Icopo kabu jiji ma n’i ii nenedi?

1-2. (a) Jutic pa Yehova moko giromo bedo ku jiji iwi lembe ma kanigi? (b) Wabiweco iwi lembang’o i thiwiwec maeni?

SAA MOKO dhanu mi kwonde ceke gibedo ku jiji i igi.a Kepar pi Jamulembe pa Yehova moko m’aradu m’ubepenjere ka nyo andha Yehova ubedieng’ pire. Lembuno romo cere kadok ku limo batizo. Lapor mange utie p’umego moko ma saa m’ebino aradu, eng’iyo nitimo lee i tic pa Yehova kakare nidwaru sente lee. Calu ma yeny mi juruot pare ubemedere, eromo penjere ka nyo andha egam emaku yub ma cuu. Kepar bende pi nyamego moko m’utii ma tego pare jwik. Cwinye romo tur pilembe dong’ embe ku copo mi timo gin m’ebed etimo. Nyo idaru penjiri de ku penji ma calu: ‘Nyo andha Yehova ubenena? Nyo andha atimo cuu nitwonara ku piny dupa pi Yehova? Nyo fodi asu kony para nuti i wang’ Yehova?’

² Ka wanwang’u ngo dwokowang’ penji ma kumeno, gicopo bedo ku matoke ma rac iwi thier ma wabetimo ni Yehova. Pieno i thiwiwec maeni, wabineno kite ma niketho wiwa i kum cik mir ukungu mi Biblia copo konyo kowa tek wabepenjara (1) ka nyo andha Yehova dieng’ piwa, (2) ka nyo andha wagam wamaku yub ma cuu kunoke (3) ka nyo fodi asu kony mwa nuti i wang’ Yehova.

KITE M’ICOPO KABU KO JIJI MA N’I II

3. Wacopo kabu jiji ma n’i iwa i yo moko acel ma kani?

³ Yo moko acel ma waromo kabu ko jiji ma n’i iwa utie nilokara i bang’ Lembe pa Mungu pi ninwang’u dwokowang’ penji m’ubesendo wiwa. Tek watimo kumeno, wabinwang’u tego, wabiteng’ini i thenge mi tipo man ‘wabicungo ma tek i yiyoyic.’—1 Kor. 16:13.

4. Wacopo “[ng’iyo] cuu i lembe ceke” nenedi? (1 Juthesaloniki 5:21)

⁴ Som 1 Juthesaloniki 5:21. Biblia ubekwayuwa nia “[wang’ii] cuu i lembe ceke.” Wacopo timo kumeno nenedi? Pi ninyang’ nia gin ma wayiyo utie lemandha, ukwayu wapore ku lembe ma Biblia uyero. Wakedwog iwi aradu m’ubepenjere ka nyo pire tek i wang’ Mungu. Nyo bikwayu ejik kende kende iwi paru maeno? Ungo, bikwayu “[eng’ii] cuu i lembe ceke,” niwacu esay ninyang’ i paru pa Yehova bende.

5. Wacopo “winjo” Yehova nenedi kinde m’ebedwoko wang’ penji mwa?

⁵ Kinde ma wabesomo Biblia, “wawinjo” Yehova ubeweco i bang’wa. Ento pi ninyang’ i paru m’etie ko iwi lembe moko, kwayu watim kero ma lee. Ukwayu wasom theng Biblia m’uweco iwi lembe m’ubedieng’o cwinywa. Wacopo tiyo ku girasoma ma dilo mwa uwodho pi nitimo sayusac iwi lembene. (Rie. 2:3-6) Ukwayu warwo i bang’ Yehova utel wiwa man ekonywa wanyang’ i gin m’ebeparu iwi lembe m’ubedieng’o cwinywane. E i ng’eye, wasay cik mir ukungu mi Biblia man paru ma bikonyowa i lembene. Waromo nwang’u bende kony lee i kpawa mi Biblia m’uweco pi dhanu ma ginwang’iri i lembe m’urombo ku mwa.

6. Coko copo konyowa nenedi nikabu jiji ma n’i iwa?

⁶ “Wawinjo” bende dwand Yehova i coko mwa. Tek wacidho i coko nja, waromo winjo paru ma tap ma watie ku yenyne pi nidaru jiji ma n’i iwa i korolembe kunoke i dwokowang’ penji ma ng’atu moko umiyo. (Rie. 27:17) Dong’ kawoni wakenenu kite ma wacopo kabu ko kit jiji moko ma waromo bedo ko.

NYO ANDHA YEHOVA UBEDIENG’ PIRI?

7. Jumoko giromo penjiri ku penji ma kani?

⁷ Nyo idaru penjiri de nia, ‘Eni ndhu andha nia Yehova ubenena?’ Tek ibeparu nia tiji mbe, eromo bedo iri tek niparu nia icopo doko jarimb Jacwic mi polo ku ng’om zoo, kunoke iromo paru nia etie lembe ma copere ngo. Copere nia Daudi de ukeuparu kumeno. Iye uwang’ lii kinde m’enyang’ nia Yehova dieng’ pi dhanu, uketho epenjo kumae: “E Yehova, dhanu e tie ang’o ma nia inen bang’e, man wod dhanu ma tho e, ma nia iketh wii i kume?” (Zab. 144:3) Tek ibepenjiri ka nyo andha Yehova dieng’ piri, iromo nwang’u dwokowang’ penji maeno kani?

8. Nimakere ku 1 Samwel 16:6, 7, 10-12, Yehova neno ang’o i dhanu?

⁸ Biblia ubeponjowa nia Yehova neno dhanu ma gibeparu nia pigi tek ungo i wang’ jumange. Ku lapor, nindo moko Yehova uoro Samwel i ot pa Yese pi niciwiro acel m’i kind wote ni ubimo macen mir Israel. Yese bino ku wote abora. Elwong’o juabiro ubin i bang’ Samwel, ento eweko Daudi ma wode ma cogo.b Re karaman nwang’u en re ma Yehova ung’iye. (Som 1 Samwel 16:6, 7, 10-12.) Yehova uneno nia Daudi ubino ng’a i andha; enyang’ nia aradu maeno umare lee mandha.

9. Ang’o ma copo tego cwinyi nia Yehova dieng’ piri? (Nen bende cal.)

⁹ Kepar pi kite ma Yehova udaru nyutho ko nia eng’eyi cuu. Emiyo iri juk m’urombo ku yeny peri. (Zab. 32:8) Ibeparu ndhu andha nia ecopo timo lembuno kan eng’eyi ngo cuu? (Zab. 139:1) Tek itiyo ku juk pa Yehova man ineno kite m’ekonyi ko, e ibinyang’ andha nia ebedieng’ piri. (1 Kei. 28:9; Tic. 17:26, 27) Yehova neno kero ceke m’ibetimo pi niwore. Eneno kite peri ma beco man ebemito edok Jarimbi. (Yer. 17:10) Ebemito bende nia ijole ebed Jarimbi.—1 Yoh. 4:19.

NYO IBEPARU NIA IGAM IMAKU YUB MA CUU NGO?

10. Kinde ma wabeparu pi yub ma wamaku con, waromo penjara ku penji ma kani?

¹⁰ Saa moko i kwo, jumoko giparu pi yub ma gimaku con, man gipenjiri ka nyo andha ebino yub m’atira. Saa moko nyo gigam ging’iyo niweko tic mi sente ma lee kunoke kuloka migi m’ubino wotho ma ber pi nitimo lee i tic pa Yehova. Copere nia kawoni oro ma dupa udaru kadhu. Ento ka gibeparu pi juwagi ma gibed gitimo kugi tic ma rom man ubeyenyo nen nia gitie ku sente lee man nia kwo urombo igi, giromo penjiri kumae: ‘Nyo andha atimo cuu nitwonara ku piny dupa pi Yehova? Eni nia ng’iyong’ic maeni uketho abayu ngo gin moko andha?’

11. Ang’o m’ujebo wi jagor Zaburi mi 73?

¹¹ Tek penji ma kumeno ubesendo wii, nen kite ma jagor Zaburi mi 73 ugam uwinjere ko. Eneno dhanu moko ma gibetimo ngo ni Yehova re gitie ku yotkum ma cuu, julonyo man gimbe ku peko i kwo migi. (Zab. 73:3-5, 12) Kinde m’eneno nia ve kwo migi rombo, eparu nia ebesendere mananu nitimo ni Yehova. Paru maeno uketho ‘ebed edieng’ dieceng’ duu.’ (Zab. 73:13, 14) Evoyo paru ma rac maeno nenedi?

12. Nimakere ku Zaburi 73:16-18, ang’o m’ukonyo jagor Zaburi nivoyo paru ma rac m’ebino ko?

¹² Som Zaburi 73:16-18. Jagor Zaburi maeni ucidho i hekalu pa Yehova. Ku kuca ecopere ire niparu lembe ma wiye lero. Enyang’ nia kadok ubeyenyo nen nia kwo mi jumoko urombo de, re gimbe ku genogen. Ku paru maeno, enwang’u kwiyocwiny mir adunde man cwinye doko tek nia niketho timo ni Yehova i kabedo ma kwong’a i kwo uloyo zoo. E kumeno, enwang’u tego ma nyen m’emedere ko nitimo ni Yehova.—Zab. 73:23-28.

13. Icopo nwang’u kwiyocwiny mir adunde nenedi tek itie ku jiji iwi yub moko ma con? (Nen bende cal.)

¹³ In de icopo nwang’u kwiyocwiny mir adunde i Lembe pa Mungu. Nenedi? Por valer mi piny m’itie ko kawoni ma calu ve lonyo m’itie ko i polo, ku matoke m’ubekuro ju ceke ma gibijik kende kende ku piny ma gibenwang’u i ng’om maeni. Giromo jengiri zoo iwi tic mi cing’gi pilembe gimbe ku genogen acel de pi nindo m’ubino. Ento iri Yehova ung’olo mugisa dupa dit nisagu kadok i kadhiri m’icopo paru. (Zab. 145:16) Kepar bende pi lembe ma e: Nyo andha ing’eyo tap tap kite ma nwang’u kwo peri ucibedo ko ka nwang’u imaku yub m’ukoc ku m’imakune? Ento cwinyi bed tek nia ju ceke ma gitimo ng’iyong’ic m’ujengere iwi mer ma gimaru ko Mungu man dhanu wagi, gikoso ngo gin moko acel de ma ber.

NYO IBEPARU NIA KONY PERI MBE I WANG’ YEHOVA?

14. Jumoko giwinjiri nenedi, man penji ma kani ma romo sendo wigi?

¹⁴ Jutic pa Yehova moko oro migi, twoyo kunoke goro uketho giromo timo ngo lee i tic pa Mungu. Lembuno romo ketho giparu nia pigi tek ungo i wang’ Yehova. Giromo penjiri kadok kumae: ‘Nyo fodi asu kony para nuti i wang’ Yehova?’

15. Cwiny jagor Zaburi mi 71 ubino tek i kum lembang’o?

¹⁵ Jagor Zaburi mi 71 de ubino ku paru ma rom eno. Erwo i bang’ Yehova kumae: “Kud ikuna kinde ma tego para ubethum.” (Zab. 71:9, 18) Re kadok kumeno de, emedere nibedo ku tegocwiny ma nia tek etimo ni Yehova ku gwoko bedoleng’, ebitelo wiye man ebikonye. Enwang’u ponji ma nia anyong’a nego Yehova i kum ju ceke ma gibetimo ire ku kero migi zoo nimakere ku copo migi.—Zab. 37:23-25.

16. Ju m’utii gitie ku kony ma kani i wang’ Yehova? (Zaburi 92:12-15)

¹⁶ Tek idaru tii, neniri i kite ma Yehova neni ko. Ecopo konyi kara imediri nitimo ire kadok peko peri ubeceri nitimo lee. (Som Zaburi 92:12-15.) Kakare niketho wii i kum gin ma dong’ imbe ku copo mi timo, keth wii i kum gin m’icopo timo. Ku lapor, lapor peri man kite m’ibedieng’ ko ku jumange copo konyogi nicungo ma tek. Icopo koro kite ma Yehova utuc nikonyi ko pi oro ma dupa m’ukadhu man iweco iwi genogen ma tek m’itie ko iwi pong’o mi lembang’ola pare. Man kud icay tego ma rwo peri romo bedo ko iwi jumange. (1 Pet. 3:12) Kadok wabekadhu kud i lembang’o de, ng’atuman m’i kindwa utie ku piny moko kokoro m’ecopo miyo ni Yehova man ni jumange.

17. Pirang’o ukwayu ngo wabed waporara ku jumange?

¹⁷ Tek ibedieng’ pilembe ya ecopere ngo iri nitimo lee i tic pa Yehova, cwinyi bed tek nia ebeneno gin ceke m’itie ku copo mi timo ni gin ma pire tek. Saa moko iromo poy nia ibepimo gin m’ibetimo ku mi jumange. Ento kud itim kumeno nyanok de! Pirang’o? Pilembe Yehova de porowa ngo ku jumange. (Gal. 6:4) Ku lapor, Maria umiyo ni Yesu giramiya mi mo ma ng’wice ng’ar ma beine tek lee. (Yoh. 12:3-5) Dhato ma jacan ke ulund ubolo i hekalu sente mi tongolo ario ma tijgi nok magwei. (Luka 21:1-4) Re Yesu uneno nia giramiya migi unyutho nia gin ario ceke gibino ku yiyoyic ma lee. Andhandha, Yehova ma Won m’i polo de ubeneno gin ceke m’ibetimo ire nikum mer m’imare ko man yiyoyic m’itie ko i iye, eno ke kadok ibeparu nia tije mbe de.

18. Ang’o ma bikonyowa nikabu jiji ma n’i iwa? (Nen bende sanduku ma thiwiye tie, “Lembe pa Yehova copo konyi nikabu jiji ma n’i ii.”)

¹⁸ Saa moko wan ceke wabedo ku jiji i iwa. Ento calu ma waneno, Biblia ma Lembe pa Mungu copo konyowa nivoyo pidoic maeno. Pieno tim kero inyang’ cuu i lembe m’uberoyo jiji i ii, e ibinwang’u tegocwiny. Kud iwil nia Yehova ung’eyi cuu mandha. Anyong’a nege lee i kumi kan ebeno nia imaku yub mi timo lee i tic pare, man ebimiyo iri sukulia m’eng’olo. Cwinyi bed tek nia Yehova umaru jutic pare man edieng’ pigi ceke acel acel.