Isaya
57 Won bedopwe utho,
Ento ng’atu moko mbe m’udieng’ ku lembene.
Jubekabu ju m’ugwoko bedoleng’,
Ento ng’atu moko mbe m’uneno nia jukabu won bedopwe
Nikum masendi.
2 Emondo i kwiyocwiny.
Ju ceke m’uwotho atira gibeyom iwi kavuto* migi.
3 “Ento wun, wucor ceng’ini,
Wu wot ajoga,
Wun awiya pa won abor man pa dhaku ma won asara.
4 Wubecayu ng’a?
Wubeyabu dhogwu ma lac i kum ng’a man wubewodho lebwu ni ng’a?
Nyo wun awiya mi dubo ngo,
Awiya mi ndra,
5 Dhanu m’ava uopo i kumgi i kind yen ma dongo,
I the yen ceke m’ujany,
Ma githumo awiya i poga,*
I the cana m’ukak?
6 Makapiny peri utie karacelo ku kidi ma foth mi poga.*
Eyo, eni re ma makapiny peri.
Ikonjo igi kadok girathiera mi pigulok man imiyo giramiya.
Nyo ukwayu anyong’a unega* i kum piny maeno?
7 Iyiko kavuto peri iwi got ma wiw man m’uting’ere malu,
Man iidho kuca pi nithiero lam.
8 Ikanu ayi gin m’acwiya peri i ng’ey dhugola man i the dhugola.
Iwenja man iwodho bongu kud i kumi;
Iidho malu man iyaru kavuto peri ma lac.
Itimo lembariba kugi.
Imaru vuto kugi iwi kavuto migi,
Man ineno yom co.*
9 Iloro piny i bang’ Melek* ku mo
Man kud udok ma ng’wice ng’ar bik.
Ioro jukwenda peri bor,
E igam iloro i Liel.*
10 Iol ku wotho i yo peri ma dupa,
Ento iwacu ngo kumae: ‘Gin ma jugeno mbe!’
Inwang’u tego ma nyen.
Pi thelembe maeno re m’ivoc ungo.*
11 Ndiri ku lworo umeki i kum ng’a
M’uketho icaku cwayu ndra?
Ipoy ungo pira.
Idieng’ ungo ku lembe moko ci.
Nyo abedo ngo ling’ man aloko ngo ku ng’eya?*
Eno re m’uketho i lwora ngo.
12 Abiketho jubing’eyo ‘bedopwe’ peri ku tic peri,
Man gibimiyo ngo iri bero moko.
13 Kinde m’ibewak pi kony,
Ayi gin m’acwiya peri m’icoko dhoggi bileri ngo.
Yamu bikotogi cen,
Yuyo ma yuyo e de biweyogi cen,
Ento ng’atu ma binwang’u kapondo i bang’a bilagu ng’om
Man got para ma leng’ bidoko ni aba pare.
14 Jubiyero kumae: ‘Wuyabi, wuyabi gengi! Wuyik yo!
Wukab gin moko ci ma kierojo kud i yo mi dhanu para.’”
15 Kum Ng’atu ma bedo lir lir man m’uting’ere malu,
Ma kwo* rondo ku rondo man ma nyinge tie leng’ uwacu kumae:
“Abedo i kabedo ma lir lir man ma leng’,
Ento abedo bende ku ju ma jurungo man ma mol,
Kara adwog tipo ju ma mol
Man kara adwok cwiny ju ma jurungo.
16 Kum abijai ungo igi rondo ku rondo
Kadi abibedo ngo ku ng’eicwiny i kumgi saa ceke;
Kan ungo tipo dhanu romo kwiyo nikuma,
Kadok giracwiya ma yuyo m’acwiyo de.
17 Ng’eicwiny umaka i kum dubo pare m’ebeyenyo ko ninwang’u piny i ayi m’atira ngo;
Pieno agoye, akanu wang’a, man abino ku ng’eicwiny.
Ento emedere niwotho calu ng’atu m’ujai, m’ebelubo ko lembe ma iye yenyo.
18 Aneno kit timo pare,
Ento abikeyo kume man abitelo wiye;
Abijuko cwinye kendo man dhanu pare ma n’i lemcan bende.”
19 “Abecwiyo pak i dendhok.
Abimiyo kwiyocwiny ma thum ungo ni ng’atu ma ni bor man ni ng’atu ma ni ceng’ini,” Yehova wacu,
“Man abikeyo kume.”
20 “Ento jutimrac gi calu nam m’ubekoto ma copo cungo ngo yoo,
Man pige medere niwodho susu man ucodho.
21 Kwiyocwiny umbe ni jutimrac,” Mungu para wacu.