Isaya
56 Yehova uwacu kumae:
“Wucer bang’ pokolembe m’atira man wutim bedopwe,
Kum both para ni ceng’ini
Man bedopwe para binyuthere.
2 Ng’atu m’ubetimo lembe maeni e jamutoro
Man wod dhanu m’umoko kii i kum lembene,
M’ubegwoko Sabatu man m’ubecide ngo
M’ucero cinge i kum timo lembe moko ci ma rac.
3 Jawirok m’udikere gire ku Yehova kud uyer kumae:
‘Yehova bikoya andha kud i kind dhanu pare.’
Man jamugumba* kud uyer kumae: ‘Nen! an a yen m’uthwo.’”
4 Kum Yehova uwacu ni jumugumba m’ugwoko sabatu para man m’ung’iyo lembe ma nyayu anyong’a i iya man m’umoko kii i kum lembariba para kumae:
5 “Abimiyo igi jampoy man nying’ i ot para man i gang’kidi para,
Piny ma beco nisagu awiya ma co ku ma nyir.
Abimiyo igi nying’ ma rondo ku rondo,
Nying’ ma birucere tak de ngo.
6 Pi juwirok m’udikiri gigi ku Yehova pi nitimo ire,
Pi nimaru nying’ Yehova
Man pi nibedo jutic pare,
Ju ceke m’ubegwoko Sabatu man m’ucide ngo
Man m’umoko kii i kum lembariba para,
7 Abiterogi bende i got para ma leng’
Man abiketho anyong’a binegogi i ot para mi rwo.
Abijolo lam migi m’awang’a ma boo man lam migi iwi pemlam para.
Kum jubilwong’o ot para ot mi rwo pi dhanu ceke.”
8 Rwoth Ubimo ma Malu Ngbir Yehova, m’ubecoko dhu ju m’ulal mir Israel uwacu kumae:
“M’uweko ju ma dong’ udaru cokiri, abicoko jumange de i bang’e.”
9 Wun wu yedi mi lum ceke, wubin wucam,
Wun wu yedi mi lum ceke ma wun’i luli.
10 Jukur pare gin abinga, ng’atu acel de mbe i kindgi m’uneno piny.
Gin ceke gi gwogi ma buba, gigbuyo de ngo.
Gibeyuyo ma tek man givuto; gimaru migi nindo.
11 Gi gwogi ma jubamba;
Giyeng’ ungo nyanok de.
Gi jukwac ma nyang’ ungo i lembe.
Gin ceke ng’atuman ukwanyu yo pare;
Kubang’gi ceke gibesayu ninwang’u piny i ayi m’atira ngo man giwacu kumae:
12 “Wubin! Kewek agam pigulok moko,
Man wek wamadh kong’o ma lake tek nitundo wamer.
Urwo bibedo ber calu tin, kunoke nisagu de.”