Isaya
35 Mutoro binego langa man ng’om ngele,
Anyong’a binego pambu mi langa man ebithiwo calu safran.*
2 Ebithiwo kokoro;
Anyong’a binege man ebikok ni mutoro.
Jubimiyo ire dwong’ mi Lebanon,
Leng’o mi Karmel man mi Caron.
Jubineno dwong’ pa Yehova man leng’o pa Mungu mwa.
3 Wumii tego ni cing’ ma ng’ic,
Man wudwok cong’ ma lebe lebe tek.
4 Wuyer ni ju ma cwinygi ung’abere kumae:
“Wubed tek. Lworo kud unegwu.
Wunen! Mungu mwu bibino culo kwor.
Mungu bibino ku matira.
Ebibino man ebibodhowu.”
5 I nindo maeca, wang’ abinga biyabere,
Man ith udhing’ de biyabere.
6 I nindo maeca, weg abala bipor malu calu ruda,
Man leb buba bikok ni mutoro.
Kum pii bithwogere i langa,
Man pii bimol i pambu mi langa.
7 Ng’om ngele m’utal bidoko ni kut mir agada,
Man pii bidhenyini i ng’om ma rieu ubenego.
Kaka m’utho gibed giyom i iye,
Lum ma numu kud agada man kolo bibedo nuti.
8 Man gengi ma dit bibedo nuti keca,
Eyo, yo ma jubilwong’o nia Yo mi leng’o.
Ng’atu m’ucido biwotho ngo kud i iye.
Jukethe pi ju ma wotho i yoje;
Jakasegu moko mbe ma birwinyo pi ninwang’ere i yoje.
9 Umvor bibedo mbe keca,
Man yedi ma kwiny mi lum bibino ngo i iye.
Gibinwang’iri ngo keca;
Ju ma juwaru awara kendgi re ma biwotho i iye.
10 Ju ma Yehova uwaru bidwogo man bimondo i Sayuni ku muzira.
Anyong’a ma thum ungo bibedo i wigi calu jamker mi wic.
Mutoro kud anyong’a bibedo migi,
Man can ku cur biringo cen.