Wateng’ yiyoyic mwa i lembang’ola pa Yehova pi ng’om ma nyen

1-2. Kwayu wawoth timo ang’o kinde ma wabekuro ng’om ma nyeni?

WABEFOYO Yehova lee dit pi lembang’ola m’etimo nia ebiwilo ng’om maeni ma rac cen ku ng’om ma nyen ma pwe. (2 Pet. 3:13) Wang’eyo ngo nia ng’om ma nyenne bibino tap awene, re lembe dupa m’ubetimere i ng’om maeni ubenyutho nia wabikuro nindo ma lee ngo.—Mat. 24:32-34, 36; Tic. 1:7.

² Ento pi kawoni, wan ceke wacikara nidwoko yiyoyic mwa udok tek i lembang’ola maeno, kadok nwang’u wadaru galu i lemandha rukani de. Pirang’o? Pilembe kadok yiyoyic ma tek de copo kwiyo. I andha, jakwenda Paulo uwacu nia koso yiyoyic tie “dubo ma moko i kumwa yot yot.” (Ebr. 12:1) Dong’ kara yiyoyic mwa kud ukwii, ubekwayu wang’ ma pol wabed wapar cuu pi lembe ma tung’ tung’ m’ubenyutho nia ceng’ini eni, Mungu bikelo ng’om ma nyen andha.—Ebr. 11:1.

3. I thiwiwec maeni wabineno lembang’o?

³ I thiwiwec maeni, wabineno yo adek ma waromo dwoko ko yiyoyic mwa tek i lembang’ola ma Yehova utimo pi ng’om ma nyen: (1) nibenyamu i lembe iwi jamgony, (2) nibeparu cuu iwi copo pa Yehova, man (3) nibekoyo saa pi nitimo lembe mi tipo. I ng’eye, wabiweco pi lemkwenda ma Yehova umiyo ni Habakuk man kite m’ebetielo ko yiyoyic mwa tin eni. Enke mi kwong’o, wakenen lembe moko ma waromo nwang’ara ko tin eni ma copo kwayu nia wabed ku yiyoyic ma tek i lembang’ola ma Mungu utimo pi ng’om ma nyen m’ubino.

LEMBE M’UBEKWAYU YIYOYIC MA TEK

4. Ng’iyong’ic ma kanigi ma kwayu nibedo ku yiyoyic ma teki?

⁴ Kubang’ ceng’, wabed wamaku yub ma kwayu yiyoyic ma tek. Ku lapor, wamaku yub m’umulo kum bedo ku jurimo, galuwang’, ponjiri, gamiri, nyo nibedo kud awiya, man tic ma wacopo timo. Dong’ wakepenjara kumae: ‘Nyo ng’iyong’ic para ubenyutho nia ayiyo andha nia ng’om maeni bikadhu akadha, man ceng’ini eni Mungu biwile ku ng’om pare ma nyeni? Kunoke nyo abed atimo ng’iyong’ic calu dhanu ma giyiyo nia tho utie ajiki mi lembe ceke?’ (Mat. 6:19, 20; Luka 12:16-21) Wabitimo ng’iyong’ic ma beco tek wadwoko yiyoyic mwa tek nia ng’om ma nyen ni ceng’ini, um ku dhok.

5-6. Pirang’o watie ku yeny mi yiyoyic ma tek i saa mi peko? Kemii lapor moko.

⁵ Wabed wanwang’ara bende ku peko ma kwayu yiyoyic ma tek. Ecopo bedo ragedo, twoyo m’umoko korodo i kumwa, kunoke lembe mange ma romo turo cwinywa. I acaki, waromo keciro peko mwa ma cwinywa tek. Re wang’ ma pol peko ma kumeno moko i kumjo pi nindo ma dupa. Pieno, kwayu wabed ku yiyoyic ma tek kara wacire man wamedara nitimo ni Yehova kud anyong’a.—Rum. 12:12; 1 Pet. 1:6, 7.

⁶ Saa ma wan’i die peko ma ndruk, waromo paru nia ng’om ma nyen pa Yehova bibino ngo zoo de. Nyo eno nyutho nia yiyoyic mwa tek ungo? Tie ngo kumeno. Wakemeku lapor moko. Ka koth udaru cwii pi yenga dupa, waromo paru ngo zoo de nia ceng’ bidok rieny kendo. Re ing’eye ceng’ dok rieny. Rom rom kumeno, ka cwinywa utur magwei, wacopo paru nia ng’om ma nyen bibino ngo zoo de. Ka yiyoyic mwa tek lundo, wang’eyo nia lembang’ola pa Mungu bipong’o. (Zab. 94:3, 14, 15; Ebr. 6:17-19) Tegocwiny maeno ketho wamedara niketho thier ma wabetimo ni Yehova i kabedo ma kwong’a i kwo mwa.

7. Wacikara nibedo ku wang’wa i kum lembang’o?

⁷ Wakewec pi tic mi lembanyong’a ma de tie lembe ma kwayu yiyoyic ma tek. Dhanu dupa ginwang’u nia “lembanyong’a” ma waberweyo igi pi ng’om ma nyen ma Mungu ung’olo nia ubebino, tie lembe ma copo timere ngo. (Mat. 24:14; Eze. 33:32) Re wacikara nibedo ku wang’wa ma kud wawek jiji ma gitie ko iwi lembe ma Yehova ubeponjo unyol i iwa bende. Kara lembe maeno kud unwang’wa, ukwayu wamedara niteng’o yiyoyic mwa. Dong’ wakenenu yore adek ma wacopo teng’o ko yiyoyic mwane.

NYAM LEMBE IWI JAMGONY

8-9. Ka wabewotho paru i lembe kilili iwi jamgony, adwogine bedo ang’o iwi yiyoyic mwa?

⁸ Yo mi kwong’o ma wateng’o ko yiyoyic mwa utie nibenyamu i lembe iwi jamgony. Jamgony ma Mungu umiyo unyutho nia andha lembang’ola pare bipong’o. Ka wabenyamu i lembe kilili iwi thelembe m’uketho Yehova umiyo jamgony man lembe ma lee m’etwonere ko, yiyoyic mwa doko tek nia lembang’ola m’etimo pi kwo ma rondo ku rondo i ng’om ma ber akeca bitimere andha. Pirang’o wabeyero kumeno?

⁹ Lembang’o m’ugam ukwayere kara jamgony umiyere? Yehova uoro wode ma kayu m’emaru akeca, ma tie jarimbe ma ceng’ini niai kud i polo kara ebin enyolere i ng’om calu dhanu m’umbe ku dubalaga. Kinde ma Yesu n’i wi ng’om, eciro kwond peko ceke. I ng’eye esendere man etho tho mi litho ma lee. Yehova uculo wel piny ma yawe mbe! Nwang’u Mungu mwa ma jamer copo weko ngo Wode usendere man utho kara nia wakwo ma ber, ke nyanok kende. (Yoh. 3:16; 1 Pet. 1:18, 19) Pi wel piny ma lee ma Yehova uculo, ebiketho andha wakwo rondo ku rondo i ng’om ma nyen.

PAR KILILI PI COPO PA YEHOVA

10. Nimakere ku Juefeso 3:20, Yehova utie ku copo mi timo ang’o?

¹⁰ Yore mir ario ma wateng’o ko yiyoyic mwa utie nibeparu kilili pi copo pa Yehova. Etie ku copo mi pong’o lembe moko ci m’eng’olo. Tin dhanu dupa beparu nia etie lembe ma copere ngo iwa nikwo rondo ku rondo i ng’om ma nyen. Re wang’ ma pol lembang’ola ma Yehova beng’olo, dhanu copo pong’e ngo nyanok de. Eno ke pilembe etie Mungu ma Jategokpo. (Yob 42:2; Mark. 10:27) Pieno, wang’ey nia lembang’ola pare copo wang’u ijo.—Som Juefeso 3:20.

11. Kemii lapor acel kud i kind lembang’ola pa Mungu ma wang’u ijo. (Nen sanduku ma thiwiye tie “Kite ma lembang’ola moko ma wang’u ijo upong’o ko.”)

¹¹ Wakenenu lembe moko ma Yehova ugam ung’olo ni dhanu pare ma con m’ubed uyenyo nen ni lembe ma copere ngo. Eng’olo ni Abraham giku Sara ma nwang’u dong’ gidaru tii nia gibinyolo nyathin ma nico. (Tha. 17:15-17) Eng’olo bende ni Abraham nia ebimiyo ng’om mi Kanan ni nyikwaye. I kind oro ma dupa ma nyikway Abraham, niwacu Juisrael gibino ng’eca i ng’om mi misiri, ugam unen ve nia lembang’ola maeno bitimere ngo zoo de. Re elund etimere. I ng’eye, Yehova uwacu nia Elizabethi ma dong’ utii binyolo nyathin. Eng’olo bende ni Maria m’ubino nyaku ma sumba nia ebinyolo Wode en e Yehovane; eno bipong’o lembang’ola mange ma Yehova ular utimo oro ma lee dit i wang’e i podho mir Eden!—Tha. 3:15.

12. Yocuwa 23:14 man Isaya 55:10, 11 ubetielo cwinywa ku lembang’o iwi copo pa Yehova?

¹² Ka wabeparu pi lembang’ola ceke ma Yehova ugam utimo man kite m’ebed epong’o kogi, wabinyang’ nia karaman etie ku copo ma lee; e yiyoyic ma watie ko i lembang’ola pare ma nia ebimiyo ng’om ma nyen bidoko tek nisagu. (Som Yocuwa 23:14; Isaya 55:10, 11.) Yiyoyic ma tek maeno biketho wabiyikara ma ber pi nikonyo jumange ginyang’ nia lembang’ola ma Mungu utimo pi ng’om ma nyen utie ngo lek kadi lembe ma juparu apara. Yehova uyero en gire pi polo ma nyen ku ng’om ma nyen kumae: “Lembe maeni gi mandha man ma jugeno.”—Nyu. 21:1, 5.

PONG’ KWO PERI KU LEMBE MI TIPO

13. Coko beteng’o yiyoyic mwa nenedi? Kekor.

¹³ Yore mir adek ma wacopo tielo ko yiyoyic mwa utie nibekoyo saa pi nitimo lembe mi tipo. Ku lapor, wakenenu bero ma wabed wanwang’u i coko mwa. Nyamego Anna, m’ugam utimo kit tic ma tung’ tung’ mi saa ceke pi oro dupa uyero kumae: “Coko udwoko yiyoyic para nging’ nging’. Kadok nang’u jakorlembe umbe ku bodho ma hai mi ponji kunoke ebeponjo lembe m’adaru ng’eyo de, re kokoro abed aii niwinjo lembe moko ma konya ninyang’ cuu i lemandha mi Biblia man ma bitielo yiyoyic para.”b M’umbe jiji, yiyoyic mwa copo doko bende tek, kinde ma wabewinjo dwokowang’ penji m’umego ku nyimego mwa gibemiyo i coko.—Rum. 1:11, 12; 10:17.

14. Tic mi lembanyong’a teng’o yiyoyic mwa nenedi?

¹⁴ Gin mange ma teng’o yiyoyic mwa utie nidikara i tic mi rweyo lembanyong’a. (Ebr. 10:23) Barbara, m’utimo ni Yehova pi oro ma kadhu 70 ukoro kumae: “Saa ceke abed anwang’u nia tic mi lembanyong’a ubeteng’o yiyoyic para. Kan abeweco akeca pi lembang’ola ma wang’u ijo ma Yehova utimo, e yiyoyic para de medere nibedo kwo man edoko tek nisagu.”

15. Ponji mwa ma segi tielo yiyoyic mwa nenedi? (Nen bende cal.)

¹⁵ Wakewec iwi lembe mange mi tipo ma teng’o yiyoyic mwa, niwacu ponji mwa ma segi. Nyamego Susan unwang’u nia kan epangu nindo m’ebitimo i iye ponji pare, eno konye lee. Ewacu kumae: “Ceng’ yenga, alar aponjo thiwiwec mi Otkur ma Wiw ma jubing’iyo iye yenga m’ubino. Kas’acel ku kas’ario, ayiko coko m’i kind yenga. I dong’ nindo m’udong’ ke, atimo lembe mange m’uneno ponji para ma segi.” Calu ma Susan belubo program mi ponji m’edaru pangu, eno uketho emedere ameda niteng’o yiyoyic pare. Nyamego Irene m’ugam utimo i kabedo mwa ma dit pi oro ma dupa unwang’u nia kan ebeponjo lembila mi Biblia, yiyoyic pare doko tek. Ekoro kumae: “Etie ira lembe mi zungo nineno kite ma lembila pa Yehova pong’o ko acel acel.”c

“EBITIMERE ANDHA’”

16. Pirang’o tielocwiny ma Yehova umiyo ni Habakuk utiye ku kony iwa tin de? (Juebrania 10:36, 37)

¹⁶ Jurutic pa Yehova moko gicaku kuro ajiki mi ng’om maeni niai con. Inen mi dhanu, ecopo nen nia ve lembang’ola pa Mungu ubegalu dit nipong’o. Re Yehova ung’eyo kite ma jurutic pare giwinjiri ko, uketho egam etielo cwiny jabila Habakuk kumae: “Ginmawokiwang’ fodi en e pi nindo ma juketho, man etimo pio i dhu kajikne, man ebicwayu ndra ngo: kadok egalu, kure; kum ebibino (ebitimere) andha, ebigalu ngo.” (Hab. 2:3) Nyo Mungu umiyo tielocwiny maeno pi bero pa Habakuk kende? Kunoke nyo wec parene utie iwa ku kony tin de? Ku kony mi tipo ma leng’, jakwenda Paulo utiyo ku wec maeno ni Jukristu ma gibekuro ng’om ma nyen bende. (Som Juebrania 10:36, 37.) Eyo, cwinywa romo bedo tek nia kadok both mwa ma jung’olo pire ubenen nia ubegalu de, re “ebibino andha, ebigalu ngo.”

17. Nyamego moko utiyo nenedi ku juk ma Yehova umiyo ni Habakuki?

¹⁷ Jurutic pa Yehova ma dupa gitiyo ku juk m’emiyo nia ‘wamedara nikuro;’ jumoko gidaru kuro pi oro ma lee. Ku lapor, nyamego Louise ucaku timo ni Yehova niai i oro 1939. Eyero kumae: “Con eca, abed aparu nia Armagedon bibino ma nang’u fodi adaru de ngo somo mi sekonder. Re Armagedon ubino de ngo. Pi oro ma dupa, abed asomo lembe ma Biblia ukoro pi dhanu ma gigam ‘gikuro pong’o mi lembang’ola pa Yehova,’ eno ugam ukonyo an bende nikuro. Asomo pi Noa, Abraham, Yozefu, ku jumange de ma gikuro pi kare ma lac ka gibin ginwang’u sukulia ma Yehova ung’olo igi. Calu ma wabino ku yiyoyic saa ceke nia lembe ma Mungu ung’olo bipong’o, eno ukonyo an ku dhanu mange de ning’eyo andhandha nia ng’om ma nyen ni ceng’ini magwei.” Jurutic pa Yehova dupa ma gidaru timo ire pi oro ma lee de gicwaku lembe maeno!

18. Ka wabeneno giracwiya, yiyoyic mwa i ng’om ma nyen doko tek nenedi?

¹⁸ Andha, ng’om ma nyen re fodi utundo ngo. Re kelund ipar pi piny moko ma waneno kumgi. Ku lapor, nyikaluku, yen, lei man dhanu wadwa. Ng’atu moko mbe ma romo piemo nia piny maeno gimbe, kadok nwang’u i wang’e gike gibedo mbe de. Tin ginuti pilembe kende kende Yehova ucwiyogi. (Tha. 1:1, 26, 27) Rom rom kumeno, Mungu mwa ukeco nia ebimiyo ng’om ma nyen. Ma jiji mbe, ebipong’o lembakeca maeno. I ng’om ma nyen, dhanu bikwo awena kud anyong’a man ma twoyo mbe i kumgi. Kinde ma saa ma Mungu uketho biromo, ng’om ma nyen bibedo nuti andha calu piny m’udhokowa ma wabeneno tin eni.—Isa. 65:17; Nyu. 21:3, 4.

19. Icopo teng’o yiyoyic peri nenedi?

¹⁹ Pi kawoni, tii ku kaka ceke m’itie ko pi nidwoko yiyoyic peri tek. Bed idwok foyofoc pi jamgony saa ceke. Par kilili iwi tego pa Yehova. Pong’ kwo peri ku lembe mi tipo. Tek itimo kumeno, icopo bedo i kind “ju ma ni kum yiyoyic man twiyocwiny gibelagu lembang’ola.”—Ebr. 6:11, 12; Rum. 5:5.