Lembanyutha ni Yohana
5 Man aneno Ng’atu m’ubedo iwi komker umaku kithabu m’adola ma jukiewo wiye yo woko ku yor i iye i cinge mir acwic, man jumwono dhu kithabune kikiki kud ayi abiro. 2 Bende, aneno malaika moko ma tek ubekok ku dwande ma dit kumae: “Ng’a m’uromo niyabu dhu kithabu m’adola maeni man nialu ayi m’i dhoge?” 3 Ento ng’atu moko mbe m’ubino ku copo mi yabu dhu kithabu m’adolane kunoke mi neno lembe m’i iye, dok ebed i polo kunoke i ng’om kadi i the ng’om. 4 E awak lee dit pilembe junwang’u ngo ng’atu moko acel de m’uromo niyabu dhu kithabu m’adolane kunoke nineno lembe m’i iye. 5 Ento ng’atu acel m’i kind judongo uyero ira kumae: “Kud iwaki. Nen! Umvor mi suru pa Yuda, m’etie ulag Daudi uloyo, pieno eromo niyabu dhu kithabu m’adolane man nialu ayi abiro ma jumwono ko dhoge.”
6 Man aneno nyathi rombo m’ubino nen ve juai juthumo ucungo i kind komker, i kind giracwiya ma kwo ang’wen man i kind judongo, tunge bino abiro man wang’e de abiro; wang’ene ubenyutho tipo abiro pa Mungu ma juoro i ng’om zoo. 7 E ndhundhu ebino man egamu kithabu m’adolane kud i cing’ mir acwic pa Ng’atu m’ubedo iwi komker. 8 Kinde m’egamu kithabu m’adolane, giracwiya ma kwo ang’wen man judongo pier ario wi ang’wen (24) gipodho i wang’ Nyathi rombo, ng’atuman m’i kind judongone ubino kud adungu man tabu mi mola ma kwar m’upong’ kud udok ma ng’wice ng’ar. (Udok ma ng’wice ng’ar ubenyutho rwo mi jumaleng’.) 9 Man gibewero wer ma nyen giwacu kumae: “Iromo ya igam kithabu m’adola man ial ayine de, kum jugam juthumi man ku rimbi ing’iewo dhanu ni Mungu niai kud i suru ceke, dhok ceke, kodhi dhanu ceke, man thek ceke; 10 iketho gidoko jubim man julam, e gibicamu ker iwi ng’om.”
11 E aneno man awinjo dwal mi jumalaika dupa i ng’et komker, man mi giracwiya ma kwo ku mi judongo; wendgi bino elufu dak swa wang’ elufu dak swa, eyo, milion dak swa, 12 man gibino yero ku dwandgi ma dit kumae: “Nyathi rombo ma jukejuthumo uromo ya jumii ire tego, lonyo, rieko, kero, yung, dwong’, man pak.”
13 Man awinjo giracwiya ceke m’i polo man m’i wi ng’om, ku m’i the ng’om man m’i nam ku piny ceke m’i igi ubeyero kumae: “Pak, yung, dwong’, man tego ubed ni Ng’atu m’ujany iwi komker man ni Nyathi rombo rondo ku rondo.” 14 Giracwiya ma kwo ang’wen giwotho dwoko wang’ werne kumae: “Amen!” E judongo gipodho piny man girwo ni Mungu.