турарга ол эмезе бир эмеш орой јадып уйуктаарга келижер болор. Је мынайып Иеговага бу аҥылу сыйды баалап турганысты кӧргӱзерис. w23.05 3, абз. 4, 5

Бӱгӱнги ӱлгердеги «бойыныҥ сӱӱжин берген» деген сӧстӧргӧ ајару эдип ийектер. Бир бичикте бу сӧстӧр мынайда јарталат: майлаткандардыҥ јӱректерине «коркышту јаан сӱӱш урулган» деп айдарга јараар. Иегова олорды бойыныҥ балдары чылап не аайлу тыҥ сӱӱп турган дезеер! Майлаткандар Иегованыҥ сӱӱжине бир де алаҥзыбай јат (Иуда 1). Апостол Иоанн бу керегинде мындый сӧстӧр айткан: «Кӧрӱгер, Ада биске Кудайдыҥ балдары деп адаларга кандый сӱӱш бергенин» (1 Иоанн 3:1, ЈК 2003). Је Иегова јӱк ле майлаткандарды сӱӱп турган ба? Јок. Ол бистиҥ бастырагысты сӱӱп турганын кӧргӱзип турган керелерди кӧрӱп ийектер. Иегова бисти сӱӱп турган деп, эҥ јаан кере кандый? Ол толынты тайылга. Бастыра јердиҥ ӱстинде Иегованаҥ ӧскӧ андый јаан сыйды база кем де этпеген (Иоанн 3:16; Рим. 5:8). w24.01 28, абз. 9, 10

Бу ӱлгердеҥ бис Давидке коркыбаска не болушканын кӧрӱп јадыс. Оныҥ јӱрӱми јеткерлӱ айалгада да болгон болзо, ол Иегова келер ӧйдӧ ого нени эдерин шӱӱп сананган. Иегова оныҥ адаанын алар ла аргадап алар деп билген. Нениҥ учун дезе Иегова оны каан этире кӧстӧп салган болгон (1 Сам. 16:1, 13). Иегова айткан сӧзине турар деп, Давид бир де алаҥзыбаган. Иегова бистиҥ кажыбыска ла удабас нени эдер? Кудай бисти кандый ла кӱчтердеҥ корулаар деп сакыбай јадыс. Је андый да болзо, ол удабас, јаҥы јӱрӱмде, бӱгӱнги кӱчтерди ончозын јоголтып салар (Иса. 25:7—9). Иегова божогон улусты тиргизер, улусты оору-јоболдоҥ, ол тоодо эмоциональный да оорулардаҥ, јазып койор, анайда ок бастыра ӧштӱлерди јоголтып салар (1 Иоанн 4:4). w24.01 6, абз. 12, 13

Учурланганаарды ла чӧҥӱрилгенеерди шӱӱп сананыгар. Слер бу алтамдарды нениҥ учун эткенеер? Нениҥ учун дезе Иегованыҥ јанын талдап аларга кӱӱнзегенеер. Чындыкка канайып келгенеерди эске алып ийигер. Слер озо ло баштап Иегова керегинде билгирлер алала, теҥеридеги Адагарды тооп ло сӱӱп баштаганаар. Мынаҥ улам бӱдӱмјигер тыҥыган, јастыралараарды алынганаар, оныҥ кийнинде јӱрӱмигерди солып, Кудайдыҥ нормаларыла јӱрӱп баштаганаар (Сар. 32:2). Кудай слердиҥ јаманыгарды таштаган деп билип алала, токунал алган болороор. Анайда ок јуундарга јӱрӱп, билип алганаарды улуска куучындаганаар. Учы-учында Кудайга учурланып, сууга чӧҥӱрилгенеер. Эмди дезе слер ӱргӱлји јӱрӱмге апаратан јолдо барып јадыгар. Бу јолдоҥ качан да туура чыкпаска бек шӱӱп алганыгар (Матф. 7:13, 14). Бек ле турумкай болуп, Иеговага чындык артып, оныҥ јакаруларын јаантайын угуп турактар. w23.07 17, абз. 14; 19, абз. 19

Иегованыҥ табын баштапкы јерге тургузараар деп берген сӧзӧӧрди эске алып турзаар, ченелтелерди јеҥил ӧдӧ беререер. Темдектезе, слер билелӱ кижиле сертежереер бе? Јок эмей! Нениҥ учун дезе слер Кудайга андый немени этпезеер деп сӧзӧӧрди берип койгоноор. Јаман кӱӱн-санаа тазылдана берзе, кыйалта јогынаҥ санааркаштарга экелер. А слер мындый санааркаштарга алдыртпазаар. Карын «кинчектӱлердиҥ јолына» кирбегенер учун не аайлу сӱӱнгейеер не! (Укаа 4:14, 15). Иисустыҥ темин сананыгар. Ол теҥеридеги Адазын јаантайын сӱӱндирерге албаданган. Оныҥ теми слерге Иегованы ачындыргадый керектерди тӱрген ле јектеп ийерге болужар (Матф. 4:10; Иоанн 8:29). Ченелтелер ле кӱчтер биске Иисустыҥ кийнинеҥ барарга турганысты кӧргӱзетен арга болот. Бир де алаҥзыбагар, Иегова андый айалгаларда слерге болужар. w24.03 10, абз. 8—10