Isaya
14 Kum Yehova bitimo kisa ni Yakobo, man ebing’iyo Israel kendo. Ebiketho gibibedo* i ng’om migi, man juwirok bidikiri kugi man gibimoko gin gigi i kum ot pa Yakobo. 2 Dhanu biting’ogi man biterogi i kabedo migi ma dhe, man ot pa Israel bicokogi kara gibed jutic ma co ku ma mon i ng’om pa Yehova; gibidwoko ju ma naka udwokogi ng’eca ni ng’eca migi, man gibidiyo ju ma naka ubed udiyogi nitimo tic ma tek.*
3 I nindo ma Yehova bimiyo iri yom nikum litho peri man woy peri, man nikum ng’eca ma tek ma juketho i wii, 4 ibibewero lembabola* ma e i kum ubimo mi Babeli:
“Nen maram ng’atu m’ubed udiyo jumange nitimo tic ma tek* ujik ko!
Nen maram masendi uthum ko!
5 Yehova uturo uluth mi jutimrac,
Uluth mi rwodhi,
6 Ng’atu m’ubed ugoyo dhanu ku ng’eicwiny thiri thiri,
Ng’atu m’ubed udiyo thek ku kwinyo ku ragedo m’umbe niweko.
7 Ng’om zoo kawoni ubeyom, ekwiyo gire.
Dhanu ubekok ku mutoro.
8 Kadok yend jenevriye karacelo ku yend tido mi Lebanon de
Anyong’a ubenegogi piri.
Gibewacu kumae: ‘Niai m’ipodho ci,
Jatong’yen moko mbe m’ubino i kumwa.’
9 Kadok Liel* ma ni piny de kume cek
Pi nijolo tundo peri.
Pilembe piri, ecewo ju ma tego migi thum i tho,
Jutelwic ceke ma weg adici* mi ng’om.
Ebeketho jubim ceke mi thek ubeai kud iwi komker migi.
10 Gin ceke gibeyero kumae:
‘In de ikwiyo ve wan?
In de idoko calu wan?
11 Judaru loro doro peri i Liel,*
Dwand jamgoyo wer peri ma juthondhe.
Ivuto iwi ukoko m’umoyiri calu pem,
Man jam um peri tie ukoko.
12 Kenen maram ipodho ko kud i polo,
Ee in m’icaru piny, wod mombwa!
Kenen maram jung’ondi ipodho ko i ng’om,
In ma nwang’u ivoyo thek!
13 Ibed iyero i adundeni kumae: ‘Abiidho i polo,
Abidodo komker para yor iwi nyikaluku pa Mungu,
Man abijany iwi got mi coko,
Thenge ma bor mandha ma yo malu.
14 Abiidho malu i die wi afuru;
Abidwokara gira calu Ng’atu ma Malu Ngbir.’
15 Ento jubilori piny i Liel,*
I the vur ma lieng’.
16 Ju m’ubeneni bineni tel,
Gibing’ii cuu mandha, man gibiwacu kumae:
‘Eni re jalwo m’ubed uyengo ng’om e ngo,
M’uketho ker ma tung’ tung’ uyengere,
17 M’uketho ng’om ma dhanu bedo i iye udoko calu langa
Man m’ung’ielo adhuranegi,
M’ukwero niweko ju m’etwiyo udok i bang’gi?’
19 Ento in jubeyi abaya m’umbe nikunyi i liel,
Calu jang yen ma judagu,
M’uronyo ju ma junego, ma jucobo ku palamularu,
M’uloro piny iwi kidi ma n’i the vur,
Calu avu ma junyono i the tielo.
20 Ibidikiri ngo kugi i liel,
Kum inyotho ng’om peri,
Inego dhanu peri.
Jubilwong’o ngo nyanok de kendo nying’ nyikway jutimrac.
21 Wuyik kanego wote
Pi dubo pa kwarugi,
Kara kud giai gimak ng’om
Man kud gipong’ ng’ombe kud adhura migi.”
22 “Abiai malu i kumgi,” Yehova mir udul uwacu.
“Man abikabu cen kud i Babeli nying’ man dong ju m’udong’, nyikwayu, man kodhi,” Yehova wacu.
23 “Man abiketho ebidoko ni kaka ma ceu re ma bedo i iye man ng’om jugu, man abiweye kud uwic mi nyoth,” Yehova mir udul uwacu.
24 Yehova mir udul ukwong’o kumae:
“Ebitimere tap calu m’akeco,
Man tap calu m’ang’olo, eno re ma gin ma bitimere.
25 Abirungo i Jaasiria i ng’om para,
Man abinyono iye iwi gudi para.
Abikabu mberembere pare kud i bang’gi,
Man abikabu ter pare kud i gokgi.”
27 Pilembe Yehova mir udul udaru ng’olo,
Man ng’a ma copo ranyu lembene?
Cinge dong’ utie arieya,
Man ng’a ma copo dole?
28 I rundi m’Ubimo Ahaz ugam utho i iye, jumiyo atwong’a ma e:
29 “Anyong’a kud unegi, Filistia, ng’atu moko ci m’i kindwu,
Nia pilembe juturo uluth pa ng’atu m’ubino goyi.
Kum kud i ulag thwol, thwol ma jukwir biwok,
Man kodhine bibedo thwol ma jumac ma tuk atuka.
30 Kinde ma kayu pa ng’atu ma mol ubecamu
Man jacan uvuto museme,
Abinego ulegi ku ndru,
Man ju m’udong’ i kindwu jubinego.
31 Goy nduru, Ee dhugang! Koki, Ee adhura!
Wun ceke cwinywu bitur, Ee Filistia!
Kum yiro ubebino niai ku yo malu,
Man ng’atu moko mbe ma bikoyere kud i ungu pare.”
32 Jubidwoko lembe nenedi ni jukwenda mi thek?
Nia Yehova udaru ketho kathere mi Sayuni,
Man nia ju ma mol mi dhanu pare binwang’u kapondo i iye.