Isaya
34 Wucor ceng’ini pi niwinjo, wu thek,
Man wucik ithwu, wu dhanu.
Wek ng’om ku piny m’upong’e uwinji,
Ng’om ku piny ceke m’ucek i iye.
2 Kum ng’eicwiny pa Yehova n’i kum thek ceke,
Man kwinyo pare n’i kum udul mony migi ceke.
Ebinyothogi;
Ebimiyogi i cing’ junek.
4 Udul mony ceke mi polo bitop,
Man polo bidolere calu kithabu m’adola.
Udul mony migi ceke bithwo,
Calu ma ith ulok m’uthwo podho ko kud iwi yende,
Man calu ma ith ulam m’uner podho ko kud iwi yende.
5 “Kum i polo, palamularu para bitop ku rimo,
Ebiloro iwi Edom i pokolembe,
Iwi dhanu m’aketho pi nyoth.
6 Yehova tie ku palamularu, rimo biumo kume.
Miyo biumo kume,
Ku rimb nyithi nyogi rombe man diegi,
Ku rong’ini ma miyo mi nyogi rombe.
Kum Yehova tie ku lam i Bozra,
Nek ma dit i ng’om mir Edom.
7 Thwoni dhieng’ mi lum biloro piny kugi,
Ma thindho ku ma tek bende.
Rimo bitobo ng’om migi,
Man miyo bitobo utur migi.”
8 Kum Yehova uketho nindo mi culo kwor,
Oro mi wodho wel pi lemkesi i Sayuni.
10 Dieceng’ kadi diewor de ebinegere ngo;
Yirone bimedere niidho malu nja ku nja.
Ebidong’ ni uvuru niai i kum dhanu m’utuk cil i kum dhanu m’utuk;
Ng’atu acel de mbe ma bikadhu kud i iye rondo ku rondo.
11 Ugoro ku ceu gibikwo i iye,
Man tula ma jutunge kud ungoro gibibedo i iye.
Mungu birieyo thol mi pimo alima ma iye nanu i wiye,
Man kidi mi nyoth.
12 Weg yung pare acel de mbe ma jubilwong’ogi gidok ubimo,
Man judongo ma wijo pare ceke gibidoko gin moko ngo.
13 Ukudho bidongo i udi pare ma wiw ma jutieko ku gang’,
Ayilayila* man uboko ma kumgi juukudho i udi pare ma tek.
Ebidoko ni kabedo mir utho,
Man dwol mir udo.
14 Giracwiya mi langa birombo ku yedi ma kok akoka i iye,
Man nyogi diegi* mi gudi bilwong’o juwagi.
Eyo, winyo mir uthieno* bibedo i iye man gibinwang’u kayom.
15 Thwol ma juathero bigiero ode man ebinyolo tonge keca,
Ebitoko tonge man ebicoko dhoggi i the tipone.
Eyo, acey bicokiri keca, ma vonge ku ma wode, ng’atuman ku jadhoge.
16 Say i buku pa Yehova man isome ku dwal ma tek:
Acel de mbe m’i kindgi ma bibedo mbe,
Acel de mbe m’i kindgi ma bikoso jadhoge,
Kum dhu Yehova re m’umiyo ng’olne,
Man tipo pare re m’ucoko dhoggi karacelo.
17 En re m’e Ng’atu m’ubolo gagi pigi,
Man cinge re m’upimo kabedo ma jumiyo igi.*
Ebibedo aba migi pi nja;
Gibibedo i iye i kind dhanu m’utuk ceke.