Иегова сӧзин берет: «Јер рай болуп калар!»

1. Судурчы Исайя израильтяндарга нени айдарга сананган?

СУДУРЧЫ Исайя Иегованы «чындык Кудай» деп адаган. «Чындык» деп кӧчӱрилген сӧс (сӧстӧҥ сӧскӧ «аминь»), «андый болзын» дегенин темдектейт (Иса. 65:16, сноска). Кӧп сабада «Аминь» деп сӧс Агару Бичикте Иегова ла Иисус сӧзине јаантайын турат деп кӧргӱзерге тузаланылат. Исайя бу сӧстӧриле израильтяндарга нени айдарга сананган? Иеговага бӱткӱлинче иженерге јараар ла ол берген сӧзин јаантайын бӱдӱрет.

2. Иегованыҥ берген сӧзине нениҥ учун бӱдерге јараар, бис кандый сурактар шӱӱжерис?

² Нениҥ учун Кудайдыҥ берген сӧзине бӱдерге јараар? Исайяныҥ айткан сӧзиниҥ кийнинеҥ 800 јыл кире ӧдӧ берерде, апостол Павел мынайып айткан: «Кудайдыҥ тӧгӱндеер аргазы јок» (Евр. 6:18). Бир ле јердеҥ тоҥмок суу ла тусту суу чыкпай јат. Иегова качан да тӧгӱндебес, чындык Кудай. Айдарда, Иегованыҥ сӧзине чын ла бӱдерге јараар. Бу јӧрмӧлдӧ мындый сурактар кӧрӱп ийерис: Иегова келер ӧйдӧ нени эдер? Оныҥ берген сӧзи бӱдер деп кандый керелер бар?

ИЕГОВАНЫҤ БЕРГЕН СӦЗИ

3. а) Кудайдыҥ ончо ишчилерине кандый судур сӱреен тыҥ јарап јат? (Ачылта 21:3, 4). б) Кезик улус бу судурды угала, нени айдыжат?

³ Эмди дезе Кудайдыҥ ончо ишчилерине јарап турган судурды шӱӱжип ийектер. (Ачылта 21:3, 4 кычырыгар.) Кудай удабас «ӧлӱм де, ачу-корон до, сыгыт та, јобол до база болбос» ӧй болор деп сӧзин берген. Бис бу сӧстӧрди јарлаар иште, райда јӱрӱм кандый болор деп кӧргӱзерге, јаантайын кычырып јадыс. Кезик улус бу судурды угала: «Бу сӧстӧр чӧрчӧккӧ тӱҥей» — дежет.

4. а) Иегова нени билген ле нени озолондыра кӧрӱп салган? б) Иегованыҥ берген сӧзинеҥ ӧскӧ бисте база не бар?

⁴ Иегова бис јарлаар иште Ачылтада бичилген судурды улуска кычырарыс деп билген. Анайда ок ол кӧп улуска бу сӧстӧргӧ бӱдерге јеҥил эмес болор деп, озолондыра кӧрӱп салган (Иса. 42:9; 60:2; 2 Кор. 4:3, 4). Биске ӧскӧ улусты да, бойысты да, Ачылта 21:3, 4-тӧ бичилген сӧстӧр кыйалта јогынаҥ бӱдер деп бӱдӱмјилеерге не болужар? Иегова јӱк ле сӧзин берген эмес, је бир канча бӱдӱмјилӱ шылтактар берип салган. Кандый шылтактар?

ИЕГОВА БЕРГЕН СӦЗИН БӰДӰРЕР

5. Иегованыҥ берген сӧзине бӱдетен шылтактар кандый ӱлгерлерде айдылган?

⁵ Иегова берген сӧзин бӱдӱрер деп, бӱдетен шылтактар Ачылта 21:5, 6-да айдылган. Бу ӱлгерлер јер ӱстинде рай эдерим деп, Иегованыҥ айткан сӧзиниҥ кийнинеҥ ле бичилген. Мында мынайып айдылат: «Ширееде Отурганы айткан: — „Бат, ончозын јаҥы эдип јайап јадым!“ Оноҥ айткан: — „Бичи, бу сӧстӧр чындык ла чын“. Оноҥ меге: — „Бӱтти!“ — деген. — „Мен — Альфа ла Омега, Бажы ла Учы“».

6. Ачылта 21:5, 6-дагы сӧстӧр Иегованыҥ берген сӧзине бӱдӱмјибисти канайып тыҥыдат?

⁶ Бу ӱлгерлер Иегованыҥ берген сӧзине бӱдӱмјибисти тыҥыдат. «Апогей Откровения» деп бичикте мынайда айдылган: «Бу сӧстӧрди айдып, чындык улуска келер ӧйдӧ алкыштар берилер деген документке Иегова кол салып койгон деп айдарга јараар»b. Ачылта 21:3, 4-тӧги сӧстӧр — Иегованыҥ берген сӧзи. А 5-чи ле 6-чы ӱлгерлер Иегованыҥ кол салганын кӧргӱзет. Бу дезе Иегова берген сӧзин бӱдӱрер деп, кере болот. Оноҥ ары 5 ле 6 ӱлгерлерди тереҥжиде кӧрӱп ийектер.

7. 5-чи ӱлгердиҥ бажы незиле јилбилӱ?

⁷ 5-чи ӱлгер мынайып башталат: «Ширееде Отурганы айткан» (Ачыл. 21:5а). Ачылта деп бичикте Иегова та кемде ажыра эмес, је бойы айткан јӱк ле ӱч учурал бичилген. Бу олордыҥ бирӱзи болот. Андый болордо, бу сӧстӧрди ангел де, тирилип келген Иисус та эмес, је Иегова бойы айткан. Мынызы оноҥ ары бичилген сӧстӧргӧ бӱдерге јараарын деп кӧргӱзет. Нениҥ учун мынайып айдарга јараар? Нениҥ учун дезе Иегова «тӧгӱндебес Кудай» (Титке 1:2). Айдарда 5-чи ӱлгердиҥ бажы Ачылта 21:5, 6-да бичилген сӧстӧргӧ бӱдерге јараар деп кӧргӱзет.

«ОНЧОЗЫН ЈАҤЫ ЭДИП ЈАЙАП ЈАДЫМ!»

8. Иегова оныҥ сӧзи бӱдер деп канайып кӧргӱзет? (Исайя 46:10).

⁸ «Ончозын јаҥы эдип јайап јадым!» деген сӧстӧрди тереҥжиде кӧрӱп ийектер (Ачыл. 21:5). Оригиналда бу сӧстӧрдӧҥ озо «кӧр» ол эмезе «ук» деп кӧчӱрилген сӧс турат. Бу сӧс Ачылтада кӧп катап туштайт. Бир справочникте айдылганыла, бу сӧстиҥ амадузы — кычыраачыны оноҥ ары сӧстӧргӧ ајару этсин деп кӱӱнзедери. Оноҥ ары кандый сӧстӧр кычырадыс? Ајарзаар да, Иегова мында «јайаарым» эмес, је «јайап јадым» деп айткан. Мында Кудай келер ӧйдӧ эдетен немелерди бӱгӱнги ле кӱнде эдип турган этире айдат. Айдарда, ол бойыныҥ берген сӧзин бӱдӱреринде бир де алаҥзыбай турганын кӧрӧдис. (Исайя 46:10 кычырыгар.)

9. а) Иегова ончоны канайып јаҥы эдер? б) Эмдиги бар «теҥериле», «јерле» не болор?

⁹ «Ончозын јаҥы эдип јайап јадым!» деген сӧстӧрдиҥ база бир јанын кӧрӱп ийектер. Иегова бу сӧстӧрди канайып бӱдӱрер? Ол та нени де солыыр, а та нени де орныктырар. Иегова нени солыыр? Ачылта 21:1-де: «Башкы теҥери ле башкы јер кеде јӱре бергендер [«јоголып калган», ЈТ]» — деп кычырадыс. «Башкы теҥери» — Сатананыҥ ла кӧрмӧстӧрдиҥ башкарузындагы политикалык јаҥдар (Матф. 4:8, 9; 1 Иоанн 5:19). А «јер» деген сӧс Агару Бичикле болзо, јерде јӱрген улусты темдектейт (1 Лет. 16:31; Сар. 96:1). Айдарда, «башкы јер» дегени бӱгӱнги кӱнде јадып турган ӱрелип калган улусты кӧргӱзет. Иегова эмдиги бар «јерди» ле «теҥерини» тӱзедердиҥ ордына оны јоголтып, јаҥы «јер» ле јаҥы «теҥери» тургузар. Ӧскӧртӧ айтса јаҥы башкару ла јаҥы улус болор.

10. Иегова нени орныктырар?

¹⁰ Је Иегова кезик немени солыбас, а кезик немени јаҥыртып, орныктырып салар (Ачыл. 21:5). Иегова јерди ле улусты јазып, толо кемине јетирер. Исайя бистиҥ јерди Эдем садтый сӱреен јараш болуп калар деп судурлаган. А бистиҥ кажыбыс ла эди-каныныҥ јаҥыртылып, ийде-кӱчтӱ болуп турганын сезер. Аксак, кӧзи кӧрбӧс, кулагы укпас улус су-кадык болуп калар. Керек дезе божогон до улус тирилер! (Иса. 25:8; 35:1—7).

«БУ СӦСТӦР ЧЫНДЫК ЛА ЧЫН». «БӰТТИ!»

11. Иегова Иоаннга кандый јакару берген, нениҥ учун?

¹¹ Иегова бисти ого бӱтсин деп база нени айткан? Ол Иоаннга: «Бичи, бу сӧстӧр чындык ла чын» — деген (Ачыл. 21:5). Иегова Иоаннды јаҥыс ла «бичи» деген эмес, је нениҥ учун бичиир керек деп јартап берген. Нениҥ учун дезе «бу сӧстӧр чындык ла чын». Карын Иоанн Кудайга сӧсуккур болуп, бу сӧстӧрди бичип салган! Мынаҥ улам Иегованыҥ јердиҥ ӱстинде рай эдерге турган амадузын билип алганыс ла ол керегинде шӱӱп сананар аргалу.

12. Иегова: «Бӱтти!» — деп нениҥ учун айткан?

¹² Иегова оноҥ ары база кандый сӧстӧр айдат? Ол: «Бӱтти!» — деген (Ачыл. 21:6). Иегова келер ӧйдӧ болотон рай керегинде судур эмди ле бӱдӱп калган этире айдат. Ол мынайып нениҥ учун айдар аргалу? Нениҥ учун дезе ого бойыныҥ амадузын бӱдӱрерге кем де, не де буудактап болбос. Анайда ок Иегованыҥ берген сӧзине бӱдерге јараар деп кӧргӱзип турган база бир сӱреен тыҥ кере кӧрӱп ийектер.

«МЕН — АЛЬФА ЛА ОМЕГА»

13. Иегова: «Мен — Альфа ла Омега» — деп нениҥ учун айткан?

¹³ Ӧрӧги айдылганыла болзо, Ачылта деп бичикте Иегова Иоаннга бойы айткан ӱч учурал бичилген (Ачыл. 1:8; 21:5, 6; 22:13). Бу учуралдардыҥ кажызында ла Иегова: «Мен — Альфа ла Омега» — деп айдат. Альфа — грек алфавиттиҥ баштапкы буквазы, а омега — калганчызы. Иегованыҥ «Альфа ла Омега» деп айтканы ол та нени де эдип баштаган болзо, оны учына јетире эдет деп кӧргӱзет.

14. а) Иегова, сӱрлеп айтса, качан «Альфа» деп айтканын ла качан «Омега» деп айдарын јартап беригер. б) Башталганы 2:1—3-теги сӧстӧр кандый кере берет?

¹⁴ Иегова Адам ла Еваны јайаган ла кийнинде јер ле улус керегинде амадузын јарлап ийген. Агару Бичикте: «Кудай олорды алкап, айткан: — „Ӧзигер, кӧптӧгӧр, јерди толтырып ээлегер“» — деп айдылган (Баш. 1:28). Ол ло ӧйдӧ Иегова, сӱрлеп айтса, «Альфа» деген. Иегова амадузын јартап берген: Адам ла Еваныҥ толо кемдӱ, сӧсуккур балдары јердиҥ ӱстин толтырып, рай эдип салар. А качан бу сӧстӧр бӱдӱп калза, Иегова, сӱрлеп айтса, «Омега» деп айдар. Бу андый ла болор деп, Иегова јерди ле теҥерини јайаган ла кийнинеҥ сӧзин берген. Бис оны Башталганы 2:1—3-те (кычырыгар) кычырадыс. Ондо айдылганыла, Иегова јетинчи кӱнди агару деп айткан. Анайып, бу кӱнниҥ учында Иегова бастыра амадузын бӱдӱрип салар деп керелеген.

15. Нениҥ учун Сатананаҥ улам Иегованыҥ амадузы бӱтпес деп билдирген?

¹⁵ Адам ла Ева Иеговага удура тӱймеен кӧдӱрип, кинчектӱ болуп калган. Анайып бала-барказына да кинчек ле ӧлӱм кӧчкӧн (Рим. 5:12). Бу айалгага Сатананыҥ кирижип ийгенинеҥ улам, Иегованыҥ јерди толо кемдӱ, сӧсуккур улусла толтырар деген амадузы бӱтпес деп билдирген. Эмди дезе Кудай «Омега» деп айдып болбос по? Сатана Иегованыҥ амадузын бӱдӱрерге јолды туйуктап салган деп сананган болор. Ол мынайда сананардаҥ айабас болгон, Иеговада кижилик аайынча амадузын бӱдӱретен аргалар кӧп эмес. Андый аргалардыҥ бирӱзи — Адам ла Еваны јоголтып, толо кемдӱ ӧскӧ улусты јайаары. Је Иегова мынайып эткен болзо, Дьявол оны тӧгӱнчи деп айдар эди. Нениҥ учун дезе Башталганы 1:28-те Иегова Адам ла Евага олордыҥ бала-барказы јерди толтырар деп айткан.

16. Нениҥ учун Сатана Иегованы баштап алганын учына јетиргизип болбос деп сананган?

¹⁶ Сатана база кандый эп-арга керегинде сананган болор? Иегова Адам ла Евага балдарлу болзын деп јараткан да болзо, бу балдар качан да толо кемдӱ болбос деп сананган болор (Эккл. 7:20; Рим. 3:23). Анайып, ол Иегованы баштап алган немезин учына јетире јетиргизип болбогон деп бурулаар эди. Нениҥ учун дезе Сатананыҥ сананганыла болзо, Иегованыҥ јер ле улус аайынча амадузы качан да бӱтпес эди.

17. Иегова Сатананыҥ пландарын канайып бузып салган ла мынаҥ улам не болор? (Јурукты база кӧрӱгер.)

¹⁷ Иегова Сатананыҥ ончо пландарын бузып салган (Сар. 92:5). Ол Адам ла Евага балдарлу болзын деп јараткан. Мынаҥ улам Сатанада Иегованы тӧгӱнчи Кудай деп бурулаар арга јок болгон. Анайда ок ол Иегованы керекти баштап алала, учына јетиргизип болбогон деп бурулаар да аргазы јок. Нениҥ учун дезе Кудайдыҥ амадузыла, «калдык» (ЈТ) болор учурлу болгон. Ол «калдык» бойыныҥ јӱрӱмин толынты эдип береле, Адам ла Еваныҥ сӧсуккур балдарын аргадап алар эди (Баш. 3:15; 22:18). Иегова мындый алтам эдер деп, Сатана сананбаган да. Нениҥ учун? Нениҥ учун дезе Иегованы мындый алтам эдерге сӱӱш кӱӱнзеткен (Матф. 20:28; Иоанн 3:16). А Сатана мындый сезимди билбес, ол јӱк ле бойын сананат. Толынтыныҥ тузазы кандый? Христостыҥ башкарган бир муҥ јылдыҥ учында, бастыра јердиҥ ӱстинде Адам ла Еваныҥ толо кемдӱ, сӧсуккур бала-барказы јадар. Анайып, Иегованыҥ амадаганы бӱдӱп калар. Ол тушта Кудай, сӱрлеп айтса, «Омега» деп айдар.

ИЕГОВАНЫҤ СӦЗИНЕ БӰДӰМЈИНИ КАНАЙЫП ТЫҤЫДАР?

18. Јердиҥ ӱсти рай болуп калар деп кандый керелер бар? («Иегованыҥ берген сӧзине бӱдетен ӱч шылтак» деген рамканы кӧрӱгер.)

¹⁸ Бу јӧрмӧлдӧ Иегова јердиҥ ӱстин рай эдип салар деп кӧргӱзип турган керелерди кӧрдис. Баштапкызында, Иегова бойы сӧзин берген. Ачылта деп бичикте мынайып айдылган: «Ширееде Отурганы айткан: — „Бат, ончозын јаҥы эдип јайап јадым!“» Иеговада амадузын бӱдӱрерге ойгор до, кӱч те, кӱӱн де бар. Экинчизинде, ол айткан сӧзине бир де алаҥзыбай јат. Иегова оны бӱдӱп калган этире кӧрӧт. Оныҥ учун ол мынайып айткан: «Бу сӧстӧр чындык ла чын», «Бӱтти!» Ӱчинчизинде, Иегова нени баштаган, оны учына јетиргизет. Нениҥ учун дезе ол бойын «Альфа ла Омега» деп айткан. Иегова Сатананы тӧгӱнчи ле ол оныҥ амадузына бир де буудак јетирип болбос деп керелеер.

19. Кижиге Кудайдыҥ берген сӧзине бӱдерге кӱч болзо, слер нени эдер аргалу?

¹⁹ Јарлаар иште Иегованыҥ берген сӧзи керегинде куучындап турзагар, Иеговага бӱдӱмјигер тыҥып јат деп ундыбагар. Је кижиге Ачылта 21:4-тӧги сӧстӧрди кычырып ийеристе, ол кижи: «Бу сӧстӧр чӧрчӧккӧ тӱҥей» — деп айткан болзо, слер ого нени айдар эдеер? Темдектезе, оноҥ арыгы 5 ле 6 ӱлгерлерди кычырып ийеле, оны јартап беригер. Бу ӱлгерлердиҥ алдында Иегова бойыныҥ колын салып койгон деп айдарга јараар. Анайып, Кудай берген сӧзин бӱдӱрер деп керелеп салганын кӧргӱзип береригер (Иса. 65:16).