Иисус Иегованыҥ адын сӱреен баалаган

1, 2. а) Иисус божоор алдында эҥирде нени эткен? б) Бу јӧрмӧлдӧ бис кандый сурактар шӱӱжерис?

Б. Э. 33 јылы, 14 нисан, четвергтиҥ орой эҥири. Иисус, удабас оны садып ийер, бурулу деп јаргылаар, анайда ок кыйнап ӧлтӱрер деп билген. Ол чындык апостолдорыла Иерусалимде тураныҥ ӱстиги кыбында аҥылу эҥирди ӧткӱрип божотты. Иисус ӱренчиктерине кӧп јылу сӧстӧр айткан. Оноҥ айылдаҥ чыгардаҥ озо, јаан учурлу мӱргӱӱл айтты. Ол мӱргӱӱл Иоанныҥ сӱӱнчилӱ јарыныҥ 17-чи бажалыгында бичилген.

² Иисустыҥ не керегинде сананганы оныҥ мӱргӱӱлинеҥ канайып кӧрӱнет? Иисус јерде иштеп турарда, баштапкы јерге нени тургускан? Бу сурактардыҥ карууларын шӱӱжип ийектер.

«МЕН ОЛОРГО АДЫҤДЫ АЧТЫМ»

3. Иисус «мен сениҥ адыҥды ачтым» деп айдып, нени айдарга сананган? (Иоанн 17:6, 26).

³ Иисус: «Мен сениҥ адыҥды ачтым» — деп мӱргӱген. Ол бу шӱӱлтени бойыныҥ мӱргӱӱлинде эки катап айткан. (Иоанн 17:6, 26 кычырыгар.) Ол нени айдарга сананган? Оныҥ ӱренчиктери Кудайдыҥ адын билбеген бе? Јок эмей, билген. Нениҥ учун дезе олор еврей укту улус болгон. Бу ат Еврей Бичимелдерде муҥдар тоолу катап туштайт. Айдарда, Иисус Кудайдыҥ ады Иегова деп, јӱк ле ӱреткен эмес, је ол кандый Кудай деп јартаган. Темдектезе, оныҥ кылык-јаҥдары, амадулары ла керектери керегинде. Нениҥ учун дезе Иегованы Иисустаҥ јакшы кем де билбес.

4, 5. а) Биске та кемниҥ де ады канайып јуук болуп калар? Тем куучындап беригер. б) Иисустыҥ ӱренчиктери недеҥ улам Иегованы јакшы билип алар аргалу болгон?

⁴ Биске та кемниҥ де ады канайып јуук болуп калар аргалу? Слердиҥ јуунда Александр деп атту аксагал бар болзын. Ол хирург болуп турган. Слер бу аканы кӧп јылдардыҥ туркунына билереер. Бир катап слерге медицинский болуш керек боло берерде, ол слерге операция эдип, јӱрӱмеерди аргадап јат. Эмди слер бу аканыҥ адын угуп, ол слерге нени эткенин сананараар эмей. Александр деп ат слерге јӱк ле таныш аксагалдыҥ ады эмес, је слердиҥ јӱрӱмеерди аргадаган врачтыҥ ады болот.

⁵ Анайып ла Иисустыҥ ӱренчиктери Иегованыҥ адын билер болгон. Је Иисустыҥ болужыла олорго бу ат оноҥ јуук болуп калган. Нениҥ учун анайып айдарга јараар? Нениҥ учун дезе Уулы Адазынаҥ бастыра јанынаҥ тем алган. Ӱренчиктер Иисустыҥ канайып ӱреткенин угуп, улуска канайып баштанганын кӧрӱп, Иегова керегинде оноҥ кӧпти билип алатан (Иоанн 14:9; 17:3).

«МЕГЕ БЕРГЕН БОЙЫҤНЫҤ АДЫҤ УЧУН»

6. Кандый учурыла Иегова Иисуска бойыныҥ адын берген? (Иоанн 17:11, 12).

⁶ Иисус ӱренчиктери керегинде мынайып мӱргӱген: «Агару Ада, меге берген бойыҥныҥ адыҥ учун олорды корула». (Иоанн 17:11, 12 кычырыгар.) Бу сӧстӧр эмди Иисусты Иегова деп адаарга јараар деп кӧргӱзет пе? Јок. Нениҥ учун дезе Иисус: «Бойыҥныҥ адыҥ учун» — деп айткан. Айдарда, Иегованыҥ ады Иисустыҥ ады боло бербеген. Айса кандый учурыла Иегова Иисуска адын берген? Иисус јерге келип, Адазыныҥ адынаҥ кайкалдар эдип, улуска јарлаган (Иоанн 5:43; 10:25). Оноҥ Иисустыҥ адыныҥ учуры да «Иегова — аргадаачы» болот. Айдарда, Кудайдыҥ ады ла Уулыныҥ ады бой-бойыла колбулу.

7. Нениҥ учун Иисус Иегованыҥ адынаҥ куучындаар аргалу болгон? Тем айдып беригер.

⁷ Тем кӧрӱп ийектер. Посол ӧскӧ ороондо бойыныҥ башкараачызыныҥ адынаҥ айдар аргалу, оныҥ учун оныҥ сӧстӧри башкараачызыныҥ айткан сӧстӧри болот. Анайып ла Иисус улусла Иегованыҥ адынаҥ куучындашкан (Матф. 21:9; Лука 13:35).

8. Иисус јерге келердеҥ озо, Иегованыҥ адынаҥ канайып иштеген? (Чыгыш 23:20, 21).

⁸ Агару Бичикте Иисус Сӧс деп адалган. Нениҥ учун дезе Иисус ажыра Иегова улуска ла ангелдерге башкартулар берет (Иоанн 1:1—3). Темдектезе, чӧл јерде Израиль албатыны кичеезин деп, Иегованыҥ тургускан ангелы Иисус болгон болор. Иегова албатызына бу ангелге сӧсуккур болзын деп јакарып: «Ондо мениҥ адым» — деп айтканa. (Чыгыш 23:20, 21 кычырыгар.) Анайып Иегова Иисусты ол тургускан деп кӧргӱскен. Анайда ок Иегованыҥ адын корулаарында ла агарулаарында эҥ јаан ишти Иисус бӱдӱрип јат.

«АДА, АДЫҤДЫ МАКТАТКЫН!»

9. Иисус Иегованыҥ адын тоогон деп недеҥ кӧрӱнет?

⁹ Јерге келердеҥ де озо, Иисус Иегованыҥ адын тооп јӱретен. Јерге келерде, оныҥ бастыра керектеринеҥ Кудайдыҥ адын анайып ла тооп турганы кӧрӱнген. Јердеги ижиниҥ учында Иисус Адазына айткан: «Ада, адыҥды мактаткын!». Ол ло ӧйдӧҥ Адазы теҥеридеҥ ого: «Мактаттым, база да мактадарым!» — деп айткан (Иоанн 12:28).

10, 11. а) Иисус Иегованыҥ адын канайып мактаган? (Јурукты база кӧрӱгер.) б) Нениҥ учун Иегованыҥ адын агарулап, корулаар керек?

¹⁰ Иисус Адазыныҥ адын база мактаган. Ол улуска Кудайдыҥ сӱреен јакшы кылык-јаҥдары ла кайкамчылу керектери керегинде куучындап туратан. Анайда ок Иисус бойыныҥ керектериле Кудайдыҥ адын агарулап, корулаганb. Иисус Кудайдыҥ адын агарулап, корулаары сӱреен керектӱ деп, ӱренчиктерин мӱргӱӱрге ӱредип турала, кӧргӱскен. Ол айткан: «Теҥеридеги Адабыс! Улус сениҥ адыҥды тооп јӱрзин» (Матф. 6:9).

¹¹ Нениҥ учун Иегованыҥ адын агарулап, корулаар керек болгон? Нениҥ учун дезе Эдем садта, Сатана Иегованы јамандап салган. Ол Иегованы, Адам ла Еваны тӧгӱндеп, олордоҥ јакшы та нени де јажырып турган деп айткан (Баш. 3:1—5). Мынайып Сатана Кудайды оныҥ эткени јастыра деп бурулап, јакшы адын уйатка тӱжӱрген. Кийнинде, Иовтыҥ ӧйинде, Сатана улусты јӱк ле та нени де аларга болуп, Иеговага иштеп турган деп бурулаган. Анайда ок ол бир де кижи Иегованы чыннаҥ сӱӱбей турган, оныҥ учун кӱчтер боло ло берзе, ого иштебей барар деп айткан (Иов 1:9—11; 2:4). Иегова ба, эмезе Сатана тӧгӱнчи бе деп, ончозы кӧрӱп ийзин деп ӧй керек болгон.

«ЈӰРӰМИМДИ БЕРИП ЈАДЫМ»

12. Иисус Иегованыҥ адын сӱӱп турганынаҥ улам нени эдерге белен болгон?

¹² Иисус Иегованы сӱӱп турганынаҥ улам, оныҥ адын агарулаарга ла корулаарга, бастыра ийде-кӱчинеҥ албаданган. Иисус «Јӱрӱмимди берип јадым» — деп айткан (Иоанн 10:17, 18). Ол Иегованыҥ ады учун јӱрӱмин де берерге белен болгонc. Баштапкы толо кемдӱ улус, Адам ла Ева, Иегованаҥ тууралап, Сатананыҥ јанын талдап алган. Олорго кӧрӧ, Иисус бойыныҥ кӱӱниле јерге келип, Адазын сӱӱп турган деп кӧргӱскен. Ол бастыра јӱрӱминиҥ туркунына Адазына чындык болуп јӱрген (Евр. 4:15; 5:7—10). Керек дезе «керӱ агашта кыйынды чыдажып ӧдӱп», учына јетире чындык арткан (Евр. 12:2). Анайып ол Иегованы ла оныҥ адын сӱӱп турган деп керелеген.

13. Нениҥ учун Иисус Сатана тӧгӱнчи деп, ончозынаҥ артык кӧргӱзер аргалу болгон? (Јурукты база кӧрӱгер.)

¹³ Иисус бастыра бойыныҥ јӱрӱмиле Иегова тӧгӱнчи эмес, је Сатана тӧгӱнчи деп кӧргӱскен (Иоанн 8:44). Теҥериде де, јерде де јӱргендердеҥ Иегованы эҥ јакшы Иисус билген. Оныҥ учун Сатананыҥ сӧстӧринде эмеш те чын бар болгон болзо, ол билер болор эди. Је Иисус Иеговага бир де алаҥзыбаган. Ол учына јетире Кудайдыҥ јакшы адын корулаган. Керек дезе Иегова Иисусты артырып салган деп билдирерде, ол ого чындык артып, ӧлӧргӧ белен болгон (Матф. 27:46)d.

«СЕНИ ЈЕРДЕ МАКТАТТЫМ, МЕГЕ ЭТСИН ДЕП ЈАКЫП САЛГАНЫҤДЫ БӰДӰРДИМ»

14. Иегова Иисусты чындык артканы учун канайып кайралдаган?

¹⁴ Иисус божоор алдында тӱнде Иеговага мынайып айткан: «Сени јерде мактаттым, меге этсин деп јакып салганыҥды бӱдӱрдим». Иисус Иегова оны чындык артканы учун кайралдаар деп алаҥзыбаган (Иоанн 17:4, 5). Андый ла болуп калды. Адазы оны сӧӧк салатан јерге артыргыспады (Ап. ижи 2:23, 24). Ол уулын тирилтип, теҥериде эҥ бийик јаҥ берген (Флп. 2:8, 9). Кийнинде, Иисус Кудайдыҥ Башкарузында Каан болуп калган. Бу Башкару нени эдер? Каруузын Иисустыҥ мӱргӱӱлинеҥ кычырадыс: «Сениҥ Башкарууҥ јерге келзин. Сениҥ кӱӱниҥ теҥериде чилеп, јерде де бӱтсин» (Матф. 6:10).

15. Иисус удабас нени эдер?

¹⁵ Удабас Иисус Кудайдыҥ ӧштӱлериле јуулажып, Армагеддондо казыр, јаман улусты јоголтып салар (Ачыл. 16:14, 16; 19:11—16). Оноҥ ол Сатананы «тӱби јок јерге таштап» ийер. Бу јерди ӧлӱмле тӱҥдештирерге јараар, Сатана ондо нени де эдип болбос (Ачыл. 20:1—3). Иисус бир муҥ јылдыҥ туркунына башкарар ӧйинде јерде амыр-энчӱни орныктырып, улусты толо кемине экелер. Анайда ок божогон улусты тирилтип, бастыра јердиҥ ӱстин рай эдип салар. Ол тушта Иегованыҥ амадузы бӱдӱп калар! (Ачыл. 21:1—4).

16. Иисустыҥ бир муҥ јылга башкарган кийнинеҥ јӱрӱм кандый болор?

¹⁶ Христостыҥ бир муҥ јылга башкаратан ӧйиниҥ кийнинде јӱрӱмди сананып ийзеер де. Улустыҥ кинчеги ле толо кеминде эмес болгоны јоголып калар. Олорго кинчектери учун толынты тайылгага тайанып, Кудайдаҥ јаманын таштазын деп сураары керек јок болор. Анайда ок улустыҥ Кудайла колбулары орныктырылып калганынаҥ улам, ортокчы база керек јок болор. Оноҥ «калганчы ӧштӱ — ӧлӱм, јоголтылар». Божогон улус тирилип келер. Јердеги ончо улус толо кеминде болуп калар (1 Кор. 15:25, 26).

17, 18. а) Бир муҥ јылдыҥ кийнинеҥ не болор? б) Иисустыҥ башкаратан ӧйи тӱгензе, ол нени эдер? (1 Коринфтегилерге 15:24, 28). (Јурукты база кӧрӱгер.)

¹⁷ Бир муҥ јыл ӧткӧн кийнинеҥ не болор? Иегова агару ла справедливый Кудай деп, база кем де, качан да алаҥзыбас. Нениҥ учун? Эдем садта Сатана Иегованы улусты тӧгӱндеп турган, анайда ок улусла сӱӱш јок башкарып турган деп бурулаган. Је ол ӧйдӧҥ бери Кудайды тооп турган улус тӱҥей ле болгон. Олор бастыра бойыныҥ јӱрӱмиле Кудайдыҥ Башкарузы эҥ јакшы деп кӧргӱскен. Бир муҥ јылдыҥ кийнинеҥ Кудайдыҥ ады тӧгӱннеҥ аруталып калар. Анайып ол улусты сӱӱп турган теҥеридеги Ада деп бойын кӧргӱзер.

¹⁸ Ол тушта Сатананыҥ Иегова керегинде айтканы ӱзе тӧгӱн деп, јарт кӧрӱне берер, андый сурак база качан да турбас. А Иисус башкаратан ӧйи тӱгензе, нени эдер? Ол база Сатана ла чылап Иеговага удура чыгар ба? Јок. (1 Коринфтегилерге 15:24, 28 кычырыгар.) Ол башкаратан јаҥды кайра Адазына берип, ого багынар. Эйе, Сатанага кӧрӧ, Иисус Адазын сӱӱп турганынаҥ улам ӱзе немени артыргызып саларга белен.

19. Иисус Иегованыҥ адын тооп турган деп недеҥ кӧрӱнет?

¹⁹ Иегова Иисуска бойыныҥ адын бергенинде кайкаар неме јок! Кудай Иисусты бойыныҥ адынаҥ јерге ийерде, Иисус Адазыныҥ айтканын чике бӱдӱрип салган. Бу јӧрмӧлдӧҥ кӧргӧнисле, Иисуска Кудайдыҥ ады сӱреен баалу болгон. Оныҥ ады учун ол бойыныҥ јӱрӱмин берип ийген, анайда ок бир муҥ јылдыҥ кийнинеҥ башкаратан јаҥды Адазына сӱӱнип, берип ийер. Бис Иисустаҥ неге ӱренер аргалу? Бу керегинде келер јӧрмӧлдӧҥ шӱӱжип ийерис.