Isaya
33 Can i wii, i janyoth ma junyothi ngo;
I jacibe ma jucibi ngo!
Saa m’ibidaru ninyotho, in de jubinyothi.
Saa m’ibidaru nicibo, in de jubicibi.
2 Ee Yehova, bed ku kisa i kumwa.
Wageno in.
Dok tego mwa* kubang’ kugweno,
Eyo, both mwa i saa mi can.
3 Dhanu ringo nikum badwal mi yakini.
Kinde m’iai malu, thek lal mba mba.
4 Calu ma bonyo ma mvoro piny cokiri ko karacelo,
Jubicoko bende jambayeki mwu kumeno;
Dhanu bicoriri i wiye calu udul bonyo.
5 Yehova bidodere,
Kum ebedo malu ngbir.
Ebipong’o Sayuni ku pokolembe m’atira man bedopwe.
6 En re m’ebiketho nindo peri bicungo ma tek;
Both ma dwong’, rieko, ng’eyong’ec, man lworo Yehova,
Eno re m’utie lonyo pare.
7 Nen! jurukara migi ubewak i gengi,
Jukwenda mi kwiyocwiny ubewak ku can.
8 Juwenjo gengi ma dongo;
Ng’atu moko mbe m’ubewotho i yo.
9 Ng’om ubewak* man ethwo.
Lewic umaku Lebanon; edaru top.
Caron udoko calu langa,
Man Bacan ku Karmel giyengo ithgi uoy.
10 “Kawoni abiai malu,” Yehova wacu,
“Kawoni abidodara;
Kawoni abiyungara.
11 Wugamu ic mi lum m’uthwo man wunyolo soka.
Tipo mwu giwu biwang’uwu ruk calu mac.
12 Man dhanu bidoko calu nunu m’ubewang’.
Jubicwinyo mac i kumgi, calu ukudho ma jujwero.
13 Wun ma wuni bor, wuwinj lembe m’abitimo!
Wun ma wuni ceng’ini, wung’ey tego para!
14 Ndiri umaku judubo mi Sayuni;
Kum jujai ubemiel:
‘Ng’a m’i kindwa ma copo kwo kaka ma mac ma wang’u piny ruk n’i iye?
Ng’a m’i kindwa ma copo kwo ku mac ma tho ngo?’
15 Ng’atu ma wotho i bedopwe saa zoo,
Ma yero lembe m’atira,
M’ukwero nwang’u faida i ayi m’atira ngo man mir avure,
Ma cinge kwero kanyaka kakare nigame,
Ma culo ithe i kum wec mi cwiro rimo,
Man ma miyo wang’e kara kud enen gin ma rac.
16 Ng’atune bibedo malu;
Kapondo pare ma museme bibedo i odicana ma tek,
Jubimiyo mukathi pare,
Man pii pare bithum ki ngo.”
17 Weng’i bineno ubimo i dwong’ pare;
Gibineno ng’om ma bor.
18 Ibipoy* pi ndiri i adundeni man ibipenjo kumae:
“Jagor ni kani?
Ng’atu m’ubed upimo ajok ni kani?
Ng’atu m’ubed ukwanu udi ma wiw ni kani?”
19 Ibineno ngo kendo dhanu ma jucac,
Dhanu ma dhok migi nyang’ i iye tek dit,
Ma wec migi ma ku gwong’o nyang’ i iye tek.
20 Nen Sayuni, adhura mi foc mwa!
Weng’i bineno nia Yeruzalem utie kabedo m’ukwiyo gire,
Hema ma jubikabu ngo.
Gutene* jubifudho ngo nyanok de,
Man thondhe moko acel de mbe ma jubicodo.
21 Ento kuca, Yehova ma Ng’atu ma Dwong’,
Bibedo iwa calu ng’om kulo mi pii m’ariega ma lac,
Kaka ma meli dupa bicidho ngo i iye
Man kaka ma meli ma dongo bikadhu ngo kud i iye.
22 Kum Yehova en e Japoklembe mwa,
Yehova en e Jamii Cik mwa,
Yehova en e Ubimo mwa;
En re m’e Ng’atu ma bibodhowa.
23 Thol peri bigony;
Gibimaku ngo yen ma jucomo i yei
Kadi niyaru bongu mi yei.
I saa maeca jubipoko jambayeki lee;
Kadok won abala de bimaku jambayeki lee.
24 Man ng’atu ma bedo i ng’ombe biwacu ngo kumae: “Abetwoyo.”
Jubiweko kier mi dhanu ma bedo i ng’ombe.