Zaburi
148 Wupak Yah!*
Wupak Yehova niai kud i polo;
Wupake i kaka ma malu.
2 Wupake, wu malaika pare ceke.
Wupake, wun udul askari pare ceke.
3 Wupake, wu ceng’ ku dwi.
Wupake, wu nyikaluku ceke m’uberieny.
4 Wupake, E wu polo ma malu ngbir*
Man wun wu pii ma n’i wi polo.
5 Dong’ gipak nying’ Yehova,
Kum egam eng’olo lembe man gicwiyiri.
6 Eketho gicungo nging’ nging’ rondo ku rondo;
Ewodho cik ma bikadhu ngo.
7 Wupak Yehova niai kud i ng’om,
Wu giracwiya ma dongo mi nam man pii ma thuc ceke,
8 Wu lukoth man lungu pei, wu pei man afuru ma col,
Wu yamu ma tek, ma wubeworo lembe pare,
9 Wu gudi man ungulu gudi* ceke,
Wu yen ma cego nyinggi man yend tido ceke,
10 Wu lei mi lum man lei ceke mi pacu,
Wu giracwiya ma wumol ku korwu man winyo,
11 Wu jubim mi ng’om man wu thek ceke,
Wu judongo ma wijo man jupoklembe ceke mi ng’om,
12 Wun aradu ma co man aradu ma nyir,*
Wu ju m’utii kud aradu ceke karacelo.*
13 Dong’ gipak nying’ Yehova,
Kum nyinge kende re ma ni malu ma jucopo tundo ngo i bang’e.
Dwong’ pare n’i wi ng’om ku wi polo.
14 Ebimedo tego* mi dhanu pare,
Pi nimiyo pak ni dhanu ceke ma gigwoko bedoleng’ migi ire,
Ni wot Israel ma tie dhanu ma ni ceng’ini kude.
Wupak Yah!*