Isaya
13 Atwong’a ma Isaya ma wod Amoz uneno i gin ma wok i wang’ pi Babeli:
2 “Wuting’ ayi* malu iwi got cana ma wiye lelele.
Wulwong’gi, wulek cingwu,
Kara gimond i dhugola mi weg yung.
3 Adaru miyo cik ni ju m’ang’iyo.*
Adaru lwong’o jurumony para pi ninyutho kwinyo para,
Jupara m’ubefoyiri ku kuhaya.
4 Wuwinji! Udul dhanu n’i wi gudi;
Dwandgi winjere ve gitie dhanu ma wendgi lee dit!
Wuwinji! Woy mi ker,
Mi thek m’ucokiri karacelo!
Yehova mir udul ubecoko dhug udul mony pi lwiny.
5 Gibebino niai kud i ng’om ma bor,
Niai kud i tung’ polo,
Yehova ku jamlwiny mi kwinyo pare,
Pi nikelo nyoth iwi ng’om zoo.
6 Wugoy nduru, kum nindo pa Yehova dhingo!
Ebibino ni nyoth m’uai i bang’ Jategokpo.
7 Pi thelembe maeno re ma cing’ ceke bikwiyo,
Man adunde dhanu ceke biloy ni lworo.
8 Ndiri udaru maku dhanu ma rac.
Ajakajaka ku remo ugoyogi,
Calu dhaku m’ubegonyere.
Gibeneniri i kindgi ku zungo,
Wang’gi ubogere calu mac nikum ndiri.
9 Nen! Nindo pa Yehova ubebino,
Ebino m’e ger, m’e kwiny, man m’etie ku ng’eicwiny ma lake tek,
Pi niketho ng’om udok ni jamzungo,
Man nidaru judubo m’i ng’om pet kud i iye.
10 Kum nyikaluku mi polo ku njuru* migi
Biwodho ngo der migi;
Ceng’ bidoko ma col kinde m’ebewok,
Man dwi bicaru ngo derne.
11 Abipenjo wel i bang’ ng’om ma jubedo i wiye pi racu pare,
Man i bang’ jutimrac pi kosa migi.
Abijigo doro mi ju ma rikini,
Man abijwigo ting’iri mi weg adici.
12 Abiketho dhanu ma tho bidoko tak tak nisagu mola ma kwar ma julilo,
Man dhanu bidoko tak tak nisagu mola ma kwar mir Ofir.
13 Pi thelembe maeno re m’abiketho polo biyengere,
Man ng’om biyengere, ebiai cen ku kakare
Nikum kwinyo pa Yehova mir udul i nindo mi ng’eicwiny pare ma lake tek.
14 Ng’atuman bidok i bang’ juthugi ma dhe;
Ng’atuman biringo i ng’om thugi ma dhe calu amur ma juriemo,
Man calu udul lim ma ng’atu m’ucoko dhoggi mbe.
15 Ng’atu moko ci ma jubinwang’u jubicobo iye plu,
Man ng’atu moko ci ma jubimaku bipodho i lak palamularu.
16 Jubinyadhu i awiya migi nziki nziki i wang’gi,
Jubiyaku udi migi,
Man jubimaku mon migi ku kero.
17 Nen, abeting’o Jumedi i kumgi,
Gin ma gineno mola ma tar ni gin moko ngo
Man ma mola ma kwar nyayu ngo anyong’a i igi.
18 Athero migi biyeco i awobi;
Kisa binegogi ngo i kum nying ic,
Kadi ngisi i kum awiya.
19 Man Babeli, ma dwong’* mi kerne ukadhu mi ker mange zoo,
Leng’o ku doro mi Jukaldayo,
Bibedo calu Sodoma ku Gomora kinde ma Mungu ung’ielogi.
20 Jubibedo ngo nyanok de i iye,
Man ebibedo ngo ni kabedo i kind dhanu m’utuk ceke.
Jaarabia moko mbe ma biguro hema pare keca,
Man jakwac moko mbe ma biketho udul lim pare uyom keca.
21 Yedi mi langa bivuto keca,
Tula bipong’o udi migi.
Udo bibedo keca,
Man diegi mi lum* bigoyo undilo keca.
22 Yedi mi lum biwak i udi pare ma wiw,
Man utho biwak i pacu pare ma beco.
Saa pare dhingo, man nindo pare bing’adu ngo.”