Zaburi
Pa Daudi.
144 Dong’ pak ubed ni Yehova ma Cana para,
Ma ponjo cinga pir ali,
Nyig cinga pi lwiny.
2 Etie mer para ma lokere ngo man ot ma tek para,
Kapondo para ma museme* man jalarna,
Ban para man Ng’atu m’avogara i bang’e,
En e Ng’atu ma jwigo dhanu i the loc para.
3 E Yehova, dhanu e tie ang’o ma nia inen bang’e,
Man wod dhanu ma tho e, ma nia iketh wii i kume?
4 Dhanu tie ve lietho;
Nindo pare calu tipopiny ma kadhu akadha.
5 E Yehova, lung’ polo peri piny man lor;
Mul gudi man keth giduny yiro.
6 Keth lukoth umil man ilal judegi;
Kil athero peri man nyoth wigi.
7 Riey cingi ku malu;
Lara man bodha kud i pii m’udhenyini,
Kud i cing’* juwirok,
8 Ma dhoggi yero vupo
Man ma giting’o cing’gi mir acwic pi nikwong’o kwong’ mi vupo.*
9 E Mungu, abiwero iri wer ma nyen.
Abiwero iri wer mi pak* ku jamgoyo wer ma thondhe apar,
10 Pilembe imiyo aloci* ni jubim,
Ibodho jatic peri ma Daudi kud i lak palamularu mi nek.
11 Lara man bodha kud i cing’ juwirok,
Ma dhoggi yero vupo
Man ma giting’o cing’gi mir acwic pi nikwong’o kwong’ mi vupo.
12 E wotwa gibibedo calu lum m’utwii ma nyen ma dongo nyapio pio,
Nyigwa ke calu mbegi ma juruko ko gul mi kal.
13 Dero mwa bipong’o haw ku kwond piny ceke;
Lim mwa binyay i podho mwa wang’ elufu, wang’ elufu apar (10 000).
14 Dhieng’ mwa ma gidhuro gibinwang’iri ngo kud ariti, kadi gibivogo de ngo;
Kok mi can bibedo mbe i lela mwa ma lac.
15 Jumutoro gi dhanu ma lembe tie igi kumeni!
Jumutoro gi dhanu ma Mungu migi tie Yehova!